1. a) ¿Jovencunaca imatataj agllana can? b) ¿Ama sustaringapajca jovencunaca imatataj yuyarina can? (Jahuapi tiyaj dibujota ricui).

¿MAIMAN viajasha nishcanguichu? Manaraj viajashpaca maiman rinatami alli yachana cangui. Ñucanchij causaica viajashpa ricuj shinami can. Chaimantami jovenraj cashpa ñucanchij causaipi imata ruranata alli agllana canchij. Maipica ima ruranata agllanaca sinchimi ricurin. Shuj solteraca: “Shamuj punllacunapi imatachari rurasha nishpami sustarini” ninmi. Cai soltera laya sintirishpaca Jehová Dios nishcata yuyari. Paica: ‘Ama manchaichu. Ñucami canman fuerzata cuj Taita Dios cani. Cantaca ayudacushallami. Ñuca alli maquihuanmi cantaca charirasha’ ninmi (Isaías 41:10).

2. ¿Cushilla causachun Dios munashcataca ima shinataj yachanchij?

² Jehová Diosca shamuj punllacunapi imata ruranata alli agllaichij ninmi (Eclesiastés 12:1; Mateo 6:20). Joven, Jehová Diosca cushilla causachunmi munan. Chaimantami tucui ñucanchij minishtishcacunata cai Allpapi churashca. Shinallataj alli causachun munashpami alhaja consejocunata cun. Chai consejocunata mana cazusha nijcunataca cashnami nin: ‘Ñuca  mana munashcatami agllarcanguichij. Ñucapajta rurajcunaca cushicungacunami, ashtahuanpish cancunaca pingachishcami canguichij. Ñucapajta rurajcunaca, tucui shunguhuan cushicushpami cantangacuna’ ninmi (Isaías 65:12-14). Alli decisioncunata agllashpaca Jehová Diostami cushichinchij (Proverbios 27:11).

3. ¿Diosca imatataj rurachun munan?

³ Joven, ¿Jehová Diosca imata rurashpataj causachun munan? Caita yuyai. Animalcunaca micunitata micushpa, yaquituta ubyashpa, mirarishpami cushilla causancuna. Jehová Diosca chashna causachunmi rurashca. Pero ¿ñucanchijtaca ima shinataj rurashca? Jehová Diosca paita rijsishpa, paita tucui shunguhuan sirvishpa cushilla causachunmi rurashca (Salmo 128:1; Mateo 5:3, QC, 1989). Bibliapica, cꞌuyaj Diosca gentecunataca paiman rijchajtami rurarca ninmi (2 Corintios 13:11; Génesis 1:27). Jehová shina imatapish rurashpaca cushillami causangui. Diospaj Shimipica: “Imatapish cujmi, cushcata japijta yalli cushicun” ninmi (Hechos 20:35). ¿Canpish shujtajcunaman imallatapish cushpa cushicushcanguichu? Jehová Diosca paita cꞌuyashcata, shujtajcunatapish cꞌuyashcata ricuchichunmi munan (Mateo 22:36-39-ta leyipai).

4, 5. ¿Jesusca imata rurashpataj cushilla causarca?

⁴ Jesús rurashca layami canpish rurai tucungui. Eclesiastés 3: 4-pica “asingapajpish, bailangapajpish punllami chayan” ninmi. Jesús huahuaraj cashpaca pugllashpami cushicurca. Chashna cashpapish Diospaj Shimita yachashpami Jehová Dioshuan alli apanacurca. 12 huatacunata charishpaca templopi yachachijcuna tapushcataca allimi contestarca. Jesús ‘yachaisapa cashcata ricushpami paicunaca achcata mancharircacuna’ (Lucas 2: 42, 46, 47).

⁵ Jesús ña jatunyashpaca Dios munashcata rurashpami cushilla causarca. Diosca ‘huajchacunaman alli huillaita huillachun, mana ricujcunata ricujta rurachunmi’ munarca (Lucas 4:18). Salmo 40: 8-pi nishca shinaca Jesusca Diospaj munaita rurashpami cushicurca. Jesusca paipaj Yayamanta gentecunaman yachachinatami munarca (Lucas 10:21-ta leyipai). Shuj cutinca shuj huarmimanmi Diosta ima shina adoranata yachachirca. Chai qꞌuipaca paita catijcunamanca: “Ñuca micunaca ñucata cachaj Yayapaj munaita rurana, pai rurai nishcata pajtachinami” nircami (Juan 4:31-34). Diosta cꞌuyashcata, shujtajcunatapish cꞌuyashcata ricuchishpami Jesusca cushilla causarca. Canpish Jesús laya rurashpami cushilla causai tucungui.

6. ¿Imata ruragricushcata shujtajcunaman parlanaca imamantataj alli can?

⁶ Achcacunaca joven cashpaca precursorcunami tucurcacuna. Chashnami cushilla causarcacuna. Can imata ruragrishcatami paicunaman parlai tucungui. Proverbios 15:22-pica: ‘Imata ruragrishpapish shujtajcunata tapunami alli can’ ninmi. Cai huauqui panicunaca:  “Precursor cashpaca achca cosascunatami yachangui. Chai yachashcacunaca cambaj causaipimi sirvinga” nishpami animangacuna. Jesusca jahua pachapi cashpaca paipaj Yayamanta achcatami yacharca. Cai Allpapi cashpapish ashtahuanmi yachashpa catirca. Shujtajcunata Diosmanta yachachishpa, llaquicunata ahuantashpami cushilla sintirirca (Isaías 50:4-ta leyipai; Hebreos 5:8; 12:2). Jehová Diosta ashtahuan sirvishpa imamanta cushilla causanata ricushun.

7. ¿Achcacunaca imamantataj Diosmanta yachachinata munancuna?

⁷ Jesusca gentecunaman yachachigrichij nishpami mandarca (Mateo 28:19, 20). Shujtajcunaman Diosmanta yachachishpaca cushillami causangui, Diostapishmi jatunyachingui. Alli yachachij cangapajca tiempomi minishtirin. Timothy huauquimanta parlashun. Paica huambraraj cashpami precursor tucurca. Paica cashnami nin: “Diosta ashtahuan sirvishpami paita cꞌuyashcata ricuchini. Callaripica ni piman Bibliamanta mana yachachi tucurcanichu. Qꞌuipaca shujtaj ladomanmi rircani. Chaipica asha punllacuna qꞌuipallami achcacunaman Diosmanta ña yachachicurcani. Shuj estudiocarin tandanacuicunamanmi puri callarirca. Asha tiempo qꞌuipaca ishqui quillacunatami Escuela Bíblica para Varones Solteros nishcaman invitarcacuna * (urapi tiyaj notata ricui). Chai huashaca shujtaj ladomanmi cacharcacuna. Chaipica chuscu gentecunamanmi Bibliamanta yachachi callarircani. Shujtajcunaman Diosmanta yachachinaca alhajami can. Paicunapaj causaita cambiachun Jehová ayudacujta ricushpami cushilla sintirini” nin (1 Tesalonicenses 2:19).

8. ¿Achca gentecunaman Diosmanta yachachingapajca huaquin jovencunaca imatataj rurashca?

⁸ Maijan jovencunaca shujtaj shimitami yachashcacuna. Estados Unidospi causaj Jacobmanta parlashun. Paica cashnami nin: “7 huatacunata charijpica ñuca escuelapi huaquin compañerocunaca Vietnam llajtamantami carca. Paicunaman Diosmanta yachachisha nishpami paicuna parlashca shimita yachai callarircani. Inglés shimipi Huillaj revistataca vietnamita shimipi Huillaj revistahuanmi comparaj carcani. Chashnami vietnamita shimita ashtahuan yacharcani. Shinallataj vietnamita congregacionpi sirvij huauqui panicunahuanmi apanacui callarircani. Ña 18 huatacunata charishpaca precursormi tucurcani. Qꞌuipa huatacunapica Escuela Bíblica para Varones Solteros nishcamanmi rircani. Cai escuelapica congregacionpi huauqui panicunata ima shina ayudanatami yacharcani. Cunanca vietnamita shimita parlaj shuj grupopimi sirvicuni. Chaipica precursormi cani. Shinallataj ñucallami anciano cani. Huillacujpica Vietnam gentecunaca: ‘¿Ima shinataj ñucanchij shimita yacharcangui?’” nishpami tapuncuna. Huaquincunaca paicunapaj huasimanmi invitancuna, maijancunaca Bibliamantami ña yachacuncuna. Cutin shujtajcunacarin ñami bautizarishcacuna” ninmi (Hechos 2:7, 8-ta ricui).

9. ¿Diosmanta yachachishpaca canpish imatataj yachangui?

 ⁹ Gentecunaman Diosmanta yachachishpaca achcatami yachangui. Por ejemplo, alli trabajador canata, shujtajcunahuan alli parlanatami yachangui. Shinallataj imata rurangapaj mana manchanata, shujtajcunatapish cꞌuyaihuan tratanatami yachangui (Proverbios 21:5; 2 Timoteo 2:24). Shujtajcunaman yachachishpaca canpishmi Bibliamanta ashtahuan yachangui. Shinallataj Diospaj munai pajtarichunmi ayudangui (1 Corintios 3:9).

10. ¿Gentecuna Bibliamanta mana yachasha nijpipish imamantataj Jehová Diosta cushilla sirvi tucungui?

¹⁰ Cambaj llajtapica gentecunaca manachari Diosmanta uyasha nincuna. Pero Diostaca cushillami sirvi tucungui. Alli shungu gentecunata taringapajca tucuicunami tandalla trabajanchij. Chaimantami shuj huauqui o pani Diosta sirvichun maijanta ayudajpica tucuicuna cushilla sintirinchij. Brandon shuti huauquimanta parlashun. Pai causacushca llajtapica huaquin gentecunallami Diosmanta yachasha nircacuna. Brandonca 9 huatacunatami chai llajtapi precursor carca. Paica: “Jehová Diosca tucui gentecunaman huillachun ninmi. Chaita pajtachishpami cushilla sintirini. Colegiota tucuchishca qꞌuipami precursor tucurcani. Congregacionpi jovencunata ayudanatami munani. Paicuna Diospajta ashtahuan rurajta ricushpami cushilla sintirini. Escuela Bíblica para Varones Solteros nishcaman rishca qꞌuipaca shujtaj ladopimi sirvinaman cacharcacuna. Shujtaj huauqui panicunaca testigo tucuchunmi huaquin gentecunata ayudashca. Pero ñucaca testigo tucuchunca shujllatapish manaraj ayudashcanichu. Chashnapish Diosmanta huillashpa, paita ashtahuan sirvishcamantami cushilla sintirini” ninmi (Eclesiastés 11:6).

11. ¿Achca jovencunaca imapitaj ayudacuncuna?

¹¹ ¿Ima shinataj Diosta ashtahuan sirvi tucungui? Achca Tandanacuna Huasicunami minishtirin. Chaimantami achca jovencunaca chai Tandanacuna Huasicunata shayachishpa ayudacuncuna. Cashna ayudashpaca Diostami jatunyachincuna. Shinallataj shujtaj huauqui panicunahuan cashpami cushilla sintirincuna. Tandanacuna Huasicunata shayachishpa ayudashpaca trabajopi cuidadota charinata, alli trabajador canatami yachangui. Pushaj huauquicunatapish cazunatami yachangui.

12. ¿Precursor cashpaca ima shujtaj oportunidadcunatataj charingui?

¹² Kevin shuti huauquimanta parlashun. Paica cashnami nin: “Huahuaraj cashpaca shuj punllaca Diostami ashtahuan sirvisha nircani. 19 huatacunata charishpami precursor tucurcani. Mantiniringapajca shuj huauquihuanmi asha horascunallata trabajaj carcani. Trabajopica techocunata, ventanacunata, pungucunata ima shina churanatami yacharcani. Shuj cutinca jatun acapanami Tandanacuna Huasicunata, huauqui panicunapaj huasicunata dañarca. Chaicunata allichishpami ishqui huatacunata ayudarcani. Chai huashaca Sudáfrica llajtapi Tandanacuna Huasicunata rurangapaj ayudata minishticushcatami yachaj chayarcani. Chaipi ayudachun invitajpimi chaiman rircani. Africapica chꞌican chꞌican ladocunapimi Tandanacuna Huasicunata rurashpa  ayudani. Caipi trabajaj huauqui panicunaca shuj familia layami tandalla causanchij, trabajanchij, Bibliatapish estudianchij. Shujtaj huauquicunahuanpish cada semanami huillanaman rinata munani. Uchillaraj cashpami Diosta ashtahuan sirvingapaj imata ruranata yuyarcani. Chashna rurashcamantami cunancama Diosta cushilla sirvicuni” ninmi.

13. ¿Betelpi sirvij jovencunaca imamantataj cushicuncuna?

¹³ Achca jovencunaca precursores tucushca qꞌuipaca Betelpi sirvinamanmi rishcacuna. Betelpi sirvinaca alhajami can. Chaipi imata rurashpapish Jehovapajmi rurancuna. Chaipi trabajaj huauqui panicunaca Diosmanta yachachingapajmi Bibliacunata, publicacioncunata rurashpa ayudancuna. Betelpi sirvij Dustin huauquimanta parlashun. Paica: “9 huatacunata charishpaca Diostami ashtahuan sirvisha nircani. Colegiota tucuchishca qꞌuipaca precursormi tucurcani. Casi ishqui huata qꞌuipaca Betelpi sirvichunmi invitarcacuna. Betelpica imprimina maquinacunata ima shina manejanatami yacharcani. Computadorapi trabajanatapishmi yacharcani. Betelpica shujtaj llajtacunapi Diosmanta ima shina yachachicujtami huillancuna. Chaita uyanatami achcata munani. Betelpi trabajacushpaca shujtajcuna Diospajman cꞌuchuyachunmi ayudanchij. Chaimantami caipica cushilla sirvini” ninmi.

14. ¿Diosta ashtahuan sirvingapajca ima shinataj cunanmanta preparari tucungui?

¹⁴ ¿Diosta ashtahuan sirvingapajca imatataj rurai tucungui? Cꞌuyaj canata, mana utca pꞌiñarij canata, pacienciata charinatami yachana cangui. Chaicunata yachashpaca Diostaca allimi sirvingui. Chaipajca punllantami Bibliata leyina cangui. Tucui leyishcapipish cutin cutinmi yuyana cangui. Tandanacuicunapipish tapuicunata cutichishpami Diospi tucui shunguhuan crishcata ricuchi tucungui. Colegiota manaraj tucuchishca cashpaca alli huillaj cangapajmi preparari tucungui. Huauqui panicunata respetashpa, paicunata uyashpami shujtajcunata ayudanata yachai tucungui. Shinallataj Tandanacuna Huasita pꞌichashpa, allichishpapishmi ayudai tucungui. Jehová Diosca humilde, tucui shunguhuan ayudasha nijcunallatami paipajta rurachun mañan (Salmo 110:3-ta leyipai; Hechos 6:1-3). Huauqui panicunaca, ‘Timoteoca alli causajmi’ nijcunami carca. Chaimi apóstol Pabloca paihuan Diosmanta huillagrichun Timoteota invitarca (Hechos 16:1-5).

15. ¿Precursor tucushpa mantiniringapajca imatataj rurai tucungui?

¹⁵ Precursor cashpapish mantiniringapajca trabajanami minishtirin (Hechos 18:2, 3). Ashalla horascunata trabajangapajca shuj cursoman rishpami shuj oficiota yachai tucungui. Shujtaj precursorcunahuan o superintendente huauquihuanmi imata ruragrishcata parlai tucungui. Paicunami imata rurangapaj alli yuyaicunata cunga. Shinallataj, “can imata ruranataca Mandaj Diospaj maquipi mingai. Paimi can yuyacushcataca, chashnataj rurachinga” (Proverbios 16:3; 20:18).

16. ¿Jovenpi Diosta ashtahuan sirvishpaca qꞌuipa punllacunapica ima shinataj causangui?

¹⁶ Joven, Diosca cushilla causachunmi munan (1 Timoteo 6:18, 19-ta leyipai). Diosta ashtahuan sirvishpaca can shinallataj sirvij huauqui panicunahuanmi alli apanacungui. Chashnami ashtahuan alli crij tucungui. Jovenpi Diosta ashtahuan sirvishpaca cazarashpapish alli cusa, alli huarmimi cangui. Achcacunaca soltero cashpami precursor tucushcacuna. Shinami cazarashca qꞌuipapish ishquindij chashnallataj Diosta sirvishpa catishcacuna (Romanos 16:3, 4).

17, 18. ¿Jehová Diosta tucui shunguhuan cꞌuyashcamantaca imatataj rurasha ningui?

¹⁷ Jehovamanta parlashpaca Salmo 20:4-pica: “Cambaj shungupi munashca shina cushca cachun. Can rurasha nishcacunataca tucuita pajtachichichun” ninmi. Chaimanta joven, cambaj causaipi imata ruranata alli yuyai. Shinallataj cunan punllacunapi Jehová Dios imata ruracushcata yuyai. Paimanta imata ashtahuan ruranata ricui. Chai qꞌuipaca pai munashcata ima shina pajtachinata ricui.

¹⁸ Salmo 37:4-pica: “Mandaj Diosllahuan cushicui. Cambaj shungupi yuyashcataca paimi cunga” ninmi. Jovenpi tucui shunguhuan Diosta sirvishpaca paita alabashpami cushilla causangui.