Apóstol Pabloca Diablo ama pandachichunmi cuidarirca. Pero shujtaj crijcunaca mana cuidarircacunachu. Por ejemplo, Corintopi causaj crijcunaca Diospi sinchi crishcata yuyashpami, “Diabloca mana pandachi tucunchu” nijcuna carca (1 Corintios 10:12). Chaimantami Pabloca: “Chashna cajpipish culebra achca yachaj cashpa Evata umashca shinallataj, cancunatapish tucui shunguhuan mana nij tucushpalla Cristota cꞌuyacushca yuyaicunata ima shinapish umashpa cungachinatami manchacuni” nircami (2 Corintios 11:3).

Pablo nishca shinaca Diablo ama pandachichunmi cuidarina canchij. Diablo ama pandachichunca paipaj llullacuna llaquichij cashcatami yuyaipi charina canchij.

Achca gentecunaca paicuna shinallataj yuyachun o paicuna munashcata rurachunmi imatapish nincuna. Shuj libropi nishca shinaca, ‘cashna gentecunaca llullashpa, mana tucuita huillashpami crichincuna. Caita ruranaca mana allichu can’ ninmi (Propaganda and Persuasion).

¿Imamantataj cuidadota charina canchij? Yuyashun. Gentecunapaj llullacunaca mana ricuipaj, mana mutquipaj venenota huairapi shitashca layami can. Chashna huairata mutquishpaca huañunchijmanmi. Shinallatajmi mana cuidarijpica gentecunaca asha asha pandachi tucun. Vance Packard runaca: “Cai gentecunaca llullacunahuan achca gentecunatami paicuna munashcata rurachishca” ninmi. Shinallataj shujtaj runaca cashnapishmi nin: “Cashna llullacunata crishpami achcacunaca shujtajcunata llaquichishca. Por ejemplo, achcacunaca shujtajcunatami huañuchishca, guerracunata callarichishca. Cutin shujtajcunaca shujtaj llajtamanta cajpi, o shujtaj religionmanta cajpica mana ricunayachisha  nishcacuna” nin (Easily Led—A History of Propaganda).

Diabloca achca podertami charin. Chaimantami gentecuna llaquichishca yalli ñucanchijta llaquichi tucun. Jehová Dios Adanta Evata rurashca punllamantami Diabloca ñucanchijta ima shina pandachinata ricucushca. Shinallataj Diabloca cai pachatami mandacun. Chaimantami ima layapish gentecunata pandachisha nin (1 Juan 5:19; Juan 8:44). Diabloca achca gentecunatami llullacunahuan pandachishca. Chaimantami Bibliaca Diablotaca: “Allpa pachapi causajcunata umajmi” nin (2 Corintios 4:4; Apocalipsis 12:9). ¿Diablo ama pandachichunca imatataj rurana canchij?

Diablo ama pandachichun imata ruranatami Jesusca yachachirca. Paica: “Mana llullataca rijsinguichij. Chai mana llullami huatashca shinamanta cacharichinga” nircami (Juan 8:31, 32). Yuyashun. Shuj soldado guerrapi cajpica enemigocunaca llullata nishpachari pandachisha ninga. Chaimantami paita ama pandachichun imata crinata alli ricuna can. Chashnallatajmi ñucanchijpish Diablo ama pandachichun imata crinata alli ricuna canchij. Diosca Bibliatami cushca. Chaipimi Diablo ama urmachichun imata ruranata ricui tucunchij (2 Timoteo 3:16, 17).

Diabloca Bibliapi nishcacuna mana llulla cashcataca allimi yachan. Chaimantami Bibliata ama yachachun imatapish ruran. Bibliata leyichun, estudiachun Diablo jarcasha nijpipish chaita ruranataca manataj saquinachu canchij (Efesios 6:11). Bibliata jahua jahualla yachashpa mana saquirinachu canchij. Ashtahuanpish intindingacamami alli yachana canchij (Efesios 3:18). Noam Chomsky runa nishcata yuyarishun. Paica: “Imata crichunca ni pi mana obligai tucunchu. Ñucanchijllatajmi imatapish cringapaj alli estudiana canchij” nircami. Shinaca Bibliata alli intindigapajca ñucanchijllataj tucui punllacuna Bibliata alli yachashpa catishunchij (Hechos 17:11).

Diabloca imatapish mana alli yuyashpa rurachunmi munan. Shuj libropi nishca shinaca maijancunaca mana alli yuyashpami imapipish crincunalla (Media and Society in the Twentieth Century). Chaimantami imapi cringapajca alli ricunaraj, yuyanaraj canchij (Proverbios 14:15). Jehová Diosca alli yuyashpa imatapish rurachunmi ñucanchijta rurashca. Chaimantami Biblia yachachishcacunapi alli yuyana, ricuna canchij (Proverbios 2:10-15; Romanos 12:1, 2).

Soldadocunaca llullacunata crishpaca enemigocunahuan manachari macanacusha ninga. Ashtahuanpish paicunapurallatajchari macanacusha ningacuna o caruyanacushpa ringacuna. Por ejemplo, Alemaniamanta shuj soldadoca: “Primera Guerra Mundialpica enemigocunapaj llullacunata crishcamantami perdircanchij” nircami. Diablopish llullacunahuanmi Diospaj pueblomanta caruyachisha nin. Chaimantami shujtajcuna llaquichishcata yuyachishpa huauqui panicunata pꞌiñanacuipi churan.

Diablo pandachichun ama saquishunchijchu. Bibliapi yachachishcacunata catishpa huauqui panicunahuan Diosta sirvishunchij. Ima problemacuna tiyajpipish utca allichishpa caishujhuan chaishujhuan perdonanacushunchij (Mateo 5:23, 24; Colosenses  3:13, 14). Huauqui panicunamantapish mana caruyanachu canchij (Proverbios 18:1). ¿Diablo pandachisha nicushcata o mana pandachisha nicushcata yachangapajca imatataj rurai tucunchij? Por ejemplo, ¿Cai punllacunapi pi imata nishpa pꞌiñachishcachu? ¿Pꞌiñachishcamantaca imatataj rurarcangui? ¿Dios munashca shinachu allichircangui? (Gálatas 5:16-26; Efesios 2:2, 3).

Shuj soldadoca paita mandaj soldadota mana crishpaca mana alli macanacungachu. Chaimantami enemigocunaca mandaj soldadota ama crichun imatapish ningacuna. Por ejemplo, mandaj soldado pandarijpi enemigocunaca: “Canta mandaj soldadotaca mana cazunachu cangui, paita cazushpaca llaquimi tucungui” ningacunami. Diablopish Diospaj pueblota pushajcunata ama crichunmi munan.

¿Diablo ama pandachichunca imatataj rurai tucunchij? Juchayujcuna cajpipish huaquin cꞌaricunatami Diosca paipaj pueblota pushachun churashca. Chaimantami Diospaj pueblomanta mana caruyana canchij. Shinallataj Diospaj pueblota pushajcunatami cazuna canchij (1 Tesalonicenses 5:12, 13). Diospaj pueblomanta caruyashpa llullata nijcunapish, shujtaj enemigocunapishmi tiyan. Paicunapaj nishcacuna alli laya ricurijpipish mana crinachu canchij (2 Tesalonicenses 2:2; Tito 1:10). Shinallataj Timoteoman cushca consejotami catina canchij. Pabloca Timoteomanca: ‘Can yachashca allitaca ama saquingui. Maipi yachashcatapish ama cungaringui’ nircami (2 Timoteo 3:14, 15). Jehová Diosca casi 100 huatacunatami “alli cazuj, alli yuyaiyuj  sirvij” huauquicunata utilizashpa yachachicushca ¿Manachu paicunata cazushpa catina canchij? (Mateo 24:45-47; Hebreos 13:7, 17).

Diabloca manchaita charichunmi munan. Shuj libropi nishca shinaca ñaupamantami gentecunaca imatapish nishpa o imatapish rurashpa shujtajcunata manchachishcacuna (Easily Led—A History of Propaganda). Por ejemplo, Philip Taylor runaca: “Asiriocunaca gentecunaman manchaita churashpami mandaj carca” ninmi. Diabloca Diosmantami caruyachisha nin. Chaimantami gentecunata manchachun, huañuita manchachun, shujtajcuna llaquichinata manchachun munan (Isaías 8:12; Jeremías 42:11; Hebreos 2:15).

Diablo manchaita churashpa Diosmanta caruyachichun ama saquishunchijchu. Jesusca: “Cuerpota huañuchijcunataca, ama manchaichijchu. Huañuchishca qꞌuipaca, imata mana ashtahuan rurai tucungacunachu” nircami (Lucas 12:4). Jehová Diosca gentecunata ama manchashpa paita sirvishpa catichunmi fuerzata cushpa ayudanga. Diosca pai nishcacunata pajtachingatajmi. Chaitaca mana cungarinachu canchij (2 Corintios 4:7-9; 1 Pedro 3:14).

Huaquinpica manchaihuanchari canchij. Chashna cashpaca Josueman Jehová Dios nishcatami yuyarina canchij. Paica: “Ñucaca cantaca cꞌari cꞌari cai, ama manchaichu nishpami mandani. Ama manchanguichu, shaicurishpa ama saquiringuichu. Ñuca canta Mandaj Diosca can maita rijpipish canhuanmi casha” nircami (Josué 1:9). Manchaihuan cashpaca chai ratomi mañana canchij, ñucanchij ima shina sintirishcatapish Jehová Diosmanmi huillana canchij. Chashna rurajpica Jehová Diosca sumaj causaita cushpami ñucanchij yuyaita, shungutapish huaquichinga. Diablopish mana pandachi tucungachu (Filipenses 4:6, 7, 13).

Asiria llajtata mandajca judiocunata manchachingapajmi Rabsacesta (Rabsaqué) cashna nichun cacharca: “Cancunataca pipish mana quishpichingachu. Jehová Diospish cancunataca mana ayudangachu. Paillatajmi cai llajtacunata tucuchichun cacharca” nircami. Rabsaces chashna nijpimi Jehová Diosca judiocunata mandajtaca cashna animarca: “Asiria llajtata jatun mandajpajta rurajcuna ñucata pꞌiñashpa cꞌamishcata uyashpapish ama manchaichu” nircami (2 Reyes 18:22-25; 19:6). Qꞌuipaca shuj tutallapi 185 mil asirio soldadocunata huañuchichunmi Diosca shuj angelta cacharca (2 Reyes 19:35).

¿Televisionta ricushcanguichu? Peliculapica shuj runata llaquichingapaj shuj trampata churacujtachari ricurcanchij. Chai peliculata ricucushpaca chai runataca: “Ama chaita richu. Shuj trampatami churarcacuna” nishpa caparinata yuyashcanchijchari. Jahua pachamanta angelcunaca ñucanchijta ricucunmi. Paicunapish: ‘Diablo pandachichun ama saquichu’ nicuj layami can.

Diablopaj llullacunata ama crishunchij (Proverbios 26:24, 25). Diospi tucui shunguta churashpa paimanta ama caruyashunchijchu (Proverbios 3:5-7). Diosca: “Ñuca huahualla, yachaisapa cayari. Chashna cashpamari ñucataca cushichingui” ninmi (Proverbios 27:11). Yachaisapa cajpica Diabloca mana pandachingachu.