1. ¿Imatataj tucuicuna munanchij?

SHUJ rijsishca y respetashca runahuan tupajpi can ima shuti cashcata, can pi cashcata mana yuyarijpica ¿ima shinataj sintiringuiman? Llaquillami sintiringuiman. ¿Imamanta? Ñucanchijca shujtajcuna rijsichunmi munanchij. Pero pi cashcata yachachunllaca mana shuyanchijchu. Ashtahuanpish ñucanchij ima shina cashcata, ñucanchij imata ruraj cashcamanta valorachunmi munanchij (Números 11:16; Job 31:6).

2, 3. ¿Juchayujcuna cashcamantaca imatataj munanchijman? (Jahuapi tiyaj dibujota ricui).

² Juchayujcuna cashcamantami huaquinpica shujtajcuna ñucanchijta importanteta laya ricuchun munanchijman. Cai mundopish chashna yuyaicunata charichunmi munan. Chaimantami ama chashna yuyangapaj cuidarina canchij. Importante cashcata sintishpaca Jehová Diosta jatunyachinata, paita adoranatami saquishun (Apocalipsis 4:11).

³ Jesuspaj punllacunapica religionta huaquin pushajcunaca alli nishca canatami munajcuna carca. Chaimi Jesusca paita  catijcunataca: “Mandashcacunata quillcajcuna shina canamanta huaquichiringuichij. Paicunaca pambata pꞌichacujta churashpa purinatami munancuna. Plazacunapipish, allillachu cangui nishca canatami munancuna. Sinagogacunapipish, mai jatun micuicunapipish puntapi tiyarinatami munancuna. Chashna rurajcunataca yallitaj jatunta llaquichishcami canga” nirca (Lucas 20:46, 47). Chai punllacunapica shuj viudaca mana gentecuna ricuchunllachu cullquita curca. Chaimantami Jesusca cai huarmica allitami ruran nirca (Lucas 21:1-4). Pero shujtajcunaca Jesús shina mana yuyajchu carca. Cai yachaipica Jehová munashca shina yuyangapaj imata rurana cashcatami yachashun.

4. ¿Pipaj ñaupajpitaj rijsishca canata munanchij?

⁴ Gentecunaca shuj alli profesionta charishpa, alli negociocunata charishpa, famoso cashpallami shujtajcunapaj ñaupajpica alli ricurishun nincuna. Pero Apóstol Pabloca: “Chashna cashca cashpapish Diosta rijsishpa, Diospish ña cancunata rijsijpica ¿ima nishpataj chai manapish imapaj alli cajta huajcha ruranahuanca cutinllataj huatashca shina tucushun ninguichij?” nircami (Gálatas 4:9, QC, 1989). Ñucanchijpajca Tucuita Mandaj Diospaj ñaupajpi rijsishca canami ashtahuan valishca can. Jehová Diosca ñucanchijta cꞌuyanmi, ima shina cashcatapish allimi yachan. Diosca paipajman cꞌuchuyachunmi munan. Paipaj amigocuna cachunmi ñucanchijtaca rurarca (Eclesiastés 12:13, 14).

5. ¿Yaya Dios paipaj amigota shina ricuchunca imatataj rurana canchij?

⁵ Moisesca Jehová Diospaj alli amigomi carca. Cambaj ñanta rijsichihuai nishpa Moisés Yaya Diosta mañajpica paica: “Canca ñuca ñahuipi alli ricurishcamanta, cambaj shutitapish ima shina cajta rijsishcamantaca can nishcataca rurashami” nircami (Éxodo 33:12-17). Ñucanchijtapish cada unotami Diosca rijsisha nin. Pero paipaj amigo tucungapajca ¿imatataj rurana canchij? Paitami shungumanta cꞌuyana canchij. Tucui ñucanchij causaipimi paita sirvina canchij (1 Corintios 8:3-ta leyipai).

6, 7. ¿Imata rurashpataj Diospaj amigo canata saquishun?

⁶ Yaya Dioshuan alli amigo canataca mana saquinachu canchij. Galacia llajta crijcunaman Pablo consejashcatami ñucanchijpish cazuna canchij. “Manapish imapaj alli cajta huajcha ruranahuanca” esclavo shina mana tucunachu canchij. Chashnami cai mundopaj rijsishca cana munaimanta jarcarishun (Gálatas 4:9, QC, 1989). Galaciapi causajcunaca ñami Diosta alli rijsishca carcacuna. Diospish paicunataca ñami alli rijsishca carca. Shinapish cai huauquicuna ñaupa causaiman tigracushcatami Pabloca nicurca. Chashna nishpaca “¿ima nishpataj cancuna imapish mana valicunata sirvinaman cutin tigracunguichij?” nicuj layami carca.

⁷ ¿Ñucanchijpish ñaupa causaiman tigrai tucunchijchu? Diosta rijsishpaca Pablo shinallatajmi ñucanchijpish cai mundopi rijsishca canata ladoman saquircanchij (Filipenses 3:7, 8-ta leyipai). Por ejemplo, universidadpi estudianata, shuj alli trabajota charinata, negociopi achca cullquita  gananatachari ladoman saquircanchij. Shinallataj alli pugllaj cashcamanta, alli tocaj, alli cantaj cashcamanta cullquiyuj, famoso tucunatachari ladoman saquircanchij (Hebreos 11:24-27). “Chaicunataca deganami saquishcani” nishpa ¿arrepintirinachu canchij? Chashna yuyashpaca ‘manapish imapaj alli caj, huajcha’ ruraicunaman cutin tigrai tucushunmi * (urapi tiyaj notata ricui).

8. ¿Diospaj ñaupajpi alli ricurina munaita charingapajca imatataj yuyarina canchij?

⁸ Cai pachapi alli ricurina munaita charinapaj randica Diospaj ñaupajpi alli ricurinatami mashcana canchij. ¿Chaipajca imatataj yuyarina canchij? Puntapica, Jehová Dios paita tucui shunguhuan sirvijcunata mana cungarij cashcata, cꞌuyaj cashcatami yuyarina canchij (Hebreos 6:10-ta leyipai; 11:6). Diosta alli sirvijcunaca paipajca achca valishcami can. Cashcata ruraj Dios cashcamantami paita sirvijcunataca siempre yuyarin. Paipajlla cajcunataca allimi rijsin (2 Timoteo 2:19, NM). “Cashcata rurajcunapaj causaitaca Mandaj Diosca” ricucunmi. Chaimantami llaquicunamanta ima shina quishpichinata paica alli yachan (Salmo 1:6; 2 Pedro 2:9).

9. ¿Jehová Diosca paita sirvijcunahuan cashcataca ima shinataj ricuchishca?

⁹ Jehová Diosca mancharina cosascunata rurashpami paita sirvijcunahuan cashcata ricuchishca (2 Crónicas 20:20, 29). Por ejemplo, Faraonpaj soldadocunapaj maquimanta ima shina israelcunata puca cuchapi quishpichishcatami yuyarina canchij (Éxodo 14:21-30; Salmo 106:9-11). Chaipi ima tucushcataca 40 huatacuna pasajpipish gentecunaca yuyaricurcallami (Josué 2:9-11). Magog llajtamanta Gog nishca Diospaj llajtata llaquichina punllaca quichquiyamucunmi. Chaimantami ñaupa tiempopi Dios cꞌuyaimanta paipaj poderhuan ima shina paipaj llajtata quishpichishcata yuyarina canchij (Ezequiel 38:8-12). Chai punlla chayamujpica cai pachapi alli ricurinapaj randi, Diospaj ñaupajpi alli ricurinata mashcashcamantami cushilla sintirishun.

10. ¿Imallatataj ashtahuan yuyarina canchij?

¹⁰ ¿Diospaj ñaupajpi alli ricuringapajca imatataj ashtahuan yuyarina canchij? Yaya Dios ñucanchij mana yuyashca shina cꞌuyaita ricuchishcatami yuyarina canchij. Shujtajcuna ricuchunlla imatapish rurajpica Diosca ñucanchijtaca mana bendiciangachu. ¿Imamantataj chaita ninchij? Jesusca paicuna chashna rurashpaca runacuna alli nishcallatami ña japincuna nircami (Mateo 6:1-5-ta leyipai). Cutin cancuna shujtajcunapaj allita rurajpi mana pi felicitajpipish, ‘pacallatapish ricuj cambaj Yayaca’ mana yuyashca shinami bendicianga nircami. Cunanca huaquincunata Dios ima shina bendiciashcata yachashun.

11. ¿Yaya Diosca Mariata agllashcataca ima shinataj ricuchirca?

¹¹ Diosca paipaj Churi cai Allpapi huacharichunca María shuti soltera huarmitami agllarca. Paica Nazaret uchilla pueblopimi causarca. Nazaretca Jerusalenpi caj templomanta carupimi carca (Lucas 1:26-33-ta leyipai). Pero, Diosca ¿imamantataj Mariata agllarca? Ángel Gabrielca paitaca: “Diosmari canmanca mana cꞌuyaipajta cꞌuyajta cungapaj agllashca” nircami. Asha tiempo qꞌuipami Mariaca Elisabetta visitanaman rirca. Elisabethuan parlanacucushpaca Dioshuan alli amiga cashcatami ricuchirca (Lucas 1:46-55). María tucui shunguhuan sirvij cashcataca Jehová Diosca allimi yacharca. Chaimantami paitaca Jesuspaj mama cachun agllarca. Mariaca chashna bendicionta charinataca mana yuyashcachu canga.

12, 13. a) ¿Jesús huacharijpica ima shinataj Diosca paita alli nishcata ricuchirca? b) ¿María Jesusta temploman apajpica imatataj Jehová Diosca rurarca?

¹² Jesús huacharishcataca Jehová Diosca Jerusalenpi, Belenpi mandajcunamanca mana huillarcachu. Ashtahuanpish huaquin angelcunata cachashpami Belén canlla ladopi ovejacunata michijcunallaman Jesús huacharishcata huillanaman cacharca (Lucas 2:8-14). Chaimi ovejacunata michijcunaca Jesusta ricunaman rircacuna (Lucas 2:15-17). Jehová Diosca ovejata michijcunata cachashpami Jesusta alli nishcata ricuchirca. Jehová chaita ruranataca Josepish Mariapish mana yuyashcallapishchu canga. Cutin Diabloca yachaj runacunatami Jesusta ricunamanca cacharca. Chaimi Jerusalenpi tucui causajcuna Jesús huacharishcataca yacharcacuna. Diablo chaita rurashcamantami chai llajtapica achca llaqui tiyarca (Mateo 2:3). Jerusalenpica achca llullu huahuacunatami huañuchircacuna (Mateo 2:16).

¹³ Jesús huacharishca 40 punllacuna qꞌuipami Mariaca Jerusalenpi tiyaj templopi ofrendata cunaman rina carca. Chaipajca Belenmanta casi ishqui horascunatami rina carca (Lucas 2:22-24). Jerusalenman Josehuan, Jesushuan ricushpami Mariaca, “¿sacerdoteca Jesusta ima layashi alli  ninga?” nishpa tapurishcanga. Pero Jesustaca mana María yuyashca shinachu alli nirca. Jehová Diosca paipaj Churi Mesías cashcata huillachunca, ‘cashcata ruraj’ Simeón shuti runata, 84 huatacunata charij Ana shuti viuda huarmitami utilizarca (Lucas 2:25-38).

14. ¿Diosca ima shinataj Mariataca bendiciarca?

¹⁴ Jesusta cuidashcamantaca ¿Diosca Mariata bendiciarcachu? Ari. Chaimantami María imalla nishcacunata, imalla rurashcatapish Bibliapi quillcachirca. Jesús quimsa huata chaupita alli huillaicunata huillacujpica Mariaca manachari paita compañai tucurca. Viuda cashcamantami mana chaita rurai tucushcanga. Jesús imalla rurashcata, yachachishcataca mana shujtajcuna shina beneficiari tucushcachu canga. Shinapish Jesús huañui punllaca Mariaca chaipimi carca (Juan 19:26). Pentecostés fiestapi Jesusta catijcuna Diospaj espirituta manaraj chasquijpipish Mariaca paicunahuanmi Jerusalenpi carca (Hechos 1:13, 14). Chaipi cashcamantami Mariaca jahua pachapi causanaman ringapaj Diospaj espirituta chasquishca canga. Shina cashpaca huiñai huiñaitami jahua pachapi Jesushuan causacunga. Diosta tucui shunguhuan sirvishcamantami Diosca paita chashna bendiciarca.

15. Jesús cai Allpapi cajpica ¿ima shinataj Diosca paita chasquishcata ricuchirca?

¹⁵ Jesusca religionta pushajcuna, o llajtata mandajcuna paita alli nichunca mana shuyarcachu. Jesuspajca Yaya Dios alli nishca canami ashtahuan importante carca. Paipaj Yaya jahua pachamanta quimsa cutin rimajta uyashpaca Jesusca achcatami cushiyarishcanga. Por ejemplo, río Jordanpi bautizarishca qꞌuipaca jahua pachamantami Diosca: “Caimi ñuca cꞌuyashca Churi. Paipimi cushicuni” nirca (Mateo 3:17). Chaitaca Jesús y Bautizaj Juanllami uyashca cangacuna. Jesús huañunapaj casi shuj huata faltajpimi quimsa apostolcunapish: “Caimi, ñuca cꞌuyashca Churi. Paipimi cushicuni. Paita uyaichij” nishpa Yaya Dios rimashcata uyarcacuna (Mateo 17:5). Jesús  huañunapaj huaquin punllacuna faltajpimi Jehová Diosca cutin jahua pachamanta paihuan parlarca (Juan 12:28).

16, 17. ¿Jehová Diosca Jesusta cꞌuyashcata ricuchingapajca imatataj rurarca?

¹⁶ Jesusca pinganaita huañuna cashcataca allimi yacharca. Paita yangamanta juchachishpa gentecuna rimanatapish yacharcami. Shina cajpipish paica: ‘Ama ñuca munashca shina rurapaichu, ashtahuanpish can munashca shina rurapai’ nishpami Diosta mañarca (Mateo 26:39, 42). Jesusca Diospaj ñaupajpi alli ricurinata munashcamantami cai pacha gentecunapaj ñaupajpi alli nishca canataca mana mashcarca. Chaimi asicujpipish paica mana pinganayachishpa huañurca (Hebreos 12:2, NM). Jehová Diosca Jesusta cꞌuyashcata ricuchingapajca ¿imatataj rurarca?

¹⁷ Jesusca ‘Yayitu, jahua pachapi ima shinami canhuan sumajta causarcani, chashna sumaj causaillamantaj pushahuai’ nishpami Jehová Diosta mañarca (Juan 17:5). Jesús chashna nishpaca shuj jatun puestopi paita churachunca mana shuyarcachu. Shinapish ¿Yaya Diosca imatataj rurarca? Jesusta causachishpami “tucui ima tiyajcunapaj jahuapi jatunyachirca”. Ashtahuantajca nunca mana huañuna causaihuanmi bendiciarca. Chashna causaitaca ni pi mana chasquishcachu carca * (urapi tiyaj notata ricui) (Filipenses 2:9; Romanos 6:9). Jesús tucui shunguhuan Yayitu Diosta sirvishcamantami chashna bendicionta chasquirca.

18. ¿Diospaj ñaupajpi alli ricurinata mashcangapajca imatataj yuyarina canchij?

¹⁸ Shujtajcunapaj ñaupajpi alli ricurinata ama mashcangapajca ¿imatataj yuyarina canchij? Jehová Dios paita tucui shunguhuan sirvijcunata siempre bendiciaj cashcatami yuyarina canchij. Manapish yuyashca bendicioncunata cuj cashcatapishmi yuyarina canchij. Shamuj punllacunapi Dios ima shina ñucanchijta bendicianataca mana yachanchijchu. Mana alli gentecunaca ñallami tucuringa. Chaitapishmi yuyarina canchij. Shinapish chai punlla chayangacamaca llaquicunata ahuantashpa, gentecunapaj ñaupajpi alli ricurinata mana mashcashpami catina canchij (1 Juan 2:17). Ñucanchij cꞌuyaj Yayitu Diosca paipaj imallata rurashcataca manataj cungaringachu. Paita cꞌuyashcatapish siempremi yuyaringa (Hebreos 6:10). Paita tucui shunguhuan sirvishcamantaca Diosca ñucanchijmanca manapish yuyashca bendicioncunatami cunga.