1. ¿Davidca ima jarcaicunahuantaj chꞌimbapurarca?

 DAVIDCA mandaj Saúl paita huañuchisha nijpimi miticunaman rirca. Paica yaricachishpaca Nob llajtapimi paiman 5 tandata cuchun mañarca (1 Samuel 21:1, 3). Qꞌuipaca paipish, paipaj runacunapish jatun jutcupi miticunamanmi rircacuna (1 Samuel 22:1). ¿Davidca imamantataj chashna miticushpa puricurca?

2. 1 Samuel 23:16, 17-pi nishca shinaca ¿Saulca ima mana alli cosascunatataj rurarca?

² Davidca achca macanacuita mishashpami rijsishca carca. Chaimi mandaj Saulca paitaca achcata envidiarca. Shinallataj Saulca mana cazushcamanta Dios paita mandanata quichunatami alli yacharca. Davidta israelitacunata mandachun agllashcatapishmi yacharca (1 Samuel 23:16, 17-ta liyipai). Pero mandaj Saulca achca soldadocunata charishcamanta, soldadocuna paita apoyashcamantami Israel llajtata mandashpa caticurca. Chaimantami Davidca paipaj causaita quishpichingapaj miticushpa rirca. Bibliapica David mandaj cachun Saúl jarcasha nishcataca mana huillanchu (Isaías 55:11). Pero chashna rurasha nishpaca Diospaj contrami tucunman carca. Jehová Diostaca mana pi mishai tucuncunachu.

3. ¿Davidca sinchi pruebacunahuan chꞌimbapuracushpaca imatataj mana rurarca?

³ Davidca humilde runami carca. Davidca israelitacunata mandaj canataca mana paillataj agllarcachu. Ashtahuanpish Jehová Diosmi paitaca agllarca (1 Samuel 16:1, 12, 13). Chaimi Saulca paitaca achcata pꞌiñarca. Pero Davidca pai sinchi llaquicunata chꞌimbapuracushpaca Jehová Diostaca mana culparcachu. Shinallataj micunata mana tanto charishcamanta, jutcucunapi miticushpa puricushcamantapish mana quejarircachu. Ashtahuancarin Davidca  jatun jutcucunapi miticucushpami Salmo 34-pi tiyaj sumaj cantotaca quillcashcanga. Chaipica: ‘Diosta mashcajcunaca ima illajpish mana puringacunachu’ ninmi. Cai yachaitaca cai versomantami japishcanchij (Salmo 34:10).

4. ¿Cai yachaipica ima valishca tapuicunatataj yachashun?

⁴ Cunan punllacunapica Jehová Diosta sirvijcunaca micunacunata, minishtirishca cosascunataca achcacunami mana tanto charincuna. * Ashtahuancarin pandemia tiyashcamantami minishtirishca cosascunata charinaca sinchi cashca. Jatun llaqui punlla cꞌuchuyamucujpicarin causaica mana jahuallachu canga (Mateo 24:21). Chaimanta cai yachaipica cai chuscu tapuicunatami yachashun: ¿Davidca “ima illajpish” mana purircachu nishpaca imatataj nisha nin?, ¿imamantataj ñucanchijca minishtirishca cosascunallahuan cushilla causana canchij?, ¿imamantataj Jehová Dios ñucanchijta cuidanataca manataj cungarina canchij?, ¿imamantataj shamuj punllacunapajca cunanmanta allichirina canchij?

5, 6. Salmo 23:1-6-pi ricushca shinaca ¿Diosta sirvijcunaca “ima illajpish” mana puringachu nishcaca imatataj nisha nin?

⁵ ¿Davidca imamantataj Jehová Diosta sirvijcunaca “ima illajpish” mana puringacunachu nirca? Caita alli intindingapajca Salmo 23-ta yachashunchij. Chai Salmopica Salmo 34:10-pi tiyaj shimicuna layami tiyan (Salmo 23:1-6-ta liyipai). Davidca: “Mandaj Diosca ñucata michijmi, ñucapajca ima mana illangachu” nishpami callarirca. Qꞌuipaca Jehová Diosta sirvijcuna bendicioncunata chasquishcata, Diospish paicunata pushashcatami parlarca. Chashna cajpipish Davidca paipaj causaipi problemacuna tiyanatami yacharca. Chaimantami paica maipica desanimarishca, amsa pugru pambata puricushca shina cashcanga. Contracunatapishmi charirca. Pero Jehová Dios paita michij cashcataca allimi yacharca. Chaimi Davidca: “Ima llaqui japinata mana manchashachu” nirca.

 ⁶ ¿Davidca imamantataj “ima illajpish” mana purirca? Paica cushilla sintiringapaj achca cosascunata mana minishtishcatami intindirca. Ashtahuanpish Jehová Dios ima cushcacunallahuan cushilla sintirinatami yacharca. Ashtahuancarin Davidpajca Jehová Diospaj bendicionta charina, pai cuidacushcata yachanami importante carca.

7. Lucas 21:20 al 24-pi nishca shinaca ¿Judeapi causaj Jesusta catijcunaca imacunahuantaj chꞌimbapurarcacuna?

⁷ ¿David nishca shimicunamantaca imatataj yachanchij? Maipica ima cosascunata charinaca allimi can. Pero chai cosascunata ñucanchij causaipi punta lugarpi churanami mana alli can. Apostolcunapaj tiempopica Judeapi causaj Jesuspaj discipulocunaca cai shimicunatami alli yachaj chayarcacuna (Lucas 21:20-24-ta liyipai). Jesusca achca soldadocuna Jerusalén muyundijta shayarijpica chai rato urcucunaman llujshichunmi advirtirca. Chashna rurashpallami discipulocunaca quishpiri tucurcacuna. Pero chaipajca tucui imalla cosascunatami huashaman saquina carca. 1999 huatapi llujshishca La Atalaya revistapica: “Paicunaca huasicunata, campocunata, imalla charishcacunatapish mana apashpami rircacuna. Paicunaca Jehová Diosta punta lugarpi churajpi paillataj cuidanata, apoyanatami confiarcacuna” ninmi.

8. ¿Judea llajtapi causaj Diosta sirvijcunamantaca imatataj yachanchij?

⁸ ¿Judea llajtapi causaj huauqui panicunamantaca imatataj yachanchij? Párrafo 7-pi parlashca La Atalaya revistapica: “¿Shamuj punllacunapica ima llaquicuna ricurijpica ñucanchijpajca charishca cosascunachu ashtahuan importante canga? O ¿Jehová Diosta sirvishcamanta quishpirinachu ashtahuan importante canga? Cai millai mundo tucurina chayamujpica sinchi llaquicunahuan chꞌimbapurashpachari ima cosascunata saquina tucunga. Ima shinami Judeapi causaj Diosta sirvijcunaca tucuita saquishpa Jesús ima nishcata cazurcacuna, ñucanchijpish paicuna shina Diosta cazungapaj allichirishca cashunchij” ninmi. *

9. ¿Apóstol Pablo cushca consejoca ñucanchijtaca ima shinataj animan?

⁹ Chai tiempopica Jesuspaj discipulocunapajca imalla cosascunata saquishpa, shujtaj ladopi causanaman rinaca sinchimi cashcanga. Paicunaca Jehovallataj cuidanapimi confiana carcacuna. 5 huatacuna ñaupajmanmi Romamanta soldadocuna Jerusalenman manaraj chayajpica, apóstol Pabloca Judeapi causaj discipulocunamanca valishca consejocunata cushca carca. Paica: “Cancunaca quiquinpajlla ashtahuan charij canataca ama munaichijchu. Cunan imata charishcacunallahuan cushi caichij. Chashnacunatami Diosca: ‘Cantaca manataj shitashachu, manataj cungarishachu’ nin. Chashna cajpimi, imata mana manchashpa: ‘Jatun Diosca ñucata ayudajmi. Pipish ñucata imata ruranataca, mana manchanichu’ ninchij” nircami (Hebreos 13:5, 6). Jesusta catijcunaca apóstol Pablopaj consejota chasquishpaca, paicuna maiman rijpipish Jehová Dios imalla minishtirishca cosascunata cushpa catinapimi confiarcacuna. Ñucanchijpish caimanta yachashpaca Jehová Diosllataj minishtirishca cosascunata cunapimi confiana canchij.

10. ¿Apóstol Pabloca ñucanchijpajca ima consejotataj quillcashpa saquirca?

¹⁰ Apóstol Pabloca Timoteotaca minishtirishca cosascunallahuan causachunmi consejarca. Chai consejoca ñucanchijpajpish valishcami can. Pabloca: “Chaimanta micunata, churanatapish charishpaca, chaillahuan ña cushi cashunchij” nishpami quillcarca (1 Timoteo 6:8). ¿Pabloca mishqui micunata charina, maipi alaja  causanata charina, ima sumaj ropata randina mana alli cashcatachu nisha nirca? Mana, apóstol Pabloca mana chaita nisha nircachu. Paica imalla minishtirishca cosascunahuan cushilla causai tucushcatami nisha nicurca (Filipenses 4:12). Paillatajmi Diosta sirvicushcamanta minishtirishca cosascunallahuan cushilla causaj carca. Ñucanchijpajpish Jehová Dioshuan alli apanacunami tucuimanta yalli valishca cana can (Habacuc 3:17, 18).

11. ¿Moisés israelitacunaman cushca consejomantaca imatataj yachacunchij?

¹¹ Maipica ñucanchijca ima cosascunatami minishtinchij nishpa yuyanchij. Pero Jehová Diosca ñucanchij ima minishtishcata, imata mana minishtishcataca allimi yachan. Cunanca 40 huatacunata shitashca pambapi purishca qꞌuipa, israelitacunaman Moisés imata nishcata ricushun. Paica: “Mandaj Dios, cancunapaj Taita Diosca cancuna imata ruranapipish allimi nishcami. Shitashca jatun pambapi cancuna puricujtaca paica yachanmi. Cai tucui chuscu chunga huatatami Mandaj Dios cancunapaj Taita Diosca cancunahuan cashca. Paica cancunataca ima mana illajtami pushamushca” nircami (Deuteronomio 2:7). Casi 40 huatacunatami Jehová Diosca israelitacunamanca maná nishca micunata cararca. Paicuna churashca ropacunapish Egipto llajtamanta llujshishca qꞌuipaca mana ima rato maucayarcachu (Deuteronomio 8:3, 4). Pero maijan israelitacunaca caicunataca mana tanto valishcata layami ricushcangacuna. Chaimi Moisesca Jehová Dios imalla minishtirishca cosascunata paicunaman cushcata yuyachirca. Ñucanchijpish imalla minishtirishca cosascunata cushcamanta, Jehová Diosta agradicijpica paica cushillami sintiringa.

12. ¿Davidca Jehová Diospi confiashcataca ima shinataj ricuchirca?

¹² Davidca Jehová Dios paita cꞌuyajcunamanta preocuparishcataca allimi yacharca. Davidca Salmo 34-ta quillcacushpaca peligropimi carca. Pero paica sinchi feta charishcamantami, Jehová Diospaj ángel paipaj muyundijpi cuidacushca shina sintirirca (Salmo 34:7). Davidca Diospaj angeltaca shuj soldadohuanmi chꞌimbapurarca. ‘Ima shinami shuj soldadoca ñucata contracuna ama llaquichichun cuidacun, chashnallatajmi paica cuidan’ nircami. Paica Jehová Dios paita mandaj cachun agllashcataca allimi yacharca. Pero alli macanacuj cashpapish contracunata rumicunahuan shitashpa o espadacunahuan paicunata mishai tucushcapica mana confiarcachu (1 Samuel 16:13; 24:12). Ashtahuanpish paica Jehová Diospi confiajpi paillataj paipaj angelhuan ayudanatami yacharca. Cunan punllacunapica Jehová Diosca shuj angelta cai Allpaman cachashpa o shuj milagrota rurashpaca paita sirvijcunataca manachari cuidanga. Pero paita sirvijcuna paipi confiashpa huiñai causaita charinatami yachanchij.

13. a) ¿Magog llajtata mandaj Gogca Diosta sirvijcunamantaca imatataj yuyanga? b) ¿Pero ñucanchijca imamantataj mana manchana canchij? (Página 1-pi tiyaj dibujota ricui).

¹³ Shamuj punllacunapica Jehová Dios ñucanchijta cuidanapi confianami minishtiringa. Magog llajtata mandaj Gog ñucanchijta llaquichisha nijpica “tal vez ñucanchijtami huañuchinga” nishpachari yuyashun. Chaipimi ñucanchijca Jehová Dios ayudanapica tucui shunguhuan confiana canchij. Magog llajtata mandaj Gogca tandanacushca llajtacunami can. Cai llajtacunaca ñucanchijtaca michij illajta layami ricungacuna (Ezequiel 38:10-12). Paicunaca ñucanchijmantaca: “Macanacungapajpish armacunata mana charincunachu, entrenashcapish mana cancunachu” nishpami yuyangacuna. Pero paicunaca Jehová Diospaj angelcuna ñucanchijta difindingapaj listos cashcataca mana yachancunachu. Ñucanchijca Jehová Diospi feta charishcamantami Diosllataj paipaj angelcunahuan ayudanataca alli yachanchij. Jehová Diospaj angelcuna ñucanchijta quishpichinaman shamujpica paicunaca mancharingacunami (Apocalipsis 19:11, 14, 15).

14. ¿Shamuj punllacunapajca ima shinataj allichirina canchij?

¹⁴ ¿Shamuj punllacunapajca ima shinataj allichirina canchij? Charishca cosascunallapica mana confianachu canchij. Shuj punlla charishca cosascunata saquina cashcatami yuyarina canchij. Chaimantami minishtirishca cosascunata charishpa Jehová Diospaj amigos cashcamanta cushilla sintirina canchij. Jehová Diosta ashtahuan rijsishpaca Magog llajtata mandaj Gog ñucanchijta llaquichisha nijpipish, Jehová ñucanchijta ayudanapimi tucui shunguhuan crishun.

15. ¿Davidca Jehová Dios, paita mana nunca saquinataca ima shinataj yacharca?

¹⁵ Davidca: “Mandaj Diosca alli shungumi. Munaichigari, ricuichigari. Mandaj Diospi shunguta churajcunaca cushichishcami” nircami (Salmo 34:8). Cai versopi nishca shinaca Davidca Jehová, paita ayudashcatami ña ricushca carca. Chaimantami Jehová Diospi confiashpa catirca. Davidca jovenraj cashpaca Goliat runahuanmi macanacurca. Chaipimi paica: “Mandaj Diosmi cantaca ñuca maquipi churanga” nirca (1 Samuel 17:46). Qꞌuipacarin David, mandaj Saulpaj trabajacujpica Saulca paitaca achca cutinmi huañuchisha nirca. Chai ratoca Jehová Diosca Davidta cuidanataca manataj saquircachu (1 Samuel 18:12). Davidca Jehová Dios ñaupa punllacunapi ima shina ayudashcataca allimi yacharca. Chaimantami Davidca Jehová Dios paita ayudashpa catinataca mana  cungarirca. Chashnallataj Jehová Dios ñucanchijta ima shina ayudashcata yuyarishpaca, shamuj punllacunapipish ñucanchijta ayudanapimi confiashun.

16. ¿Diospaj ayudata cunamanta mashcacushcataca ima shinataj ricuchinchij?

¹⁶ Cunan punllacunamanta Jehová Diospaj ayudata mashcashpaca, shamuj punllacunapica Jehová Dios ñucanchijta ayudanapimi confiashun. Por ejemplo, trabajopica ñucanchij jefetachari jatun tandanacuicunaman ringapaj, congregacionpi tiyaj tucui tandanacuicunaman ringapaj, huillanaman llujshingapajca permisota cuchun mañanchij. Chaipajca Jehová Diospi sinchi feta charinatami minishtinchij. Shinapish maipica jefeca ñucanchij permisota mañajpica manachari cunga. Chaimantachari maipicarin trabajo illaj saquirishun. Cashna trabajo illaj saquirishpaca Jehová Dios ñucanchijta manataj saquinata, minishtirishca cosascunata cushpa ayudanatami crina canchij (Hebreos 13:5). Tiempo completopi sirvij achca huauqui panicunaca Jehová Dios paicunata siempre ayudashcatami ricushcacuna.

17. a) ¿2022 huatapaj versoca maijantaj can? b) ¿Cuerpo Gobernante huauquicunaca imamantataj ñucanchijpaj cai versota agllarca?

¹⁷ Jehová Dios ñucanchijhuan cashcamantami shamuj punllacunapi ima laya llaquicuna tiyajpipish mana manchana canchij. Paita punta lugarpi churajpica manataj saquingachu. Cunanmanta shamuj punllacunapaj allichiringapaj, Jehová Diospi confiashpa catingapajmi Cuerpo Gobernante huauquicunaca 2022 huatapaj versotaca Salmo 34:10-manta japishcacuna. Chaipica: ‘Diosta mashcajcunaca ima illajpish mana puringacunachu’ ninmi.