1. a) ¿Maijan huauqui panicunaca imamantataj ñucanchijtaca consejancuna? b) ¿Consejocunataca imamantataj chasquina canchij?

TUCUICUNAMI consejocunata cuchun minishtinchij. Maipica ñucanchijllatajmi shujtajcuna consejachun mañanchij. Cutin maipica maijan huauqui panicunaca ña ñucanchij pandarigrijta ricushpami, ama pandarichun ñucanchijman consejocunata cuncuna (Gálatas 6:1). Ancianocunapish ñucanchij ima juchapi urmashca qꞌuipacarin corregincunami. Ima laya cajpipish chasquinallami canchij. Chai consejocunaca ñucanchijpaj allipajllatajmi (Proverbios 6:23).

2. Proverbios 12:15-pi nishca shinaca ¿imamantataj shujtajcunapaj consejota chasquina canchij?

² Cai yachaipaj versopica ‘yachaisapacuna yachachishcata’ uyachunmi animan (Proverbios 22:17). Tucuicunami yachashpa catinata minishtinchij. Chaimantami experienciata charijcunamanta yachana canchij (Proverbios 12:15-ta liyipai). Imata rurangapajpish shujtajcuna siempre ayudachunmi minishtinchij. Chaimanta paicuna cushca consejocunata uyashunchij. Chashnami humildecuna cashcata ricuchishun. Jehová Diosca rey Salomonmanca: “Imapish alli cachunca taucapura yuyarinacushpami callarina” nishpami quillcachirca (Proverbios 15:22).

3. ¿Ima shinallataj consejocunata chasquinchij?

³ Maipica ñucanchijllatajmi publicacioncunata, Bibliata liyishpa consejocunata tarinchij. Chai consejocunapi yuyashpaca imapi mejorana cashcatami yachanchij (Hebreos 4:12). Cutin maipica experienciata charij huauqui panicuna o pushaj  ancianocunami ñucanchij imapi mejorachun ñahui ñahui consejota cunga. Paicunaca Bibliahuan consejashpaca ñucanchijta cꞌuyashcatami ricuchincuna. Chaimanta paicuna consejashcata alli uyashpa pajtachishunchij.

4. Eclesiastés 7:9-pi nishca shinaca ¿ima consejota chasquicushpaca imatataj mana rurana canchij?

⁴ Tucuicunami juchayuj cashcataca alli intindinchij. Pero maijanpish ñucanchijta imapi mejorachun consejajpica, maipica chaita chasquinaca sinchimi can (Eclesiastés 7:9-ta liyipai). Chaimantachari shujtajcuna consejajpica, “ñucata mana alli sintichingapajllami chashna consejacun” nishpa yuyashun. Mana cashpaca “paica ñucata consejangapajca ima derechota mana charinchu, paipish pandarinllami” nishpachari yuyashun. Chashna yuyashpaca resintirishcami saquirishun. Ashtahuancarin ima consejota mana chasquisha nishpaca alli sintiringaraicullachari, quejarishpa shujtajcunaman parlashun.

5. ¿Cai yachaipica imacunatataj yachashun?

⁵ Cai yachaipica Bibliapi parlashca Diosta sirvijcuna huaquincunaca consejota chasquishcata, cutin shujtajcunaca consejota mana chasquishcatami ricushun. Shinallataj ñucanchijpish consejocunata chasquingapaj imata rurana cashcata, chasquishpaca ima shina beneficiari tucushcatami yachashun.

6. ¿Rehoboampaj ejemplomantaca imatataj yachanchij?

⁶Rehoboampi yuyashun. Paipaj yaya Salomón mandacushpaca israelitacunapajca llaquichij leycunatami churarca. Chaimi Rehoboam mandai callarijpica gentecunaca chai sinchi leycunata anchuchichun mañarcacuna. Rehoboamca imata agllanata yachangapajmi Israelpi pushaj ancianocunata tapunaman rirca. Paicunaca: “Gentecuna canta apoyachunca paicuna mañashcatami rurana cangui” nishpami consejarcacuna (1 Reyes 12:3-7). Pero Rehoboamca chai consejotaca mana munarcachu. Chaimantami paica paihuan huiñai runacunata tapunaman rirca. Cai runacunaca 40 huata yallicunatami charishcangacuna. Chaimantami paicunaca ima experienciatapish charishcangacuna (2 Crónicas 12:13). Pero paicunaca: “Gentecunataca ashtahuanmi llaquichina cangui” nishpami consejarcacuna (1 Reyes 12:8-11). Rehoboamca pai munashca consejota chasquisha nishpami, paihuan huiñai runacuna consejashcata chasquirca. Pai mana alli mandai tucushcamantami gentecunapish llaquicunata charirca. Ñucanchijpish maipica ñucanchij munashca shinami consejachun munanchij. Pero Bibliahuan consejajpica chaitaca chasquinallami canchij.

7. ¿Uziasmantaca imatataj yachanchij?

⁷Rey Uziaspish consejocunataca mana chasquircachu. Shuj punllaca paica inciensota rupachina ucupimi, inciensota rupachisha nirca. Pero chaitaca sacerdotecunallami rurana carca. Chaimi sacerdotecunaca: “Uzías, Mandaj Diosman inciensota cushpa rupachinaca mana cambaj ruranachu. Aaronpaj huahua huahua curacunallami caitaca rurai tucun” nishpami consejarcacuna. Chashna aconsejajpica Uziasca achcatami pꞌiñarirca. ¿Uziasca imamantataj chai consejotaca mana chasquisha nirca? Paica: “Ñucaca mandajmi cani. Chaimanta ñucataca pi mana aconsejanachu can” nishpami yuyashcanga. Pero Jehová Diosca chashna rurachunca mana munarcachu. Uzías humilde cashca cashpaca cai consejota chasquishcahuanmi chai templo ucumantaca rinman carca. Jehová Diospish paitaca perdonanmanmi carca. Uzías mana cazushcamantami Jehová Diosca paitaca lepra ungüihuan castigarca. Chaimantami paica  huañuna horascama lepra ungüihuan causarca (2 Crónicas 26:16-21). ¿Caimantaca imatataj yachai tucunchij? Ima responsabilidadcunata charishpapish consejocunatami cazuna canchij. Chaita mana rurashpaca Diospaj ñaupajpipish mana allimi ricurishun.

8. ¿Jobca consejota cujpica ima shinataj chasquirca?

⁸ Bibliapica huaquincunapish consejocunata chasquishcatami yachai tucunchij. Chaimantami Jehová Diosca paicunata bendiciarca. Jobpi yuyashun. Paica Diosta tucuipi cazusha nishpapish juchayujmi carca. Jobca sinchi llaquicunahuan cai horasca imatapish mana yuyashpami nirca. Chaimi Elihupish, Jehová Diospish paitaca aconsejarca. ¿Jobca ima shinataj cai consejotaca chasquirca? Paica humilde cashcamantami ima consejashcata chasquirca. Jobca: ‘Ñucaca mana ima yuyaita japishpa rimaricurcanillami. Cunanca shungumantami arrepintirishca cani’ nircami. Job chashna humilde cashcamantami Jehová Diosca paita bendiciarca (Job 42:3-6, 12-17).

9. a) ¿Moisesca Jehová Dios consejajpica ima shinataj chasquirca? b) ¿Ñucanchijpish cai ejemplomantaca imatataj yachanchij?

⁹Moisesca pandarishpapish Jehová Diospaj consejocunatami chasquirca. Shuj cutinca Moisesca israelitacunahuanmi achcata pꞌiñarirca. Jehová Diostapish mana jatunyachircachu. Chaimantami Jehová Diosca paitaca pai cusha nishca allpaman pasachunca mana saquirca (Números 20:1-13). Tiempo huashaca Moisesca Dios cusha nishca allpaman yaicungapajmi cutin mañarca. Chaimi Diosca: ‘Chaimantaca ama ashtahuan rimaichu’ nirca (Deuteronomio 3:23-27). Moisesca resentirishca saquirinapaj randica Jehová Dios imata decidishcatami apoyarca. Chaita rurajpimi Jehová Diosca israelitacunata mandashpa catichun saquirca (Deuteronomio 4:1). Jobpish, Moisespish ñucanchijpajca alli ejemplocunami can. Jobca quejarishpa pasanapaj randica Dios consejashcatami chasquirca. Moisespish Dios cusha nishca allpaman mana pasashpapish huañuna horascamami Jehová Diostaca alli sirvirca.

10. a) Proverbios 4:10 al 13-pi nishca shinaca ¿consejocunata chasquishpaca ima shinataj beneficiarishun? b) ¿Huaquin huauqui panicunaca paicunata consejajpica imatataj rurashcacuna?

¹⁰ Ñucanchijpish Job shina, Moisés shina consejota chasquishpaca ima llaquipi mana urmashunchu (Proverbios 4:10-13-ta liyipai). Achca huauqui panicunami chaita rurashcacuna. República Democrática del Congopi causaj Emmanuel shuti huauquica: “Experienciata charij huauqui panicunaca Jehová Diosmanta ñuca caruyacujta ricushpami consejarcacuna. Chai consejocunata chasquishcamantami llaquicunapica mana urmashcani” nircami. * Canadamanta Megan shuti precursorapish: “Maipica ima consejocunata mana uyasha nijpipish, huauqui panicunaca ñuca minishtishca consejocunatami cushcacuna” ninmi. Croaciamanta huauqui Markoca: “Mana allita rurashcamantami Diosta sirvinapica shuj privilegiota pirdircani. Pero consejocunata chasquishcamantami Dioshuanca cutin alli apanacui callarircani” ninmi.

11. ¿Huauqui Karl Kleinca imatataj cuentata curca?

¹¹ Cuerpo Gobernantepi sirvij huauqui Karl Kleinpish consejota chasquishpami beneficiarirca. Shuj cutinca paipaj alli amigo huauqui Joseph Rutherford paimanca shuj consejota cushcatami parlarca. Huauqui Kleinca callaripica consejotaca mana alli chasquircachu. Paica: “Shuj cutinca huauqui Rutherfordca ñucahuan tupashpaca  cushillami ‘imanallataj cangui’ nishpa tapurca. Pero ñucaca ñucata consejashcamanta, resentirishca cashcamantami shimi ucullapi saludarcani. Shimi ucullapi saludajta ricushpami huauqui Rutherfordca, ‘Klein cuidaringui, ñatij canta Diablo pandachinman’ nirca. Chaimi ñucaca pingaihuan cashcamantaca ‘mana ima tucunichu huauqui Rutherford’ nircani. Pero huauqui Rutherfordca ñuca resentirishca cashcata ricushpami paica cutin, ‘ñatij Diablo pandachinman, chaimanta cuidaringui’ nirca. Chaica ciertomi carca. Pi ñucanchijta consejajpi resentirishca saquirishpaca Diablo pandachichunmi saquishun” nircami (Efesios 4:25-27). * Huauqui Kleinca huauqui Rutherfordpaj consejota chasquishcamantami ishquindij alli amigo cashpa catircacuna.

12. Salmo 141:5-pi nishca shinaca ¿consejocunata chasquingapajca imamantataj humildes cana canchij?

¹²Humildecuna cashpaca juchayujcuna cashcata, shujtajcunapaj ayudatapish minishtishcatami yachashun. Ña ricushca shinaca Jobca callaripica consejotaca mana chasquircachu. Pero qꞌuipaca paica humilde cashcamantami, paipaj qꞌuipa huiñai Elihú consejajpica chasquirca (Job 32:6, 7). Chaimantami Jehová Diosca paitaca bendiciarca. Maipica ñucanchijpish pi consejachunca mana minishtinchijchu nishpami yuyanchij. Jovencuna consejota cujpicarin mana uyasha ninchijchu. Pero humildecuna cashpaca pi consejajpipish uyashunmi. Canadamanta shuj pushaj ancianoca: “Ñucanchij ima shina cashcataca, ñucanchijllatajca mana ricuri tucunchijchu. Chaimanta tucuicunami alli cualidadcunata charingapaj, alli yachachijcuna cangapajca shujtajcuna consejachun minishtinchij” ninmi. Chaica ciertomi can (Salmo 141:5-ta liyipai).

13. ¿Jehová Diosca imamantataj ñucanchijtaca consejan?

¹³Jehová Dios ñucanchijta cꞌuyashcamanta consejashcatami yuyarina canchij (Proverbios 4:20-22). Diosca paipaj Shimihuan, publicacioncunahuan, experienciata charij huauqui panicunahuanmi ñucanchijta consejan. Chashnami paica yallitaj cꞌuyashcata ricuchin. Bibliapica: ‘Diosca ñucanchij allipajmi corregin’ ninmi (Hebreos 12:9, 10, NWT).

14. ¿Consejota ima laya cujpipish imatataj rurana canchij?

¹⁴Consejota ima laya cujpipish chai consejota pajtachishunchij. Bibliapica cushichij, alli shimicunahuan consejana cashcatami yachachin (Gálatas 6:1). * Pero maipica maijancunaca  sinchita rimashpa o pꞌiñarishpachari consejota cungacuna. Chashna consejajpipish consejota pajtachingapajmi esforzarina canchij. Chaipajca: “¿Consejashcamantaca imatataj yachai tucuni?” nishpami tapurina canchij. Pꞌiñarishpa, sinchita rimashpa consejashcapi yuyanapaj randica, chai consejashcamanta ima shina beneficiari tucushcataca siempremi ricuna canchij (Proverbios 15:31).

15. ¿Imamantataj shujtajcunamanca consejota cuchun mañana canchij?

¹⁵ Bibliapica shujtajcunaman consejota mañachunmi animan. Proverbios 13:10-pica: “Cunashcata chasquijcunaca, alli yachajcunami tucun” ninmi. Shujtajcunaman consejota mañajcunaca ima decisiontapish allimi agllancuna. Chaimanta ñucanchijpish shujtajcunaman consejota mañashunchij.

16. ¿Imacunallata rurangapajtaj shujtajcunamanca consejota mañana canchij?

¹⁶ ¿Imacunallata rurangapajtaj shujtajcunamanca consejocunata mañana canchij? Cai catij ejemplocunapi yuyashunchij. 1) Shuj panica Bibliamanta estudiota cungapajmi experienciata charij publicadortaca acompañachun mañan. Qꞌuipaca cai publicadortaca imapi mejorana cashcatami tapun. 2) Shuj soltera panica experienciata charij panitachari ropata randingapajca acompañachun mañan. Chaipica alli agllangapajmi consejota cuchun mañan. 3) Shuj huauquica congregacionpichari punta cutin shuj conferenciata cun. Qꞌuipaca experienciata charij huauquitami imapi mejoranata tapun. Experienciata charij huauquicunapish alli yachachijcuna cangapajca shujtajcunapaj consejotami mañana can. Mañashpaca chaitami pajtachina can.

17. ¿Yachaisapa tucungapajca imatataj rurana canchij?

¹⁷ Catij semanacunapi o catij quillacunapica huaquin consejocunatami chasquishun. Chashna consejajpica humildesmi cana canchij. Consejota ima laya cujpipish pajtachinami canchij. Tucuicunami juchayujcuna canchij. Pero pi cushca consejocunata uyashpa, chaita pajtachishpaca Bibliapi nishca shinaca yachaisapami tucushun (Proverbios 19:20).