1. ¿Quimsa Testigocuna Diosta alli sirvijcuna cashcataca ima shinataj ricuchircacuna?

CAICUNAPI yuyashun. Shuj joven huarmica escuelapimi can. Chaipimi profesorca shuj fiestapi participachun nin. Chai fiesta mana alli cashcataca chai joven huarmica allimi yachan. Chaimi profesortaca chai fiestapi mana participashachu nishpa respetohuan parlan. Cutin shujtaj jovenca Diospaj Shimimantami huasin huasin huillacun. Catij huasipi escuelamanta shuj compañero causaj cashcatami paica cuentata cun. Chai compañero testigo de Jehovacunamanta burlarij cashcatapishmi yuyarin. Chashna jahuapish manchaita saquishpami chai jovenca chai huasipi huillanaman rin. Cutin shuj yayaca trabajopimi can. Chaipimi jefeca gobiernopaj leyta mana cazushpa shuhuachun, llullachun mañan. Shinapish chai yayaca Diosta sirvij cashcamantami gobiernopaj leyta cazuj cashcata huillan (Romanos 13:1-4; Hebreos 13:18).

2. a) ¿Cai temapica ima tapuicunatataj yachashun? b) ¿Cai tapuicunataca imamantataj yachana canchij?

² ¿Cai Testigocunaca imatataj ricuchircacuna? Cashcata rurajcuna, mana manchajcuna cashcatami ricuchircacuna. Pero ashtahuanca imapipish mana pandarij o Diosta tucuipi cazujcuna cashcatami ricuchircacuna. Chaimantami Jehová Diosca paicunamanta cushilla sintirishcanga. Ñucanchijmantapish Yayitu Dios cushilla sintirichunmi munanchij. Chaimanta, ¿tucui causaipi ima pandata mana ruranaca imatataj nisha nin? ¿Imamantataj cada uno Diosta tucui causaipi cazuna canchij? Cai llaqui punllacunapi causashpapish Diosta cꞌuyashcamanta paita cazushpa catingapajca ¿imatataj rurana canchij? nishca tapuicunatami yachashun.

3. a) ¿Tucui causaipi ima pandata mana ruranaca imatataj nisha nin? b) Ima pandata mana rurana cashcata alli intindingapajca shuj chꞌimbapuraimanta parlai.

³ Ima pandata mana ruranaca Diosta cꞌuyashcamanta paita tucui causaipi cazuna cashcatami nisha nin. Hebreo rimaipi “ima pandata mana rurana” nishpaca entero o sano cashcatami nicun por ejemplo, Moisesman cushca leypica israelitacunaca Diosmanca sano, alli animaltami cuna carca ninmi (Levítico 22:21, 22). * Chaimantami Diosta sirvijcunaca Mandaj Diosmanca ciego animalcunata, chaqui pꞌaquirishcacunata, ima utu cajcunata, ungushca animalcunata mana cuna carca. Jehová Diosca sano animalcunata cuchunmi munarca (Malaquías 1:6-9). ¿Imamanta? Caipi yuyashun. Tiendapi o mercadopica pedazo illaj frutacunataca mana randinchijchu. Ashtahuanpish enterotami randinchij ¿nachu? Chashnallatajmi Diosca paita tucui shunguhuan cꞌuyachun, tucui causaipi cazuchun munan.

4. a) Imapi ama pandaringapajca ¿imamantataj mana jucha illaj cana canchij? b) Salmo 103:12-14-pi nishca shinaca ¿imatataj ñucanchijmantaca Diosca mana mañan?

⁴ Ñucanchijca juchayujcuna cashcamantami pandarinchijlla. Chaimanta, ¿ima pandata mana rurangapajca jucha illajchu cana canchij? Mana. ¿Imamantataj shina ninchij? Jehová Diosca mana ñucanchij pandarishcallatachu ricucun. Bibliapica: “Jatun Dioslla, ñucanchij juchacunata quiquin ricuracujllapica, ¿pitaj quiquinpaj ñaupajpica shayari tucungari?” ninmi (Salmo 130:3). Diosca ñucanchij juchayuj cashcamanta pandarijlla cashcataca allimi yachan. Chaimantami ñucanchijta perdonan (Salmo 86:5). Shinallataj paica ñucanchijcuna mana tucuita rurai valishcatapish allimi yachan. Chaimi mana rurai valishcataca mana mañan (Salmo 103:12-14–ta liyipai). Shinashpaca ¿ima shinataj Diospaj ñaupajpi mana pandarij cashcata ricuchishun?

5. Ima pandata mana rurangapajca ¿imamantataj Diosta cꞌuyana canchij?

⁵ Diosta tucui shunguhuan cꞌuyashpaca llaquicuna ricurijpipish ima pandata mana rurashunchu. Shinallataj tucui causaipimi paita cazushun (1 Crónicas 28:9; Mateo 22:37). Punta parrafopi quimsa Testigocunata cutin yuyarishunchij. ¿Chai joven huarmica escuelapi cushilla pasanatachu mana munarca? Cutin ¿caishuj jovenca huillacujpi pingaipi saquichunchu munarca? Shinallataj ¿chai yayaca trabajo illajchu saquirinata munarca? Mana. Shinashpaca ¿imamantataj chashna rurarcacuna? Dios mandashcacuna alli cashcata yachashcamantami Yaya Diosta cushichinata munarcacuna. Chashnallataj imata ruranata manaraj agllashpami Diosta cꞌuyashcamanta paita yuyaipi charircacuna. Chashnami ima pandata mana rurashcata ricuchircacuna.

6. a) ¿Imamantataj cada uno Diosta tucui causaipi cazuna canchij? b) ¿Adán, Evaca Diosta mana tucuipi cazushcataca ima shinataj ricuchircacuna?

⁶ ¿Imamantataj cada uno Diosta tucui causaipi cazuna canchij? Satanasca Jehová Diosmanta, ñucanchijmantapishmi llullashca. Edén huertapica cai millai angelca Satanasmi tucurca. Satanás shimica “Jarcaj” nisha ninmi. Paica Jehová Diosca paillapi yuyaj, millai mandajmi can nishpami Diospaj shutitaca mana allipi saquirca. Adán, Evapish Edén huertapica Diosta cꞌuyashcatami  ricuchina carcacuna. Pero Satanás Diospaj contra tucujpica paicunaca Satanaspaj ladomi tucurcacuna. Chashnami Diosta mana tucui shunguhuan cꞌuyashcata ricuchircacuna (Génesis 3:1-6). Achca huatacuna qꞌuipaca Job runami cai Allpapi causarca. Chai punllacunapica ¿gentecunaca Diosta cꞌuyashcamantachu paita tucui causaipi cazuncuna? nishca tapuitami cutichina minishtirirca.

7. a) Job 1:8-11-pi nishca shinaca ¿Diosca Job runamantaca imatataj yuyaj carca? b) ¿Diabloca Job runamantaca imatataj yuyaj carca?

⁷ Israelitacuna Egipto llajtapi causacui punllacunallapitajmi Job runapish causarca. Chai tiempopica Job runallami Diosta siempre cazuj carca. Pero ñucanchij shinallataj juchayuj cashcamantami maipica pandarijlla carca. Chashna jahuapish cazuj cashcamantami Diosca paita cꞌuyarca. Ñami Diabloca ‘gentecunaca cantaca mana tucui shunguhuanchu cazungacuna’ nishpa Diosta rimashca canga. Chaimantami Diosca Job runata ricui nirca. Cai runaca paipaj causaihuanmi Diablo llulla cashcata ricuchirca. Pero Diabloca Job tucuipi cazushcata o mana cazushcatami yachasha nirca. Chaimantami ‘paita llaquichichun saqui’ nishpa Diosta mañarca. Diosca Job runapi confiashcamantami paita llaquichichun saquirca (Job 1:8-11-ta liyipai).

8. ¿Diabloca Jobtaca ima shinataj llaquichirca?

⁸ Diabloca millai, huañuchij angelmi can. Chaimantami Jobtaca llaquichirca. ¿Ima shinataj llaquichirca? Paipaj tucui charishcacunata quichushpami paipaj sirvijcunatapish huañuchirca. Gentecunapaj ñaupajpipish pingaipimi saquichirca. Shinallataj paipaj chunga cꞌuyashca huahuacunatami huañuchirca. Qꞌuipaca caracha ungüi layahuanmi  llaquichirca. Paipaj huarmipish yallitaj sustarishpami Jobtaca Diosta cꞌamishpa huañui nirca. Pero cai runaca huañunata munashpapish Diosta cꞌuyashcamantami paita tucui causaipi cazurca. Satanasca shujtaj layapishmi llaquichirca. Paica quimsa amigocunatami Job runapajman cacharca. Paicunaca cushichinapaj randica ‘Diosmi cantaca llaquichicun. Can paita sirvishpa causajpipish Diospajca mana importanchu’ nircacunami. Shinallataj mana alli runa cashcamanta tucui llaquicunata charina cashcatami intindichircacuna (Job 1:13-22; 2:7-11; 15:4, 5; 22:3-6; 25:4-6).

9. Sinchi llaquicunahuan cashpapish Jobca ¿imatataj mana rurarca?

⁹ ¿Llaquicuna ricurijpica Job runaca imatataj rurarca? Juchayuj cashcamantami chai quimsa mana alli amigocunataca pꞌiñarishpa sinchita rimarca. Paicunamanca ‘Diostapish yalli cashcata rurajmi cani’ nircami. Pero qꞌuipaca mana alli yuyashpa rimashcatami cuentata curca (Job 6:3; 13:4, 5; 32:2; 34:5). Chashna sinchi llaquicunahuan cashpapish Jobca Diosmantaca manataj caruyarcachu. Amigocuna ima nishcatapish mana crircachu. Chaimantami paicunataca: “Cancuna cashcata rurajcunami canguichij ninataca manataj yuyashcanillapishchu. Ashtahuanpish huañungacamami ñucaca ima pandata mana rurasha” nircami (Job 27:5, NM). Chashna nishpami Job runaca ima llaquicuna ricurijpipish Diosta tucui causaipi cazusha nishcata ricuchirca. Ñucanchijpish Job shinami casha ninchij.

10. Diabloca gentecunamanta ¿imatataj nin?

¹⁰ Millai Diabloca Jobta shinallatajmi ñucanchijtapish juchachin. Paica ‘gentecunaca Diostaca mana tucui shunguhuanchu cꞌuyancuna. Paicunapaj causaita quishpichingapajca Diosta saquingacunallami’ ninmi (Job 2:4, 5; Apocalipsis 12:10). Chaita yachashpaca ¿manachu llaquilla sintirinchij? Caipi yuyai. Jehová Diosca ñucanchijpimi confian. Chaimi Diablo ñucanchijman llaquicunata cuchun saquin. Ashtahuancarin paita tucui shunguhuan cazuj cashcata Satanasman ricuchichunmi munan. Chaipajca Diosca ayudasha ninmi (Hebreos 13:6). Tucuita ruraj Mandaj Dios ñucanchijpi confiashcata yachashpaca ¿manachu cushilla sintirinchij? Ari. Shinaca ¿imamantataj Diosta tucui shunguhuan cazuna canchij? Chaita rurashpami Satanás llulla cashcata ricuchishun. Chashnallataj Yaya Dios alli Mandaj cashcata, paipaj shutitapish difindishcatami ricuchishun.

11. ¿Jobmantaca imatataj yachacunchij?

¹¹ Cai tucuri punllacunapica Satanasca Diosta sirvijcunata ashtahuanmi llaquichishca (2 Timoteo 3:1). Chaimantami ima pandata mana rurashpa catingapajca Jobpaj causaimanta yachana canchij. Paica llaquicunata manaraj charishpapish Diosta cꞌuyashcamantami tucuipi cazuj carca. Cunanca imacunapi Job chashna cashcata yachashun.

12. a) Job 26:7, 8, 14-pi nishca shinaca Job runaca Diosta cꞌuyangapaj, paita respetangapajca ¿imatataj rurarca? b) ¿Diosta respetangapajca imatataj rurana canchij?

¹² Job runaca sumaj rurashcacunata ricushpami Jehová Diostaca ashtahuan cꞌuyarca. Job runaca Allpata, cielota, pꞌuyucunata ricushpa, truenocunata uyashpaca mancharishpami saquirij carca. Shinallataj chaicunapimi cutin cutin yuyaj carca (Job 26:7, 8, 14-ta liyipai). Ashtahuancarin Dios rurashcacunamanta ashallata yachashcatami cuentata curca. Jobca Jehová Dios imalla yachachishcacunatapish achcatami valoraj carca. Chaimantami: “Paipaj shimihuan  yachachishcaca achcamari valishca” nirca (Job 23:12, NM). Job runaca Dios rurashcacunata ricushpa mancharishcamanta, paita respetashcamantaca ¿imatataj rurarca? Diosta ashtahuan cꞌuyashpami tucui causaipi cazunata munarca. Ñucanchijpish Job shinallatajmi Dios rurashcacunapi cutin cutin yuyana canchij. Cunan punllacunapica ñucanchijca Dios rurashcacunamantaca Jobta yallimi yachanchij. Chashnallataj Diosta alli rijsingapajca entero Bibliatami charinchij. Diosmanta ashtahuan yachashpaca paitaca ashtahuanmi cꞌuyashun, respetashun. Chaimi paipaj ñaupajpi ima pandata mana ruranata munashun (Job 28:28).

13, 14. a) Job 31:1-pi nishca shinaca ¿Jobca ima shinataj Diosta cazushcata ricuchirca? b) ¿Imatataj Job laya rurana canchij?

¹³ Job runaca Diosta tucui causaipimi cazurca. Jobca ima pandata ama rurangapajca Diosta cazuna cashcatami yacharca. Ñucanchijpish Diosta cazushpaca imapi mana pandarishpami causashun. Job runaca punllanta Diosta cazunata munashcamantami shujtaj huarmicunataca respetohuan trataj carca (Job 31:1-ta liyipai). Cazado cashcamantaca shujtaj huarmicunataca mana mapa munaicunahuanchu ricuj carca. Cunan punllacunapish huainayana tentacioncunaca maipipish ricurinllami. ¿Chaipica Job shinachu shujtaj huarmita o shujtaj cꞌarita mapa munaicunahuan ricunamanta jarcarishun? ¿Lluchulla cꞌari o huarmi fotocunapi o videocunapi ricurijpica imatataj rurashun? (Mateo 5:28). Tucui punllacuna jarcarinata yachashpaca Diostaca siempremi cazushun.

¹⁴ Jobca charishca cosascunapi shunguta churashpaca mana allita rurashcatami yacharca. Chaita rurashpaca castigota chasquina cashcatapishmi yacharca. Shina yuyashpami Diosta cazushcata ricuchirca (Job 31:24, 25, 28). Cunan punllacunapish gentecunaca charij tucunallapimi yuyancuna. Pero Diosca charina cosascunamanta, cullquimantapish  imata yuyashcatami yachachin. Paita cazushpaca ima pandata mana rurashunchu (Proverbios 30:8, 9; Mateo 6:19-21).

15. a) ¿Job runaca Diosta tucui causaipi cazungapajca imatataj yuyaipi charirca? b) ¿Imamantataj Dios cusha nishca bendicioncunata yuyaipi charina canchij?

¹⁵ Job runaca Dios cusha nishca bendicioncunatami yuyaipi charirca. Jobca pai cazuj cashcata o mana cazuj cashcata Dios ricucushcatami yacharca (Job 31:6). Shinallataj llaquicunata charishpapish Jehová Dios bendicianata yachashcamantami paita tucui causaipi cazurca. Chaimi Yaya Diosca pai juchayuj cajpiraj achcata bendiciarca (Job 42:12-17; Santiago 5:11). Shamuj punllacunapipish Diosca Jobtaca achcatami bendicianga. Cutin ¿ñucanchijca Diosta tucui causaipi cazujpi pai bendicianata crinchijchu? Diosca paipaj yuyaita mana cambiashcachu (Malaquías 3:6). Yayitu Diosca paita siempre cazujpica mana cungarinchu. Chaita yuyaipi charishpaca shamuj punllapi cushilla causai tiyanata shuyashpami catishun (1 Tesalonicenses 5:8, 9).

16. ¿Imatataj rurasha ninchij?

¹⁶ Diosta cꞌuyashcamantami paita tucui causaipi cazusha ninchij. Shinapish maipica ñucanchijllami chaita ruranata munanchij ninchijchari. Pero mana ñucanchijlla canchijchu. Muyundij Allpapimi achca huauqui panicunaca Diosta cꞌuyashcamanta paita tucui causaipi cazuncuna. Ñaupa punllacunapica Diosta sirvijcunaca huañuna cashpapish Diosta siempremi cazujcuna carca. Ñucanchijpish paicuna shina cashpaca Diosta cazujcunapurapimi cashun (Hebreos 11:36-38; 12:1). Shinashpaca tucuicuna Jobpaj ejemplota catishpa pai shina: “Huañungacamami ñucaca ima pandata mana rurasha” nishunchij. Shinallataj ima pandata mana rurashcamanta Jehová Diosta huiñai huiñaicama jatunyachishunchij.