1-3. a) ¿Salmo 147-taca ima horataj escribirca? b) ¿Salmo 147-pica imatataj yachai tucunchij?

SHUJTAJCUNA allita rurajpi, cꞌuyaj o llaquij cajpica paicunataca jatunyachinchijmi. Pero tucuicunamanta yallica Jehová Diosllatami alabana canchij. Jehová Diosmi tucuita rurashca. Shinallataj ñucanchijta cꞌuyashcamantami paipaj Churita cacharca. Chaimantami paillata alabana canchij.

² Salmo 147-ta escribijca tucui shunguhuanmi Jehová Diosta alabasha nirca. Shujtajcunatapish Diosta alabachunmi animarca (Salmo 147:1 *, 7, 12-ta leyipai).

³ Cai Salmota pi escribishcataca mana yachanchijchu. Jehová Dios israelcunata Babiloniamanta llujshichishca tiempopimi causashca canga (Salmo 147:2). Jehová Diosca israelcuna Jerusalenpi paita tigra adorachunmi ayudarca. Chaita ricushpami Salmo 147-ta escribij runaca Diosta alabashcanga.  ¿Imamantataj ashtahuan alabarca? ¿Ñucanchijpish imamantataj Jah-ta alabana canchij? (Salmo 147:1, NM).

4. a) ¿Mandaj Ciro Babiloniamanta llujshichijpica israelcunaca ima shinataj sintirishcacuna canga? b) ¿Israelcunaca imamantataj cushilla sintirircacuna?

⁴ ¿Babiloniapica israelcunaca ima shinashi sintirishcacuna canga? Babiloniocunaca paicunamanta burlarishpami, ‘Sionpi cantana cantocunata ñucanchijpaj cantaichij’ nijcuna carca. Pero Jerusalén tucuchishca cashcamantami israelcunaca llaquilla carcacuna. Chaimantami mana cantasha nircacuna (Salmo 137:1-3, 6). Israelcunaca shungupi nanarishca cashcamantami paicunata cushichichun minishticurcacuna. Jehová Diosca paicunata ayudasha nircami. Chaimantami mandaj Cirota israelcunata Babiloniamanta llujshichichun agllarca. Ciroca: ‘Diosca Jerusalenpi shuj huasita shayachichunmi mandan. Chaimanta cancunapurapi Dios agllashcacuna maijan tiyajpica Diosca paihuan cachun. Paica Jerusalenman huichiyachunlla nin’ nircami (2 Crónicas 36:23). Caita uyashpami israelcunaca dimastij contentarishcanga.

5. ¿Salmo 147:3-pi nishca shinaca Diosca ima shinataj ñucanchijta ayudan?

⁵ Jehová Diosca cada israelcunamanta preocuparishpami ayudarca. Cunanpish Diosca chashnallatajmi ayudan. Chaimantami Salmo 147-ta escribij runaca: “Paimi shungu pꞌaquirishcacunataca alliyachin. Paicunapaj chugricunatapish paimi jambishpa pilluchin” nirca (Salmo 147:3). Ñucanchijcuna ungushca cajpi o llaquilla cajpica Taita amito Jehová Diosca cushichisha ninmi. Paica ñucanchij nanarishca shunguta jambisha ninmi (Salmo 34:18; Isaías 57:15). Ima llaquita charijpipish paica alli yuyaita cushpa, fuerzata cushpami ayudan (Santiago 1:5).

6. ¿Salmo 147:4-pica imatataj yachanchij? (Página 15-pi tiyaj dibujota ricui).

⁶ Salmo 147-ta escribij runaca jahua cielota ricushpami: ‘Luzerocuna mashna cashcatapish Diosmi yupashcata charin. Tucui chaicunataca paicunapaj shutipimi cayan’ nircami (Salmo 147:4). Cai runaca luzerocunata ricui tucushpapish mashna tiyashcataca mana yachai tucurcachu. Cientificocunapish achca luzerocunatami ricui tucuncuna. Pero mashna tiyashcataca mana yachai tucuncunachu. Diosllami mashna luzerocuna tiyashcata yachan. Paica cada luzerotami shutipi cayan (1 Corintios 15:41). Cada luzerota alli rijsishca layallatajmi Diosca cada unota alli rijsin. Paica ñucanchij maipi cashcata, ima shina sintirishcata, imata minishtishcatapish allimi yachan.

7, 8. a) ¿Diosca imatataj ñucanchijmanta alli intindin? b) ¿Kyoko panitaca Diosca ima shinataj ayudarca?

⁷ Jehová Diosca cada cual ima shina cashcataca allimi rijsin. Chaimantami ima problemata charijpipish paica ayudai tucun (Salmo 147:5-ta leyipai). Llaquicunahuan cashpaca imata mana rurai tucushca shinami sintirinchij. Pero Diosca imata rurai  tucushcata o mana rurai tucushcataca allimi yachan. “Ñutu allpamanta ñucanchij cashcatapish yuyaipimi” charin (Salmo 103:14). Juchayuj cashcamantaca cutin cutinmi chaillapitaj pandarinchij. Maipica mana allitachari rimarcanchij o mapa munaitachari charircanchij, mana cashpaca shujtajcunamantachari envidiata charircanchij. Chaimantaca llaquillachari sintirircanchij. Jehová Diosca mana ima juchata ruraj cashpapish, ñucanchij ima shina sintirishcata allimi intindin (Isaías 40:28).

⁸ ¿Llaquicunahuan cajpi Jehová Dios ima shina ayudashcata ricushcanguichu? (Isaías 41:10, 13). Kyoko shuti panimanta parlashun. Paica shujtaj llajtapimi Diospaj Palabrata yachachinaman rirca. Callaripica llaquillami carca. Chaimi mushuj congregacionpi huauqui panicunaca cushichishpa ayudarca. Pani Kyokoca: “Turi ñañacuna chashna ayudajpimi Jehová Diosca ñucataca: ‘Ñuca huahualla, cantaca mana precursora cashcallamantachu cꞌuyani, ñucata tucui shunguhuan sirvishcamantami cantaca cꞌuyani. Cushilla sirvishpa catichunmi munani’ nicuj shinami carca” ninmi. ¿Jehová Diosca cantaca ima shinataj ayudashca?

9, 10. ¿Jehová Diosca ima shinataj ñucanchijta ayudan?

⁹ Huaquinpica imatachari churashun o imatachari micushun nishpachari preocuparinchij. Pero Jehová Diosca tucui minishtishca micunacuna allpapi pꞌucuchunmi rurarca, ‘cuervocunapaj huahuacuna mañajpipish paica cunmi’ (Salmo 147:8, 9-ta leyipai). Jehová Diosca cuervocunamanpishmi caran. ¿Manachu ñucanchij minishtishcacunatapish paica cunga? (Salmo 37:25).

¹⁰ Jehová Diosca paipi ashtahuan crichunmi ñucanchijta ayudan. Shinallataj tranquilo sintiringapajmi ayudan (Filipenses 4:6, 7). Mutsuo shuti huauquitapish paipaj huarmitapish Jehová Dios ima shina ayudashcata ricushun. Huata 2011-pica Japón llajtapimi jatun llaqui tiyarca. Mama cuchamanta yacucuna shamushpami huasicunata taparca. Mutsuo paipaj huarmipish huasi jahuaman llujshishpami salvarircacuna. Pero casi tucui charishcacunatami yacuca apashpa rirca. Chai qꞌuipaca segundo pisopimi shuj tutata amsapi chirihuan pasarcacuna. Ña pacarijpica animaringapajmi imata leyingapaj mashcarcacuna. Paicunaca Anuario de los testigos de Jehová 2006 librollatami tarircacuna. Chai libropica paicuna pasacushca llaquimanta parlaj shuj tematami ricurcacuna. Chai temapica 2004 huatapi Sumatra llajtapi tiyashca llaquimantami parlarca. Sumatra llajtataca jatun yacucunami tapashpa llaquichishca carca. Chai jatun llaqui layaca cunancama mana tiyashcachu. Sumatra llajtapi huauquicunata panicunata Dios ima shina ayudashcata leyishpaca Mutsuopish paipaj huarmipish huacarcacunami. Paicunaca chai leyishca experienciacunahuan Jehová Dios animota cucushcatami sintircacuna. Shinallataj huauqui panicuna micunitata, ropitata cushpa ayudajpica Jehová Dios ayudacushcatami ricurcacuna. Comité de Sucursalpi sirvij huauquicuna visitajpicarin ashtahuanmi animarircacuna. Mutsuo huauquica: “Jehová Diosca ñucanchij ladopi cashca layami carca” nircami. Caipi ricushca shinaca Jehová Diosca paipi  tucui shunguhuan cringapajmi ayudan. Shinallataj ñucanchij minishtishcacunata cushpami ayudan.

11. ¿Dios ñucanchijta ayudachunca imatataj rurana canchij?

¹¹ ‘Jehová Diosca mana jatun tucushcacunataca maquita cushpa jatarichinmi’ (Salmo 147:6a, QC, 1989). ¿Jehová Dios ayudachunca imatataj rurana canchij? Paihuanmi alli apanacuna canchij. Cutin, paihuan alli apanacungapajca alli shungumi cana canchij (Sofonías 2:3). Alli shungucunaca mana alli ruraicunata, llaquicunatapish Jehová allichichunmi shuyancuna. Chashna gentecunatami Diosca cꞌuyan.

12, 13. a) ¿Dios ñucanchijta ayudachun nishpaca imamantataj caruyana canchij? b) ¿Salmo 147:10-pica imatataj yachachin?

¹² Salmo 147:6-pica: ‘Diosca millaicunataca  pambacama cumurichinmi’ ninmi. Dios ñucanchijta ama saquichunca pai millashcatami millanayachina canchij (Salmo 97:10). Por ejemplo, huainayanamanta, shujtaj mapa ruraicunamantami caruyana canchij. Chaicunapi ama urmangapajca televisionpi, Internetpi o shujtaj ladocunapipish mapa cosascunata mana ricunachu canchij (Salmo 119:37; Mateo 5:28). Chai mapacunamanta anchurinaca sinchichari canga. Pero chaimanta anchuringapaj esforzarishpaca Diospaj ñaupajpi allimi ricurishun.

¹³ Cai mapa cosascunamanta anchuringapajca Jehová Diospaj ayudatami mashcana canchij. Salmo 147: 10-pica: Diosca “caballopaj fuerzapica mana cushicunchu. Fuerzasapa runahuanpish mana cushicunchu” ninmi. ¿Chaita nishpaca imatataj nisha nicun? Ñucanchijllapi o shujtaj runacunapi shunguta churachun Diosca mana munashcatami nicun. Jehová Diosca ñucanchij mañashcacunata uyangapajmi listo can. Chaimantami Diosta rogarishpa ayudachun mañana canchij. Salmo 147:11-pi nishca shinaca ‘Diosca paita manchajcunahuanmi cushicun. Pai llaquij cashcata shuyajcunahuanmi cushicun’. Shinaca mapa munaicunata ama charingapaj Jehová Dios ayudachunmi saquina canchij.

14. ¿Salmo 147-ta escribijca imamantataj cushilla sintirirca?

¹⁴ Problemacunata charijpica Jehová Diosca ayudasha ninmi. Salmo 147-ta escribijca, israelcuna Jerusalenman tigrashcata yuyarishpami cashna nirca: ‘Diosmi cambaj pueblo pungucunapica, fierro aldabacunata sinchita churarca. Paimi canpi caj huahuacunataca alli cashca cachun nirca. Paimi cambaj llajtapica, sumaj causaita cun’ nircami (Salmo 147:13, 14). Cai Salmota escribijca Jehová Dios Jerusalenta cuidacushcata yachashpami cushilla sintirirca.

15-17. a) ¿Huaquinpica ima shinataj sintirinchij? b) ¿Jehová Diosca ima shinataj ayudan? c) ¿Jehová Diosca paita sirvijcunataca ima shinataj paipaj Shimihuan ayudashca?

¹⁵ Huaquinpica llaquicunahuan cashpaca dimastijmi sustarinchij. Pero Jehová Diosca alli yachaita cushpami ayudan. Chaimantami Salmo 147-ta escribijca cashna nirca: ‘Paimi cai pachamanca paipaj shimita cachan. Paipaj shimica utcami tucuita  rin. Paimi rasutapish millmata shina urmachin. Casatapish ushpata shinami urmachin. Paimi rasutaca mirga mirgata urmachin’ nircami. Chai qꞌuipaca cashnami nirca: “Chai chiripica, ¿pitaj ahuantai tucungari? Diosca paipaj shimihuan rimashpaca rasutaca yacuyachinllami” nircami (Salmo 147:15-18). Jehová Diosca tucuitami alli rijsin, achca podertapishmi charin. Chaimantami rasuhuanpish, runduhuanpish imatapish rurai tucun. ¿Manachu ima llaquicunatapish ahuantachun ayudanga?

¹⁶ Cunan punllacunapica Jehová Diosca Bibliahuan yachachishpami ñucanchijta ayudan. Salmota escribijca, ‘Diospaj Shimica utcami tucuita rin’ nircami. ¿Chaita nishpaca imatataj nicurca? Minishticushca rato Jehová Dios ayudaj cashcatami nicurca. ¿Ima shinataj Diosca ayudan? Bibliahuan, JW Broadcasting programacunahuan, Internetpi jw.org paginahuan, congregacionpi ancianocunahuan, shujtaj huauqui panicunahuanpishmi ayudan. Shinallataj ‘alli cazuj, alli yuyaiyuj sirvij’ nishca huauquicuna rurashca publicacioncunahuanpishmi ayudan (Mateo 24:45). ¿Cantapish minishticushca rato Jehová Dios ayudashcachu?

¹⁷ Simone shuti panimanta parlashun. Paica imapajpish mana valij layami sintirirca. Diospaj ñaupajpipish mana alli ricurishcatami yuyarca. Chashna llaquilla puricushpapish Diosta mañanataca mana saquircachu. Shinallataj Diospaj Shimita estudiashpami catirca. Pani Simoneca: “Llaquilla puricujpipish Jehová Diosca fuerzata cushpa, ima ruranata yachachishpami ayudahuashca” ninmi. Taita Dios ayudacushcata yachashpaca Simoneca cushillami causan.

18. a) ¿Jehová Diosca imapajtaj ñucanchijta agllashca? b) ¿Canca imamantataj Jehová Diosta alabasha ningui?

¹⁸ Jehová Diosca israelcunata paipaj llajta cachunmi agllarca. Israelcunallamanmi Diosca paipaj Shimita, pai mandashcacunata yachachij carca. Salmo 147-ta escribijca caitaca allimi yacharca (Salmo 147:19, 20-ta leyipai). Cunanpish Jehová Diosca paipaj testigocuna cachunmi ñucanchijta agllashca. Paipaj Shimita yachachishcamanta, paipaj ñaupajpi alli ricuringapaj ayudashcamantami Diosta pagui ninchij. Jehová Diosca tucuitami cushca. Chaimantami Salmo 147-ta escribij layallataj Jehová Diosta alabasha ninchij. Shinallataj shujtajcunapish Diosta alabachunmi ayudashun ninchij.