1, 2. a) ¿Robert huauquica imamantataj esforzarina carca? b) ¿Ima shinataj esforzarishcata ricuchirca?

ROBERTCA 15 huatacunata charishpami bautizarirca. Shinapish mana tucui shunguhuan Diosta sirvicurcachu. Paica: “Ima mana allitaca mana rurarcanichu. Tandanacuicunamanpish mana faltajchu carcani. Huatapica huaquin quillacunatami precursor auxiliar tucuj carcani. Chaimantami Dioshuan alli apanacushcata yuyarcani” ninmi. Pero Robertca Dioshuan ashtahuan apanacungapajmi esforzarina carca.

² Robertca cazarashpami ima cambiocunata rurana cashcata intindirca. Paica: “Huaquinpica ñuca huarmihuanmi Bibliamanta tapuicunata rurashpa pugllaj carcanchij. Ñuca huarmica Bibliata alli yachashcamantami casi tucui tapuicunata cutichijlla carca. Pero ñucaca casi mana imata cutichi valijchu carcani. Pingaimi tucuj carcani. Chaimantami, alli cusa, alli uma cangapaj esforzarina carcani” ninmi. Robertca Bibliata ashtahuan estudianapimi dedicarirca. Chashnami Bibliata alli intindirca. Dioshuanpish alli apanacuj tucurca.

3. a) ¿Huauqui Robertmantaca imatataj yachai tucunchij? b) ¿Ima tapuicunamantataj yachagrinchij?

 ³ ¿Huauqui Robertmantaca imatataj yachai tucunchij? Ñucanchijcunaca tucui tandanacuicunamanchari ricunchij, huillanamanpish llujshinchijchari. Bibliapi huaquin yachaicunatapish yachanchijchari. Chashna cashpapish mana siempre Dioshuan alli apanacushcata nisha ninchu. Dioshuan alli apanacungapaj esforzarishca cashpapish ashtahuan esforzarina cashcatachari cuentata cungui (Filipenses 3:16). Cai yachaipica Dioshuan ashtahuan apanacushpa catingapaj imata ruranatami yachagrinchij. Chaipajca cai tapuicunatami cutichina canchij: 1) ¿Dioshuan alli apanacushcata o mana alli apanacushcataca ima shinataj yachai tucunchij? 2) ¿Diospi tucui shunguhuan crishpa paipajman ashtahuan cꞌuchuyangapajca imatataj rurai tucunchij? 3) ¿Dioshuan alli apanacushpaca ima shinataj causashun?

4. ¿Efesios 4:23, 24-pi nishca shimicunaca imatataj yachachin?

⁴ Diosta sirvingapajca achca cambiocunatami rurana carcanchij. Bautizarishca qꞌuipapish cambiocunata rurashpami catina carcanchij. Bibliapica: “Cancunapaj shungutapish, yuyaitapish mushujyachichij” ninmi (Efesios 4:23, 24). Griego rimaipica “mushujyachichij” nishpaca cambiocunata rurashpa catina cashcatami nisha nin. Juchayuj cashcamantaca tucuicunami cambiocunata rurashpa catina canchij. Achca huatacunata Diosta sirvicushpapish paihuan alli apanacungapajmi esforzarina canchij (Filipenses 3:12, 13).

5. ¿Dioshuan alli apanacushcata o mana alli apanacushcata yachangapajca imatataj tapurina canchij?

⁵ Jovencuna, mayorcuna cashpapish Dioshuan alli apanacushcata o mana alli apanacushcatami ricuna canchij. Chaita yachangapajca ¿Dioshuan ashtahuan cꞌuchuyacushcata sintinichu? ¿Jesús shina cangapajca esforzaricunichu? ¿Ñuca ruraicunapish, rimaipish tandanacuipica imatataj ricuchin? ¿Ñuca parlashcacunahuanca imata munashcatataj ricuchini? ¿Bibliata alli estudiajchu cani? ¿Pi consejota cujpica ima shinataj chasquini? ¿Ñuca ropa churashcahuanpish imatataj ricuchini? ¿Tentacioncuna ricurijpica imatataj rurani? ¿Diosta alli rijsij, alli cazujchu tucushcani? nishpami tapurina canchij (Efesios 4:13). Cai tapuicunapi yuyashpami Diospajman ashtahuan cꞌuchuyacushcata o imapi esforzarina cashcata yachashun.

6. ¿Dioshuan alli apanacuj cashcata yachangapajca picunataj ayudai tucun?

⁶ Dioshuan alli apanacuj cashcata o mana alli apanacuj cashcata yachangapajca shujtaj huauqui panicuna ayudachunmi minishtinchij. Apóstol Pabloca aicha munaillata ruraj runaca Diospaj ñaupajpi ima mana allita ruracushcataca mana cuentata cunchu nircami. Cutin, Diospaj espirituta charij runaca Dios yuyashca shinami yuyan. Aicha munaillata rurana mana alli cashcatapishmi yachan (1 Corintios 2:14-16; 3:1-3). Congregacionpi huauqui ancianocunaca Cristopaj yuyaita charishcamantami pi aicha  munashcata rurai callaricushcata utca cuentata cun. Chaita ricushpaca chai huauquita o panita ayudangapajmi esforzarin. Aicha munaita ñucanchij rurai callaricujpi ancianocuna ayudasha nijpica ¿paicuna cushca consejocunata pajtachishunchu? Chai consejocunata pajtachishpaca Dioshuan alli apanacuj casha nishcatami ricuchishun (Eclesiastés 7:5, 9).

7. ¿Dioshuan alli apanacuj cangapajca imatataj rurana canchij?

⁷ Dioshuan alli apanacuj cangapajca mana Bibliata alli yachanalla minishtirinchu. Por ejemplo, Salomonca Jehová Diosmantaca achcatami yacharca. Huaquin pai nishcacunacarin Bibliapimi quillcashca can. Achcata yachashpapish Diosta sirvinatami saquirca (1 Reyes 4:29, 30; 11:4-6). Chaimantami Bibliamanta alli yachashpapish Diospi ashtahuan cringapaj esforzarishpa catina canchij (Colosenses 2:6, 7). ¿Ima shinataj chaita rurai tucunchij?

8, 9. a) ¿Sinchi crijcuna cangapajca imatataj rurana canchij? b) ¿Ima munaihuantaj estudiana, yachashcapi cutin cutin yuyanapish canchij? (Página 22-pi tiyaj fotocunata ricui).

⁸ Jesusta punta catijcunamanca Pabloca: ‘Ashtahuan sinchiyangapaj ñaupajman richij’ nircami (Hebreos 6:1). Cunan punllapish Pablo nishcatami rurana canchij. Chaipajca “Yaya Diosta cꞌuyashpa cati” librotami estudiana canchij. Cai librota estudiashpaca ñucanchij causaipi Bibliapi mandashcacunata ima shina pajtachinatami yachashun. Cai librota ña estudiashca cashpaca sinchi crij cangapajmi shujtaj publicacioncunata estudiana canchij (Colosenses 1:23). Shinallataj cutin cutinmi chai yachashcacunapi yuyana canchij. Yachashcacunata pajtachingapajpishmi ayudachun Diosta mañana canchij.

⁹ Diospaj ñaupajpi alli ricurina munaihuan, paita tucuipi cazuna munaihuanmi estudiana, yachashcapi yuyanapish canchij (Salmo 40:8; 119:97). Shinallataj Diospajman ashtahuan cꞌuchuyangapaj ima jarcaicunamantapishmi caruyana canchij (Tito 2:11, 12).

10. ¿Dioshuan ashtahuan apanacungapajca jovencunaca imatataj rurai tucun?

¹⁰ Joven, ¿Jehová Diosta ima shina ashtahuan  sirvinata ñachu yachangui? Betelpi sirvij shuj huauquimanta parlashun. Paica jatun tandanacuicunapica bautizarigrijcunahuanmi parlanata munan. Paica: “¿Diosta ashtahuan sirvingapajca imallatataj ruragringui?” nishpami tapunata yachan. Maijancunaca huillangapaj minishticushca llajtacunapi sirvinamanmi risha nincuna. Shinallataj precursor, betelita o chashna laya sirvinatami munancuna. Cutin shujtaj jovencunaca imata contestanataca mana yachanchu. Chai jovencunaca Diosta sirvingapajca mana achcata rurana minishtirinchu nishpachari yuyancuna. Chaimantami jovencunaca: “¿Tandanacuicunamanpish, huillanamanpish ñuca yaya mama chaita rurachun nishcallamantachu pajtachicuni? Mana cashpaca ¿Dioshuan alli apanacushcamantachu chaita rurani?” nishpami tapurina can. Tucuicunami Diosta ashtahuan sirvingapaj imata ruranata yuyarina canchij. Chashnami Dioshuan ashtahuan apanacushun (Eclesiastés 12:1, 13).

11. a) ¿Dioshuan ashtahuan apanacungapajca imatataj ashtahuan rurai tucunchij? b) ¿Pi shinataj casha ninchij?

¹¹ Imapi cambiana cashpaca utcami cambiana canchij. Mana cambiashpaca aicha munaicunaca huañuimanmi apai tucun (Romanos 8:6-8). Jehová Diosca ñucanchijcuna pandarijlla cashcataca allimi yachan. Pero paipaj espirituhuanmi alli rurangapaj ayudai tucun. Chashnapish siempremi esforzarina canchij. Achca huatacuna huashamanca Cuerpo Gobernantepi trabajaj John Barr huauquica Lucas 13:24-manta parlashpaca “Mana esforzarishcamantami achcacunaca quichqui  pungutaca mana yaicui tucuncuna” nircami. Ñucanchijcunaca Jacob shinami cana canchij. Paica bendiciangacamami shuj angelhuan mana shaicushpa macanacurca (Génesis 32:26-28). Bibliata estudianaca sumajmi can. Pero mana leyina cashcallamanta jahua jahua leyinachu canchij. Ashtahuanpish Diospajman ashtahuan cꞌuchuyangapajmi Bibliapi tiyaj valishca yuyaicunata taringapaj esforzarina canchij.

12, 13. a) ¿Cristo yuyashca shina yuyangapajca imatataj rurai tucunchij? b) ¿Pedropaj ejemplopish paipaj consejopish ima shinataj ayudai tucun? c) ¿Diospajman cꞌuchuyangapajca imatataj rurai tucunchij? (“¿Diospajman ashtahuan cꞌuchuyangapajca imatataj rurai tucunchij?” nishca cuadrota ricui).

¹² Dioshuan alli apanacungapaj esforzarijpica Diosllatajmi paipaj espíritu santohuan ñucanchij panda yuyaicunata cambiangapaj ayudanga. Chashnami asha asha Cristo yuyashca shina yuyai callarishun (Filipenses 2:5). Shinallataj Diospaj espíritu ayudajpimi mana alli munaicunata saqui tucushun. Dios munashca shinami cꞌuyaj llaquij cashun (Gálatas 5:16, 22, 23). Aicha munaillata ruranata o charinallapi yuyacushpaca ama shaicushunchijchu. Jehová Diosta paipaj espíritu santota cuchun mañashpa catishunchij. Chashna rurajpica Jehová Diosllatajmi alli yuyaicunata charingapaj ayudanga (Lucas 11:13). Apóstol Pedrota yuyarishun. Paipish huaquinpica Cristo yuyashca shina yuyanatami cungarirca (Mateo 16:22, 23; Lucas 22:34, 54-62; Gálatas 2:11-14). Pero paica mana chaipi saquirircachu. Diospaj ayudahuanmi asha asha Cristo yuyashca shina yuyai callarirca. Ñucanchijpish chashnallatajmi rurai tucunchij.

¹³ Tiempo qꞌuipaca Pedrollatajmi quiquinllataj jarcarij, mana pꞌiñarij, quiquin huauquindij shina cꞌuyanacuj cangapaj esforzarichij nishpa yachachirca (2 Pedro 1:5-8-ta leyipai). Pedro nishca shina cangapajmi esforzarina canchij. Chashnami Diospajman ashtahuan cꞌuchuyashun. Chaimanta cada punllacuna “¿Diospajman ashtahuan cꞌuchuyangapajca imatataj rurai tucuni?” nishpa tapurishunchij.

14. ¿Dioshuan alli apanacushpaca ima shinataj causashun?

¹⁴ Escuelapipish, trabajopipish ñucanchij rimashcahuan, rurashcahuanmi Jesús yuyashca shina yuyashcata ricuchi tucunchij. Shinallataj tucui punllacuna alli decisionta japishpami Jesusta catij cashcata ricuchishun. Dioshuan alli apanacushpaca imapish Diosmanta caruyachichun mana saquishunchu. Ima tentacioncuna ricurijpipish mana rurashunchu. Ima decisioncunata japigricushpaca: “¿Alli decisionta japingapajca ima versocunataj ayudai tucun? ¿Jesusca imatashi ruranman carca? ¿Diospaj ñaupajpi alli ricuringapajca ima decisiontataj japisha?” nishpami siempre tapurina canchij. Cunanca huaquin ejemplocunata ricushun. Alli decidingapajmi cada ejemplopi shuj verso tiyan.

15, 16. a) ¿Pihuan cazaranata agllacushpaca ima shinataj Jesús shina yuyashcata ricuchishun? b) ¿Pihuan apanacunata agllacushpaca ima shinataj Jesús shina yuyashcata ricuchishun?

¹⁵ ¿Ima shinataj pihuan cazaranata alli agllai tucunchij? Caita yachangapajca 2 Corintios 6:14, 15–ta leyipai. Pabloca Diospaj espirituta charij runaca mana aicha munaillata ruraj shinachu yuyan nircami. Shinaca pihuan cazaranata yuyacushpaca ¿ima shinataj cai versota pajtachi tucunchij?

¹⁶ ¿Ima shinataj alli amigocunata agllai tucunchij? Caita yachangapajca Proverbios 13:20-ta leyipai. Diospaj espirituta charijcunaca Diosmanta caruyachi tucuj gentecunahuanca mana apanacunachu can. Proverbios  13:20-pi nishca shimicunata pajtachingapajca: “¿Redes sociales nishcata utilizacushpaca ima shinataj cai versopi nishca shina rurasha? ¿Internetpi shuj mana rijsishca pugllangapaj invitacionta cachajpica imatataj rurasha?” nishpa tapurishunchij.

17-19. a) ¿Dioshuan alli apanacuj cashpaca imatataj mana rurana canchij? b) ¿Dioshuan alli apanacuj cashpaca ima shinataj ashtahuan Diosta sirvi tucunchij? c) ¿Shujtajcunahuan problemacunata charishpaca ima shinataj Dioshuan alli apanacuj cashcata ricuchishun?

¹⁷ ¿Ima ruraicunataj Dioshuan alli apanacungapaj jarcai tucun? Shuj alli consejotami Bibliapi tari tucunchij (Hebreos 6:1-ta leyipai). Pabloca ‘huañunaman pushaj millai ruraicunamantami’ yachachirca. Cai ruraicuna imapajpish mana valinchu. Ashtahuanpish Dioshuan alli apanacungapajmi jarcan. Pablo nishca consejota yuyarishpami cai tapuicunatapish cutichi tucunchij: “¿Caita rurashpaca Diospajman ashtahuan cꞌuchuyashachu o caruyashachu? ¿Ashtahuan cullquita ganasha nishpa chai trabajota chasquishachu? Shinallataj mana alli ruraicunata tucuchingapaj grupocunami tiyan, ¿chai grupocunapica imamantataj mana participana cani?”

¹⁸ ¿Diosta ashtahuan sirvingapajca imatataj rurai tucuni? Jesús urcupi yachachicushpami Diosta ashtahuan sirvingapaj imata ruranata nirca (Mateo 6:33). Diospaj espirituta charijca Diospaj ruraicunatarajmi puntapi churashpa causan. Cai versota yuyaipi charishpaca universidadpi yachanata o shuj trabajota chasquinata alli o mana alli cashcatami yachashun.

¹⁹ ¿Pꞌiñanacui tiyajpica imatataj rurai tucunchij? Pihuan pꞌiñanacushpaca Romapi causaj huauqui panicunaman Pablo cushca consejotami pajtachi tucunchij (Romanos 12:18). Diosta sirvijcunaca tucuicunahuan sumajta causangapajmi esforzarina canchij. Chaimantami: “¿Pihuan shuj problemata charishpaca imatataj rurani? ¿Shujtajcuna imata nijpi uyanata yachanichu? ¿Shujtajcunahuan problemacunata charishpa paicunahuan alli tucungapaj esforzarij cashcatachu ricuchini?” (Santiago 3:18).

20. ¿Imamantataj Dioshuan ashtahuan apanacusha ningui?

²⁰ Caipi yachashca shinaca ima decisioncunata japingapajca Bibliapi nishcacunatami alli yuyana canchij. Chashna rurashpaca Dioshuan alli apanacuj cashcatami ricuchishun. Shinallataj ashtahuan cushillami causashun. Robert huauquita yuyarishun. Paica “Dioshuan alli apanacuj tucushpaca ashtahuan alli cusa, alli yayami tucurcani. Shinallataj ashtahuan cushillami sintirircani” ninmi. Dioshuan ashtahuan apanacungapaj esforzarishpaca Robert shinami achca bendicioncunata charishun. Shinallataj allimi causashun, shamuj punllacunapicarin huiñai causaita chasquishpami yallitaj cushicushun (1 Timoteo 6:19).