1. ¿Jehová Diosca tucuri punllacunapi ima tucunatataj huillarca?

JEHOVÁ DIOSCA tucuri punllacunapi ima tucunata parlashpami cashna nirca: ‘Tucui llajtacunamanta chꞌican chꞌican rimaita rimaj chunga runacunami Judá llajtapi causaj runapaj churanapi charirashpa: Dios cancunahuan cajtami uyashcanchij. Ñucanchijpish cancunahuan rishun nipanchijmi ningacuna’ nircami (Zacarías 8:23, NM ). Judá llajtapi causaj runaca Dios paipaj espíritu santohuan jahua pachapi causachun agllashcacunatami ricuchin. Bibliapica paicunataca Diospaj israelcuna ninmi (Gálatas 6:16). Cutin chunga runacunaca cai Allpapi huiñaita causagrijcunatami ricuchin. Paicunaca jahua pachapi causagrijcunata Dios agllashcatami intindincuna. Chaimantami agllashcacunahuan tandalla Diosta sirvicuncuna.

2. ¿Paraíso Allpapi causagrijcunaca agllashcacunahuanmi risha ninchij nishpaca imatataj ricuchin?

² Bibliapica chunga runacunaca Judá llajtapi causaj runapaj churanapi charirashpami: ‘Dios cancunahuan cajtami uyashcanchij. Ñucanchijpish cancunahuanmi rishun nipanchij’ ningacuna ninmi. Cancunahuanmi risha ninchij nishpaca Judá llajtapi causaj runaca mana shujlla cashcatachu ricuchin. Ashtahuanpish muyundij Allpamanta Dios agllashcacunatami ricuchin. Jesushuan mandanaman rigrij agllashcacunapaj shuticunataca mana tucuita yachanchijchu. * Shinapish cai Allpapi causagrijcunaca paicunahuanmi ri tucuncuna. ¿Caica imatataj ricuchin? Paraíso Allpapi causagrijcunapish,  jahua pachapi causangapaj agllashcacunapish Yayitu Diosta tandalla sirvicushcatami ricuchin. Shinallataj cai Allpapi causagrijcunaca jahua pachaman rigrijcunataca mana mandajcunata shinachu ricuncuna. Ashtahuanpish Jesuslla mandaj cashcatami intindincuna (Mateo 23:10, NM ).

3. ¿Cai yachaipica ima tapuicunatataj yachashun?

³ Cunan tiempopica jahua pachaman rigrijcunamantaca huaquincunallami cai Allpapi causacuncuna. Chaimantachari cashna nishpa tapurinchij. ¿Jahua pachaman rigrijcunaca ima shinataj cana can? ¿Jesús huañushcata yuyarina tandanacuipi vinota ubyajcunata, tandata micujcunataca ima shinataj tratana canchij? ¿Tandata micujcuna, vinota ubyajcuna mirarishpa catijpica preocuparinachu canchij? Cai yachaipimi cai tapuicunamanta yachashun.

4. ¿Agllashcacunaca 1 Corintios 11:27 al 29-pi nishcacunataca imamantataj yuyaipi charina can?

⁴ (1 Corintios 11:27-29-ta liyipai). Cai versocunapica agllashcacunaca mana alli shunguhuanmi tandata micun, vinota ubyan nishpaca ¿imatataj nisha nin? Dios mandashcacunata mana cazushpami paicunaca yangamanta tandata micucuncuna,  vinota ubyacuncuna nisha ninmi (Hebreos 6:4-6). Jesushuan mandasha nishpaca agllashcacunaca Jehová Diostami tucuipi cazuna can (Filipenses 3:13-16).

5. ¿Agllashcacunaca imatataj mana yuyancuna?

⁵ Jehová Diospaj espíritu santohuan agllashcacunaca mana jatun tucuncunachu (Efesios 4:1-3; Colosenses 3:10, 12). Chaimantami paicunaca shujtajcunata yalli cashcataca mana yuyancuna. Shinallataj Jehová Diospish shujtajcunaman yallimi espíritu santota cunga nishpaca mana yuyancunachu. Agllashcacunaca shujtajcunatapish yallimi Bibliata intindinchij nishpaca mana yuyancunachu. Shujtajcunatapish ‘canca Dios agllashcami cangui, Jesús huañushcata yuyarina tandanacuipica tandata micunami cangui, vinota ubyanami cangui’ nishpapish mana nincunachu. Chaipaj randica Jehová Dioslla jahua pachapi causachun agllana cashcatami alli intindincuna. Chashnami humildes cashcata ricuchincuna.

6. 1 Corintios 4:7, 8-pi nishca shinaca ¿agllashcacunaca ima shinataj cana can?

⁶ Dios agllashcacunaca jahua pachaman rina shuj alaja bendición cajpipish shujtajcuna paicunata jatunyachichunca mana munancunachu (Filipenses 2:2, 3). Jahua pachaman rina cashcataca Jehová Diosca agllashcacunallamanmi huillashca. Chaimantami jahua pachaman rigrijcunaca paicunata Dios agllashcata shujtajcuna mana crijpica mana llaquirincuna. Bibliapi nishca shinaca shujtajcuna imata nijpica mana chai rato crinachu canchij (Apocalipsis 2:2). Shinallataj Dios agllashcacunaca shujtajcuna paicunata alli tratachunca mana shuyancunachu. Pihuanpish tupashcahuanca Dios agllashcami cani nishpaca mana huillancunachu (1 Corintios 4:7, 8-ta liyipai).

7. ¿Dios agllashcacunaca imatataj mana rurancuna?

⁷ Jehová Diospaj espíritu santota chasquijcunaca tucuicunahuanmi tandalla, sumajta causancuna (Romanos 16:17, 18). Chaimantami agllashcacunaca mana paicunapuralla apanacuncuna. Shinallataj paicunapuralla Bibliamanta yachangapajpish, Dios ima shina paicunata agllashcata parlangapajpish mana tandanacuncunachu (Gálatas 1:15-17). Chashna rurashpaca huauqui panicunatami chꞌicanyachingacuna.

8. ¿Dios agllashcacuna shujtajcunata yalli cashcataca imamantataj mana yuyana canchij? Notata ricui.

⁸ Jesushuan mandachun agllashcacunaca shujtajcunata yallimi can nishpaca mana yuyanachu  canchij (Mateo 23:8-12). Pushaj huauquicunamanta parlashpaca Bibliapica: “Paicuna crishpa ima shina caticushca shina cancunapish catichij” ninmi. Pero chaica mana nisha ninchu runacunata catina cashcata (Hebreos 13:7). Shinallataj Bibliapica pushaj ancianocunaca ishquiman cuna cashcata japichun ninmi. Pero mana paicunata jahua pachapi causachun agllashcamanta. Ashtahuanpish alli michij, alli trabajaj, alli yachachij cashcamantami paicunata valorana canchij (1 Timoteo 5:17). Agllashcacunata dimastij jatunyachijpica paicunaca mana alli * sintiringacunachu. Mana cashpaca jatun tucushcachari sintiringacuna (Romanos 12:3). Chaimanta agllashcacunata ama pandachingapaj esforzarishunchij (Lucas 17:2).

9. ¿Dios agllashcacunata respetashcataca ima shinataj ricuchinchij?

⁹ ¿Dios agllashcacunata respetashcataca ima shinataj ricuchinchij? Paicunataca Yayitu Dios ima shina agllashcataca mana tapunachu canchij (1 Tesalonicenses 4:11; 2 Tesalonicenses 3:11). Shinallataj familia ucumanta shuj agllashca cajpica tucui chai familiapish agllashcami canga nishpaca mana yuyanachu canchij. Diosta sirvijcunaca agllashca canataca mana paicunapaj familiamantachu chasquincuna. Ashtahuanpish Diosmantami chasquincuna (1 Tesalonicenses 2:12). Paicunamanca llaquichij shimicunahuanca mana parlanachu canchij. Por ejemplo, agllashcapaj huarmitaca canca cusa illaj cashpaca paraíso Allpapica ¿ima shinashi causangui? nishpaca mana tapunachu canchij. Ima shina cashpapish Jehová Diosca paraíso Allpapi tucuicuna cushilla causachunmi ayudanga (Salmo 145:16).

10. ¿Imamantataj agllashcacunataca manataj jatunyachina canchij?

¹⁰ Bibliapica jahua pachaman ringapaj agllashcacuna mana allita rurashpaca Diosmantami caruyai tucun ninmi (Mateo 25:10-12; 2 Pedro 2:20, 21). Chaimantami runacunataca manataj catina canchij. Agllashcacuna rijsishca cajpipish, achca huatacunata Diosta sirvicujpipish paicunataca manataj jatunyachinachu canchij (Judas 16). Chashnami agllashcacuna Yayitu Diosta sirvinata saquijpipish, congregacionmanta caruyajpipish ñucanchijca Diosta sirvinataca manataj saquishun.

11. ¿Tandata micujcunahuan, vinota ubyajcunahuanca imataj tucushca?

¹¹ Achca huatacuna huashaca Jesús huañushcata yuyarina tandanacuipica tandata micujcuna, vinota ubyajcunaca huatan huatanmi menorashpa catircacuna. Pero cai huatacunaca tandata micujcuna, vinota ubyajcunaca mirarishpami catincuna. ¿Caita yachashpaca mancharinachu canchij? Mana. Caita alli intindingapajca huaquin yuyaicunata ricushun.

12. ¿Tandata micujcuna, vinota ubyajcuna mirarishpa catijpipish imamantataj mana preocuparina canchij?

¹² “Jehová Diosca paipaj cajcunataca allimi rijsin” (2 Timoteo 2:19, NM ). Jesús huañushcata yuyarina tandanacuipi tandata micujcunata, vinota ubyajcunataca tucuicunatami yupancuna. Shinapish yupaj huauquicunaca yupashcacunapuramanta picunata Dios agllashcataca mana  yachancunachu. Maijancunaca tandata micujcuna cashpapish, vinota ubyajcuna cashpapish chaita ruranatami saquishcacuna. Shujtajcunaca umapi ima ungüita charishcamantami Jesushuan jahua pachapi mandana cashcata yuyancuna. Chaimantami mashna agllashcacuna cai Allpapi causacushcataca mana yachai tucunchij.

13. ¿Bibliapica jatun llaqui punlla callarinapaj mashna agllashcacuna tiyana cashcata huillanchu?

¹³ Dios agllashcacunata Jesús pushanaman shamujpica muyundij Allpapimi agllashcacuna tiyanga (Mateo 24:31). Bibliapica tucuri punllacunapica cai Allpapica ashalla agllashcacunami tiyanga ninmi (Apocalipsis 12:17). Pero jatun llaqui punlla callarinapaj mashnacuna tiyana cashcataca mana huillanchu.

14. Romanos 9:11, 16-pi nishca shinaca ¿agllashcacunamantaca imatataj yachanchij?

¹⁴ Jesushuan mandagrijcunataca Jehová Diosmi ima hora agllanata yachan (Romanos 8:28-30). Jesús causarishca huashami Jehová Diosca jahua pachapi mandagrijcunataca agllai callarirca. Apostolcunapaj punllacunapica Jesusta catijcunaca tucuicunami Dios agllashcacuna carca. Pero apostolcuna huañushca huashaca achcacunami jahua ricuillapi Diosta sirvijcuna shina causarcacuna. Chaimantami Yaya Diosca chai huatacunapica ashalla alli sirvijcunata agllarca. Jesús nishca shinaca cai agllashcacunaca trigo shinami carcacuna. Paicunaca mana alli qꞌuihua chaupipi huiñacuj layami carcacuna (Mateo 13:24-30). Cai tucuri punllacunapipish Jehová Diosca 144  milcunata completangacamami huaquincunataca agllashpa caticun. * Jatun llaqui punlla manaraj callarijpi Jehová Dios huaquincunata Jesushuan mandagrichun agllajpica mana mancharinachu canchij (Romanos 9:11, 16-ta liyipai). * Ñucanchijpish Jesús ima nishcatami yuyarina canchij. Dueñoca achcata trabajajcunamanpish, ashallata trabajajcunamanpish igualtami pagarca. Chaimi achcata trabajajcunaca quejari callarircacuna nircami. Ñucanchijpish chai quejarijcuna shinaca mana casha ninchijchu (Mateo 20:8-15).

15. ¿Jahua pachapi mandagrijcunaca imamantataj mana tucuicuna alli cazuj alli yuyayuj huauquicunapuramanta can?

¹⁵ Jahua pachapi mandagrijcunaca mana tucuicunachu alli cazuj alli yuyaiyuj huauquicunapurapi sirvin (Mateo 24:45-47-ta liyipai). Apostolcuna causashca punllacunapica ashalla agllashca huauquicunamanmi Diosca mushuj testamentota quillcachun mingarca. Shinallatajmi cunan punllapish Jehová Diosca ñucanchijman yachachichunca ashalla agllashca huauquicunaman mingashca.

16. ¿Cai yachaipica imatataj yachashcanchij?

¹⁶ Imallata yachashcata yuyarishunchij. Jehová Diosca achca huauqui panicunamanmi cai Allpapi huiñai causaita cusha nin. Shinallataj jahua pachapi Jesushuan mandachunca ashacunallatami agllashca. Jehová Diosca, 10 runacunapuramanta cashpapish o Judá llajtamanta runacunapuramanta cashpapish, tucuicuna pai mandashcacunata cazuchunmi munan. Chaimantami mana jatun tucushpa tandalla Diosta sirvina canchij. Tucuri punllacuna quichquiyamucujta yachashpacarin shuj shinallami Jesusta catina canchij (Juan 10:16).