1. a) ¿Maipica imamantataj yallitaj sustarinchij? b) ¿Yallitaj sustarishcamantaca imatataj yuyai callarishun?

¿MAIPICA yallitaj sustarishcachu sintirishcanchij? * Pi rimashcamanta, llaquichishcamantachari llaquilla sintirinchij. Mana cashpaca ñucanchijllataj chugrichij shimicunata nishcamanta, mana allita rurashcamantachari yallitaj sustarinchij. Juchata rurashpacarin Jehová Diosca manataj perdonangachu nishpami preocuparinchij. Chashna sustarishcamantachari mana sinchi feta charinichu, imapaj mana valinichu nishpa yuyashun. Pero ¿chaica ciertochu can?

2. ¿Huaquincunaca sinchi feta charishpapish ima shinataj sintirircacuna?

² Bibliapi tiyaj huaquin ejemplocunamanta yachashun. Profeta Samuelpaj mama Anaca sinchi fetami charirca. Shinapish paipaj cusapaj shujtaj huarmi paita llaquichishcamantami Anaca llaquilla sintirirca (1 Samuel 1:7). Apóstol Pablopish sinchi feta charishpapish huauqui panicunamantami sustarirca (2 Corintios 11:28). Rey Davidtaca sinchi feta charishcamantami Yayitu Diosca paitaca achcata cꞌuyarca (Hechos 13:22). Pero Davidca jatun juchata rurashcamantami dimastij llaquilla sintirirca (Salmo 38:4). Jehová Diosca paicunata ayudashpami cushichirca. Cunanca paicunapaj ejemplomanta yachashun.

3. ¿Ñucanchij familia o amigo rimajpica ima shinataj sintirinchij?

³ Ñucanchij familia o shuj cꞌuyashca amigo mana alli tratajpimi llaquilla sintirinchij. Chaimi paihuanca ña mana cutin alli apanacushachu nishpa sustarinchij. Maijancuna mana yuyashpa imatapish nijpimi espadahuan chugrichishca shina sintirinchij (Proverbios 12:18). Pero maijancunaca ñucanchijta llaquichingaraicumi mana allita rurancuna. Shuj joven panitami chashna llaquichircacuna. Paica: “Asha huatacuna ñaupaca shuj alli amigatami charircani. Cai amigaca ñucamantami huashalla rimai callarirca. Chashna rimajpica dimastij llaquillami sintirircani. Espadahuan chugrichishca shina imamanta chaita rurashcataca mana intindircanichu” ninmi. Ñucanchijtapish shuj familia o amigo llaquichishca cajpica Anamantami yachai tucunchij.

4. ¿Anaca ima llaquicunatataj chꞌimbapurarca?

⁴ Anaca huahuacunata mana charishcamantami achca llaquicunata charirca (1 Samuel 1:2). Israelitacunaca huahuacunata mana chari tucuj huarmicunataca Diosca mana bendicianchu nijcunami carca. Chaimi Anaca imapaj mana valishca shina sintirirca (Génesis 30:1, 2). Anapaj cusaca shujtaj huarmitami charirca. Paica Penina shutimi carca. Cai huarmica achca huahuacunatami charirca. Chaimantami Anataca chanzata rurashpa pꞌiñachishpa llaquichirca (1 Samuel 1:6). Chashna llaquichijpimi Anaca huacai solo pasashpa mana micurca (1 Samuel 1:7, 10). ¿Jehová Diosca Anataca ima shinataj cushichirca?

5. ¿Anaca Yayitu Diosta mañashpaca ima shinataj sintirirca?

⁵ Anaca ima shina sintirishcataca Yayitu Diosmanmi tucuita huillarca. Diosta mañashca qꞌuipaca sacerdote Elimanpishmi tucuita huillarca. Chaimantami Elica: “Can imata mañashcataca israelcunapaj Taita Dios cushca cachun. Cushicushpa rilla” nirca. Jehová Diosta mañashca qꞌuipami Anaca chaimanta rishpa micurca. Shinallataj ña mana ashtahuan llaquilla sintirircachu (1 Samuel 1:17, 18).

6. a) ¿Ana ima shina Diosta mañashcamantaca imatataj yachanchij? b) Filipenses 4:6, 7-pica ¿Pabloca imatataj yachachirca?

⁶ Jehová Diosta mañashpaca tranquilomi sintirishun. Anaca llaquilla cashpaca Jehová  Diostaca unitami mañacurcalla (1 Samuel 1:12). Ñucanchijpish ima llaquicunamanta sustarishca cashpaca Yaya Diostami mañarana canchij. Diosta mañacushpaca imamanta preocuparishcata, imapi pandarishcatami huillana canchij. Mañacushpaca pandarishami nishpapish mana yuyanachu canchij. Huaquinpica Diosman ima shina sintirishcata huillacushpaca huacashpachari huillanchij. Pero Jehová Diosca ñucanchij mañashcacunata uyanataca mana shaicungachu. Shinallataj Diosta mañacushpaca Pablo ima nishcatami yuyarina canchij (Filipenses 4:6, 7-ta liyipai). Paica Diosta mañacushpaca siempremi agradicina canchij nircami. Por ejemplo, Jehová Diostaca causaita cushcamanta, tucuita sumajta rurashcamanta, ñucanchijta cꞌuyashcamanta, shamuj punllacunapi pai cusha nishcacunamantami achcata agradicinchij. ¿Anamantaca imatataj ashtahuan yachanchij?

7. ¿Anapish paipaj cusapish maimantaj rijcuna carca?

⁷ Anaca llaquicunata charishpapish paipaj cusahuanmi Yayitu Diosta adorangapaj Silo puebloman rij carca (1 Samuel 1:1-5). Chaipica Diospaj carpa huasipimi sacerdote Elica: ‘Can imata mañashcataca Yayitu Diosmi cutichinga’ nishpa Anataca animarca (1 Samuel 1:9, 17).

8. ¿Tandanacuicunaman rishpaca ima shinataj sintirishun?

⁸ Tandanacuicunaman rishpaca tranquilomi sintirishun. Tandanacuipica Diospaj espíritu santota mañashpami callarinchij. Dios cushca espíritu santoca granota pꞌucuj shinami tranquilo causaita cun (Gálatas 5:22). Llaquicunahuan cashpa tandanacuicunaman rijpica Diospish huauqui panicunapishmi cushichincuna. Ña ricushca shinaca siempre mañajpi, tandanacuicunaman rijpica Jehová Diosca tranquilo sintirichunmi ayudan (Hebreos 10:24, 25). Anapaj ejemplomanta ashtahuan yachashun.

9. a) ¿Anaca imatataj chꞌimbapurashpa catirca? b) ¿Yayitu Diosca ima shinataj paitaca ayudarca?

⁹ Jehová Diosca Anapaj problemacunataca mana utca anchuchircachu. Paica Diospaj carpa huasimanta tigrashca huashaca Peninahuanmi chai huasillapitaj causashpa catirca. Bibliapica Penina huarmi Anata llaquichinata saquishcataca mana huillanchu. Chaimi Anaca tucuita ahuantashpa causashcanga. Pero paipaj llaquita Jehová Diospaj maquipi saquishcamantami paica tranquila sintirirca. Asha tiempo huashacarin Ana mañashcatami Jehová Diosca cutichirca. Chaimantami huahuacunata charirca (1 Samuel 1:19, 20; 2:21).

10. ¿Anapaj causaimantaca imatataj yachanchij?

¹⁰ Llaquicuna mana tucurijpipish tranquilomi sintiri tucunchij. Yayitu Diosta mañajpipish tandanacuicunaman rijpipish ima problemacunaca manachari utca anchunga. Pero Jehová Diosca Anata ima shinami ayudarca, chashnallatajmi ñucanchijtapish tranquilo sintirichun ayudanga. Paica manataj cungarishpami ñucanchijtaca bendicianga (Hebreos 11:6).

11. ¿Pabloca imamantataj sustarirca?

¹¹ Pablopish chꞌican chꞌican llaquicunatami chꞌimbapurarca. Por ejemplo, huauqui panicuna llaquicunata charishcata ricushpami paica sustarirca (2 Corintios 2:4; 11:28). Shinallataj Dios mingashcata pajtachicujpimi Diospaj contracunaca Pablotaca macarcacuna, carcelpipish churarcacuna. Ashalla cosascunahuan causacushcamantapishmi  preocuparirca (Filipenses 4:12, NWT ). Pai ricushca barcocunapish quimsa cutinmi yacupi pambarirca. Chaimantami paica barcopi viajacushpaca yallitaj sustarishcanga (2 Corintios 11:23-27). ¿Pabloca tranquilo sintiringapajca imatataj rurarca?

12. ¿Pabloca imamantataj tranquilo sintirirca?

¹² Pabloca huauqui panicunapaj problemacunamantami preocuparirca. Pero paica humilde cashcamantami shujtaj huauquicunata ayudachun mañarca. Por ejemplo, Pabloca Timoteoman, Titomanca huauqui panicunata cuidachun, pushachunmi mingarca. Chaimantami paica tranquilo sintirirca (Filipenses 2:19, 20; Tito 1:1, 4, 5).

13. ¿Pushaj ancianocunaca Pablo shinallataj imatataj rurana can?

¹³ Shujtajcuna ayudachun mañashunchij. Cunan punllacunapish pushaj ancianocunaca huauqui panicunapaj problemacunamantami Pablo shinallataj sustarincuna. Pero shuj ancianoca ñucallami tucuicunata ayudana cani nishpaca mana yuyanachu can. Chaipaj randica Diosta alli sirvij huauquicunatami ayudachun mañana can. Shinallataj jovenlla huauquicunamanmi ima shina huauqui panicunata cuidanata yachachina can. Chashnami cai ancianoca humilde cashcata ricuchin (2 Timoteo 2:2).

14. a) ¿Pabloca imamantataj mana pingarirca? b) ¿Paipaj ejemplomantaca imatataj yachanchij?

¹⁴ Shujtajcuna cushichichunmi minishtinchij. Pabloca humilde cashcamantami shujtajcuna cushichichun saquirca. Paipaj amigocuna animashcamanta shujtajcuna riparangami nishpaca mana pingarircachu. Chaimantami Pabloca Filemonmanca: ‘Canca cꞌuyaj cashcamantami achcata cushichishcangui’ nishpa quillcarca (Filemón 7). Ashtahuanpish ñuca llaquilla cajpica shujtajcunami animarca nishpami huillarca (Colosenses 4:7-11). Ñucanchijpish humildecuna cashpaca shujtajcuna ayudachunmi saquishun. Chaita rurajpica paicunaca cushicushpami ñucanchijta animanga.

15. ¿Pabloca imamantataj tranquilo sintirirca?

¹⁵ Diospaj Shimipi confiashunchij. Pabloca Roma carcelpi cashpami ñalla huañuna cashcata yacharca. Chai llaquicunata chꞌimbapurangapajmi Timoteotaca: “Ñucata ricunaman utca shamungui. Quillcachishcacunatapish apashpa shamungui” nirca (2 Timoteo 4:6, 7, 9, 13). ¿Imamantataj quillcachishcacunataca apamuchun  nirca? Tal vez chai quillcachishcacunapica Ñaupa Testamentomanta huaquin partecunami tiyashcanga. Pabloca Dios Quillcachishcacunata estudiasha nishcamantami chaita apamuchun nirca. Paica Diospaj Shimita liyishpami animarirca (Romanos 15:4). Llaquicunata ima shina chꞌimbapuranatapishmi yacharca (2 Timoteo 3:15, 16). Ñucanchijpish llaquicunahuan cashpaca Pablo shinallatajmi Bibliata estudiana canchij. Chaita rurajpica Jehová Diosca tranquilo sintirichunmi ayudanga.

16. ¿Davidca jatun juchapi urmashpaca ima shinataj sintirirca?

¹⁶ Davidca Betsabe huarmihuan huainayashpami paipaj cusatapish huañuchichun cacharca. Cai juchacunata pacasha nishcamantami culpable sintirirca (2 Samuel 12:9). Shinallataj Diospaj ñaupajpi alli ricurinatami saquirca. Yallitaj sustarishca cashcamantapishmi ungurca (Salmo 32:3, 4). ¿Davidca tranquilo sintiringapajca imatataj rurarca? ¿Ñucanchijpish juchapi urmashca cashpaca imatataj rurana canchij?

17. ¿Davidca shungumanta arrepintirishcataca ima shinataj ricuchirca?

¹⁷ Jehová Dios perdonachun mañashunchij. Davidca shungumanta arrepintirishpami Yayitu Dios paita perdonachun mañarca. Shinallataj pai imalla rurashcacunataca tucuimi parlarca (Salmo 51:1-4-ta liyipai). Davidca Diosta mañashpaca tranquilomi sintirirca (Salmo 32:1, 2, 4, 5). Ñucanchijpish jatun juchata rurashpaca mana pacanachu canchij. Ashtahuanpish imata rurashcataca tucuitami Diosman parlana canchij. Chashnami tranquilo sintirishun. Pero Diospaj ñaupajpi cutin alli ricuringapajca mana chaillatachu rurana canchij.

18. ¿Jehová Dios disciplinajpica Davidca imatataj rurarca?

¹⁸ Diospaj disciplinata chasquishunchij. Jehová Diosca profeta Natantami David juchapi urmashcata ricuchingapaj cacharca. Profeta Natán corregijpica Davidca allimi chasquirca. Paica Betsabepaj cusata huañuchishcata, Diospaj ñaupajpipish jatun juchata rurashcatami huillarca. David disciplinata chasquijpimi Diosca perdonarca (2 Samuel 12:10-14). Ñucanchijpish jatun juchata rurashca cashpaca pushaj ancianocunamanmi  huillana canchij. Paicunataca Yayitu Diosca ñucanchijta cuidachunmi churashca (Santiago 5:14, 15). Shinallataj ima juchata rurashca jahuaca chaitaca mana rurarcanichu nishpaca mana yuyanachu canchij. Ashtahuanpish Diospaj disciplinata chasquishpaca utcami cambiana canchij. Chashnami tranquilo, cushilla sintirishun.

19. ¿Juchapi ama cutin urmangapajca imatataj rurana canchij?

¹⁹ Juchapi urmashca cashpaca ama cutin urmashunchij. Rey Davidca juchapi ama cutin urmangapajmi Jehová Diosta ayudachun mañarca (Salmo 51:7, 10, 12). Yayitu Dios paita perdonashca qꞌuipaca mana alli yuyanatami saquirca. Chashnami tranquilo sintirirca.

20. ¿Jehová Dios perdonaj cashcamantaca ima shinataj agradicina canchij?

²⁰ Jehová Dios ñucanchijta perdonaj cashcamantami agradicina canchij. Chaimantami juchapi urmashpaca Jehová Diosta perdonachun mañana canchij. Shinallataj Yayitu Dios disciplinajpipish allimi chasquina canchij. Juchapi ama cutin urmangapajpish esforzarinami canchij. Chaita rurashpaca tranquilomi sintirishun. James shuti huauquica jatun juchapimi urmarca. Paica: “Jatun juchapi urmashcataca ancianocunaman huillashpami shuj quipita ladoman saquij shina tranquilo sintirircani” ninmi. Shungu pꞌaquirishcacunapaj cꞌuchullapi Jehová Dios cashcamantami cushilla sintirinchij (Salmo 34:18).

21. ¿Yayitu Dios cushichichunca imatataj rurana canchij?

²¹ Tucuri punllacuna quichquiyamucushcamantami llaquicunaca jahuanpi jahuanpi mirarishpa catinga. Yallitaj llaquicunahuan sustarishca cashpaca Jehová Dios ayudachun mañashunchij. Bibliatapish alli estudiashunchij. Shinallataj Anamanta, Pablomanta, Davidmantapish ashtahuan yachashunchij. Imamanta sustarishca cashcata intindingapajpish Diosta mañashunchij (Salmo 139:23). Problemacunata ñucanchijlla mana allichi tucushpaca Diospaj maquipi saquishunchij. Caita rurashpaca ñucanchijpish salmista shinami sintirishun. Paica: “Llaquicunahuan yallitaj sustarishca cajpica, canmi ayudashpa cushichihuarcangui” nircami (Salmo 94:19, NWT ).