Tucui laya gentecunaman llaquij cashcata ricuchishunchij
JESUSCA paita catijcunataca alli huillaicunata ima shina huillanatami yachachirca. Huillanaman rijpipish mana tucuicunachu alli chasquinga nircami (Lucas 10:3, 5, 6). Ciertomi can, huillanaman rijpica huaquin gentecunaca mana alli tratancunachu. Maipicarin macashca nincunami. Chashna mana alli tratajpimi paicunata llaquij canaca sinchi canga, paicunaman ña mana huillanata munashun.
Alli shunguta charij gentecunaca shujtajcunata llaquishpami imata minishtijpi o ima problemacunata charijpica ayudanata munan. Pero llaquij canata saquishpaca ña mana tanto huillanata munashunchu o mana alli huillashunchu. Shinapish llaquij cangapaj esforzarishpaca cushillami huillashpa catishun. Rupacuj nina ama chiriyachun ashtahuan yantata churashca shinami canga (1 Tesalonicenses 5:19).
¿Sinchi cajpipish ima shinataj shujtajcunata llaquij canata yachai tucunchij? Jehová Diospaj, Jesuspaj, apóstol Pablopaj ejemplomanta yachashun.
JEHOVÁ DIOS SHINA LLAQUIJ CASHUNCHIJ
Achca huaranga huatacunatami Diosmantaca llullacunata nishcacuna. Shinapish ‘Taita Diosca mana pagui nijcunatapish, mana allicunatapish llaquishpami’ catin (Lucas 6:35). Diosca pacienciata charishcamantami tucui runacuna quishpirichun shuyacun (1 Timoteo 2:3, 4). Millai cosascunata pꞌiñashpapish runacunataca cꞌuyashpami catin. Shujllapish huañuchunca mana munanchu (2 Pedro 3:9).
Jehová Diosca Satanás gentecunata llullashpa umaj cashcataca allimi yachan (2 Corintios 4:3, 4). Achcacunamanca huahuamanta pachami Diosmanta llullacunata nishpa yachachishcacuna. Chaimi panda yuyaicunata charishpa o mana alli sintirishpaca Bibliamanta ña mana yachasha nincuna. Pero Yaya Diosca ayudasha ninmi. ¿Ima shinataj chaitaca yachanchij?
Nínive llajtapi causajcunamanta yuyarishun. Paicuna millaicuna cajpipish Jehová Diosca Jonasmanca: “Nínive pueblotacarin maitataj mana llaquishari. Chai jatun pueblopica, 120.000 runacunami causancuna. Paicunaca maijan alli maqui cashcata, maijan lluqui maqui cashcatapish mana yachashca shinami causancuna” nircami (Jonás 4:11). Jehová Diosca ninivitacuna paimanta mana imata yachashcatami cuentata curca. Chaimantami paicunata llaquishcata ricuchishpa imata rurasha nishcata Jonasman huillanaman cacharca.
Ñucanchijpish, Jehová shinallatajmi gentecuna valishca cashcataca yachanchij. Chaimantami Jehová Diosmanta yachachishpa paicunata ayudasha ninchij. Paicuna mana uyasha nij laya cajpipish ayudasha ninchijmi.
JESÚS SHINA LLAQUIJ CASHUNCHIJ
Jesusca paipaj Yaya shinallatajmi gentecunata llaquij carca. “Michij illajlla, ovejacuna caita chaita puricuj shinata, achcacunata ricushpami paicunataca achcata llaquirca” (Mateo 9:36). Jesusca gentecunapaj shungu ima shina cashcatami yacharca. Paica religionta pushajcuna uyanaman rij gentecunata llaquichishcata, pandata yachachishcatami cuentata curca. Jesusca gentecuna jarcaicunata charishcamanta paita mana catinata yachashpapish, “achca cosascunatami yachachi callarirca” (Marcos 4:1-9).
Gentecuna punta cutin mana uyasha nijpipish ama desanimarishunchij
Gentecunapaj causaica tiempohuanca cambianmi. Chaimantami Diosmanta yachanatapish munangacuna
Gentecuna Diospaj Shimita mana uyasha nijpica, “¿imamanta mana uyasha nin?” nishpami tapurina canchij. Huaquincunaca crij canchij nishpapish mana alli cosascunatami rurashcacuna. Chaimantami shujtajcunaca Biblia yachachishcacunamanta, Diosta sirvijcunamantapish mana allita yuyancuna. Mana cashpaca ñucanchij crishcacunamanta llullacunata nijpi, familia o vecinocuna burlarinata manchashpami mana uyasha nincuna.
Huaquin gentecunaca ima llaquicunata charishcamantami ñucanchijtaca mana uyasha nincuna. Kim shuti misionera panica: “Ñuca huillan ladopica shuj jatun macanacuimi tiyarca. Gentecunaca tucuitami chingachirca. Paicunaca shujtajcunapi ña mana confiancunachu, llaquillami sintirincuna. Shamuj punllapaj ima esperanzatapish mana charincunachu. Chaimantami Diospaj Shimimanta huillajpipish jarcasha nincuna. Shuj cutincarin ñucataca macarcacunami” ninmi.
Kim shuti panica ¿llaquij cashcata ricuchishpa catingapajca imatataj ruran? Paica: “Gentecuna ñucata mana alli tratajpica Proverbios 19:11 ima nishcatami yuyarini. Chaipica: ‘Alli yuyaiyuj runaca, pꞌiñarishpapish jarcarinmi’ ninmi. Gentecunapaj causai ima shina cashcata yuyarishpami paicunamanta llaquirini. Chai ladocunapica mana tucuicunachu mana uyasha nincuna. Ashtahuanpish Bibliamanta yachasha nijcunatami cutin visitanaman tigranchij” ninmi.
Ñucanchij llajtapi causan gentecuna cashcata yuyashun. ¿Testigo de Jehovacuna huillanaman shamujpica imatataj ruranchijman? Por ejemplo, testigocunamanta llullacunata nishcata uyashpaca paicunata mana uyasha ninchijmanchu. Shinapish paicuna ñucanchijta llaquishpa catichunmi munanchijman. Jesús ima nishcata yuyarishunchij. Paica, shujtajcuna cancunapaj allita rurachun nishpaca, cancunapish paicunapaj allita ruraichij nircami. Sinchi cajpipish shujtajcuna ima shina sintirishcata yachashpami paicunata llaquij cashpa catishun (Mateo 7:12).
APÓSTOL PABLO SHINA LLAQUIJ CASHUNCHIJ
Apóstol Pabloca macashpa jarcasha nij gentecunatapish llaquijmi carca. ¿Imamanta? Paica ñaupa pai ima shina cashcata yuyarishpami: “Ñaupaca ñucaca Diosta cꞌamij, catirashpa llaquichij, maipish cachun rimajmi carcani. Chaicunataca mana yachaj, mana crij cashpa, chashna ruracujpipish Diosmi ñucataca llaquirca” nircami (1 Timoteo 1:13). Pabloca Diospish Jesuspish paita llaquij cashcataca allimi yacharca. Paica catirashpa llaquichijmi cashca carca. Chaimantami Diosmanta huillajpi gentecuna imamanta jarcasha nishcataca alli intindirca.
Huaquinpica panda yuyaicunapi yallitaj crij gentecunahuanmi Pabloca tupaj carca. Shinapish ¿ima shinataj chaitaca ricuj carca? Hechos 17:16-pica Pablo Atenas llajtapi cashpaca: “Chai puebloca rurashcalla dioscunahuan junda cashcata ricushpami paipaj shungupica yallitaj llaquirirca” ninmi. Pero paica chaicunallatatajmi alli huillaicunata huillangapaj utilizarca (Hechos 17:22, 23). Pabloca gentecuna ima shina cashcata ricushpami huillaj carca. Maijancunallatapish quishpichingapajmi chaita ruraj carca (1 Corintios 9:20-23).
Ñucanchijpish mana uyasha nij gentecunahuan o panda yachachishcacunapi crij gentecunahuan tupashpaca apóstol Pablo shinami rurai tucunchij. Gentecuna ima shina cashcata yachashpami alli huillaicunata rijsichun ayudai tucunchij (Isaías 52: 7). Dorothy shuti panica: “Ñucanchij huillacun ladopica Diosca sinchitami juzgan nishpami yachachishcacuna. Chashna nijpica puntaca Diospi crishcamantami felicitani. Qꞌuipaca Jehová Diosca cꞌuyaj cashcatami Bibliahuan ricuchini. Shinallataj shamuj punllapi sumaj causaita cugrishcatami yachachini” ninmi.
MILLAITACA ALLIHUAN MISHASHUNCHIJ
‘Tucuri punllacunapi’ cashcamantami ‘millai gentecunaca, ashtahuan ashtahuan mirarishpa catinga’ (2 Timoteo 3:1, 13). Pero gentecuna chashna tucujpipish ñucanchijca llaquij, cushilla canataca mana saquinachu canchij. Diosca ‘millaita allihuan mishachunmi’ fuerzata cunga (Romanos 12:21). Jessica shuti precursoraca: “Huillanaman rijpica jatun tucushca gentecunaca ñucanchijta, ñucanchij huillashcatapish burlarincunami. Chaimantami ñucanchijpish jahualla pꞌiñari tucunchij. Gentecunahuan parlai callarishpaca Diostaca can ricushca shina ricungapaj ayudahuai nishpami mañani. Chaita rurashpami ñucallapi yuyanapaj randica paicunata ima shina ayudanata yuyani” ninmi.
Diosmanta yachanata munajcunatami mashcashpa catinchij
Diosmanta yachachishpa ayudasha nijpica huaquincunaca tiempohuanca chasquingacunami
Huauqui panicunahuan huillacushpaca paicunata ima shina animanatami yuyana canchij. Pani Jessicaca: “Ñucanchijmanta maijan ima mana alli experienciata charijpica mana chaipi yallitaj yuyanichu” ninmi. Ashtahuanpish paica, huaquin gentecuna mana uyasha nijpipish shujtajcunaca Diosmanta yachana munaita charishcatami parlan.
Huillanapi ñucanchijcuna ima jarcaicunahuan chꞌimbapurashcataca Diosca allimi yachan. Shinallataj pai shina shujtajcunata llaquij cajpica cushillami sintirin (Lucas 6:36). Diosca mana tucui vidachu gentecunata llaquishpa caticungalla. Paica millai gentecunata ima horas tucuchinataca allimi yachan. Chaitami ñucanchijpish tucui shunguhuan confianchij. Chaicamaca mana shaicushpami huillashpa catina canchij (2 Timoteo 4:2). Shinashpaca cushicuihuan huillashpa, tucui laya gentecunahuanpish llaquijcuna cashpa catishunchij.
