1-3. a) ¿Cai tucuri punllacunapi Diosmanta ama caruyangapajca imatataj rurana canchij? b) ¿Cai temapica imatataj yachashun?

CAI Allpapi mana alli ruraicunata Dios tucuchina punllaca ñami quichquiyacun. Mana alli gentecunaca ‘qꞌuihua shinami yallitaj mirashpa’ caticun (Salmo 92:7). Chaimantami Dios mandashcacunata mana cazujcuna ashtahuan tiyan. Pero Pabloca: “Ama huahuacuna shina yuyaichijchu, ashtahuanpish yuyajcuna shina yuyaichij. Ima mana allipajca, huahuacuna shina caichij” nircami (1 Corintios 14:20). ¿Chai versopi nishca shina cangapajca imatataj rurai tucunchij?

² Imata rurana cashcataca Proverbios 28:5-pimi yachai tucunchij. Chaipica: ‘Ashtahuanpish Mandaj Dios yuyailla causajcunaca tucuitami yachan’ ninmi. Cai versopi nishca shinaca Diospaj ñaupajpi alli ricuringapaj imata ruranataca allimi yachana canchij. Proverbios 2:7, 9-pipish, ‘paimi allita rurajcunamanca, mana pandachij alli yachaita cun. Pai yachachijpimi  cashcata ruraj canatapish, allita ruraj canatapish, mana pandarij canatapish, tucuipi alli canatapish yachangacuna’ ninmi.

³ Noepish, Danielpish, Jobpish Diospaj yachaitami charircacuna (Ezequiel 14:14). Cunan punllapipish Diosta sirvijcunaca Diospaj yachaitami charincuna. Canpish, ¿Diospaj ñaupajpi alli ricuringapaj imata ruranataca allichu yachangui? Chaipajca Diostami alli rijsina cangui. Chaimantami cai temapica Noepish, Danielpish, Jobpish Diosta ima shina rijsishcata yachashun. Qꞌuipaca Diosmanta yachashpa ima shina causashcatami yachashun. Shinallataj paicuna shina Diospi cringapaj imata ruranatami yachashun.

4. a) ¿Noeca ima shinataj Diosta rijsirca? b) ¿Diosta alli rijsishpaca Noeca imatataj rurarca?

⁴ ¿Noeca ima shinataj Diosta alli rijsirca? Adanpaj Evapaj huahuacuna causashca punllamantami Dios rurashcacunata ricushpa, shujtajcuna yachachijpi, tucuipi cazujpi Dios ima shina bendiciajta ricushpami gentecunaca Diosmanta yachashcacuna (Isaías 48:18, QC, 1989). Noeca Dios rurashcacunata ricushpami Dios tiyashcata, cꞌuyaj, llaquij cashcatapish yacharca. Shinallataj ‘huiñaipaj poderyuj’ cashcatapish, pailla Dios cashcatapishmi yachaj chayarca (Romanos 1:20). Noeca Diosta alli rijsishpami paipi tucui shunguta churarca.

5. ¿Jehová Dios gentecunapaj imata munashcataca Noeca ima shinataj yacharca?

⁵ Bibliapica: “Crinaca huillashcata uyashcamantami shamun” ninmi. Cai versopi nishca shinaca shujtajcuna parlajpipishmi Diospi cri tucunchij (Romanos 10:17). ¿Noemanca pitaj Diosmanta parlarca? Paipaj familiacunami Diosmanta parlashca canga. Por ejemplo, paipaj yaya Lamecca Diospi tucui shunguhuan crijmi carca. Lamec huacharishca punllacunaca Adán Evapish causacurcarajmi (página 9-pi tiyaj dibujota ricui). Shinallataj Matusalenca Noepaj abuelomi carca. Cutin Jaredca tatarabuelomi carca. Jaredca Noé huacharishca punllamanta 366 huatacuna qꞌuipami huañurca (Lucas 3:36, 37) * (urapi tiyaj notata ricui). Caipi ricushca shinaca Lamecpish, Matusalenpish, Jaredpish paicunapaj huarmicunandijmi Noemanca Diosmanta parlashca canga. Chaimi Noeca Jehová Dios gentecunata rurashcata, huahuacunata charishpa cai pachata jundarichun mandashcata, Diosta sirvishpa causanatapish yachashca canga. Shinallataj Noeca Adán Eva Diosta mana cazushcamanta llaquicuna tiyashcatami ricushca canga (Génesis 1:28; 3:16-19, 24). Cai tucui yachashcacunataca Noeca paipaj shungupimi huaquichirca. Chaimantami tucui shunguhuan Diosta sirvishpa causarca (Génesis 6:9).

6, 7. ¿Dios cusha nishcacunapi yuyashpaca Noeca imatataj rurarca?

⁶ Jehová Dios cusha nishcacunata yuyarishpami paipi ashtahuan cri tucunchij.  Noepi yuyashun. Lamecca Dios yuyachijpimi Noemantaca cashna nirca: “Mandaj Dios allpata mana alli nishcamanta, ñucanchij maquihuan allpapi imata rurashpapish sinchita trabajashpa llaquita apacunmantaca cai huahuami samachinga” nircami. Noé shutica ‘samana’ o ‘cushichina’ nisha ninmi. Noé shutica Diosca alli causaita cuna cashcatami ricuchirca. Noeca paipaj shuti ima nisha nishcata yachashpami ashtahuan Diospi crirca (Génesis 5:29). Abel, Enoc shinallatajmi ‘huarmipaj huahua huahuapuramanta’ culebrapaj umata sarunata Noepish crirca (Génesis 3:15).

⁷ Noeca Génesis 3:15-pi nishca profecía ima shina pajtarinata manachari tucuita intindirca. Pero shuj punlla gentecuna cushilla causana cashcataca allimi intindishca canga. Enocpish cai laya profeciatami huillarca. Paica mana alli gentecunata Jehová Dios tucuchina cashcatami nirca (Judas 14, 15). Chai profeciamanta Noé yachashpaca Diospimi ashtahuan crishca canga. Shinallataj Dios cusha nishcacunapimi ashtahuan yuyashpa causashca canga. Enoc huillashca profeciaca Armagedonpimi tucui pajtaringa.

8. ¿Diosta alli rijsinaca Noetaca ima shinataj ayudarca?

⁸ ¿Diosta alli rijsishpaca Noeca ima shinataj beneficiarirca? Noeca Diosta alli rijsishpami paipi tucui shunguhuan crirca, Diosmanta alli yachaitapish charirca. Chaimantami imapish Diosmanta ama caruyachichun cuidarirca. Bibliapica: “Noeca Taita Dioshuanmi purirca” ninmi. Caipi nishca shinaca Noeca Diosta mana respetajcunahuanca mana purircachu. Shinallataj millai angelcunaca jahua pachamanta uriyamushpami runa aichayujcuna tucurca. Paicunaca gentecunatapish yallimi fuerzayujcuna carca. Diosta mana rijsij gentecunaca chai angelcunatami alabasha nishcacuna canga. Pero Noeca chaita mana yuyarcallapishchu (Génesis 6:1-4, 9). Chashnallataj Noeca Jehová Dios gentecunata huahuacunayuj tucushpa cai pachapi jundarichun mandashcatapishmi yacharca (Génesis 1:27, 28). Millai angelcunapaj huahuacunaca shujtaj huahuacunamanta ashtahuan jatun, fuerzayujcunami carcacuna. Chaita ricushpami Noeca millai angelcuna gentecunapaj ushushicunahuan cazaranaca mana alli cashcata intindishca canga. Tiempo pasashca qꞌuipaca Taita Diosca millai gentecunata tucuchingapajmi jatunta tamyachigrini nirca. Noeca Diosta cazushpami jatun arcata rurarca. Chaimantami Noepish paipaj familiapish quishpirirca (Hebreos 11:7).

9, 10. ¿Ima shinataj Noé shina Diospi cri tucunchij?

⁹ ¿Ima shinataj Noé shina Diospi cri tucunchij? Bibliata allimi estudiana canchij. Diospaj yachaicuna ñucanchij shunguman chayachunmi esforzarina canchij. Chai qꞌuipaca yachashcata pajtachinami canchij. Alli decisioncunata japingapajpishmi esforzarina canchij (1 Pedro 1:13-15). Shinaca Diospaj yachaita charishpa, paipi tucui shunguhuan crishpaca Diablopaj trampacunapi mana urmashunchu. Cai mundopi gentecuna shina mana causashunchu (2 Corintios 2:11, NM). Achca gentecunaca millaita rurashpa, huainayashpa, mana alli munaicunallata rurashpami causancuna (1 Juan 2:15, 16). Shinallataj Bibliapi nishcacuna tucui pajtaricushcata ricushpapish Jehová Diospaj punlla ñalla chayamucushcataca cungarincunami. Yuyashun, Jesusca tucuri  punllacunaca Noepaj punllacuna shinami canga nircami. Paica millai gentecuna canamanta o huainayaj canamanta mana parlacurcachu. Ashtahuanpish Diosta sirvinata ama saquingapaj cuidadota charinamantami parlacurca (Mateo 24:36-39-ta leyipai).

¹⁰ Chaimanta cashna tapurishunchij: “¿Ñuca causaipi Diosta alli rijsishcata ricuchicunichu? ¿Diospi crishcamanta pai mandashcacunata cazucunichu? ¿Dios mandashcacunata shujtajcunaman yachachicunichu?” Cai tapuicunata cutichishpami quiquinllataj Dioshuan puricushcata o mana puricushcata yachangui.

11. a) ¿Danielpaj yaya mamaca paimanca imatataj yachachirca? b) ¿Imapitaj Daniel shina casha ningui?

¹¹ ¿Danielca ima shinataj Diosta alli rijsirca? Danielmanca paipaj yaya mamami Diosmanta alli yachachishca canga. Paicunami Diosta cꞌuyanata, Dios mandashcacunatapish cazuchun yachachishca canga. Danielca paipaj tucui causaipimi Diosta cꞌuyashpa catirca. Ña yuyaj cashpapish Diospaj shimita alli yachanata mana saquircachu (Daniel 9:1, 2). Danielca Diostaca allimi rijsirca. Jehová Dios israelitacunata ima shina cuidashcatapishmi alli yacharca. ¿Imamantataj chaita ninchij? Daniel 9:3-19-pica Jehová Diosta humildadhuan, tucui shunguhuan mañashcatami ricui tucunchij. Chai versocunata leyingapaj, chai shimicunapi yuyangapaj asha tiempota cushunchij. Shinallataj leyicushpaca ¿Danielmantaca imatataj yachai tucuni? nishpa tapuri.

12-14. a) ¿Danielca ima shinataj Diospaj alli yachaita charishcata ricuchirca? b) ¿Mana manchashpa cazushcamantaca Diosca ima shinataj Danielta bendiciarca?

¹² ¿Diosta alli rijsishpaca Danielca ima shinataj beneficiarirca? Diosta alli sirvij israelitacunapajca Babiloniapi causanaca sinchimi carca. Jehová Diosca israelitacunataca: “Cancunata ñuca prezu cachashca pueblopaj allita ruraichijlla” nircami (Jeremías 29:7). Pero chai pueblopaj allita rurashpapish Jehová Diosca tucui shunguhuan paillata sirvichunmi mandarca (Éxodo 34:14). Shinaca ¿Danielca ima shinataj chai ishqui mandashcacunata pajtachirca? Danielca Diospaj alli yachaitami charirca. Chaimantami cai pachapi mandajcunata cazunapaj randica Taita Diostaraj cazuna cashcata intindirca. Achca huatacuna qꞌuipaca Jesuspish Diostaraj cazuna cashcatami yachachirca (Lucas 20:25).

¹³ Yuyashun, Danielca cada punllami Diosta mañaj carca. Pero Babiloniocunaca 30 punllacunata ama maijan diostapish mañachun, chai llajtata mandajllata mañachun nishpami shuj leyta churarcacuna (Daniel 6:7-10-ta leyipai). Chai leyta churajpica ¿Danielca imatataj rurarca? Paica, ¿“30 punllacunallami, chai qꞌuipa Diosta mañashpa catishallami” nishpa yuyarcachu? ¿“Ama pi ricuchun” nishpa pacallachu mañarca? Mana. Ashtahuanpish Danielca Diosta adorana ashtahuan importante cashcatami ricuchirca. Gentecunapish Daniel cada punlla Diosta mañaj cashcataca yacharcacunami. Diosta mañanata saquijpica gentecunaca “Danielca Diosta adoranatami saquishca” nincunamanmi carca. Chaimantami huañuchina cajpipish Danielca cada punlla Diosta mañashpa catirca.

 ¹⁴ Danielca mana mancharcachu. Diosta mañashpami catirca. Chaimantami leoncunapaj jutcupi Danieltaca shitarcacuna. Pero Diosca shuj milagrota rurashpami leoncuna ama huañuchichun paita quishpichirca. Jehová ima shina Danielta quishpichishcataca tucui Medopersia mandashca llajtacunapimi yachaj chayarcacuna (Daniel 6:25-27).

15. ¿Ima shinataj Daniel shina Diospi cri tucunchij?

¹⁵ ¿Ima shinataj Daniel shina Diospi cri tucunchij? Bibliataca mana jahua jahualla leyinachu canchij. Ashtahuanpish intindingacamami alli yachana canchij. Chashna rurashpallami Diospi tucui shunguhuan crishun (Mateo 13:23). Shinallataj cai o chai ruraicunamanta Jehová imata yuyashcatami yachana canchij. Chaipajca leyishcapimi cutin cutin yuyana canchij. Shinallataj Diosta tucui shunguhuan mañanataca mana cungarinachu canchij. Llaquicunahuan cashpacarin ashtahuanmi Diosta mañana canchij. Jehová Diosca llaquicunata ahuantangapaj fuerzasta cushpa,  sabiduriatapish cushpami ayudanga (Santiago 1:5).

16, 17. ¿Jobca ima shinataj Diosta alli rijsirca?

¹⁶ ¿Jobca ima shinataj Diosta alli rijsirca? Jobca mana israelitachu carca. Pero Abrahampaj, Isaacpaj, Jacobpaj caru familiami carca. Chai runacunamanca Jehová Diosca pai ima shina cashcata, gentecunatapish ima shina bendiciagrishcatami huillarca. Jobpish chai valishca yachaicunatami yachaj chayarca (Job 23:12). Shuj cutinca Jobca: “Ñucaca parlashcallatami canmantaca uyarcani” nircami (Job 42:5). Ashtahuanpish Jehovallatajmi ñucamanta Job nishcacunaca mana llullachu nirca (Job 42:7, 8).

¹⁷ Jobca tucui rurashcacunata ricushpami Jehová cꞌuyaj, llaquij cashcata yachaj chayarca (Job 12:7-9, 13). Asha tiempo qꞌuipaca Eliuca Jobmanca ‘Dios rurashcata yuyari’ nircami. Jehová Diospish pai rurashcata ricuchunmi Jobta animarca. Chashnami Jehová Diosca ñucanchijmanta yalli cashcata Jobman intindichircacuna (Job 37:14; 38:1-4). Jehová chashna yachachijpimi Jobca: “Ñucaca cantaca tucuita rurai tucuj cashcatami yachani. Cambaj yuyaimantaca imapish mana pacalla cai tucunchu” nircami. Shinallataj Jobca: ‘Chaimantami ñucallataj llaquirishpa, allpa jahuapi ushpa jahuapi tiyarini’ nishpa Diospaj ñaupajpi arrepintirishcata ricuchirca (Job 42:2, 6).

18, 19. ¿Diosta alli rijsishcamantaca Jobca ima shinataj carca?

¹⁸ ¿Diosta alli rijsishpaca Job ima shinataj beneficiarirca? Diosta alli rijsishcamantami Jobca Dios imata yuyashcata alli yacharca. Chaimantami allita rurashpa causarca. Por ejemplo, Diostami cꞌuyani nishpapish, shujtajcunata pꞌiñanaca mana alli cashcatami yacharca (Job 6:14, NM). Shinallataj paica shujtajcunamanta yalli cashcataca mana yuyarcachu. Pobre cajpipish, charij cajpipish familiata shinami trataj carca. Ashtahuanpish Jobca, ñucata ruraj Diosca, ¿manachu paitapish rurarca? nishpami yuyaj carca (Job 31:13-22). Caipi ricushca shinaca charij cashpapish Jobca mana jatun tucushca carcachu. Cunan punllapica charij gentecunaca mana Job shinachu cancuna.

¹⁹ Jobca imapish Diosmanta caruyachichunca mana saquircachu. Paipajca Diosta sirvinami ashtahuan importante carca. Charina cosascunallapi yuyashpaca Jobca ‘Taita Diostaca cungarinmanmi’ carca (Job 31:24-28-leyipai). Shinallataj Jobca shuj huarmillahuan cazarana cashcataca allimi yacharca. Chaimantami paica shujtaj huarmita mana alli munaihuan ama ricungapaj paipaj ñahuihuan ari ninacurca (Job 31:1). Yuyarishun, Job causashca tiempopica Diosca cꞌaricunataca tauca huarmicunahuan cazarachun saquijllami carca. Chaimantami Jobca shujtaj huarmicunahuan cazarai tucunman carca * (urapi tiyaj notata ricui). Pero Jehová Dios Edén huertapi Adanta shuj huarmillahuan cazarachishcata alli intindishpami paica shuj huarmillata charirca (Génesis 2:18, 24). Casi 1600 huatacuna qꞌuipaca Jesuspish shuj cꞌarillahuan, shuj huarmillahuan cazarashpa chayarina cashcatami yachachirca (Mateo 5:28; 19:4, 5).

20. ¿Diosta alli rijsishpaca ima shinataj amigocunatapish diversioncunatapish agllashun?

 ²⁰ ¿Ima shinataj Daniel shina Diospi cri tucunchij? Ña nishca shinaca Jehová Diostami alli rijsina canchij. Diosmanta yachashcacunatapish ñucanchij causaipimi pajtachina canchij. Por ejemplo, Bibliapica: ‘Millaita ruranata cꞌuyajtaca Diosca pꞌiñanmi’ ninmi. Shinallataj “mishqui shimi jayaj shungucunahuanca” mana tandanacuna cashcatami yachachin (Salmo 11:5; 26:4-ta leyipai). Cunanca cashna tapurishunchij: ¿Cai versocunapi yachachishca shinaca caimantaca Diosca imatataj yuyan? ¿Ñucanchij causaipica imataj ashtahuan importante can? ¿Internetta utilizacushpaca ima shinataj cuidari tucunchij? ¿Amigocunatapish, diversiocunatapish ima shinataj alli agllai tucunchij? Cai tapuicunata cutichishpami Jehová Diosta alli rijsishcata o mana alli rijsishcata yachashun. Cai pachapi mana alli ruraicunapi ama chagrurinapajca ima alli cashcata, ima mana alli cashcatapish alli yuyashpami agllana canchij (Hebreos 5:14; Efesios 5:15).

21. ¿Diospaj ñaupajpi alli ricuringapaj imata rurana cashcata intindingapajca imatataj rurana canchij?

²¹ Noepish Danielpish Jobpish Diosta alli rijsingapajmi achcata esforzarircacuna. Chaimantami Jehová Diosca paipaj ñaupajpi alli ricuringapaj imata rurana cashcata tucuita intindichun ayudarca. Shinaca Dios munashca shina imatapish rurashcamantami cushilla causarcacuna. Paicunaca alli ejemplomi can (Salmo 1:1-3). Chaimanta ¿Noé, Daniel, Job shinachu Diosta alli rijsini? nishpa tapurishunchij. Cunan punllapicarin chai quimsa runacunata yallimi Diosta ashtahuan rijsi tucunchij. Diosllatajmi paita rijsichun ashtahuan ayudashca (Proverbios 4:18). Chaimanta Bibliata intindingacama estudiashunchij. Leyishcapi cutin cutin yuyashunchij. Shinallataj Jehová Dios paipaj espirituhuan ayudachun mañashunchij. Cashna rurashpaca cai mundopi mana alli ruraicunapica mana urmashunchu. Alli yuyashpami imatapish rurashun. Cada punllami Diospajman ashtahuan cꞌuchuyashun (Proverbios 2:4-7).