1. ¿Jehová Dioshuan tiempota pasangapajca imatataj rurana canchij?

 TUCUICUNAMI ñucanchij amigocunahuan, familiacunahuan tiempota pasasha ninchij. Cusa huarmica paicunalla pasangapaj tiempota surcushpaca allimi sintirincuna. Jovencunapish amigocunahuan tiempota pasanatami munancuna. Ñucanchijpajcarin huauqui panicunahuan pasanaca valishcami can. Pero ashtahuantajca shuj amigohuan pasangapaj tiempota surcuj shinami, Diospajman cꞌuchuyangapaj tiempota surcuna canchij. Chaipajca paita mañashpa, Bibliata liyishpa, pai cusha nishcacunapi yuyashpa, pai ima shina cashcapi yuyashpami paipajman cꞌuchuyai tucunchij. Jehová Dioshuan pasangapaj tiempota surcunaca valishcami can (Salmo 139:17).

2. ¿Diospajman cꞌuchuyangapajca imamantataj maipica sinchi can?

² Maipica achca ocupados cashcamantami Jehová Diospajman cꞌuchuyangapajca tiempota mana charinchij. Trabajomanta, familiamanta, shujtaj cosascunamantami Yayitu Diosta mañangapaj, Bibliata estudiangapaj, chaipi yuyangapajca tiempota mana charinchij.

3. ¿Tiempota ama yangamanta pirdingapajca imamantataj cuidarina canchij?

³ Pero maipica mana importante ruraicunamantami Yayitu Diospajman cꞌuchuyangapajca tiempota mana charinchij. Por  ejemplo, tucuicunami divirtirisha ninchij. Pero chaicunallapi yallitaj pasashpaca Diosta mañangapaj, Bibliata liyingapajca tiempota mana charishunchu. Chaimantami tiempota ama yangamanta pirdingapaj cuidarina canchij (Proverbios 25:27; 1 Timoteo 4:8).

4. ¿Cai yachaipica imacunatataj yachashun?

⁴ Cai yachaipica imacunata punta lugarpi churana cashcatami yachashun. Shinallataj Bibliata liyicushpa, Diosta mañacushpa tiempota ima shina alli utilizanatami yachashun. Tucuripica chaita rurashpa ñucanchijllataj ima shina beneficiari tucushcatapishmi ricushun.

5. ¿Efesios 5:15 al 17 versocunaca jovencuna imata rurachuntaj animan?

⁵ Alli decisioncunata agllashunchij. Jovencunataca mana testigo familiacuna, profesorcunaca universidadcunapi estudiashpa cullquiyuj tucuchunmi animancuna. Chaita rurashpaca tal vez jovencitocunaca shujtaj cosascunata rurangapajca tiempotaca manachari charingacuna. Cutin congregacionpica yaya mamacuna, huauqui panicunaca jovencitocunataca Jehová Diosta ashtahuan sirvichunmi animancuna. ¿Diosta cꞌuyaj jovencitocunaca alli decidingapajca imatataj rurai tucuncuna? Jovencuna, cancunaca Efesios 5:15-17-pi ima yachachishcapimi yuyai tucunguichij (chai versota liyipai). * Chai qꞌuipaca cashna nishpami tapuri tucunguichij: “¿Jehová Diosca ñuca imataj rurachuntaj munan? ¿Ima shinataj Diosta cushichi tucuni? ¿Tiempota alli aprovechangapajca imatataj rurana cani?”. Tucuicunami cai millai mundo ñalla tucurinataca yachanchij. Chaimanta Jehová Diospajman cꞌuchuyangapaj tiempota alli aprovechashunchij.

6. a) ¿Mariaca imatataj agllarca? b) ¿Imamantataj chashna decidishcaca alli carca?

⁶ Valishca ruraicunata punta lugarpi churashunchij. Maipica huaquin cosascunatami rurasha ninchij. Pero tiempota alli aprovechangapajca maijan valishca cashcatami ricuna canchij. Jesús, Mariata, Martata visitajpi ima tucushcata ricushunchij. Martaca Jesusta achcata cꞌuyashcamantami paica achca micunata yanushpa carasha nirca. Pero Mariaca Jesús ima yachachishcata uyanatami decidirca. Martaca yanunata decidishpaca ima mana allitaca mana rurarcachu. Pero Jesusca: “Mariaca ashtahuan allitami agllashca” nircami (Lucas 10:38-42). Tiempohuanca Mariaca ima micushcataca cungarishcangami. Pero Jesús yachachishcataca manataj cungarishcangachu. Mariaca Jesús yachachishcata uyangapajmi tiempota surcurca. Ñucanchijpish chashnallatajmi Jehová Dioshuan pasangapaj tiempota surcuna canchij. ¿Chaita ruracushpaca tiempota alli aprovechangapaj imatataj rurana canchij?

7. ¿Imamantataj Diosta mañana, Bibliata estudiana, estudiashcapi yuyanaca valishca can?

⁷ Yayitu Diosta mañashpa, Bibliata estudiashpa, estudiashcapi yuyashpaca Jehová Diostami adoranchij. Jehová Diosta mañashpaca ñucanchijta cꞌuyaj Yayahuanmi parlanchij (Salmo 5:7). Bibliata estudiashpaca tucuita yachaj Jehová Diosmantami  yachanchij (Proverbios 2:1-5). Bibliata estudiashcapi yuyashpaca Jehová Dios ima laya cashcata, paipaj munai maijan cashcatapishmi intindinchij. Chaicunata rurashpaca tiempotaca allimi aprovechashun. Pero tiempoca ratomi pasanlla. Chaimanta ¿ima shinataj tiempota alli aprovechana canchij?

8. ¿Shitashca pambaman Jesús rishcamantaca imatataj yachai tucunchij?

⁸ Jehová Diosta mañangapaj, estudiangapajca chulunlla pushtuta mashcashunchij. Jesusca bautizarishca qꞌuipaca 40 punllacunatami shitashca pambapi pasarca (Lucas 4:1, 2). Paica chaipi cashpaca Yayitu Diosta mañangapaj, paipaj munai maijan cashcata yuyangapajmi tiempota surcurca. Chashna rurashcamantami Jesusca sinchi pruebacunataca ahuantai tucurca. ¿Paipaj ejemplomantaca imatataj yachai tucunchij? Achcapura familiahuan causashpaca Jehová Diosta mañangapaj, estudiangapajca shuj tranquilo pushtuta manachari charinchij. Chashna cajpica shuj tranquilo pushtutami mashcai tucunchij. Pani Julie, Jehová Diosta mañangapaj, ima shina shuj tranquilo pushtuta mashcashcata ricushun. Paica Francia llajtapimi paipaj cusahuan shuj uchilla departamentopi causancuna. Paica: “Ñucaca tucui punllacunami parquepi paseanaman rini. Chai parquepi ñucalla cashcamantami, ñuca ima shina sintirishcataca Jehová Diosmanca shungumanta parlani” ninmi.

9. ¿Jesusca ocupado cashpapish Jehová Dioshuan tiempota pasangapajca imatataj rurarca?

⁹ Jesusca maiman rishpapish achca gentecunahuan pasashcamantami ocupado carca. Shuj cutinca achca gentecuna tandanacushpami Jesusta ricunaman rircacuna. Achca gentecunahuan cashpapish Jesusca Jehová Dioshuan tiempota pasangapajmi surcurca. Paica manaraj pacarijpimi pi mana causan chulunlla lugarman rishpa Jehová Diosta mañarca (Marcos 1:32-35).

10, 11. a) Mateo 26:40, 41-pi nishca shinaca ¿Jesusca paipaj discipulocunamanca ima consejotataj curca? b) ¿Paicunaca imatataj rurarca?

¹⁰ Huañunapaj ashalla horascuna faltajpica Jesusca Getsemaní huertaman rishpami Yayitu Diosta mañarca. Dios imata munashcapipishmi yuyarca (Mateo 26:36). Chaipica Jesusca paipaj discipulocunamanca Yayitu Diosta mañana imamanta importante cashcatami yachachirca.

¹¹ Chaipi ima tucushcata ricushun. Paicunaca Getsemanimanca chaupi tutatami chayashcangacuna. Jesusca chaiman chayashpaca apostolcunataca “rijcharishca caichij” nishca huashaca paica Diosta mañanamanmi rirca (Mateo 26:37-39). Ña tigrashpaca paipaj apostolcuna dormicujtami japirca.  Chaimi paica: “Llaquicunata mishangapaj chaparaichij, mañaraichij” nirca (Mateo 26:40, 41-ta liyipai). Jesusca paipaj apostolcuna shaicushca cashcataca allimi yacharca. Pero paica ishqui cutinhuanmi Diosta mañanaman rirca. Cutin tigrashpaca paipaj apostolcuna dormicushcatami japirca (Mateo 26:42-45).

12. ¿Jehová Diosta mañangapaj desanimarishca, shaicushca sintirishpaca imatataj rurana canchij?

¹² Ima hora Diosta mañanata alli agllashunchij. Maipica desanimados, shaicushca cashcamantami Jehová Diosta mañanaca sinchi can. ¿Chashna sintirishpaca imatataj rurana canchij? Huaquin huauqui panicunaca tuta horasmi Jehová Diosta mañajcuna carca. Pero chai rato shaicushca cashcamantami Diosta mañangapajca shujtaj horasta agllashcacuna. Cutin shujtajcunaca Yayitu Diosta shungumanta mañangapajca tiyarishpa, cungurishpami mañancuna. ¿Pero preocupados, desanimarishca sintirishpaca imatataj rurana canchij? Ñucanchij ima shina sintirishcatami shungumanta Jehová Diosmanca tucuita parlana canchij. Paica ñucanchijta cꞌuyashcamantami alli intindinga (Salmo 139:4).

13. ¿Bibliata estudiacushpaca imamantataj celularta o tablettaca silenciopi churana canchij?

¹³ Estudiacushpaca imapish jarcachunca ama saquishunchij. Jehová Diospajman ashtahuan cꞌuchuyangapajca Bibliatami estudiana canchij, tandanacuicunamanpishmi rina canchij. ¿Chaicunata ruracushpaca tiempota alli aprovechangapajca imatataj rurana canchij? Cai tiempopica celularcunata, tabletcunataca achcatami utilizanchij. Huaquin yachajcunaca: “Celularmantami maipica imata yachacushcata mana concentrari tucunchij” ninmi. Psicologiamanta shuj profesorpish: “Celularman cayajpi o mensajecuna chayajpica imata ruracushcapi mana concentrari tucunchijchu” ninmi. Caipi yuyashun. Jatun tandanacuicunapica tucuicuna imata yachachicushcata uyachunmi celulartaca silenciopi churachun mañancuna. Ñucanchijpish Bibliata yachacushpa chaipi concentraringapajca, celulartami silenciopi o shujtaj ladoman churai tucunchij.

14. Filipenses 4:6, 7-pi nishca shinaca ¿ima estudiacushcapi concentrarichunca Jehová Diosca ima shinataj ayudanga?

¹⁴ Bibliata estudiacushpa, tandanacuipi  cashpaca imata yachacushcapi concentraringapaj Jehová ayudachun mañashunchij. Maipica achca problemacunata charishcamantami preocupados sintirinchij. Chaimantami imata yachacushcapi mana concentrari tucunchij. Chashna sintirishpaca atentos uyangapaj, tranquilos sintiringapajmi Jehová Diostaca ayudachun mañana canchij (Filipenses 4:6, 7-ta liyipai).

15. ¿Jehová Dioshuan pasangapaj tiempota surcushpaca ima shinataj beneficiarishun?

¹⁵ Diosta mañashpa, paimanta yachashpa, ima yachashcapi yuyashpaca ashtahuanmi beneficiarishun. Punta lugarpica alli decisioncunatami agllashun. Bibliapica: ‘Yachajcunahuan tandanacujca yachaisapami tucun’ ninmi (Proverbios 13:20). Shinaca tucuita yachaj Jehová Dioshuan tiempota pasashpaca ñucanchijpish yachajcunami tucushun. Yayitu Dios imata munashcata, alli decisioncunata agllanatapishmi yachashun.

16. ¿Jehová Dioshuan tiempota pasashpaca imamantataj alli yachachijcuna cashun?

¹⁶ Ishquipica alli yachachijcunami cashun. Jehová Diosta mañashpa, paimanta yachashpaca Jehová Diostami ashtahuan cꞌuyashun. Chashna cꞌuyashpaca shujtajcunatapish Jehová Diosta cꞌuyachunmi yachachi tucushun. Jesuspish Diosmanta yachachicushpaca paita cꞌuyashcatami ricuchirca. Chashna yachachishcamantami paipaj discipulocunapish Jehová Diosta cꞌuyai callarircacuna (Juan 17:25, 26).

17. ¿Diosta mañashpa, Bibliata estudiashpaca ima shinataj ñucanchij feta sinchiyachinchij?

¹⁷ Quimsapica sinchi fetami charishun. Yayitu Diosta mañashpa, pai ñucanchijta ayudajpica ñucanchij fetami sinchiyachinchij (1 Juan 5:15). Bibliata estudiashpacarin ashtahuanmi ñucanchij feta sinchiyachinchij. Bibliapica: ‘Crinaca Diospaj Shimita uyashcamantami shamun’ ninmi (Romanos 10:17). Pero sinchi feta charingapajca yachashpallaca mana saquirinachu canchij. Imata ashtahuan ruranata ricushun.

18. ¿Imata yachacushcapica imamantataj yuyarina canchij? Shuj ejemplomanta parlai.

¹⁸ Imata yachacushcapimi yuyarina canchij. Salmo 77-ta quillcajpi yuyashunchij. Paica: ‘Ñucapish, shujtajcunapish Diospaj ñaupajpica mana allimi ricurinchij’ nishpami achcata preocuparirca. Chaimantami paica dorminatapish mana pudirca (Salmo 77:2-8). ¿Chashna sintirishpaca imatataj rurarca? Paica Jehová Diostaca: “Quiquin imalla ruracushcacunataca yuyaricushallami” nircami (Salmo 77:12). Paica Jehová Dios paipaj pueblota ima shina ayudashcatami  alli yacharca. Chaita yachashpapish paica: ‘¿Jehová Diosca ñucanchijhuan pꞌiñarishca cashcamantachu paica cꞌuyanata saquishca?’ nishpami tapurirca (Salmo 77:9). Pero chai solopi yuyanapaj randica Jehová Dios ima shina paipaj pueblota cꞌuyaihuan ayudashcapimi yuyarirca (Salmo 77:11). Chaita rurashcamantaca paica Jehová Dios paipaj pueblota manataj saquij cashcatami intindirca (Salmo 77:15). Ñaupa punllapi Jehová Dios paipaj pueblota ima shina ayudashcapi yuyashpa, ñucanchijtapish ima shina ayudashcapi yuyarishpaca ñucanchij fetami ashtahuan sinchiyachishun.

19. ¿Jehová Dioshuan tiempota pasashpaca ima shinataj beneficiarishun?

¹⁹ Chuscupica Jehová Diostami ashtahuan cꞌuyashun. Diosta cꞌuyashpaca paitami tucuipi cazushun. Paita sirvingapajmi imatapish rurashun. Ima llaquicunatapishmi ahuantashun (Mateo 22:37-39; 1 Corintios 13:4, 7; 1 Juan 5:3). Ñucanchijpajca Jehová Diospaj amigo canami tucuimanta valishca can (Salmo 63:1-8).

20. ¿Jehová Dioshuan tiempota pasangapaj canca imatataj rurasha ningui?

²⁰ Cai yachaipi ricushca shinaca Diosta mañashpa, Bibliata estudiashpa, estudiashcapi yuyashpaca Diostami adoranchij. Chaimanta Jesús shina Jehová Diosta mañangapajca chulunlla pushtucunata mashcashunchij. Shinallataj Bibliata estudiacushpapish alli concentrarishunchij. Mana concentrari tucushpaca Jehová Diosta ayudachun mañashunchij. Chashna tiempota alli aprovechajpica Jehová Diosca shamuj punllapicarin huiñai causaitami cunga (Marcos 4:24).