1, 2. a) ¿Shuj cꞌuyashca familia huañujpica ima horataj paimantaca ashtahuan yuyarinchij? b) ¿Jesusca manaraj huañushpaca imata rurachuntaj mandarca?

 SHUJ cꞌuyashca familia huañujpica achca huata pasajpipish paitaca manataj cungarinchijchu. Ashtahuantajca pai huañushca fecha chayajpimi paimantaca ashtahuan yuyarinchij.

² Muyundij Allpapica achca millón gentecunami Jesús huañushcata yuyaringapaj tandanacunchij (1 Pedro 1:8). Cai tandanacuimanca Jesús ñucanchij juchacunamanta huañushcata yuyaringapajmi rinchij (Mateo 20:28). Jesusca manaraj huañushpaca paipaj discipulocunamanca shuj micuita rurashpaca cashnami nirca: “Chaimanta caitaca, ñucata yuyarishpa ruracunguichijlla” nircami (Lucas 22:19).

3. ¿Cai yachaipica imatataj yachashun?

³ Achca millones gentecunami cada huata Jesús huañushcata yuyarina tandanacuiman rincuna. Caicunapuramantaca ashacunallami jahua pachaman rina esperanzata charijcuna can. Cutin casi la mayoriaca Paraíso Allpapi causana esperanzata charijcunami can. Cai yachaipimi imamanta chai ishqui grupocuna chai tandanacuiman rishcata, chai tandanacuiman rishpaca ima shina beneficiarishcata yachashun. Cunanca jahua pachaman rina esperanzata charijcuna imamanta Jesús huañushcata yuyarinaman tandanacushcata yachashun.

4. ¿Ungidocunaca Jesús huañushcata yuyarina tandanacuipica imamantataj tandata micuncuna, vinota ubyancuna?

⁴ Jahua pachaman rina esperanzata charijcunaca cada huata Jesús huañushcata yuyarinaman rishpaca tandata micungapaj, vinota ubyangapajmi rincuna. Chaita rurashpaca Jesushuan mandangapaj ari ninacushcatami ricuchincuna. Jesús manaraj huañushpa imata nishcata ricushunchij. Jesusca Pascua fiestata rurashca qꞌuipaca: “Ñuca huañushcata yuyaringuichij” nishpami mandarca. Paica paipaj 11 apostolcunamanmi tandata micuchun, vinota ubyachun curca. Chaimi paica: ‘Ñuca yahuarta jichashcaca mushuj ari nicushcatami ricuchin’ nirca. Shinallataj “ñuca Yaya mandanata ñucaman cushca shinallataj, ñucapish cancunamanca mandanata cuni” nircami. Chashnami cai ishqui ari ninacushcata rurarca (Lucas 22:19, 20, 28-30). * Chashna ari nishpaca apostolcunata jahua pachapi mandachunmi agllarca. Qꞌuipacarin shujtajcunatapishmi agllagrirca (Apocalipsis 5:10; 14:1). Chaimanta Jesushuan mandachun agllashca ungidocunallami, Jesús huañushcata yuyarina tandanacuipica tandata micuncuna, vinotapish ubyancuna.

5. ¿Jahua pachaman rigrij ungidocunaca ima esperanzatataj charincuna?

⁵ Jehová Diosca Jesushuan jahua pachapi mandagrij ungidocunamanca mana huañuj, mana ismuj cuerpotami cunga. Shinallataj Jesushuan mandashpa 144.000-puracunamanta cana regalotapishmi cushca. Paicunapajca Jehová Diospaj ñaupajpi sirvinaca shuj valishca privilegiomi can. Jahua pachaman rigrijcunaca Jesús huañushcata yuyarina tandanacuiman rishpaca cai sumaj esperanzata charishcatami yuyarincuna (1 Corintios 15:51-53; 1 Juan 3:2). Pero cai Allpapiraj caj jahua pachaman rigrijcunaca cai privilegiota chasquingapajca huañuna horascama Jehová Diosta alli sirvina cashcatami yachancuna (2 Timoteo 4:7, 8). Cashna sumaj esperanzata charinata yachashpami paicunaca cushilla sintirincuna. Cutin ¿Paraíso Allpapi causagrijcunaca imamantataj Jesús huañushcata yuyarina tandanacuiman rincuna? (Tito 2:13; Juan 10:16). Caimanta ashtahuan huaquin yuyaicunata yachashun.

6. ¿Shujtaj ovejacunamanta cajcunaca imamantataj cada huata Jesús huañushcata yuyarina tandanacuiman rincuna?

⁶ Shujtaj ovejacuna o Paraíso Allpapi causagrijcunaca Jesús huañushcata yuyarina tandanacuipica tandata mana micuncunachu, vinota mana ubyancunachu. Pero chaipi cashcamantami paicunaca cushilla sintirincuna. 1938 huatapimi shujtaj ovejacunamanta cajcunataca punta cutin cai tandanacuiman richunca invitarca. Abril de 1938 huatapi llujshishca La Torre del Vigía nishcapica: “Shujtaj ovejacunataca chai tandanacuiman rishpa, chaipi imata rurajta ricuchunmi invitanchij. Chaipi paicuna cashpaca cushilla sintirichunmi munanchij” nircami. Caipi yuyashun. Shuj bodaman invitajpica chaiman rishpa, chaipi imata rurajta ricushpaca cushillami  sintirinchij. Chashnallatajmi shujtaj ovejacunamanta cajcunaca Jesús huañushcata yuyarina tandanacuiman rishpa chaipi imata rurajta ricushpaca cushilla sintirincuna.

7. ¿Shujtaj ovejacunamanta cajcunaca imamantataj Jesús huañushcata yuyarina tandanacuipica conferenciata cujta uyasha nincuna?

⁷ Shujtaj ovejacunamanta cajcunaca chai tandanacuipi alaja conferenciata cujtami uyasha nincuna. Chai conferenciapica 144.000 ungidocunapish, Jesuspish mil huatata mandacushpa cai Allpa shuj Paraíso tucuchun, gentecuna jucha illaj cachun ayudanatami yachachin. Chaita uyashpaca Paraíso Allpapi cushilla, maravilla causanatami yuyarincuna (Isaías 35:5, 6; 65:21-23; Apocalipsis 21:3, 4). Paicunapaj familiacunahuan, amigocunahuan sumaj causanata yuyarishpaca Jehová Diostami cushilla sirvishpa catincuna (Mateo 24:13; Gálatas 6:9).

8. ¿Shujtaj ovejacunamanta cajcunaca imamantataj Jesús huañushcata yuyarina tandanacuiman rincuna?

⁸ Cai tandanacuimanca shujtaj ovejacunaca ungidocunata cꞌuyashcamanta, paicunata apoyashcamantami rincuna. Diospaj Shimipica jahua pachaman rigrij ungidocunapish, Paraíso Allpapi causana esperanzata charijcunapish tandalla sirvina cashcatami huillan. Cai profeciacuna ima shina pajtaricushcata ashtahuan yachashun.

9. Zacarías 8:23-pi nishca shinaca ¿shujtaj ovejacunamanta cajcunaca ima shinataj ungidocunata apoyancuna?

⁹ (Zacarías 8:23-ta liyipai). Cai versopica shujtaj ovejacunamanta cajcuna, jahua pachaman rigrij ungidocunata apoyashcatami ricuchin. Cai versopica “Judá llajtapi causaj runa” nishpa, “cancuna” nishpaca jahua pachaman rigrij ungidocunallamantatajmi parlan (Romanos 2:28, 29). Cutin ‘tucui llajtacunamanta 10 runacuna’ nishpaca shujtaj ovejacunamantami parlan. Paicunaca tandallami jahua pachaman rigrij ungidocunahuan Jehová Diosta sirvincuna. Chaimantami shujtaj ovejacunamanta cajcunaca Jesús huañushcata yuyarina tandanacuiman rishpaca ungidocunata acompañancuna.

10. ¿Ezequiel 37:15 al 19, 24, 25-pi parlashca profeciataca Jehová Diosca ima shinataj pajtachishca?

¹⁰ (Ezequiel 37:15-19, 24, 25-ta liyipai). Jehová Diosca ungidocunahuan, shujtaj ovejacunamanta cajcunahuan tandalla trabajachunmi tandachishca. Chai profeciapica ishqui caspimantami parlan. ‘Judapaj caspica’ jahua pachapi causagrij ungidocunatami ricuchin. Ñaupa punllacunapica Judapaj familiamantami israelitacunata mandachunca Jehová Diosca agllaj carca. Cutin “Efrainpaj caspica” Paraíso Allpapi causagrijcunatami ricuchin. * Jehová Diosca cai ishqui caspita shujllapi tandachicuj shinami ungidocunapish, shujtaj ovejacunamanta cajcunapish paita tandalla sirvichun ayudashca. Paicunaca ‘shuj canllalla’ cashcamanta, ‘shuj michijllata’ charishcamantami Jesús huañushcata yuyarina tandanacuimanca shuj shinalla rincuna (Juan 10:16).

11. ¿Shujtaj ovejacunaca ima shinataj ungidocunataca ayudancuna? (Mateo 25:31-36, 40).

¹¹ (Mateo 25:31-36, 40-ta liyipai). Cai versocunapi “ovejacuna” nishpaca Paraíso Allpapi causana esperanzata charijcunamantami parlacun. Paicunaca tucuri punllacunapimi Yayitu Diosta sirvishpa caticuncuna. Shinallataj paicunaca gentecunaman yachachishpa, predicashpami jahua pachapi causagrij ungidocunata ayudancuna (Mateo 24:14; 28:19, 20).

12, 13. ¿Shujtaj ovejacunamanta cajcunaca ima shinallataj ungidocunata apoyancuna?

 ¹² Cada huatami shujtaj ovejacunaca gentecunata Jesús huañushcata yuyarina tandanacuiman invitashpaca ungidocunata apoyancuna. (“ Jesús huañushcata yuyaringapaj allichirishunchij” nishca recuadrota ricui). Shujtaj ovejacunamanta cajcunaca paicunapaj congregacionpi ungidocuna mana tiyajpipish, Jesús huañushcata yuyaringapajmi tucuita allichincuna. Jahua pachaman rigrij ungidocunata chashna apoyashpami paicunaca cushilla sintirincuna. Jesusca ungidocunata chashna apoyajpica paita apoyacushcata shinami ricun (Mateo 25:37-40).

¹³ Pero ¿ima esperanzata charishpapish imamantataj tucuicuna chai tandanacuimanca rina canchij?

14. ¿Jehová Diospish, Jesuspish ima shinataj ñucanchijta yallitaj cꞌuyashcata ricuchishcacuna?

¹⁴ Jehová Diospish, Jesuspish ñucanchijta cꞌuyashcamantami agradicinchij. Jehová Diosca ñucanchijta achcata cꞌuyashcamantami paipaj shujlla Churita huañuchun curca (Juan 3:16). Jesuspish ñucanchijta cꞌuyashcamantami paipaj causaita curca (Juan 15:13). Paicuna chashna ñucanchijta achcata cꞌuyashcataca mana pagai tucunchijchu. Pero agradicingapajca Jehová Dios mandashca shinami causana canchij (Colosenses 3:15). Jesús huañushcata yuyarina tandanacuiman rishpacarin paicunata agradicishcata, cꞌuyashcatami ricuchinchij.

15. ¿Jahua pachaman rigrij ungidocunapish, shujtaj ovejacunapish imamantataj shungumanta Jesús huañushcamanta agradicincuna?

¹⁵ Tucuicunami Jesús huañushcamanta achcata agradicinchij (Mateo 20:28). Jesús huañushcamantami jahua pachaman rigrij ungidocunaca Diospaj ñaupajpi alli ricurishpa paipaj huahuacuna tucushcacuna (Romanos 5:1; 8:15-17, 23). Cutin shujtaj ovejacunamanta cajcunaca Jesús huañushcapi feta churashpami Jehová Diosta sirvi tucuncuna. Jatun llaqui punllacunamantacarin quishpiri tucungacuna (Apocalipsis 7:13-15). Cai ishqui grupocunaca Jesús huañushcata yuyarina tandanacuiman rishpaca Jesús huañushcamantami agradicishcata ricuchincuna.

16. ¿Imamantataj Jesús huañushcata yuyarina tandanacuimanca rinchij?

¹⁶ Jesustami cazusha ninchij. Jesusca huañunapaj ashalla horascuna faltajpica: “Ñucata yuyarishpa, caitaca ruracunguichijlla” nishpami mandarca (1 Corintios 11:23, 24). Cai mandashcataca jahua pachapi causagrijcunapish, cai Allpapi causanata shuyajcunapishmi pajtachisha ninchij.

17. ¿Jesús huañushcata yuyarina tandanacuiman rishpaca imamantataj Jehová Diospajman ashtahuan cꞌuchuyanchij?

¹⁷ Chai tandanacuiman rishpaca Jehová Diospajmanmi ashtahuan cꞌuchuyashun (Santiago 4:8). Jesús huañushcata yuyarina tandanacuiman rishpaca Jehová Dios cusha nishcacunapi, pai ñucanchijta achcata cꞌuyashcatami yuyarinchij (Jeremías 29:11; 1 Juan 4:8-10). Chashna yuyarishpaca Jehová Diostami ashtahuan cꞌuyanchij. Shinallataj paipajmanpishmi ashtahuan cꞌuchuyanchij (Romanos 8:38, 39).

18. ¿Jesuspaj ejemplopi yuyashpaca imatataj rurasha ninchij?

¹⁸ Chai tandanacuiman rishpaca Jesuspaj ejemplota catina cashcatami yuyarinchij  (1 Pedro 2:21). Jesús huañushcata yuyarina punlla manaraj chayajpica, Bibliapimi Jesús cai Allpapi imata rurashcata, pai ima shina huañushcata, ima shina causarishcata yachai tucunchij. Cutin chai tutaca conferenciata uyashpami Jesús ñucanchijta mashnata cꞌuyashcata yuyarinchij (Efesios 5:2; 1 Juan 3:16). Jesuspaj ejemplomanta yachashpa, paipi yuyarishpaca paipaj ejemplotami catisha ninchij (1 Juan 2:6).

19. ¿Jehová Diospaj amigos cangapajca imatataj rurana canchij?

¹⁹ Cai tandanacuiman rishpaca Jehová Diospaj amigos casha nishcatami ricuchishun (Judas 20, 21). Jehová Diosta tucuipi cazujpi, paipaj shutita jatunyachijpica Jehová Diosca ñucanchijtaca shungumantami cꞌuyashpa catinga (Proverbios 27:11; Mateo 6:9; 1 Juan 5:3). Jesús huañushcata yuyarina tandanacuiman rishpaca paita tucuipi cazungapajmi animarinchij. Paipaj amigos casha nishcatapishmi ricuchinchij.

20. ¿Jesús huañushcata yuyarina tandanacuimanca imamantataj rina canchij?

²⁰ Cai yachaipi ricushca shinaca jahua pachaman rina esperanzata charijcunapish, cai Allpapi causana esperanzata charijcunapishmi Jesús huañushcata yuyarina tandanacuimanca rina canchij. Chai tandanacuipica ñucanchij cꞌuyashca Jesucristo tucuicunamanta huañushcata, Jehová Diospish ñucanchijta cꞌuyashcamanta paipaj Churita cushcatami yuyarishun. Huata 2022-pica viernes 15 de abril tutatami Jesús huañushcataca yuyarishun. Ñucanchijca Jehová Diosta, Jesustaca achcatami cꞌuyanchij. Chaimanta cai tandanacuiman ringapajca tucui pudishcata rurashunchij.