1. ¿Diosca imata pajtachichuntaj munan?

 JEHOVÁ DIOSCA muyundij Allpapi paipaj Gobiernomanta predicachunmi munan (Marcos 13:10; 1 Timoteo 2:3, 4). Diospaj Gobiernomanta predicanaca valishcami can. Chaimantami Jehová Diosca predicacionta pushachunca paipaj cꞌuyashca Churiman mingashca. Jesús ñucanchijta pushacushcamantami alli predicai tucunchij. Cai millai mundo manaraj tucurijpimi Dios mingashcataca cabalta pajtachicushun (Mateo 24:14).

2. ¿Cai yachaipica imallatataj yachashun?

² Cai yachaipica ñucanchijman yachachingapaj, predicacionta pushangapajpish “alli cazuj, alli yuyaiyuj sirvij” huauquicunata Jesús utilizacushcatami ricushun (Mateo 24:45). Shinallataj Jesustapish alli cazuj, alli yuyaiyuj sirvij huauquicunatapish ima shina apoyanatami yachashun.

3. ¿Jesusca imata rurangapajtaj autoridadta chasquishca?

³ Jesusca predicaciontami pushacun. ¿Imamantataj chashna ninchij? Paica manaraj jahua pachaman rishpami Galileapi tiyaj shuj urcupi paipaj discipulocunahuan cashpaca: “Diosmi jahua pachatapish, cai pachatapish mandangapaj poderta ñucaman cushca. Chaimanta tucui llajtacunapi causaj gentecunapajman rishpa ñucata catijcuna tucuchun yachachigrichij” nirca (Mateo 28:18, 19). Caipi  nishca shinaca Jesusca predicacionta pushangapajmi autoridadta chasquirca.

4. ¿Jesús predicacionta pushacushcataca imamantataj seguros canchij?

⁴ Jesusca muyundij Allpapi huillana cashcata, paipaj discipulocunapish achcacuna tucuna cashcatami nirca. Shinallataj paipaj discipulocunataca: “Cai pachapaj ruraicuna tucuringacamami tucui punllacuna cancunahuan casha” nircami (Mateo 28:20). Caipi ricushca shinaca Jesusca cunan punllacunapipish gentecunaman predicachunmi ñaupajman pushacun.

5. Salmo 110:3-pi nishca shinaca ¿achca huauqui panicunaca imatataj ruracuncuna?

⁵ Jesusca cai tucuri punllacunapi achca gentecuna Diosmanta predicashpa purinatami alli yacharca. Cunan punllacunapica achca huauqui panicunami shungumanta Diospaj Gobiernomanta predicashpa caticuncuna (Salmo 110:3, La Biblia. Traducción del Nuevo Mundo). Can chashna predicacushpaca Jesustapish, alli cazuj, alli yuyaiyuj sirvij huauquicunatapishmi apoyacungui. Shinapish Dios mingashcata pajtachingapajca huaquin jarcaicunami tiyan.

6. ¿Cai tiempopica ima jarcaicunatataj charinchij?

⁶ Cai tiempopica achca jarcaicunatami charinchij. Por ejemplo, apostatacuna, gobiernocuna, religionta pushajcunapish ñucanchijmantaca llullacunatami nincuna. Chai llullacunata crishpami huaquinpica ñucanchij familiacuna, vecinocuna, trabajopi caj compañerocunapish Jehová Diosta ama sirvichun, ama predicachun jarcasha nincuna. Huaquin llajtacunapicarin ñucanchijta llaquichishpami carcelpi churancuna. Jesucristoca: “Ñucata catij cashcamantami cancunataca tucui llajtacunapi pꞌiñangacuna” nircami. Chaimantami ñucanchijta llaquichicujta ricushpapish mana mancharina canchij (Mateo 24:9). Ashtahuancarin ñucanchijta llaquichicujpi chaita ahuantashpaca Diosta alli sirvijcuna cashcatami ricuchinchij (Mateo 5:11, 12). Diabloca ima jarcaicunata churashpapish Jesustaca manataj mishai tucungachu. Jesús ñucanchijta ayudacushcamantami muyundij Allpapi achca gentecunaman predicacushcanchij.

7. ¿Apocalipsis 14:6, 7-pi nishcacunaca ima shinataj pajtaricun?

⁷ Jesusca apóstol Juantaca chꞌican chꞌican shimicunapi predicana cashcatami huillarca (Apocalipsis 14:6, 7-ta liyipai). ¿Caita pajtachina sinchi cajpipish imatataj rurashcanchij? JW.ORG paginapimi mil yalli shimicunapi publicacioncunata llujchishcanchij. Cuerpo Gobernantepi sirvij huauquicunapish Cushilla causai nishca librotaca 700 yalli shimicunapi traducichunmi saquishcacuna. Cai librohuanmi gentecunamanca Bibliamanta yachachi tucunchij. Shinallataj mana uyajcunapaj achca videocunami tiyan, mana ricujcunapajpish publicacioncunami tiyan. Cai tucui ayudacuna tiyashcamantami tucui llajtacunamanta achca gentecunaca Diospaj Gobiernomanta, Diosmantapish yachai tucushcacuna. Caicuna ima shina pajtaricushcata ricushpaca achcatami cushiyarinchij (Zacarías 8:23; Sofonías 3:9). Jesús ñucanchijta alli pushacushcamantami caicunata pajtachi tucushcanchij. 

8. ¿Jesús predicacionpi ayudacushcamantaca Diospaj puebloca ima shinataj mirarishca?

⁸ Cunan punllacunapica Jesuspaj ayudahuanmi 240 llajtacunapica 8 millón yalli Testigocuna canchij. Shinallataj cada huatami huaranga huaranga gentecuna  bautizarishpa caticuncuna. Cai mushuj huauqui panicunaca Dios cushca mushuj causaitami chari callarishcacuna (Colosenses 3:8-10). Chaimantami paicunaca huainayanata, pꞌiñarinata shujtajcunata llaquichinata saquishcacuna. Isaías 2:4-pi nishca shinaca chai huauqui panicunaca shujtajcunahuan macanacunatami saquishcacuna. Chashna alli cualidadcunata charishpaca shujtajcunapish Jehová Diosta sirvichunmi ayudancuna. Ñucanchijta pushaj Jesucristotapish caticushcatami ricuchincuna (Juan 13:35; 1 Pedro 2:12).

9. Mateo 24:45 al 47-pi nishca shinaca ¿Jesusca ima shinataj Diospaj pueblota cuidacun?

⁹ Mateo 24:45-47-ta liyipai. Jesusca cai tucuri punllacunapi ñucanchijman yachachichunca alli cazuj, alli yuyaiyuj sirvij huauquicunatami agllashca. Cai huauquicunaca agllashca ungidocunapuramantami ashallacuna can. Paicunaca Diosta sirvijcunaman, Diosmanta yachasha nijcunamanpishmi yachachishpa caticuncuna. Cai huauquicunaca ñucanchijta mandajcuna, amocuna shinaca mana cancunachu (2 Corintios 1:24). Ashtahuanpish paicunaca Diospaj pueblota Jesucristo pushacushcatami alli intindincuna (Isaías 55:4).

10. ¿Canca ima librohuantaj Yayitu Diosmanta yachai callarircangui?

¹⁰ Alli cazuj, alli yuyaiyuj sirvij huauquicunaca 1919 huatamantami gentecuna Diosmanta yachachun achca librocunata llujchishcacuna. Por ejemplo, 1921-pica inglés shimipimi El Arpa de Dios nishca librota llujchircacuna. Tiempohuanca shujtaj librocunatapishmi llujchircacuna. Por ejemplo, “Sea Dios veraz”, La verdad que lleva a  vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Bibliaca imatataj yachachin?, Bibliamanta yachashunchij, Cushilla causai nishca librocunatapishmi llujchircacuna. Canpishchari cai llujchishca librocunamantaca shujhuan Yayitu Diosta rijsircangui. Cai librocunahuanmi achca gentecunata ayudai tucushcanchij. Cai librocunaca ñucanchij minishticui horaspimi chayashca.

11. ¿Imamantataj Diosmanta, Bibliamanta yachashpa catina canchij?

¹¹ Jehová Diosmanta yachashpa catinataca tucuicunami minishtinchij. Apóstol Pablopish: “Sinchi micuica sinchiyarishcacunapajmi. Paicunaca cutin cutin yuyanata yachashcamantami ima alli cashcata, ima mana alli cashcatapish yachaj chayashcacuna” nircami (Hebreos 5:14). Cunan tiempopica mapa ruraicuna tiyashcamantami Jehová Diosta cazunaca sinchi can. Chaimantami Jesusca ñucanchij feta sinchiyachisha nin. Chaipajca alli cazuj, alli yuyaiyuj sirvij huauquicunamanmi ñucanchijta yachachichun mingashca.

12. ¿Jesús shina Diospaj shutita jatunyachingapajca imatataj rurashcanchij?

¹² Jesús shinallatajmi ñucanchijpish Diospaj shutita jatunyachishcanchij (Juan 17:6, 26). Por ejemplo, 1931 huatapica testigo de Jehovacuna nishca shutitami churarircanchij. Chashnami ñucanchijpaj Diospaj shuti importante cashcata ricuchircanchij (Isaías 43:10-12). Octubre quillapi 1931 huatamantami inglés shimipi tiyaj cai revistapi página 1-pica Diospaj shutita churai callarircanchij. Ashtahuancarin ñaupa quillcashcacunapi Diospaj shuti maipi cashcata ricushpami, Traducción del Nuevo Mundo Bibliapipish Diospaj shutita churarcanchij.  Pero crijcunami canchij nijcunaca caitaca mana rurashcacunachu. Ashtahuanpish paicunaca Bibliamantami Diospaj shutita anchuchishcacuna.

13. ¿Jesús alli cazuj, alli yuyaiyuj sirvij huauquicunata pushacushcataca imamantataj yachanchij?

¹³ Jesusca alli cazuj, alli yuyaiyuj sirvij huauquicunahuanmi Diospaj pueblota pushacun. Caita yachashpaca apóstol Pedro shinallatajmi sintirinchij. Paica: “¿Ñucanchijca maimantaj rishunyari? Canmari huiñai causaita cuj shimicunataca yachachingui” nircami (Juan 6:68). Diospaj organizacionpi cashcamantami Jesucristoca sinchi feta charichun, alli yachachijcuna cachun, mushuj causaita charichunpish ayudacun (Efesios 4:24).

14. ¿COVID-19 ungüi tiyai horaspica Jesusca ima shinataj canta ayudashca?

¹⁴ Sinchi punllacunapipish Jesusca ñucanchijtaca ñaupajmanmi pushashpa caticun. COVID-19 ungüi ricurijpica achca gentecunaca imata ruranataca mana yacharcacunachu. Pero Jesusca ñucanchijmanca valishca instruccioncunatami curca. Por ejemplo, mascarillacunata churarichun, gentecunamanta caru carupi purichunmi nirca. Ancianocunamanpish huauqui panicunamanta preocuparichun, tucuipi ayudachunmi yuyachirca (Isaías 32:1, 2). Cuerpo Gobernante huillashcacuna nishca videocunapipish achca instruccioncunata, animotami chasquishcanchij.

15. ¿Cai COVID-19 tiyai horaspica predicangapajpish, tandanacungapajpish ima instruccioncunatataj chasquishcanchij?

¹⁵ Pandemia chayashca horaspipish predicangapaj, tandanacungapajmi huaquin instruccioncunata  chasquircanchij. Pushaj huauquicunaca ñapishmi “cunanca internetpimi tandanacui callarishun” nishpa huillarcacuna. Predicangapajpish telefonopi cayachun, cartacunata rurachunmi animarcacuna. Caicunata cazushcamantami Jehová Diosca achcata bendiciashca. Chaimantami achca huauqui panicunaca huaquin gentecunata ayudai tucurcacuna. Huaquin llajtacunapicarin achca publicadorcunami mirarishca (“ Jehová Diosca gentecunaman huillachunmi ayudashca” nishca recuadrota ricui).

16. Hebreos 13:5, 6-pi nishca shinaca ¿pitaj ñucanchijta cuidashpa catinga?

¹⁶ Maijan huauqui panicunaca: “COVID-19 ungüimantaca mana manchanaita cuidarinata minishtinchijchu, instruccioncunatapish cuchunca mana minishtinchijchu” nishpachari yuyashcangacuna. Pero pushaj huauquicuna cushca instruccioncunata cazunaca valishcami cashca (Mateo 11:19). Jesús ñucanchijta ima shina cuidacushcata ricushpaca shamuj punllacunapi Jehová Diospish, Jesuspish ñucanchijta cuidanatami seguros canchij (Hebreos 13:5, 6-ta liyipai).

17. ¿Jesús Diospaj pueblota pushacushcamantaca ima shinataj sintiringui?

¹⁷ Diospaj pueblo ucupi cashcamantami agradecidos sintirinchij. Mai llajtamanta cashpapish, ima culturata charishpapish Yayitu Diostami tandalla sirvinchij, predicangapajpish listosmi canchij. Alli cualidadcunata charingapajpishmi esforzarishpa catinchij. Jesucristo ñucanchijta yachachishcamanta, alli pushacushcamantami cushilla sintirinchij.