1, 2. a) ¿Jesusca imamantataj pai huañushcata yuyarina tandanacuitapish jahualla rurachun yachachirca? b) ¿Jesusmantaca imallatataj yachashun?

JESÚS huañushcata yuyaringapaj tandanacuipica ¿imallatataj ruranchij? Cai tandanacuita ruranaca mana sinchichu can. Pero, huaquincunaca: “Jesús huañushcata yuyarina importante cajpica ¿imamantataj uchilla tandanacuitaca rurancuna?” nishpachari yuyanga.

² Jesús cai Allpapi cashpaca jahualla shimicunahuanmi sumajta yachachij carca (Mateo 7:28, 29). Pai huañushcata yuyarina tandanacuita ruranapish jahualla cachunmi yachachirca * (urapi tiyaj notata ricui). Cunanca chai tandanacuipi Jesús ima nishcata, imata rurashcata ashtahuan yachashunchij. Shinami pai humilde, mana manchaj, cꞌuyaj cashcata ashtahuan intindishun. Jesús shina cangapaj imata rurana cashcatapishmi yachashun.

3. a) ¿Mateo 26:26-28-ta liyishpaca imamantataj “Jesusca shuj uchilla micuillatami rurarca” ninchij? b) ¿Levadura illaj tandapish, vinopish imatataj ricuchin?

³ Jesusca paita catij 11 alli apostolcunapaj ñaupajpimi pai huañushcata yuyarina tandanacuita ruranata callarichirca. Chai tandanacuipica Jesusca levadura illaj tandata, Pascua fiestapi sobrashca vinollatami utilizarca. (Mateo 26:26-28-ta liyipai). Chashna uchilla micuita rurajpica apostolcunaca  mana mancharishcacunachu canga. Qꞌuipaca apostolcunamanca, tandaca ñuca jucha illaj cuerpota, vinoca ñuca jichana yahuartami ricuchin nircami.

4. a) ¿Jesusca ima consejotataj Martamanca curca? b) ¿Martaman cushca consejotaca ima shinataj Jesusllataj pajtachirca?

⁴ Shuj punllaca Jesusca paipaj amigo Lázaro, Marta, Mariata visitanamanmi rirca. Chaipi ima tucushcata ricushun. Jesús paicunahuan cashpaca Diosmantami yachachi callarirca. Pero Martaca Jesuspaj shuj alli micuita rurashpami ocupada carca. Chaimi Jesusca, Marta uchilla micuillata ruranami alli can nishpa cꞌuyaihuan aconsejarca (Lucas 10:40-42). Pai huañunapaj ashalla horascuna faltajpimi Jesusca Martaman cushca consejota pajtachirca. ¿Ima shina? Uchilla micuita rurashpami pai huañushcata yuyarichun mandarca. ¿Jesuspaj ejemplomantaca imatataj yachai tucunchij?

5. a) ¿Jesús huañushcata yuyarina tandanacuica imatataj Jesusmanta yachachin? b) ¿Filipenses 2:5-8 versocunapish imatataj Jesusmanta yachachin?

⁵ Jesusca tucuipimi humilde cashcata ricuchirca. Huañunapaj huaquin horascuna ñaupapish mana jatun tucushca cashcatami ricuchirca (Mateo 11:29). Por ejemplo, paica tucuimanta yallica shuj sacrificiotami ruragrirca. Shinallataj pai huañujpica Jehová Diosmi causachishpa jahua pachapi Rey cachun churagrirca. Chaita yachashpapish mana shuj jatun micuita rurashpa jatun tucushcata sintircachu. Ashtahuanpish paita catijcunataca cada huata shuj uchilla micuillata rurashpa pai huañushcata yuyarichunmi mandarca (Juan 13:15; 1 Corintios 11:23-25). Ñucanchij Rey Jesucristo humilde cashcata yachashpami achcata cushicunchij. Filipenses 2:5-8 Traducción del Nuevo Mundo Bibliapica: “Jesucristopi tiyashca yuyai shinallataj cancunapipish chai yuyai tiyachun. [...] Paica tucuita saquishpami sirvij shina tucurca. Runacuna shinami tucurca. Runa shinallataj tucushpami, paillataj mana jatun tucurca. Huañungacamami Diosta cazushpa, caspipi huarcushca huañurca”.

6. ¿Llaquicunata charishpapish ima shinataj Jesús shina humildes cai tucunchij?

⁶ Shujtajcunamanta preocuparishpami Jesús laya humildes cashcata ricuchishun (Filipenses 2:3, 4). Jesusca llaquinaita huañunata yachashpapish paita catijcunamantami achcata preocuparirca. Chaimi último tutaca  paicunata yachachishpa, animashpa pasarca (Juan 14:25-31). Chashnami Jesusca paillapi yuyanapaj randica shujtajcunamanta preocuparishcata ricuchirca. Ñucanchijpish chai alli ejemplotami cati tucunchij.

7. ¿Jesusca pai huañushcata yuyarichun nishca qꞌuipaca ima shinataj mana manchaj cashcata ricuchirca?

⁷ Jesusca pai huañushcata yuyarishpa ruracunguichijlla nishca qꞌuipaca mana manchaj cashcatami ricuchirca. Paita yangamanta juchachishpa, cꞌamishpa pinganaita huañuchinata yachashpapish, Yaya Diospaj munaitami rurasha nirca (Mateo 26:65, 66; Lucas 22:41, 42). Jesusca cashcata rurashpami Jehová Diospaj shutita jatunyachirca. Dioslla mandana derechota charishcatapishmi difindirca. Gentecuna juchamanta arrepintirishpa huiñai causaita charichunpishmi ayudarca. Shinallataj Jesusca paita catijcuna ima shina llaquicunata chꞌimbapurachunmi alli yachachirca.

8. a) ¿Jesusca paipaj apostolcunamanca imatataj yachachirca? b)  Jesús huañushca qꞌuipaca paita catijcunaca ¿ima shinataj mana manchaj cashcata ricuchircacuna?

⁸ Jesusca paillapi yuyashpa manchaihuan canapaj randica apostolcunata ima shina ayudanatami ricurca. Judas Iscarioteta llujchishca qꞌuipaca shuj uchilla micuitami rurarca. Chai micuita yuyarishpami ungidocunaca Jesús paipaj causaita cushcamanta, mushuj ari ninacuita paicunahuan rurashcamanta beneficiarishcacuna (1 Corintios 10:16, 17). Jesusca Dios imata rurachun munashcatami paipaj apostolcunamanca yachachirca (Juan 15:12-15). Shinallataj paita caticushcamanta gentecuna llaquichina cashcatapishmi huillarca. Pero ima problemacuna ricurijpipish pai laya mana manchaj cachunmi animarca (Juan 16:1-4a, 33).  Chaimi achca huatacuna qꞌuipapish Jesusta catijcunaca paipaj ejemplota catishpa mana manchaj cashcata ricuchircacuna. Llaquicuna ricurijpipish caishuj chaishujmi ayudarijcuna carca (Hebreos 10:33, 34).

9. ¿Jesús shina mana manchaj cangapajca imatataj rurana canchij?

⁹ Cunan punllacunapish Jesús shinami mana manchaj cashcata ricuchinchij. Maijan huauqui panicunataca paicunapaj crishcacunamantami catirashpa llaquichishcacuna. Huaquincunataca yangamantami carcelpi churashcacuna. Cashna cajpica paicunata ayudangapajmi tucui pudishcata rurana canchij. Por ejemplo, paicunamantaca Diostami mañana canchij. Shinallataj autoridadcunapaj ñaupajpipish ñucanchij crishcacunata difindingapajmi esforzarina canchij (Filipenses 1:14; Hebreos 13:19). Shinallataj mana manchaj cashcata ricuchingapajca huillanatami mana saquina canchij (Hechos 14:3). Contracuna jarcaicunata churajpipish Jesús layallatajmi Diosmanta huillanataca manataj saquishun. Pero manchaita saquinaca mana jahuallachu can. ¿Chaipica imatataj rurana canchij?

10. a) ¿Jesús huañushcata yuyarina asha semanacuna faltajpica imatataj rurana canchij? b) ¿Imamantataj chashna rurana canchij?

¹⁰ Mana manchaj cangapajca Jesús paipaj causaita cushcamanta huiñai causaita charinapimi yuyana canchij (Juan 3:16; Efesios 1:7). Jesús huañushcata agradicingapajca asha semanacuna faltajpirajmi pai imamanta huañushcata cutin cutin yuyarina canchij. Shinallataj chai semanapaj versocunatami liyina canchij. Chashnami Jesús huañushcata yuyarina tandanacuipica tandapish, vinopish imata ricuchishcata alli intindishun. Yaya Diospish Jesuspish ñucanchijpaj imallata rurashcata yachashpaca ñucanchij  crishcacunami ashtahuan sinchiyanga. Jatun llaqui punllacunapipish mana manchashpami ahuantashpa catishun (Hebreos 12:3).

11, 12. ¿Cunancamaca imatataj yachashcanchij?

¹¹ Jesús huañushcata yuyarina tandanacuica Jesús humilde cashcata, mana manchaj cashcatami ricuchin. Chaimantami Jesustaca achcata agradecinchij. Paimantami Diospajman cꞌuchuyashpa quishpiri tucunchij (Hebreos 7:24, 25). Jesús ñucanchijmanta paipaj causaita cushcata agradicingapajca pai huañushcata yuyarina tandanacuitami cada huata rurana canchij (Lucas 22:19, 20). Cada huatami 14 de nisán ima punllapi urmashcata ricushpa, chai punlla Jesús huañushcata yuyarina tandanacuita rurana canchij.

¹² Cai tandanacuica Jesús cꞌuyaj cashcatapishmi ricuchin. Cai Allpapi cashpaca Jesusca achca cꞌuyaitami tucuicunaman ricuchirca. Caimanta ashtahuan yachashun.

13. a) ¿Juan 15:9; 1 Juan 4:8-10 versocunaca ima shinataj Jehová Diospish Jesuspish cꞌuyaita charishcata ricuchin? b) ¿Jehová Diospaj, Jesuspaj cꞌuyaimantaca picunallataj beneficiarin?

¹³ Jesusca tucuipimi Yaya Dios shina cꞌuyaj cashcata ricuchirca (Juan 15:9; 1 Juan 4:8-10-ta liyipai). Paica achcata cꞌuyashcamantami ñucanchijmanta paipaj causaita curca. Jehová Diospish Jesuspish cꞌuyaita ricuchishcamantami jahua pachapi causagrijcunapish, cai Allpapi causagrijcunapish beneficiarinchij (Juan 10:16; 1 Juan 2:2). Cunanca Jesús shuj uchilla micuita rurashpa paita catijcunaman cꞌuyaj, llaquij cashcata ima shina ricuchishcata yachashun.

14. ¿Jesusca ima shinataj paita catijcunata cꞌuyashcata ricuchishca?

¹⁴ Jesusca jahua pachapi causagrijcunataca mana nircachu shuj jatun micuita rurashpa pai huañushcata yuyarichun nishpa. Chaipaj randica shuj uchilla micuillatami rurachun nirca. Chashnami paicunata cꞌuyashcata ricuchirca. Cai tucui huatacunatami Jesús huañushcata yuyarina tandanacuita ruranaca maipica mana jahualla cashca. Shinapish ¿Jesús mandashcata pajtachi tucushcanchijchu? Ari. Por ejemplo, maijancunaca cárcel ucupimi chai tandanacuita rurashcacuna (Apocalipsis 2:10).

15, 16. ¿Jarcaicuna tiyajpipish maijancunaca ima shinataj Jesús huañushcata yuyarina tandanacuita rurashcacuna?

¹⁵ Diosta alli sirvijcunaca Jesús huañushcata cada huata yuyaringapajmi tucui pudishcata rurancuna. Huaquinpica jarcaicuna tiyashcamantami mana jahualla can. Shinapish Jesús imallata rurachun nishcatami alli pajtachinata munancuna. Por ejemplo, Harold King huauquimanta parlashun. Paica China llajta carcelpimi carca. Chaipi cashpa shujtajcunahuan mana parlai pudishpapish Jesús huañushcata ima shina yuyarinatami alli ricuj carca. Tandata, vinotapish ima charishcallahuanmi ruraj carca. Chai tandanacui ima fechapi urmashcatapishmi calculaj carca. Ña punlla chayajpica paillami Yaya Diosta mañashpa, cantashpa, shuj discursota cushpa Jesús huañushcata yuyarij carca.

¹⁶ Shujtaj experienciamanta yachashun. Segunda Guerra Mundial punllacunapipish shuj grupo panicunami campo de concentracionpi prezu carcacuna. Paicunaca huañunata mana manchashpami Jesús huañushcata yuyarina tandanacuita rurarcacuna. Chai tandanacui uchilla cashcamantami pacalla rurai pudircacuna. Paicunaca: “Uchilla mesapimi shuj yuraj mantelta churarcanchij.  Chaipimi tandata, vinota churashpa muyundijta shayarircanchij. Shujtajcuna ñucanchijta ricunamantami luzta japichinapaj randica shuj velallata japichircanchij. Jehová Diostaca, ‘cambaj shutita jatunyachingapajmi tucui ñucanchij fuerzahuan canllata sirvishun’ nircanchij” nincunami. Cai panicunaca sinchi feta charishcatami ricuchircacuna. Maipi cashpa, jarcaicuna tiyajpipish Jesús huañushcata yuyarina tandanacuita rurai pudishcamantami Jesús ñucanchijta cꞌuyashcata yachanchij.

17. ¿Ima tapuicunapitaj yuyana canchij?

¹⁷ Jesús huañushcata yuyarina tandanacui punlla manaraj chayajpi cai tapuicunapi yuyashunchij: “¿Ima shinataj Jesús shina shujtajcunaman cꞌuyaita ricuchi tucuni? ¿Ñucallapi yuyanapaj randica huauqui panicuna imata minishtishcapichu yuyani? ¿Imapipish ama pandarichunchu shuyani?”. Jesuspaj ejemplota catishpaca shujtajcunata llaquij cashcatami ricuchishun (1 Pedro 3:8).

18, 19. a) ¿Jesús huañushcata yuyarina tandanacuita ruranata saquishpapish imatataj yuyarishun? b) ¿Imata rurangapajtaj esforzarina canchij?

¹⁸ Jesús huañushcata yuyarina tandanacuita ruranataca ñallami saquishun. Jatun llaqui punllacunapi ‘shamushpami’ Jesusca paipaj “agllashcacunataca” jahua pachaman pushanga. Chai punllamantami Jesús huañushcata yuyarina tandanacuitaca ña mana ashtahuan rurashun (1 Corintios 11:26; Mateo 24:31).

¹⁹ Jesús huañushcata yuyarina tandanacuita ruranata saquishpapish alaja cashcatami yuyarishun. Cai tandanacuimi Jesús humilde cashcata, mana manchaj cashcata, gentecunata achcata cꞌuyaj cashcata ricuchishca. Paraíso Allpapi causajcunaca cai tandanacui ima shina cashcata yachashpami achcata beneficiaringacuna. Pero cunan punllacunapi beneficiaringapajca Jesús shinami humilde, mana manchaj, cꞌuyaj cangapaj esforzarina canchij. Chashna rurajpimi Yaya Diospish ñucanchijtaca bendicianga (2 Pedro 1:10, 11).