1, 2. a) ¿Shuj panica Isaías 41:10-ta yuyarishpaca ima shinataj sintirirca? b) ¿Diosca imamantataj cai versota Bibliapi quillcachishca?

PANI Yoshiko doctorpajman rijpimi paitaca: “Ancha ungushcami cangui, asha quillacunallatami causangui” nirca. Chaita uyashpaca pani Yoshikoca Isaías 41:10-pi (liyipai) ima nishcatami yuyarirca. Chai versota yuyarishpami Yaya Dios paita ayudanata tucui shunguhuan crirca. Chaimi doctormanca: “Jehová Diosmi ñucahuan, paimi ñucataca ayudanga, imata mana manchanichu” nirca. * Ñucanchijpish llaquicunahuan cashpaca Isaías 41:10-ta yuyarishpami animari tucunchij. Caita alli intindingapajca Jehová Dios imamanta Isaiasman cai versota quillcachishcata ricushun.

² Judiocunaca Babilonia llajtapimi prezupi shina causacurcacuna. Paicunaman animota cungapajmi Jehová Diosca cai shimicunata nirca. Pero Diosca paita tucui sirvijcuna cai versota yuyarishpa animota japichunmi Bibliapi quillcachishca (Isaías 40:8; Romanos 15:4). Llaqui punllacunapimi causacunchij. Chaimantami Isaías nishca shimicuna ñucanchijta animachichun minishtinchij (2 Timoteo 3:1).

3. a) ¿Isaías 41:10-pica Yaya Diosca imatataj rurasha nin? b) ¿Imamantataj Isaías nishca shimicuna pajtarichun munanchij?

³ Isaías 41:10-pi Yaya Dios imalla rurasha nishcata  yachashpami paipi ashtahuan confiashun. Chai versopica Jehová Diosca: ‘Canhuanmi casha. Cambaj Taita Diosmi cani. Cantaca ayudashami’ ninmi. ¿Imamantataj cai shimicuna pajtarichun munanchij? * Ñucanchijpish pani Yoshiko shinami achca llaquicunata charinchij. Huaquincunacarin gobiernocunamanta jarcaicunatapishmi charinchij.

4. a) ¿Diosca imatataj ñucanchijmanca nishca? (Notata ricui). b) ¿Jehová Diosca ima shinataj ñucanchijta cꞌuyashcataca ricuchin? c) ¿Yaya Dios canman cꞌuyaita ricuchishcamantaca ima shinataj sintiringui?

⁴ Jehová Diosca ama manchaichu, ñucaca canhuanmi cani ninmi. * Paica cꞌuyaj cashcamantami tucuipi ñucanchijta ayudan. Chaimantami: “Ñuca ñahuipica canca munananquimi cangui. Ñuca cꞌuyashcami cangui. Alli nishcami cangui” nin (Isaías 43:4). Yaya Dios ñucanchijta cꞌuyashpa catichunca pipish mana jarcai tucungachu. Paica ñucanchijtaca manataj saquingachu (Isaías 54:10). Jehová Dios ñucanchij amigo cashcamantami imatapish mana manchashun. Paica Abrahamta shinami ñucanchijtapish cuidanga. Abrahamtaca: “Ama manchaichu, cambaj escudoca ñucami cani” nircami (Génesis 15:1).

5, 6. a) ¿Jehová Dios ñucanchijta ayudasha nishcataca ima shinataj yachanchij? b) ¿Pani Yoshikomantaca imatataj yachai tucunchij?

⁵ Yaya Diosca ñucanchij llaquicunahuan cajpica ayudanatami munan. Chaimantami paica: “Yacuta chꞌimbacujpipish ñucami canhuan casha. Jatun yacucunata chꞌimbacushpapish, mana millpuringuichu. Nina jahuata pasashpapish, mana rupanguichu. Lunyacuj ninapish, canpica mana japiringachu” nin (Isaías 43:2). ¿Cai shimicunaca imatataj yachachin?

⁶ Jehová Diosca tucui ñucanchij llaquicunata anchuchinataca mana ninchu. Pero llaquicunahuan yacupi pambarishpa  aguaricuj shina o ninapi rupacuj shina catichunca mana saquingachu. Diosca llaquicunata ahuantachunmi ñucanchijta ayudasha nin. Huañuna cajpipish paimanta amataj caruyachunmi fuerzata cushpa ayudanga (Isaías 41:13). Pani Yoshikotaca Yaya Diosca chashnami ayudarca. Cai panipaj ushushica: “Ñuca mamitaca Yayitu Dios fuerzata cujpimi huañuna horaspish tranquila sintirirca. Paica huañungacamami Diospaj bendicioncunamanta doctorcunaman, enfermeracunaman huillarca” ninmi. ¿Pani Yoshikomantaca imatataj yachanchij? Dios ñucanchijcunahuan canata crishpaca llaquicunata ahuantangapajmi fuerza, animota charishun.

7, 8. a) ¿Jehová Diosca imallatataj ñucanchijmanca nishca? b) ¿Diosca judiocunataca imamantataj ama manchanguichij nirca? c) ¿Isaías 46:3, 4-pi nishca versocunaca ima shinataj judiocunataca animarca?

⁷ Yaya Diosca, ama sustarichu, ñucami cambaj Dios cani ninmi. Ama sustarichu nishca yuyaica hebreo shimipica “imata manchashpa ama tigra ricuichu” o “mancharishpa ama ura janajta ricuichu” nisha ninmi.

⁸ ¿Yaya Diosca imamantataj Babiloniapi caj judiocunataca cai shimicunahuan animarca? Judiocunaca 70 huatacunatami Babiloniapi prezu shina carcacuna. Diosca paicunata cacharichingapajmi Medopersia llajtamanta soldadocunata cachagrirca. Medopersa soldadocuna llaquichigrijta ricushpami Babiloniapi causajcunaca achcata mancharircacuna (Isaías 41:2-4). Babiloniocuna, shujtaj gentecunapish soldadocunata ama manchangapajmi caishuj chaishuj, ‘cꞌari cꞌari cashunchij’ nijcuna carca. Shinallataj paicunapaj dioscunami quishpichinga yuyashpami ashtahuan yanga dioscunata rurarcacuna (Isaías 41:5-7). Pero Jehová Diosca judiocunata animangapajmi: ‘Cancunaca ñucapajta rurajcunamari canguichij. Ñucami cancunapaj Taita Dios cani’ nirca (Isaías 41:8-10). ‘Ñucami cancunapaj Taita Dios cani’ nishpaca Jehová Diosca paita alli sirvij judiocunata mana cungarishcata, paipaj pueblo shina catij cashcatami ricuchirca. Shinallataj chai llaqui punllacunapi paicunata cuidanata, chai llajtamanta llujshichina cashcatami nicurca. Chai shimicunami judiocunataca achcata animashcanga (Isaías 46:3, 4-ta liyipai).

9, 10. ¿Imamantataj mana yalli sustarina canchij? Shuj ejemplomanta parlai.

⁹ Cunan punllacunapish cai mundopi yallitaj millai ruraicuna tiyashcamantami gentecunaca manchaihuan causancuna. Chaimi ñucanchijpish maipica sustarishca causanchij. Pero mana tanto sustarinachu canchij. ¿Imamanta? Jehovami ñucanchijtaca, ama sustarichu, “ñucami cambaj Taita Dios cani” nin. Cai shimicunami ñucanchijtaca achcata animan.

¹⁰ Cai ejemplopi yuyashun. Juanmi Brunohuan avionpi viajacun. Pero avionca ñapishmi manchanaita cuyuri callarin. Chaimi pilotoca pasajerocunataca: “Tucuicuna alli uyaichij, sinchi huaira chaupitami pasagrinchij. Cinturonta alli ajustarichij. Ama sustarichijchu, ima mana tucushunchu” nin. Pero Juanca  Bruno tranquilo cajta ricushpami “¿ima nishpataj tranquilo tiyacungui?” nishpa tapun. Brunoca: “Pilotoca ñuca yayami can. Paica avionta alli manejadormi can, ama sustarichu” nin.

11. ¿Juanpaj Brunopaj ejemplomantaca imatataj yachacunchij?

¹¹ Ñucanchijpish Bruno shinami tranquilo sintiri tucunchij. ¿Imamanta? Jehová Dios ima shina cashcatami alli rijsinchij. Cai tucuri punllacunapi llaquicunata ahuantangapaj Diosllataj ayudana cashcatapishmi crinchij (Isaías 35:4). Gentecunaca llaquicunamantami sustarishpa causacuncuna. Pero ñucanchijca Yaya Dios ayudanata crishcamantami mana tanto sustarinchij (Isaías 30:15). Chaimantami Bruno shina, gentecuna Jehová Diospi imamanta confiana cashcata huillanchij. Chashna huillajpimi shujtajcunapish llaquicunahuan cashpaca Diospi confiangacuna.

12. a) ¿Jehová Diosca imallatataj ñucanchijmanca nin? b) ¿Bibliapica Yaya Diospaj “rigra” nishpaca imatataj intindichin?

¹² Jehová Diosca: Ñucami canmanca fuerzata cusha, ñucami cantaca ayudasha ninmi. Isaiasca Yaya Dios ima shina judiocunata ayudanatami huillashca carca. Paica: ‘Mandaj Jatun Diosca tucuita rurai tucuj cashcahuanmi shamunga. Paipaj rigrahuanmi tucuita mandanga’ nircami (Isaías 40:10). Bibliapi rigramanta parlashpaca huaquinpica Diospaj podermantami parlacun. Chaimi Isaías nishca shimicunaca Jehová Dios achca poderta charishcata intindichin. Ñaupa punllacunapica Diosca paipaj poderhuanmi  paita sirvijcunataca cuidarca, ayudarca. Cunan punllacunapipish paipi shunguta churajcunataca chashnallatajmi cuidanga, ayudanga (Deuteronomio 1:30, 31; Isaías 43:10).

13. a) ¿Diosmanta huillachun jarcajpica imapitaj confiana canchij? b) ¿Isaías 54:17-pica imatataj yachachin?

¹³ Huaquin llajtacunapica Diosmanta ama huillachunmi jarcaicunata churancuna. Chashna jarcaicunata churajpipish Dios fuerzata cushpa ayudanapimi confiana canchij. Chashnami mana tanto sustarishun. Jehová Diosca: “Canta tucuchingapaj ashtahuan ima macanacunacunata rurajpipish, cantaca chaicunaca imata mana rurai tucungachu” ninmi (Isaías 54:17).

14. ¿Contracuna ñucanchijta llaquichijpica imamantataj mana mancharinchij?

¹⁴ Gentecuna ñucanchijta pꞌiñana cashcataca allimi intindinchij (Mateo 10:22). Jesusca paita catijcunataca, tucuri punllacunapica cancunataca dimastijmi llaquichinga nircami (Mateo 24:9; Juan 15:20). Isaías nishca shinaca gentecunaca ñucanchijta mana pꞌiñangallachu. Ashtahuanpish catirashpa llaquichishpa, tucui laya llullacunata nishpami llaquichingacuna (Mateo 5:11). Jehová Diosca gentecuna ñucanchijta llaquichichunca mana jarcangachu (Efesios 6:12; Apocalipsis 12:17). Pero contracuna chashna rurajpipish mana manchanachu canchij.

15, 16. a) ¿Imatataj yuyarina canchij? b) ¿Isaías 25:4 y 5-pica imatataj Diosmanta yachachin? c) ¿Ñucanchij contracuna ima shina tucurinatataj Isaías 41:11 y 12-pica huillan?

¹⁵ Yaya Dios ima nishcatami yuyarina canchij. Paica, cancunata llaquichisha nijcunapaj armacunaca imapaj mana valingachu ninmi. Shuj pataca sinchi huairatami jarcan. Jehová Diospish shuj pata shinami ñucanchijtaca llaquichijcunamanta quishpichin (Isaías 25:4, 5-ta  liyipai). Ñucanchijta pꞌiñajcunaca mana tucui vida llaquichicungallachu (Isaías 65:17).

¹⁶ Jehová Diosca ñucanchijta pꞌiñajcuna ima tucuna cashcata ricuchishpami paipi ashtahuan confiachun ayudan (Isaías 41:11, 12-ta liyipai). Ñucanchijta pꞌiñajcuna mashnata llaquichishun yuyashpa, tucuchishun yuyashpapish manataj valingacunachu. Paicunataca Yaya Diosmi libri tucuchinga. Ima mana cashca shinami chingaringacuna.

17, 18. a) ¿Bibliata liyishpaca imamantataj Jehovapi ashtahuan confiashun? b) ¿2019 huatapaj versopica imamantataj cutin cutin yuyana canchij?

¹⁷ Yaya Diosta alli rijsishpami paipi ashtahuan confiashun. Chaipajca Bibliatami liyina canchij, imata liyishcapipish allimi yuyana canchij. Bibliapimi ñaupa punllacunapi Jehová paita sirvijcunata ima shina cuidashcata yachachin. Chaimantami cunan punllacunapish pai ñucanchijta cuidanataca crinchij.

¹⁸ Profeta Isaiasca Jehová Dios ñucanchijta alli cuidaj cashcata ricuchingapajmi ovejacunata michijhuan chꞌimbapurarca. Paica: ‘Ovejacunata michij shinami, ovejacunataca paipaj rigrapi apanga’ nircami (Isaías 40:11). Yaya Dios cai michij shina ñucanchijtapish cuidana cashcata yachashpami tranquilo sintirinchij. Llaquicunamanta ama yallitaj sustarichunmi Cuerpo Gobernantepi caj huauquicunaca Isaías 41:10 cai huatapaj verso cachun agllashca. Chaipica: “Ama sustarichu, ñucami cambaj Dios cani” ninmi. Cai shimicunapi cutin cutin yuyashunchij. Shinami llaqui punllacuna shamugrijpipish Jehová Diospi confiashpa achca fuerzata charishun.