1. ¿Santiagopaj familiaca picunataj carca?

 SANTIAGOCA Jesuspaj huauquimi carca. * Paipaj yaya José, paipaj mama Mariaca Jehová Diostaca shungumantami sirvijcuna carca. Jesuscarin Dios agllashca Mesiasmi carca. Santiagopajca chai familiamanta canaca shuj privilegiomi cashcanga.

2. ¿Santiagoca imamantataj paipaj huauqui Jesustaca respetarca?

² Santiagoca paipaj huauqui Jesustaca achcatami respetarca (Mateo 13:55). Por ejemplo, Jesusca Yayitu Diospaj Shimitaca allimi rijsirca. Pai 12 huatacunata charijpica Jerusalenpi yachachijcunaca Jesús yachaisapa cajtami cuentata curcacuna (Lucas 2:46, 47). Ashtahuancarin Santiagoca Jesushuanmi carpinteriapi trabajashcangacuna. Chaimantami paica Jesustaca alli rijsishca canga. Huauqui Nathan Knorrca: “Maijanhuan trabajashpaca paicunamantami ashtahuan yachanchij” nircami. * Santiagopish paipaj huauquihuan huiñashpaca Jesús yachaisapa cashcata, Yayitu Diospaj ñaupajpi, gentecunapaj ñaupajpi alli ricurij cashcatami yachashcanga (Lucas 2:52). Chaimanta “Santiagoca callarimantami Jesuspaj discípulo cashcanga” nishpachari yuyanchij. Pero chaica mana chashnachu carca.

3. ¿Jesús cai Allpapi predicacujpica Santiagoca imatataj rurarca?

³ Jesús cai Allpapi predicacujpica Santiagoca mana paipaj  discipulochu carca (Juan 7:3-5). Santiagopish, paipaj familiahuanmi Jesustaca: ‘Canca locomi cangui’ nishcacuna canga (Marcos 3:21). Shinallataj Jesusta caspipi huarcushpa huañuchicun horasca paica mana paipaj mama Mariahuanchu cashcanga (Juan 19:25-27).

4. ¿Cai yachaipica imatataj yachashun?

⁴ Tiempo huashaca Santiagoca Jesuspimi feta churarca. Paica congregacionpipish rijsishca pushaj ancianomi carca. Cai yachaipimi ishqui yuyaicunata yachashun: 1) ¿imamantataj Santiago shina humildes cana canchij?, 2) ¿ima shinataj Santiago shina alli yachachijcuna cana canchij?

5. ¿Jesús causarishpa Santiagoman ricurijpica Santiagoca imatataj rurarca?

⁵ ¿Santiagoca ima shinataj Jesusta cati callarirca? Jesusca pai causarishpaca Santiagoman, shujtaj apostolcunamanmi ricurirca (1 Corintios 15:7). Santiagoca Jesús causarishca qꞌuipami Jesusta cati callarirca. Jesuspaj apostolcuna Jehová Diospaj espíritu santota chasquingapaj shuyacujpica Santiagopish paicunahuanmi carca (Hechos 1:13, 14). Tiempo qꞌuipacarin Santiagoca chai punllapi Diosta sirvijcunamantami cuerpo gobernantepi sirvij carca (Hechos 15:6, 13-22; Gálatas 2:9). Huata 62-pica jahua pachaman rinata shuyajcunapajmi shuj cartata quillcarca. Cai cartaca cunan punllapi jahua pachaman rinata shuyajcunapajpish, cai Allpapi causanata shuyajcunapajpish valishcami can (Santiago 1:1). Historiamanta parlaj Josefo runaca: “Sacerdotecunata mandaj Ananmi Santiagotaca huañuchichunca mandarca” nircami. Pero Santiagoca huañuna horascamami Jehová Diostaca cai Allpapica tucui shunguhuan sirvirca.

6. ¿Santiagohuan, religionta pushajcunahuanca imapitaj chꞌican carca?

⁶ Santiagoca humildemi carca. Paica chai punllapi religionta pushajcunahuanca mana igualchu carca. Santiagoca Jesús ña causarishcata ricushpaca paipimi feta churarca. Pero religionta pushajcunaca mana chaita rurarcacunachu. Por ejemplo, Lazarota Jesús causachishcataca allimi yacharcacuna. Pero Jesús, Diospaj Churi cashcata, Mesías cashcataca mana crircacunachu. Chaimantami paicunaca Jesustapish, Lazarotapish huañuchisha nircacuna (Juan 11:53; 12:9-11). Jesús causarishca qꞌuipacarin cai pushajcunaca: ‘Jesusca mana causarishcachu’  nishpami llullacunata nircacuna (Mateo 28:11-15). Cai pushajcunaca jatun tucushca cashcamantami Jesús, Mesías cashcataca mana crircacuna.

7. ¿Imamantataj mana jatun tucuna canchij?

⁷ Santiago shina humilde cashpa Jehová Dios yachachichun saquishunchij. Cuerpopi shuj millai ungüi tiyashpaca shungutami anchayachi tucun. Chashnallatajmi ñucanchijca jatun tucushpaca ñucanchij shungu rumiyajpi, Yayitu Diostaca mana shungumanta cazui tucushun. Fariseocunaca rumi shungucuna cashcamantami Jesús, Jehová Diospaj Churi cashcataca mana chasquisha nircacuna (Juan 12:37-40). Chaimantami paicunaca huiñaita causanatapish chingachircacuna (Mateo 23:13, 33). Cutin ñucanchijca Jehová Dios paipaj Shimihuan, paipaj espíritu santohuan yachachichunmi saquina canchij. Chashnami ñucanchijca imatapish alli decidishun (Santiago 3:17). Santiagoca humilde cashcamantami Jehová Dios paita yachachichun saquirca. Cunanca Santiago humilde cashcamanta ima shina alli yachachij cashcata yachashun.

8. ¿Ima shinataj ñucanchijpish alli yachachijcuna cai tucunchij?

⁸ Santiagoca mana jatun yachaicunaman rircachu. Chaimantami religionta pushajcunaca: ‘Pedro, Juan laya Santiagopish mana jatun yachaicunaman rishcachu’ nishpa paicunamantaca yangachijcuna carca (Hechos 4:13). Pero Santiagoca alli yachachijmi tucurca. Pai quillcashca libropimi chaitaca ricui tucunchij. Ñucanchijpish Santiago shinallatajchari mana jatun estudiocunaman rishcanchij. Chashnapish Jehová Dios paipaj espíritu santohuan ayudajpi, paipaj organizacionhuan ñucanchijta yachachijpimi alli yachachijcuna cai tucunchij. Cunanca alli yachachijcuna cangapaj Santiagomanta valishca yuyaicunata ashtahuan yachashun.

9. ¿Santiagoca ima shinataj yachachirca?

⁹ Santiagoca intindirinalla shimicunahuanmi yachachirca. Chaimantami paita uyajcunaca alli intindishpa imata rurana cashcata yacharcacuna. Por ejemplo, Santiagoca Diosta sirvijcunataca llaquicunata ahuantana  cashcata, mana resintirina cashcatami yachachirca. Paica: “Ñucanchijca llaquita apajcunataca, cushichishcacunami ninchijmi: Job llaquita apashcataca uyashcanguichijmi. Llaquita apashca qꞌuipa, Jatun Dios imata cushcatapish ricushcanguichijmi. Jatun Diosca yallitaj llaquij, mana pꞌiñarijmi” nircami (Santiago 5:11). Santiagoca Bibliapi tiyaj yuyaicunamantami yachachirca. Paica Jehová Dios ima shinami Jobta ayudarca, chashnallataj ñucanchijtapish ayudanatami yachachirca. Ashtahuancarin intindirinalla shimicunahuan, yuyaicunahuanmi intindichirca. Chashnami paica Jehová Diosta jatunyachirca.

10. ¿Santiago shina yachachingapajca imatataj rurana canchij?

¹⁰ Santiago shina intindirinalla yuyaicunahuan Jehová Diospaj Shimita yachachishunchij. Gentecunaman yachachicushpaca alli yachajcuna cashcataca mana ricuchisha ninchijchu. Ashtahuanpish Jehová Dios yachaj, ñucanchijmanta preocuparij cashcatami ricuchisha ninchij (Romanos 11:33). Chaipajca siempremi Bibliamanta yachachingapaj esforzarina canchij. Por ejemplo, yachacujcuna imata tapujpica “ñucaca caita o chaitami ruraniman” ninapaj randica, Biblia ima yachachishcata paicunallataj intindichunmi yachachina canchij. Shinallataj Jehová Dios imata munashcatapishmi ricuchina canchij. Chashna yachachijpica paicunaca shungumantami Jehová Diosta cazungacuna.

11. a) ¿Huaquin huauqui panicunaca ima problemacunatataj charircacuna? b) ¿Santiagoca paicunataca ima shinataj aconsejarca? (Santiago 5:13-15).

¹¹ Santiagoca cꞌuyaihuanmi aconsejarca. Paica Santiago librota quillcacushpaca problemata charij huauqui panicunatami aconsejarca. Por ejemplo, huaquincunaca Diospaj mandashcacunataca mana utca pajtachijcunachu carca (Santiago 1:22). Cutin shujtajcunaca charijcunallatami alli tratajcuna carca (Santiago 2:1-3). Huaquincunacarin paicunapaj rimashcacunahuanmi shujtajcunata llaquichijcuna carca (Santiago 3:8-10). Paicuna chashna problemacunata charijpipish, “paicunaca mana nunca cambiangachu” ninapaj randica Santiagoca cꞌuyaihuanmi ayudarca. Shinallataj paicunataca pushaj ancianocunapaj ayudatapish mashcachunmi animarca (Santiago 5:13-15-ta liyipai).

12. ¿Yachacujcunata cambiachun ayudacushpaca imatataj yuyarina canchij?

¹² Santiago shina shujtajcunata cꞌuyaihuan aconsejashunchij. Bibliamanta yachacujcunapajca Biblia yachachishcacunata paicunapaj causaipi pajtachinaca maipica sinchichari ricuringa (Santiago 4:1-4). Paicunaca mana alli ruraicunata saquingapaj, ima costumbrecunata saquingapajca tiempotami minishtincuna. Chaimanta ñucanchijpish Santiago shinallataj yachacujcunata imapi mejorachun ayudashunchij. Shinapish Jehová Diosllataj humilde gentecunata cambiachun ayudanatami yuyarina canchij (Santiago 4:10).

13. Santiago 3:2-pi nishca shinaca ¿Santiagoca imatataj alli yacharca?

¹³ Santiagoca shujtajcunata yalli cashcataca mana yuyarcachu. Paica Jesuspaj huauqui cashpapish, paiman valishca ruraicunata mingajpipish mana jatun tucurcachu. Ashtahuanpish paica tucui huauqui panicunatami cꞌuyaihuan tratarca (Santiago 1:16, 19; 2:5). Imapipish mana pandarij cashcataca mana yuyarcachu. Santiagoca: “Tucuicunami achca cutin pandarinchij” nircami (Santiago 3:2-ta liyipai).

14. ¿Imamantataj imapipish cashcata ruraj shinaca mana cana canchij?

¹⁴ Santiago shina ñucanchijpish juchayuj  cashcata yuyarishunchij. Yachacujcunata yalli cashcataca mana yuyanachu canchij. Ñucanchij tucuipi cashcata ruraj shina cajpica, yachacujcunapajca Jehová Diosta sirvinaca sinchi layami ricuringa. Pero Biblia yachachishcacunata pajtachina mana jahualla cashcata paicunaman intindichijpi, Diospaj ayudahuan chaita pajtachi tucushcata yachachijpica yachacujcunaca Jehová Diostami sirvisha ningacuna.

15. ¿Santiagoca ima laya ejemplocunahuantaj yachachirca? (Santiago 3:2-6, 10-12).

¹⁵ Santiagoca intindirinalla ejemplocunahuanmi yachachirca. Paica Jehová Diospaj espíritu santota chasquishcamantami chashna yachachirca. Ashtahuancarin paipaj punta huauqui Jesús yachachishca ejemplocunata estudiashpami chashna yachachishcanga. Chaimantami Santiago libropi intindirinalla ejemplocunamanta yachai tucunchij (Santiago 3:2-6, 10-12-ta liyipai).

16. ¿Imamantataj intindirinalla ejemplocunahuan yachachina canchij?

¹⁶ Santiago shina intindirinalla ejemplocunahuan yachachishunchij. Gentecunaman intindirinalla ejemplocunahuan yachachijpica paicunaca ima yachachishcacunatami yuyaringacuna, alli intindingacuna. Jesusca gentecunamanca intindirinalla ejemplocunahuanmi yachachirca. Paipaj huauqui Santiagopish chashnallatajmi yachachirca. Cunanca Santiago yachachishca shuj ejemplomantami alli yachashun.

17. ¿Santiago 1:22 al 25-pi tiyaj ejemploca imamantataj valishca can?

¹⁷ (Santiago 1:22-25-ta liyipai). Santiagoca Bibliata liyishpalla mana saquirina cashcata, ashtahuanpish Bibliata liyishpaca ñucanchij causaipi pajtachina cashcatami yachachisha nirca. Chaita yachachingapajca Santiagoca Bibliata estudianataca espejopi ricurinahuanmi chꞌimbapurarca. ¿Paica imatataj yachachisha nirca? Shuj runa espejopi ricurishpa, imata allichina cajpi, mana allichirishpaca yangami canman. Shinallataj Bibliata estudiashpa, ñucanchij ruraicunapi, yuyaicunapi mana cambiashpaca Bibliata liyishcapish yangami canga. Santiago churashca ejemploca tucuicunapajmi rijsishca can.

18. ¿Ejemplocunahuan yachachicushpaca ima quimsa yuyaicunatataj pajtachina canchij?

¹⁸ Santiago shina intindirinalla ejemplocunahuan  yachachingapajca cai quimsa yuyaicunatami pajtachina canchij: 1) imata yachachicushpaca chai yuyaimanta parlaj ejemplotami agllana canchij, 2) gentecunapaj rijsishca ejemplocunahuanpishmi yachachina canchij, 3) chai ejemplohuanmi imata yachachisha nishcataca alli intindichina canchij. Pero alli ejemplocunata agllana sinchi cajpica Índice de las publicaciones Watch Tower nishcapi, “Ejemplos” nishcapi yaicushpami ricui tucungui. Shinapish caipi yuyashunchij. Ejemplocunaca shuj micrófono shinami can. Maipica importante noticiacunallatami microfonopica huillancuna. Shinallatajmi valishca yuyaicunata intindichingapajlla ejemplocunahuanca yachachina canchij. Pero gentecuna ricuchunlla, jatunyachichunllaca alli yachachijcuna shina mana casha ninchijchu. Ashtahuanpish gentecuna Jehová Diosta sirvichunmi ayudasha ninchij.

19. ¿Huauqui panicunata cꞌuyashcataca ima shinataj ricuchinchij?

¹⁹ Alli yachachij Jesushuan causana privilegiotaca ñucanchijca mana charishcanchijchu. Pero Diosta alli sirvij huauqui panicunahuan tandalla sirvina privilegiotami charinchij. Huauqui panicunahuan predicashpa, gentecunaman yachachishpaca paicunamantami ashtahuan yachanchij. Chashnami paicunata cꞌuyashcata ricuchinchij. Ñucanchijpish Santiago shina humilde, alli yachachijcuna cashpaca Jehová Diostami jatunyachishun. Ashtahuancarin gentecunatapish Jehová Diosta sirvichunmi ayudashun.