Asha huatacuna huashamanca Mesiaspaj ñaupa yayacunaca punta churicunalla cana cashcatami crij carcanchij. ¿Imamantataj chaita crij carcanchij? Hebreos 12:16-pica Esauca “Diospajlla cashcata” mana valichishpami Jacobman ‘asha micunallapi punta churi cana cashcataca cꞌaturca’ ninmi. Jacob ‘punta churi cana cashcata’ chasquishcamantami Mesiaspaj ñaupa yaya cana cashcata yuyarcanchij (Mateo 1:2, 16; Lucas 3:23, 34).

Shinapish shujtaj versocunata alli estudiashpami Mesiaspaj ñaupa yaya cangapajca punta churi cana mana minishtirishca cashcata intindishcanchij. Chaimanta ashtahuan yachashun.

Leahuan Jacob charishca punta churica Rubenmi carca. Cutin, Raquelhuan Jacob charishca punta churica Josemi carca. Rubén huainayashpaca punta churi cana cashcatami pirdirca. Paipaj randica paipaj huauqui Josemi punta churi cana cashcata chasquirca (Génesis 29:31-35; 30:22-25; 35:22-26; 49:22-26; 1 Crónicas 5:1, 2). Shina cajpipish Mesiasca mana Rubenmanta o Josemanta shamurcachu. Mesiasca Leahuan Jacob charishca Judá churimantami shamurca. Judaca cuarto churimi carca (Génesis 49:10).

Lucas 3:32-pica Mesiaspaj 5 ñaupa yayacunapaj shuticunami ricurin. Paicunaca punta churimi cashcacuna yuyachin. Por ejemplo, Obedca Boozpaj (Boaz) churimi carca. Isaica (Jesé) Obedpaj churimi carca (Rut 4:17, 20-22; 1 Crónicas 2:10-12).

Davidca Isaipaj churimi carca. 8 huahuacunamantaca último churimi carca. Mana punta churi cajpipish Mesiasca Davidmantami shamurca (1 Samuel 16:10, 11; 17:12; Mateo 1:5, 6). Shinallataj Davidpaj churi Salomonmi Mesiaspaj ñaupa yaya tucurca. Salomonpish mana punta churichu carca (2 Samuel 3:2-5).

 Shinaca, cai versocunapi ricushca shinaca ¿punta churi canaca manachu importante carca? Chai versocunaca mana chaita yachachinchu. Ashtahuanpish punta churicunaca shujtaj churicunamanta yallimi imatapish chasquijcuna carca. Achcacunacarin familiapaj umami tucujcuna carca. Herenciatapish ishqui cutinmi japijcuna carca (Génesis 43:33; Deuteronomio 21:17; Josué 17:1).

Punta churi cana cashcataca shujtaj churicunaman cunallami carca. Por ejemplo, Abraham paipaj churi Ismaelta caruman cachajpica Isaacmi punta churi cana cashcata japirca (Génesis 21:14-21; 22:2). Shinallataj ñaupa parrafocunapi nishca shinaca Rubenpaj punta churi canataca Josemi chasquirca.

Hebreos 12:16-pica: ‘Ñataj cancunapurapica maijan huainayaj tiyanman, mana cashpaca, imapish Diospajlla cashcata Esaú shina yangachijcuna tiyanman. Paica asha micunallapimi punta churi cana cashcataca cꞌaturca’ ninmi. ¿Caita nishpaca apóstol Pabloca imatataj nisha nicurca?

Cai versopica ¿Pabloca Mesiaspaj ñaupa yayacunamantachu parlacurca? Mana. Ashtahuanpish Pabloca Jesusta catijcunata cunashpami: ‘Cancunapaj huishtu ñancunata derechaichij. Alli ricuraichij, ñataj maijancunaca Diospaj mana cꞌuyaipajta cꞌuyaj canata chingachinguichijman’ nirca. Jesusta catijcuna huainayashpaca Diospaj cꞌuyaitami chingachi tucunman carca (Hebreos 12:12-16). Chashna rurashpaca Esaú shinami “Diospajlla cashcata” mana valichishcata ricuchincunaman carca. Esauca pai munashcallatami rurarca.

Chai punllacunapica Esauca Jehová Diosmanmi sacrificiocunata cuj cashca canga. Chaica shuj bendicionmi carca (Génesis 8:20, 21; 12:7, 8; Job 1:4, 5). Pero Esauca paipaj munaita ruranallata yuyashcamantami punta churi cana bendiciontaca shuj plato lentejapi cꞌaturca. Jehová Diosca Abrahampaj huahua huahuacunaca llaquitami charinga nircami. Chai llaquicunatami Esauca mana charisha nishca canga (Génesis 15:13). Shinallataj Diosta mana sirvij ishqui huarmicunahuan cazarashpami Diospajlla cashcata mana valichishcata ricuchirca. Chaita rurajpica paipaj yaya mamaca achcatami llaquirirca (Génesis 26:34, 35). Cutin, Jacobca mana Esaú shinachu carca. Paica Diosta alli sirvij huarmihuanmi cazararca (Génesis 28:6, 7; 29:10-12, 18).

¿Cai versocunapica Mesiaspaj ñaupa yayacunamantaca imatataj yachashcanchij? Maijancunaca punta churicunami carca, cutin shujtajcunaca mana punta churicunachu carca. Caitaca judiocunaca allimi yacharca. ¿Imamantataj chaita ninchij? Judiocunallatajmi Isaipaj último churi Davidmantami Mesiasca shamunga nircacuna (Mateo 22:42).