1, 2. Mateo 5:11-pi nishca shinaca ¿problemacunahuan chꞌimbapurashpapish ima shinataj sintirinchij?

JESUSCA paita catijcunataca cushilla causaitami charinguichij nircami. Pero llaquicunatapishmi charinguichij nircami (Mateo 10:22, 23; Lucas 6:20-23). Jesusta catinaca cushicuitami cun. Shinapish maipica ñucanchij familiacuna Diosta sirvichun jarcajpi, o gobiernocuna catirashpa llaquichijpi o trabajopi, o escuelapi ñucanchij compañerocuna mana allita rurachun obligasha nijpimi llaquilla sintirinchij.

² Shujtajcuna ñucanchijta catirashpa llaquichichunca mana munanchijchu. Pero Santiago libropica problemacunata charishpaca cushillami cai tucunchij ninmi (Santiago 1:2, 12). Jesuspish paita catijcunataca catirashpa llaquichijpica cushichishcami canguichij nircami (Mateo 5:11-ta liyipai). ¿Problemacunata charishpapish ima shinataj cushilla cai tucunchij? Santiago libropimi huaquin yuyaicunata yachashun. Puntapica, Jesusta punta catijcuna ima problemacunahuan chꞌimbapurashcatami yachashun.

3. ¿Santiago, Jesusta cati callarijpica imataj tucurca?

³ Jesuspaj lahuauqui Santiago Jesusta cati callarishca qꞌuipami Jerusalenpica Diosta sirvijcunataca catirashpa llaquichi callarircacuna (Hechos 1:14; 5:17, 18). Jesusta catij Estebanta huañuchijpicarin huauqui panicunaca miticushpami Judeaman,  Samariaman, Chipreman, Antioquía llajtacunaman rircacuna (Hechos 7:58–8:1; 11:19). Paicunaca achca llaquicunatami charircacuna. Shinapish Diosmanta predicanataca manataj saquircacunachu. Cushilla huillashpa catishcamantami congregacioncunapish tiyai callarirca (1 Pedro 1:1). Chashnapish paicunapajca llaquicunaca mana chaipi tucurircachu.

4. ¿Jesusta punta catijcunaca ima problemacunallahuantaj chꞌimbapurarcacuna?

⁴ Jesusta punta catijcunaca chꞌican chꞌican problemacunatami charircacuna. Por ejemplo, huata 50-pica Roma llajtata mandaj Claudioca judío gentecuna chai llajtamanta llujshichunmi mandarca. Chaimantami Diosta sirvij judiocunaca huasicunata saquishpa shujtaj ladocunapi causanaman rina tucurca (Hechos 18:1-3). Huata 61-pica apóstol Pabloca: ‘Jesusta catijcunaca paicunata rimashcacuna, carcelpi churashcacuna, paicunapaj cosascunata quichushcacunami can’ nircami (Hebreos 10:32-34) Huaquincunacarin huajchacunami tucurca. Paicunataca hasta ungüimi japirca (Romanos 15:26; Filipenses 2:25-27).

5. ¿Cai yachaipica ima tapuicunatataj yachashun?

⁵ Huata 62 manaraj tucujpimi Santiagoca shuj cartata quillcarca. Paica Diosta sirvijcuna llaquicunahuan chꞌimbapuracushcatami yacharca. Chaimantami Jehová Diosca paita sirvijcuna llaquicunata charishpapish cushilla causachun paipaj espíritu santohuan Santiagota quillcachun ayudarca. Cai yachaipica cai tapuicunatami yachashun: ¿llaquicunahuan cashpapish imamantataj cushilla cai tucunchij?, ¿maipica imamantataj llaquilla sintirinchij?, ¿llaquicunahuan cashpapish cushilla sintiringapajca imatataj rurana canchij?

6. Lucas 6: 22, 23-pi nishca shinaca ¿Diosta sirvijcunaca llaquicunata charishpaca imamantataj cushilla sintirinchij?

⁶ Achca gentecunaca alli saludta, achca cullquita, familiapi cushilla causaita charishpallami alli causaita chari tucunchij nincunami. Pero Santiagoca mana chaimanta parlacurcachu. Ashtahuanpish Santiagoca Jehová Diospaj espíritu santomanta cushilla cai tucushcatami parlacurca (Gálatas 5:22). Chaimantami llaquicunahuan cashpapish Diospaj ñaupajpi alli ricurishpa, Jesuspaj ejemplota catishpaca cushilla sintirinchij (Lucas 6:22, 23-ta liyipai; Colosenses 1:10, 11). Caipi yuyashun. Shuj focota vidriohuan alli tapajpica focotaca huairapish tamyapish mana dañai tucunchu. Ashtahuanpish fococa japirishcami catin. Dios cushca cushicunaca cai focota tapashca layami can. Chaimantami cullqui illaj cashpapish, ima ungüi japijpipish Yayitu Diostaca cushilla sirvishpa catishun. Familiacuna o contracuna ñucanchij crishcacunamanta burlarishpa jarcajpipish mana desanimarishunchu. Cashna pruebacunata charishpaca Jesusta catijcuna cashcatami ricuchinchij (Mateo 10:22; 24:9; Juan 15:20). Chaimantami Santiagoca: “Chꞌican chꞌican llaquicunahuan cashpapish ucu shungumanta cushicuichij” nirca (Santiago 1:2).

7, 8. ¿Pruebacunaca ima shinataj ñucanchij feta sinchiyachin?

⁷ Santiago nishca shinaca ima pruebacunata ahuantashpaca ñucanchij fetami sinchiyachinchij. Chaimantami cushilla sintirinchij (Santiago 1:3). Por ejemplo, shuj espadata ninapi rupachijpica chiriyashpaca cai espadaca ashtahuan sinchimi tucun. Chashnallatajmi ñucanchijpish pruebacunata chꞌimbapurashpaca ñucanchij feta sinchiyachinchij. Chaimantami Santiagoca: “Ima llaquicunata ahuantashpaca ña alli crijcunatajmi canguichij” nirca (Santiago 1:4). Llaquicuna ñucanchij feta sinchiyachinata yachashpaca cushillami ahuantai tucunchij.

⁸ Santiagoca huaquin problemacunami ñucanchij cushilla canata quichui tucun nircami. ¿Cai problemacunaca maijantaj can? ¿Ima shinataj chaitaca chꞌimbapurai tucunchij? Ricushun.

9. ¿Imamantataj Yayitu Dios yachaita cuchunca minishtinchij?

⁹ Problemacunahuan cashpaca Jehová Diosmanta manataj caruyasha ninchijchu. Huauqui panicunata sinchiyachinatapish manataj saquisha ninchijchu. Pero alli decidingapajpish, contracunaman imata ningapajpish Yayitu  Diostami yachaita cuchunca mañana canchij (Jeremías 10:23). Shinapish huaquinpica imata ninata, imata ruranata mana yachashpami llaquilla sintirinchij.

10. Santiago 1:5-pi nishca shinaca ¿Jehová Dios yachaita cuchunca imatataj rurana canchij?

¹⁰ Llaquicunata charishpaca ahuantangapajmi Jehová Diosta yachaita cuchun mañana canchij. (Santiago 1:5-ta liyipai). Pero ¿ñucanchij mañashca shina Yayitu Dios mana cutichijpica imatataj rurana canchij? Santiagoca: “Jehová Diosta mañarashpa catichij” nircami. Jehová Diosca ñucanchij paita siempre mañajpica mana pꞌiñaringachu. Ashtahuanpish paita mañajpica ñucanchijmanca yachaitami pruebacunata chꞌimbapurachun cunga (Salmo 25:12, 13). Paica ñucanchij pruebacunata charijtaca allimi yachan. Chaimantami ñucanchijtaca ayudasha nin. ¿Manachu caita yachashpaca cushilla sintirinchij? Cunanca Jehová Dios ima shina ñucanchijman yachaita cushcata ricushun.

11. ¿Yayitu Diospaj yachaita chasquingapajca imallatataj rurana canchij?

¹¹ Jehová Dios ñucanchijman yachaita cuchunca Bibliata, publicacioncunatami estudiana canchij (Proverbios 2:6). Pero estudiashpallaca mana saquirinachu canchij. Ashtahuanpish ñucanchij causaipimi ima yachachishcataca pajtachina canchij. Santiagoca: “Diospaj Shimi nishca shina rurajcuna caichij, ama uyajcunalla caichijchu” nircami (Santiago 1:22). Dios yachachishcacunata pajtachishpaca alli yuyaj, llaquij, cꞌuyajmi cashun (Santiago 3:17). Chaimi ima llaquicunata charishpapish cushilla canataca manataj saquishun.

12. ¿Imamantataj Bibliata estudianataca manataj saquina canchij?

¹² Diospaj Shimica shuj espejo shinami can. Bibliapimi imapi mejorana cashcata, ima shina  mejoranata yachai tucunchij (Santiago 1:23-25). Por ejemplo, Bibliata liyishpaca mana rato pꞌiñarina cashcatachari cuentata cunchij. Chashnami pi ñucanchijta mana alli tratajpi o ima problemacunata charishpaca mana rato pꞌiñarishun. Imamantapish mana rato pꞌiñarij cashpaca llaquicunahuan chꞌimbapurangapajmi alli decidishun (Santiago 3:13). Chaimantami Bibliata estudianataca manataj saquina canchij.

13. ¿Bibliapi parlaj ejemplocunataca imamantataj yachana canchij?

¹³ Maijan gentecunaca paicuna pandarishcallata ricushpami caitaca mana ruranachu carcani nishpa yuyancuna. Pero ñucanchijca chashnaca mana yuyanachu canchij. Chaipaj randica shujtajcunapaj ejemplota ricushpami allita ruranata yachana canchij. Santiagoca Abrampaj, Rahabpaj, Jobpaj, Eliaspaj, shujtajcunapaj causaimanta yachachunmi animarca (Santiago 2:21-26; 5:10, 11, 17, 18). Paicunaca llaquicunata charishpapish Jehová Diostaca cushillami sirvishpa catircacuna. Paicunapaj ejemplomi ñucanchijtapish llaquicunahuan cashpapish Jehová Diosta sirvishpa catichun ayudanga.

14, 15. ¿Dudacunata charishpaca imacunapi yuyanatataj saquishun?

¹⁴ Maipica Bibliata liyishpa, ima nishcata mana alli intindishpami dudai callarishun. Mana cashpaca ñucanchij mañashcacunata Jehová Dios mana ñucanchij munashca shina cutichijpimi dudai callarishun. Chashna dudajpica ñucanchij femi chiriyanga. Dioshuanpish alli apanacunatami saquishun (Santiago 1:7, 8, NWT ). Dios cusha nishcacunapipish ña mana yuyashunchu.

¹⁵ Apóstol Pabloca Dios cusha nishcacunapi shuyanataca barcota charichina shuj jatun fierrohuanmi chꞌimbapurarca (Hebreos 6:19). Chai jatun fierroca shuj cadenahuanmi barcota charichishca carca. Achcata tamiajpi huaira ama maiman apachunca barcotaca cai fierromi charin. Pero barcota charichishca cadena uxidashpa pꞌitirijpica barcoca maitami ri tucun. Ima shinami oxidashpa cadena pꞌitirin, chashnallatajmi ñucanchij crishcacunapi dudai callarishpaca ñucanchij fepish chiriyanga. Ashtahuancarin Dios cusha nishcacunapi yuyanatami saquishun. Santiago nishca shina dudacunata charishpaca barcota huaira caiman chaiman apaj shinami cashun (Santiago 1:6, NWT ). Chashna cashpaca Jehová Diostaca mana cushilla sirvi tucushunchu.

16. ¿Dudacunata charishpaca imatataj rurana canchij?

¹⁶ Dudacunata ama charingapajca ñucanchij fetami sinchiyachina canchij. Profeta Elías causashca punllacunapica Diosta sirvijcunaca dudacunatami chari callarircacuna. Chaimi Eliasca ‘maicamataj dudashpa saquiringuichij. Jehová Dios Diostaj cajpica paita catichigari, mana cashpaca Baal diostaj cajpica paita catichigari’ nircami (1 Reyes 18:21). Chaimantami ñucanchijpish dudacunata ama charingapajca Bibliapi investigana canchij. Chashnami Jehová Dios Diostaj cashcata, Biblia paipaj shimitaj cashcata, testigo de Jehovacunapish paipaj pueblotaj cashcata yachashun (1 Tesalonicenses 5:21). Caicunata rurashpaca ñucanchij fetami sinchiyachishun. Shinapish maipica dudacunata charishpaca congregacionta pushajcunatami ayudachun mañana canchij. Chashnami ñucanchijca Jehová Diostaca cushilla sirvishpa catishun.

17. ¿Desanimarishca cashpaca ima shinataj sintirishun?

¹⁷ Bibliapica desanimado cajpica “imapish ashtahuan ashtahuan sinchimi ricuringa” ninmi (Proverbios 24:10). Cai versopi desanimarina nishpaca fuerza illaj saquirinamantami  nisha nicun. Fuerza illaj saquirishpaca cushilla causanatami saquishun.

18. ¿Llaquicunata ahuantana nishpaca imatataj nisha nin?

¹⁸ Mana desanimarishpa problemacunata ahuantangapajca Jehová Dios fuerzata cuchunmi minishtinchij (Santiago 5:11). Santiagoca llaquita apashpa ahuantana nishpaca shuj mana manchaj soldado shina contracunahuan macanacungapaj chai pushtupi saquirishpa sinchita ahuantana cashcatami nicurca.

19. ¿Apóstol Pablopaj ejemplomantaca imatataj yachanchij?

¹⁹ Apóstol Pabloca mana manchashpa llaquicunata ahuantachunmi alli ejemplota curca. Pero paipish huaquinpica desanimarishcami sintirirca. Desanimarishca cashpapish Jehová Dios fuerzata cuchunmi paipi confiarca (2 Corintios 12:8-10; Filipenses 4:13, NWT ). Ñucanchijpish fuerzata charingapaj, mana manchaj cangapaj, humildadhuan Jehová Dios ayudanapimi confiana canchij (Santiago 4:10).

20, 21. ¿Pruebacunata charishpaca imatataj mana yuyana canchij?

²⁰ Pruebacunata charishpaca Yayitu Diosmi castigacun nishpaca mana yuyanachu canchij. Santiagoca: “Pi llaquicunahuan cashpaca Diosmi ñucaman pruebacunata churacun nishpaca mana yuyanachu can. Diosca mana alli cosascunahuanca mana pruebacunata churanchu. Diostapish pi mana pruebacunata churai tucunchu” nircami (Santiago 1:13, NWT ). Caita tucui shunguhuan crishpaca Jehová Diospajmanmi ashtahuan cꞌuchuyashun (Santiago 4:8).

²¹ Jehová Diosca mana nunca cambianchu (Santiago 1:17). Apostolcuna causashca punllacunapi Diosta sirvijcuna pruebacunahuan cajpi paicunata ima shinami ayudarca, shinallatajmi ñucanchijtapish ayudanga. Chaipajca ñucanchijca Jehová Diostami yachaita cuchun, sinchi feta charingapaj, manchaita ama charingapaj ayudachun mañana canchij. Chashnami llaquicunahuan cajpipish cushilla causachun Yayitu Diosca ayudashpa catinga.