1-3. ¿Imacunamantataj maipica huacanchij?

 MAIPICA cushilla sintirishcamantachari huacashcanchij. Pero ashtahuantajca ima llaquicunata charishpami casi siempre huacanchij. Por ejemplo, shuj cꞌuyashca familia huañujpicarin achcatami huacanchij. Estados Unidosmanta Lorilei * shuti panica: “Ñuca ushushi huañujpica dimastij shungu pꞌaquirishcami sintirircani. Ñucamanca imapish cushicuita cui tucushcataca mana yuyarcanichu” ninmi.

² Maipica shujtaj cosascunamantapishmi huacanchij. Japón llajtamanta shuj precursoraca: “Ñuca causan llajtapica gentecunaca Bibliamanta mana uyasha nincunachu, chaimantami desanimarini. Pero maipica Yayitu Diostaca huacashpami: ‘Cashna gentecuna canmanta yachachun ayudahuai’ nishpa mañani” ninmi.

³ Maipica ñucanchijpish cai panicuna shinallatajmi huacashcanchij (1 Pedro 5:9). Ñucanchijca Jehová Diosta cushilla sirvinatami munanchij. Pero shuj cꞌuyashca familia huañujpi, desanimarishpa o ima pruebacunata charishpaca achcatami huacanchij (Salmo 6:6; 100:2). ¿Chashna sintirishpaca imatataj rurana canchij?

4. ¿Cai yachaipica imallatataj yachashun?

⁴ Chashna sintirishpaca Jesuspaj ejemplomantami yachai tucunchij. Maipica “Jesuspish huacarcami” (Juan 11:35; Lucas 19:41; 22:44; Hebreos 5:7). Cai yachaipimi Jesuspish imacunallamanta huacashcata ricushun. Shinallataj Jesusmanta, Jehová Diosmantapish imata yachai tucushcatami ricushun. Ñucanchijpish llaquicunamanta huacashpa imata rurana cashcatami yachashun.

5. ¿Juan 11:32 al 36-pica Jesusmantaca imatataj yachanchij?

⁵ Huata 32 tucuripica Jesuspaj cꞌuyashca amigo Lazaromi ungushpa huañurca (Juan 11:3, 14). Jesusca Lazarota, Lazaropaj pani Mariata, Martataca achcatami cꞌuyarca. Marta, Mariaca paipaj turi huañushcamantami dimastij llaquilla sintirircacuna. Martaca ña Jesús tigracujta yachashpaca, Jesushuan ñanpi tupashpami paica dimastij llaquirishpa Jesustaca: “Mandaj Jesús, can caipi cashca cajpica, ñuca turica mana huañunmanchu carca” nishpa huacashcanga (Juan 11:21). Jesusca Mariapish, shujtaj gentecunapish huacacujta ricushpaca paipishmi huacai callarirca (Juan 11:32-36-ta liyipai).

6. ¿Jesusca imamantataj huacarca?

⁶ ¿Jesusca imamantataj huacarca? Perspicacia libropica: “Paipaj cꞌuyashca amigo Lázaro huañushcamanta, Lazaropaj panicuna yallitaj llaquilla cajta ricushpami paipish huacarca” ninmi. * Jesusca paipaj amigo Lázaro achcata sufrishcata yachashpami huacai callarishcanga. Shinallataj paipaj panicuna María, Marta huacashcamantami paipish huacai callarishcanga. Canpish tal vez shuj familiata o amigota huañuipi chingachishca cashpaca chashnallatajmi sintirishcangui. Cunanca Jesús huacashcamantami quimsa yuyaicunata yachashun.

7. ¿Jesusca paipaj amigocunamanta huacashpaca Jehová Diosmantaca imatataj yachachirca?

⁷ Jehová Diosca can ima shina sintirijtaca allimi yachan. Jesusca Jehová Dios ima shina cajta ricuchijmi can (Hebreos 1:3). Jesusca pai huacashpaca Jehová Dios ñucanchijmanta preocuparishcatami ricuchirca (Juan 14:9). Cambaj cꞌuyashca familiata o amigota huañuipi chingachishca cajpica, Jehová Diosca can ima shina sintirishcataca allimi yachan, paipish llaquillami sintirin.  Chaimantami cantaca ayudasha, cushichisha nin (Salmo 34:18; 147:3).

8. ¿Jesús ñucanchij familiacunata, amigocunata causachinataca imamantataj tucui shunguhuan crinchij?

⁸ Jesusca ñucanchij familiacuna, amigocuna huañushcatami causachisha nin. Jesusca manaraj huacashpaca Martamanca: “Cambaj turica causaringami” nircami. Martaca chaitaca tucui shunguhuanmi crirca (Juan 11:23-27). Shinallataj paica profeta Elías, Eliseo huaquincunata causachishcataca allimi yacharca (1 Reyes 17:17-24; 2 Reyes 4:32-37). Jesuspish shujtajcunata causachishcatami uyashcanga (Lucas 7:11-15; 8:41, 42, 49-56). Ñucanchijpish Jehová Dios huañushcacunata causachinatami tucui shunguhuan crina canchij. Jesusca paipaj amigo Lázaro huañushcamanta huacashpaca, huañushcacunata causachisha nishcatami ricuchirca.

9. ¿Familiata huañuipi chingachijcunataca ima shinataj ñucanchijpish Jesús shinallataj ayudai tucunchij? Shuj ejemplota churashpa parlai.

⁹ Familiata huañuipi chingachijcunatami ayudai tucunchij. Jesusca Martahuan, Mariahuan huacashpallaca mana saquirircachu. Ashtahuanpish paica paicuna ima shina sintirishcatami uyarca, animaj shimicunahuanpish animarca. Ñucanchijpish maijan huauqui o pani familiata huañuipi chingachijpica, paicunataca chashnallatajmi animai tucunchij. Australia llajtamanta Dan shuti shuj pushaj huauquica: “Ñuca cꞌuyashca huarmi huañujpica shujtajcuna ayudachunmi minishtircani. Achca cusa huarmimi ñuca ima shina sintirishcata uyangapaj, ñucahuan huacangapaj tiempota surcurcacuna. Shinallataj ñuca fuerza illaj sintirijpica paicunaca huaquin tareacunata rurashpami ayudarcacuna. Por ejemplo, carrota maillashpa, mercadomanta comprasta apamushpa, yanushpami ayudarcacuna. Paicunaca Jehová Diostapish ñucahuanmi mañarcacuna. Chashnami ñuca llaquihuan cai horasca alli amigocuna cashcata ricuchircacuna” ninmi (Proverbios 17:17).

10. ¿Lucas 19:36 al 40-pica imatataj huillan?

¹⁰ Huata 33, 9 de nisán punllapica Jesusca Jerusalenmanmi rirca. Chaiman chayacujpica Jesustaca achca gentecunami tandanacushpa, churanacunata mantashpa chasquircacuna. Jesús mandaj cashcata ricuchingapajmi chashna cushilla chasquircacuna (Lucas 19:36-40-ta liyipai). Chashna chasquijpipish Jesusca Jerusalén llajta tucuchishca canata yachashpami huacarca. Chaita ricushpaca Jesusta catijcunaca mancharishcami saquirircacuna (Lucas 19:41-44).

11. ¿Jesusca imamantataj Jerusalenpi causajcunamanta huacarca?

¹¹ Jesusca paita chashna cushilla chasquijpipish la mayoría judiocuna paipi mana crinatami yacharca. Chaimantami paica llaquilla sintirirca. Judiocuna Jesuspi mana crishcamantami Jerusalenca tucuchishca carca. Huaquin judiocunatacarin prezumanmi aparcacuna (Lucas 21:20-24). Ima shinami Jesús huillarca, chashnallatajmi achca gentecunaca Jesuspi mana crircacuna. Cunan punllacunapish gentecunaca Diospaj Gobiernomanta predicajpica mana uyasha nincunachu. Pero ama desanimaringapajca cunanca Jesús huacashcamanta quimsa yuyaicunata yachashun.

12. ¿Jesusca judiocunamanta huacashpaca Jehová Dios ima shina cashcatataj ricuchirca?

¹² Jehová Diosca gentecunatami cꞌuyan. Jesús huacashpaca Jehová Diospish gentecunamanta preocupariscatami ricuchirca. Diosca ‘shujllapish ama chingarichun, tucuicuna  arrepintirishpa quishpirichunmi munan’ (2 Pedro 3:9). Ñucanchijpish gentecunata cꞌuyashcata ricuchingapajca, shungumanta Jehová Diosmanta huillangapajmi tucui pudishcata rurana canchij (Mateo 22:39). *

13, 14. a) ¿Jesusca ima shinataj gentecunata cꞌuyashcata ricuchirca? b) ¿Ñucanchijpish gentecunata cꞌuyashcataca ima shinataj ricuchina canchij?

¹³ Jesusca gentecunata achcata cꞌuyashcamantami paicunaman predicangapaj achcata esforzarirca (Lucas 19:47, 48). Maipica achca gentecuna Diosmanta yachasha nishcamantami paipish, paipaj discipulocunapish micungapaj tiempota mana charircacuna (Marcos 3:20). Shuj cutinca shuj runa tuta chayajpica Jesusca paihuan parlangapajmi listo carca (Juan 3:1, 2). Achca gentecunaca Jesuspi mana crishpapish Diosmanta uyana oportunidadtami charircacuna. Cunan punllacunapish ñucanchijca tucui gentecunamanmi Diosmanta predicasha ninchij (Hechos 10:42). Caita pajtachingapajca huillanapimi ñucanchijpish huaquin cambiocunata rurana canchij.

¹⁴ Huillangapajca cambiocunata rurashunchij. Chai punllallataj, chai horasllataj siempre predicashpaca Diosmanta yachanata munaj gentecunataca mana tarishunchu. Matilda shuti precursoraca: “Ñuca cusahuanca chꞌican chꞌican horascunapimi predicanchij. Tutamanta ladoca negociocunapi predicangapajmi llujshinchij. Chaupi punllaca maipimi gentecuna tiyan lugarpimi carritocunahuan huillanchij. Cutin chishi horasca gentecuna huasipi cashcamantami huasin huasin predicanchij” ninmi. Ñucanchijpish ñucanchij munashca horaspi predicanapaj randica, gentecuna tiyan horas predicangapajmi tiempota surcuna canchij. Chaita rurashpaca Jehová Diostami cushichishun.

15. Lucas 22:39 al 44-pi nishca shinaca ¿Jesusca manaraj huañushpaca imatataj rurarca?

¹⁵ Huata 33, 14 de nisán tutapica Jesusca Olivocuna tiyan urcupimi Jehová Diostaca  shungumanta mañarca (Lucas 22:39-44-ta liyipai). Paica chai sinchi horaspica ‘jatunta caparishpa, huacashpa, rogashpami Diosta mañarca’ (Hebreos 5:7). ¿Imatataj Jesusca mañarca? Paica Jehová Diosta sirvingapaj, paipaj munaita pajtachingapaj fuerzasta cuchunmi mañarca. Jehová Diosca paipaj Churi mañashcata uyashpami shuj angelta cachashpa paita sinchiyachirca.

16. ¿Olivo urcupi Diosta mañacushpaca Jesusca imamantataj huacarca?

¹⁶ Gentecunaca Diospaj shutita Jesús yangapi churashcatami yuyarcacuna. Chaimantami Jesusca Diospaj shutita jatunyachingapaj, paita cazungapaj Jehová Diostaca ayudachun huacashpa mañarca. Canpish ima pruebacunata charishpa Diosta cazuna sinchi cajpica, Jesuspaj ejemplomantami yachai tucungui. Cunanca Jesús huacashcamanta quimsa yuyaicunatami yachashun.

17. ¿Jesús mañajpi Jehová Dios uyashcamantaca imatataj yachanchij?

¹⁷ Jehová Diosca ñucanchij mañashcacunatami uyan. Jesuspajca Diospaj shutita jatunyachina, paita cazunami tucuimanta valishca carca. Chaimantami Jehová Diosca pai mañashcata uyarca. Ñucanchijpish Jehová Diospaj shutita jatunyachijpi, paita cazujpica ñucanchij mañashcacunatami Yayitu Diosca uyanga (Salmo 145:18, 19).

18. ¿Jesús ñucanchijta alli intindij cashcataca ima shinataj yachanchij?

¹⁸ Jesusca ñucanchij ima shina sintirishcataca allimi intindin. Ñucanchijca llaquilla cashpaca pi ñucanchijta ayudachun, intindichunmi minishtinchij. Shuj amigoca ñucanchij shinallataj llaquicunata charishcamantami alli intindinga. Jesuspish chashnallatajmi intindi tucun. Paica fuerza illaj cashcamantami ayudata minishtirca. Shinallataj ñucanchij ima shina rurashca cashcata yachashpami, paica minishtirishca ayudacunata cunga (Hebreos 4:15, 16). Jesusca Olivo urcupi Diosta mañacushpaca shuj angelpaj ayudatami chasquirca. Ñucanchijpish chashnallatajmi Jehová Diospaj ayudata chasquina canchij. Jehová Diosca publicacioncunahuan, videocunahuan, conferenciacunahuan, pushaj ancianocunahuan, experienciata charij amigocunahuanmi ñucanchijta ayudan.

19. ¿Ima llaquicunahuan cajpica Jehová Diosca ima shinataj ayudanga? Shuj ejemplomanta parlai.

 ¹⁹ Jehová Diosca tranquilo sintirichunmi ayudanga. Jehová Diosta mañashpaca ima llaquicunahuan cashpapish ñucanchij yuyaipi, shungupimi tranquilo sintirishun (Filipenses 4:6, 7). Luz shuti panica chashnami sintirirca. Paica: “Maipica ñucalla sintirishcamantami ‘Jehová Diosca ñucata mana cꞌuyanchu’ nishpa yuyani. Chashna yuyashpaca chai ratomi Jehová Diosmanca tucuita parlani. Diosta mañashpaca ñuca yuyaipimi tranquilo sintirini” ninmi. Cai pani shinallataj Diosta mañashpaca ñucanchijpish tranquilomi sintirishun.

20. ¿Jesús huacashcamantaca imatataj yachashcanchij?

²⁰ Jesús huacashcamantami valishca yuyaicunata yachashcanchij. Jesús shinami familiacunata huañuipi chingachijcunataca ñucanchijpish ayudana canchij. Familiacuna huañujpi Jehová Dios, Jesús ñucanchijta ayudanapimi confiana canchij. Shinallataj Jehová Dios, Jesús shinami ñucanchijpish gentecunamanca cꞌuyaihuan predicana, yachachina canchij. Diospish, Jesuspish ñucanchij ima shina sintirishcataca allimi yachancuna, chaimantami paicunaca ayudasha nincuna. Ñallami Jehová Diosca ñucanchij ‘ñahuicunamantaca tucui huiquita pꞌichanga’ (Apocalipsis 21:4). Chaicamaca cai yachaipi imata yachashcata ñucanchij causaipi pajtachishpa catishunchij.