1, 2. a) ¿Huaquincunaca imamantataj autoridadta charijcunapica mana confiancuna? b) ¿Cai yachaipica imatataj ricushun?

CUNAN punllacunapica huaquin gentecunapajca autoridadcunapi confianaca sinchimi can. Gobiernocunaca paicunapaj leycunata churashpami charijcunata, rijsishca cajcunataca ayudancuna. Pero huajchacunataca mana ayudancunachu. Bibliapica: ‘Runacunaca caishujcunata llaquichishpa causashpaca, quiquinpaj llaquipajllatajmi chashna ruran’ ninmi (Eclesiastés 8:9). Religionta pushajcunacarin mana alli cosascunatami rurancuna. Chaimi gentecunaca Diospica mana confiancuna. Pero ñucanchijca Bibliamanta yachacujcunataca Jehová Diospi confiachun, Dios churashca pushaj huauquicunapipish confiachunmi ayudana canchij.

² Ashalla huatacunata Diosta sirvicushpapish o achca huatacunata sirvicushpapish Diospi, paipaj organizacionpi confiashpa catina canchij. Maipica Jehová Dios imata rurashcataca mana alli intindinchijchu. Pero imatapish pai alli ruraj cashcapimi confiana canchij. Cai yachaipimi quimsa yuyaicunata ricushun. 1) Ima versocunata mana intindishpapish Diospi confiana cashcata. 2) Jehová churashca pushaj huauquicunata cazuna cashcata. 3) Shamuj punllacunapipish ima pruebacunata ahuantangapaj Diospi confiana cashcatami yachashun.

3. ¿Maipica Bibliata liyishpaca imamantataj Jehová Diospi confianaca sinchi laya ricurin?

 ³ Bibliata liyishpaca Jehová Dios, gentecunata ima shina tratashcata, pai ima shina decidishcatami ricunchij. Por ejemplo,  Números libropica Jehová Diosca shuj israelita runata sábado punllapi yantata japicujpi paita huañuchichun mandashcatami parlan. Cutin Samuel librota liyicushpaca rey David, Betsabé huarmihuan huainayashpa paipaj cusata huañuchijpi, pero David arrepintirijpi, Jehová Dios paita perdonashcatami yachanchij (Números 15:32, 35; 2 Samuel 12:9, 13). Caicunata liyishpaca maipica cashnachari tapurishcanchij: “¿Jehová Diosca imamantataj Davidtaca jatun juchata rurajpipish perdonarca? Pero ¿sábado punllapi yantata japij runa jatun juchata mana rurajpipish paita huañuchichun mandarca?”. Cunanca ima versocunata mana intindishpa imata yuyarina cashcatami ricushun.

4. Génesis 18:20, 21 y Deuteronomio 10:17-pi nishca shinaca ¿imamantataj Jehová Dios decidishcapi confiana canchij?

⁴Maipica Bibliapica imalla tucushcataca mana tucuita huillanchu. Por ejemplo, David shungumanta arrepintirijpi Jehová Dios perdonashcatami yachanchij (Salmo 51:2-4). Pero ¿Moisesman cushca leyta mana cazuj runaca ima layataj carca? ¿Cai runaca sábado punllapi yantata japishcamantaca arrepintirircachu? ¿Shujtaj punllacunapipish Jehová Diostaca manachu cazushcanga? ¿Shujtajcuna paita advirtijpipish paica uyashcangachu? Bibliapica cai runa imallata rurashcataca mana tucuita huillanchu. Pero Jehová Dios “cashcata ruraj” cajtaca allimi yachanchij (Deuteronomio 32:4). Gentecunaca ñahuita ricushpalla o shujtajcunapaj ruraicunata ricushpalla juzgashpami pandarinchij. Pero Jehová Diosca imata juzgacushpapish tucuitami alli ricun (Génesis 18:20, 21; Deuteronomio 10:17-ta liyipai). Jehová Diosta ashtahuan rijsishpa, paipaj mandashcacunata cazushpaca paipimi confiashun. Chaimanta Jehová Dios tucuipi “cashcata ruraj” cashcapimi confiana canchij (Salmo 145:17).

5. ¿Maipica imamantataj mana alli juzgai tucunchij? (“ Juchayuj cashcamantami imatapish mana alli juzgai tucunchij” nishca recuadrota ricui).

⁵Juchayuj cashcamantami maipica mana tucuita alli juzgai tucunchij. Diosman rijchaj cashcamantami tucuicuna allita rurachun, cashcata rurachun munanchij (Génesis 1:26). Pero maipica juchayuj cashcamantami pita juzgashpaca pandarinchij. Jonaspi  yuyashunchij. Jehová Dios ninivitacunata perdonajpica Jonasca dimastijmi pꞌiñarirca (Jonás 3:10–4:1). Jonás pꞌiñarijpipish Jehová Dios perdonajpimi 120.000 ninivitacuna quishpirircacuna. Chaita yachashpaca Jonás pandarishca cashcatami intindinchij. Jehová Diosca mana pandarishcachu carca.

6. ¿Imamantataj Jehová Diosca ñucanchijman tucuita intindichina obligaciontaca mana charin?

⁶Jehová Diosca imamanta pai imata decidishcata ñucanchijman huillana obligaciontaca mana charinchu. Ñaupa punllacunapica Jehová Diosca imata decidingapaj o imata rurangapajca paita sirvijcunatami maipica tapuj carca (Génesis 18:25; Jonás 4:2, 3). Shinallataj paica maipica imata decidishcatami paicunaman intindichij carca (Jonás 4:10, 11). Pero Diosca ñucanchijman tucuita intindichina obligaciontaca mana charinchu. Paica Tucuita Rurajmi can. Chaimantami “Jehová Diosca caita o chaitami rurana can” nishpa mandana derechotaca mana charinchij (Isaías 40:13, 14; 55:9).

7. ¿Picunapi confianataj maipica sinchi can?

⁷ Jehová Diosca tucuipi cashcata ruraj Diosmi can. Paica paipaj pueblota pushachunmi huaquin pushajcunata churashca. Pero maipica ñucanchijpajca juchayuj cashcamantami paicunapi confianaca sinchi can. Tal vez ñucanchijca: “¿Paicunaca Jehová Dios munashca shinachu ruracun? ¿O paicuna munashca shinachu ruracun?” nishpami maipica tapurishcanchij. Ñaupa punllacunapipish maijancunaca chashnallatajmi tapurishcangacuna.  Párrafo 3-pi parlashca mana cazuj runapi yuyashunchij. Paipaj familiaca: “¿Ñuca familiata huañuchichun mandangapajca Moisesca Diostachu tapushcanga?” nishpami tapurishcanga. Shinallataj Davidhuan ima tucushcapi yuyashunchij. Davidca Uriaspaj huarmihuan huainayashpami Uriastapish huañuchirca. Uriaspaj shuj amigoca: “¿Davidca mandaj cashcamanta, pai ima culpata mana charishcata ricuchingapajchu imatapish rurashcanga?” nishpachari tapurishcanga. Ima laya cajpipish Jehová Diospi confiashcata ricuchingapajmi ñucanchijca Dios churashca pushajcunapica confiana canchij.

8. ¿Apostolcuna causashca tiempopi shinallataj ima shinataj cai tiempopipish Jehová Diosca paipaj pueblota ñaupajman pushacun?

⁸ Cunan punllacunapica Jehová Diosca paipaj pueblota ñaupajman pushachunca “alli cazuj, alli yuyaiyuj sirvij” huauquicunatami churashca (Mateo 24:45, NWT ). Apostolcuna causashca punllacunapi shinallatajmi cai huauquicunaca muyundij Allpapi predicachun organizancuna. Shinallataj congregacioncunamanpish huaquin instruccioncunata cuncuna (Hechos 16:4, 5-ta liyipai). Congregacionpica pushaj ancianocunami cai instruccioncunata pajtachichunca ayudancuna. Ñucanchijca cai pushaj huauquicunata cazushpaca Jehová Diospi confiashcatami ricuchishun.

9. ¿Maipica imamantataj ancianocunata cazunaca sinchi can?

⁹ Maipica ancianocuna imata decidishcata apoyanaca sinchimi can. Por ejemplo, cai recienlla punllacunapica huaquin congregacioncunataca shujllapimi tandachishca. Mana cashpaca huaquin ancianocunaca maijan huauqui panicunatami shujtaj congregacionpi sirvichun mañashcacuna. Paicunaca Tandanacuna Huasicunata alli utilizangapajmi chashna cambiocunata rurashcacuna. Pero ñucanchijta shujtaj congregacionpi sirvinaman  richun nijpica amigocunata, familiacunata saquinaca sinchichari ricuringa. Jehová Diosca ancianocunamanca cada publicadorta maijan congregacionman cachana cashcataca mana huillanchu. Chaimantachari paicunata cazunaca sinchi canga. Pero Jehová Diosmi paicunapi confiashca. Chaimantami ñucanchijpish paicunapi confiana canchij. *

10. Hebreos 13:17-pi nishca shinaca ¿pushaj ancianocunataca imamantataj apoyana canchij?

¹⁰ ¿Ancianocuna decidishcahuan mana de acuerdo cashpapish imamantataj paicunata cazuna canchij? Humildadhuan paicunata cazushpaca tandallami Diosta sirvishun (Efesios 4:2, 3). Shinallataj congregacionpipish tucuicunami beneficiarishun (Hebreos 13:17-ta liyipai). Ashtahuancarin Jehová Diospi confiashcatami ricuchishun. Jehová Diosllatajmi ancianocunataca ñucanchijta cuidachun agllashca (Hechos 20:28).

11. ¿Ancianocunapi confiangapajca imatataj yuyarina canchij?

¹¹ Ancianocunapi confiangapajca Jehová Dios paicunata ayudajta, pushajtami yuyarina canchij. Paicunaca imata decidingapajpish Biblia yachachishca shina, Diospaj organización yachachishca shinami decidincuna. Shinallataj paicunaca shungumantami Jehová Diosta cazunata, huauqui panicunata cuidanata munancuna. Huauqui panicunata alli cuidachun Diosllataj mingashcatapishmi yachancuna (1 Pedro 5:2, 3). Caipi yuyashunchij. Cai mundopica gentecunaca religionmanta, politicamanta, ima razamanta cashcamantami chꞌicanyanacushca causancuna. Cutin ñucanchijca Jehová Diosta sirvishcamantami tandalla causanchij. Chashnami Jehová Dios paipaj organizacionta ñaupajman pushacushcata alli intindinchij.

12. ¿Jatun juchata ruraj huauqui o pani arrepintirishcata yachangapajca ancianocunaca imatataj rurana can?

¹² Jehová Diosca ancianocunamanca jatun juchata rurajcuna congregacionpi catichun o mana catichun ricuna responsabilidadtami mingashca. Ancianocunaca juchata ruraj de verastij arrepintirishca cashcatami ricuna can. Chaipajca juchata ruraj mana allita pꞌiñashcata, juchapi cutin ama urmangapaj esforzaricushcata, mana alli amigocunamantapish caruyacushcatami alli ricuna can. Ancianocunaca caita alli yachangapajca Jehová Diostami mañancuna. Ima tucushcatapish, Biblia yachachishcatapish allimi ricuncuna. Chai tucuita rurashca qꞌuipaca paicunaca juchata ruraj congregacionpi catinata o mana catinatami decidincuna. Tal vez juchata ruraj mana arrepintirijpica paitaca congregacionmantami llujchina minishtiringa (1 Corintios 5:11-13).

13. ¿Shuj familiata o shuj amigota congregacionmanta ancianocuna llujchijpica tal vez ima nishpataj tapurinchij?

¹³ Ancianocuna congregacionmanta shuj huauquita o panita llujchijpica paicuna ima decidishcatachari apoyanchij. Pero shuj cꞌuyashca amigota o familiata congregacionmanta llujchijpica paicuna decidishcata apoyanaca maipica sinchichari ricurin. Chaipica: “¿Ancianocunaca ima tucushcata alli yachashpachu juzgarcacuna? ¿Dios munashca shinachu juzgarcacuna?” nishpachari tapurinchij. Pero paicuna imata decidishcapi imamanta confiana cashcatami ricushun.

14. ¿Shuj familiata o amigota congregacionmanta llujchijpica imamantataj ancianocuna decidishcata apoyana canchij?

¹⁴ Mana arrepintirijcunata congregacionmanta llujchichunca Jehová Diosmi ancianocunamanca chai autoridadta cushca. Chaita mana rurajpica mana arrepintirijcunaca  shujtajcunapajmi mana alli ejemplocuna canga (Gálatas 5:9). Ashtahuancarin mana arrepintirijcunaca paicunapaj yuyaita, paicunapaj causaita mana cambiashpami Jehová Diospajman tigranata mana decidingacuna (Eclesiastés 8:11). Ancianocunaca Jehová Dios paicunaman juzgana autoridadta cushcatami alli yachancuna. Chaita yachashpami paicunaca Jehová Dios mandashca shina juzgangapaj esforzarincuna. Chaimantami paicunapica confiana canchij (2 Crónicas 19:6, 7).

15. ¿Imamantataj cunanmanta Jehová Dios cushca instruccioncunata cazuna canchij?

¹⁵ Cai millai mundoca ñallami tucuringa. Chaimantami Jehová Diospica cunanmanta confiana canchij. Jatun llaqui punllacunapica mushuj instruccioncunatami chasquishun. Tal vez chaita chasquishpaca mushuj cashcamanta o mana intindishcamantami chaita pajtachinaca sinchi laya ricuringa. Chai punllacunapica Jehová Diosca ñucanchijman instruccioncunata cungapajca pushaj huauquicunatami utilizanga. Paicuna chai punllacunapi instruccioncunata cujpica ñucanchijca mana dudashpami pajtachina canchij. Chaimantami cunanmanta ancianocuna cushca instruccionta pajtachina canchij. Chaita rurashpaca shamuj punllacunapipish Diostami cazushun (Lucas 16:10).

16. ¿Jehová Dios Armagedonpi tucuicunata juzgacujpica imamantataj paipi confianata minishtishun?

¹⁶ Ñucanchijca cunan punllacunapica ñucanchij mana Testigo familiacunapish, shujtajcunapish Jehová Diosmanta yachachunmi shuyanchij. Pero Armagedón punllapica Jehová Diosllatajmi Jesushuan paicunata juzganga (Mateo 25:31-33; 2 Tesalonicenses 1:7-9). Jehová Dioslla, Jesusllami picunata quishpichinata o mana quishpichinata decidingacuna (Mateo 25:34, 41, 46). ¿Chai tiempopi paicuna chashna decidishcapica tucui shunguhuanchu confiashun? Si cunanmanta Jehová Diospi confiashpaca shamuj punllacunapipish confiashunmi.

17. ¿Jehová Dios cashcata ruraj cashcamantaca ima shinataj beneficiarishun?

¹⁷ Jehová Dios siempre cashcata ruraj cashcamantami Paraíso Allpapica alaja causai tiyanga. Chaipica ñallami panda religioncunapish, gentecunata llaquichij gobiernocunapish, millai gentecunapish mana tiyanga. Shinallataj chaipica mana mayoryashpa alli saludtami charishun. Ñucanchij cꞌuyashca familiacuna huañunatapish ña mana manchashunchu. Diablopish, demoniocunapish 1.000 huatatami huichcashca cangacuna. Tucui llaquicunaca ña mana ashtahuan tiyangachu  (Apocalipsis 20:2, 3). Jehová Diospi cunanmanta confiashpaca chai tiempopica cushillami sintirishun.

18. Números 11:4 al 6 y 21:5-pi nishca shinaca ¿israelitacuna shina ama cangapajca imatataj rurana canchij?

¹⁸ ¿Paraíso Allpapipish Jehová Diospi confiashpa catinatachu minishtishun? Caipi yuyashunchij. Jehová Diosmi Egipto llajtamantaca israelitacunataca llujchirca. Egiptomanta llujchishca qꞌuipallami israelitacunaca: “Egiptopica tucui laya micunacunatami charircanchij. Cunanca maná micunataca mana micushunchu” nishpa quejarircacuna (Números 11:4-6; 21:5-ta liyipai). Ñucanchijpish Armagedonmanta quishpirishpaca mana chai rato alaja Paraíso Allpapi causai callarishunchu. Ashtahuanpish chaipica cai tucui Allpata allichina, pꞌichanami tucunga. Asha ashami Paraíso Allpata rurashpa catishun. Callaripica causaica manachari fácil canga. ¿Chai tiempocunapica Dios cushcacunata chasquishpa ama quejaringapajca imatataj rurana canchij? Cunanmantami Jehová Dios tucuita cushcahuan agradecidos cana canchij. Chashnami shamuj punllapicarin pai cushcacunahuanca agradicishca sintirishun.

19. ¿Cai yachaipica imatataj yachashcanchij?

¹⁹ Jehová Diosca imata decidishpapish manataj pandarinchu. Chaitaca tucui shunguhuanmi crina canchij. Shinallataj Jehová Dios churashca pushaj huauquicunapimi confiana canchij. Jehová Diosca profeta Isaiastaca: “Ñucapi shunguta churashpa, casijlla causajpica muyujta pirca shinami casha” nircami (Isaías 30:15). Cai shimicunata amataj cungarishunchij.