1. ¿Adán y Eva juchapi urmashca huashaca Jehová Diosca imatataj huillarca?

 ADÁN y Eva juchapi urmashca huashaca Jehová Diosca tucuita allichinatami huillarca. Génesis 3:15-pica ima shina tucuita allichinatami ñucanchijman huillan (Génesis 3:15-ta liyipai).

2. ¿Imamantataj Génesis 3:15-mantaca yachana canchij?

² Génesis 3:15-pi tiyaj profeciata alli intindishpaca tucui Bibliatami alli intindishun. Bibliapi tiyaj tucui librocunapish cai profeciamantami parlan. Caipi yuyashun. Ima shinami shuj libropaj tucui paginacunaca shuj shinalla can, chashnallatajmi Bibliapi tiyaj librocunapish shuj shinalla, shuj yuyaillamanta parlan. Génesis 3:15-pipish, Bibliapi tiyaj shujtaj librocunapipish Diablota tucuchingapaj, paita catij millaicunatapish tucuchingapaj Jehová Dios shuj quishpichijta cachagrishcatami parlan. * Caita yachashpaca Jehová Diosta cꞌuyajcunaca achcatami cushiyarinchij.

3. ¿Cai yachaipica ima tapuicunatataj cutichishun?

³ Cai yachaipica cai catij tapuicunatami yachashun. ¿Génesis 3:15-pica picunamantataj parlan? ¿Cai profeciaca ima shinataj pajtaricushca? ¿Cai profeciamanta yachashpaca ima shinataj beneficiarinchij?

4. ¿Cai profeciapi parlashca culebraca pitaj can?

⁴ Génesis 3:14, 15-pica shuj culebramanta, chai culebrapaj huahua huahuacunamanta, shuj huarmimanta, chai huarmipaj  huahua huahuacunamantapishmi parlan. Bibliami paicuna pi cashcata yachachin. * ¿Culebraca pitaj can? Caipi parlashca culebraca mana shuj animalchu carca. Shuj culebraca Jehová Dios ima nishcataca mana intindi pudinchu. Apocalipsis 12:9-pi nishca shinaca chai culebraca Diablomi can. ¿Cutin cai profeciapi parlashca culebrapaj huahuacunaca picunataj can?

5. ¿Culebrapaj huahuacunaca picunataj can?

⁵ Bibliapica Diablo shina millai gentecunataca Diablopaj huahuacunami can ninmi. Diablopaj huahuacuna o culebrapaj huahuacunaca pai shinami Diospaj contracuna, Diospaj pueblopaj contracuna can. Paicunaca Diosta mana cazuj angelcuna, millai gentecunapishmi can (Génesis 6:1, 2; Juan 8:44; 1 Juan 5:19; Judas 6).

6. ¿Cai profeciapi parlashca huarmi, Eva mana cashcataca ima shinataj yachanchij?

⁶ Cunanca Génesis 3:15-pi parlashca huarmi pi cashcatami ricushun. ¿Cai huarmica Evachu carca? Mana. Caipi yuyashun. Cai profeciapica cai huarmipaj huahuaca culebrapaj umatami saruna can ninmi. Pero ima shinami ricushcanchij, cai culebraca millai ángel Diablomi can. Shinashpaca Evapaj shuj huahua juchayuj cashcamanta Diablota mana tucuchi tucushcatami intindinchij. Shinaca ¿cai huarmica pitaj can?

7. ¿Génesis 3:15-pi parlashca huarmica picunatataj ricuchin?

⁷ Apocalipsis libropica Génesis 3:15-pi parlashca huarmi pi cashcatami yachachin (Apocalipsis 12:1, 2, 5, 10-ta liyipai). Cai huarmica mana aichayuj, mana tulluyujchu can. Apocalipsispi nishca shinaca lunaca cai huarmipaj chaqui ucupimi can.  Paipaj umapipish 12 estrellacunayuj coronata churarishcami can. Shinallataj cai huarmica shuj huahuatami huachan. Cai huahuaca Diospaj Gobiernotami ricuchin. Diospaj Gobiernoca jahua pachapimi can. Chaimantami cai huarmipish jahua pachapi cana can. Génesis 3:15-pi parlashca huarmica jahua pachapi tiyaj tucui angelcunatami ricuchin (Gálatas 4:26).

8. a) ¿Huarmipaj punta huahuaca pitaj can? b) ¿Paica ima horataj huarmipaj punta huahua tucurca?

⁸ Cunanca huarmipaj huahuacuna picuna cashcatami yachashun. Génesis 22-pi nishca shinaca huarmipaj punta huahuaca, Abrahampaj familiamantami shamuna carca (Génesis 22:15-18-ta liyipai). Cai Génesis 22-pi nishcacunaca Jesuspimi pajtarirca. Jesusca Abrahampaj huahua huahuacunamantami shamurca (Lucas 3:23, 34). Pero Diablota tucuchingapajca huarmipaj huahuaca runacunatapish yallimi poderta charina carca. Chaimantami Jesusca 30 huatacunata charishpaca Diospaj espíritu santota chasquirca. Espíritu santota cushpaca Jehová Diosca paipaj Churiman jahua pachapi achca autoridadta cunatami ricuchirca. Jesucristoca espíritu santota chasquishpaca huarmipaj punta huahuami tucurca (Gálatas 3:16). Jesús causarishca huashaca Jehová Diosca cai pachatapish, jahua pachatapish mandachun, Diablopaj ruraicunatapish tucuchichunmi Jesusmanca achca poderta curca (Hebreos 2:7; Mateo 28:18; 1 Juan 3:8).

9, 10. a) ¿Huarmipaj caishuj huahuacunaca picunataj can? b) ¿Paicunaca ima horataj huarmipaj huahuacuna tucun? c) ¿Cunanca imatataj yachagrinchij?

⁹ ¿Génesis 3:15-pi parlashca huarmipaj chaishuj huahuacunaca picunataj can? Apóstol Pabloca paicuna picuna cashcatami yachachirca. Paica jahua pachaman ringapaj agllashca judiocunaman, mana judiocunamanpish: “Cristota catijcuna cashpaca, Abrahampaj huahua huahuacunami canguichij. Abrahamman Dios cusha nishca herenciatapishmi chasquinguichij” nircami (Gálatas 3:28, 29). Maijanpish jahua pachaman ringapaj espíritu santohuan agllashca cashpaca, huarmipaj caishuj huahuacunapuramantami tucun. Shinashpaca huarmipaj huahuacunaca Jesucristopish, jahua pachapi Jesushuan mandangapaj agllashca 144.000 ungidocunapishmi can (Apocalipsis 14:1). Paicunaca paicunapaj Yaya Jehová munashca shina yuyangapaj, causangapajmi esforzarincuna.

¹⁰ Génesis 3:15-pi picunamanta parlashcataca ñami yachashcanchij. Cunanca Jehová Dios cai profeciata ima shina pajtachicushcata, ñucanchijpish cai profeciamanta ima shina beneficiarishcatami yachashun.

11. ¿Culebraca huarmipaj huahuapaj talontaca ima shinataj chugrichirca?

¹¹ Génesis 3:15-pi nishca shinaca culebraca, huarmipaj huahuapaj talontami chugrichina carca. Jesusta huañuchingapaj judiocunaman, romanocunaman Diablo yuyaita cujpimi cai profeciaca pajtarirca (Lucas 23:13, 20-24). Talonpi chugririshpaca asha tiempotami mana puri tucunchijman ¿nachu? Chai shinallatajmi Jesusca huañushca cashpaca casi quimsa punllacunallata mana imata rurai tucurca (Mateo 16:21).

12. ¿Ima horataj Jesusca culebrapaj umata sarunga?

¹² Pero huarmipaj huahuaca culebrapaj umatami saruna carca. Chaimi Jesús mana tucui vidapaj huañuna cashcata intindinchij. Jesusca quimsa punllacunallapimi mana huañunalla espíritu shina causarirca. Dios agllashca horaspicarin Diablota sarushpami tucuita tucuchinga (Hebreos  2:14). Jesuspish, paihuan mandangapaj agllashca ungidocunapish Diablopaj tucui catijcunatami tucuchinga (Apocalipsis 17:14; 20:4, 10). *

13. ¿Génesis 3:15-pi parlaj profecía pajtarishcamantaca ima shinataj beneficiarinchij?

¹³ Yayitu Diosta can sirvicushpaca cai profecía pajtarishcamantami achcata beneficiaricungui. Por ejemplo, Jesusca cai Allpaman shamushpaca paipaj Yaya ima shina cashcatami ricuchirca (Juan 14:9). Jesuspaj ejemplomantami Jehová Diosta rijsi tucushcanchij, paita cꞌuyai tucushcanchij. Jesusca ñucanchij ruraicunahuan, yuyaicunahuan Jehová Diosta ima shina cushichinatami yachachishca. Paita catijcunata alli pushacushcamantapishmi achcata beneficiarishcanchij. Ñucanchijmanta huañushcamantacarin achca bendicioncunatami chasquishcanchij. Jesús paipaj yahuarta jichashcamantami ñucanchij juchacunamanta quishpirina oportunidadta charinchij (1 Juan 1:7).

14. ¿Génesis 3:15-pi parlaj profeciaca imamantataj mana chai rato pajtarirca?

¹⁴ Génesis 3:15-pi parlaj profeciaca mana chai rato pajtari callarircachu. Chai profeciapi parlashca huarmica huahuacunatami charina carca. Diablopish paita catijcunatami tandachina carca. Diablota catijcunaca huarmipaj huahuacunatami llaquichishpa callarina carca. Cai tucui pajtarichunca tiempomi minishtirirca. Cai profecía ima shina pajtarina cashcata yachashpaca Diablota catijcuna, Diosta sirvijcunata llaquichigrishcatami intindinchij. Jesuspish paita catijcunamanca gentecuna paicunata pꞌiñana cashcatami huillarca (Marcos 13:13; Juan 17:14). ¿Manachu cai último 100 huatacunapi cai profecía ima shina pajtaricushcata ricushcanchij? Caimanta parlashpa catishun.

15. a) ¿Imamantataj gentecunaca Diospaj pueblotaca ashtahuan pꞌiñancuna? b) ¿Imamantataj Diablotaca mana manchana canchij?

¹⁵ 1914 huatapimi Jesusca Diospaj Gobiernopi mandai callarirca. Chai huatallapitajmi Diablotaca jahua pachamanta shitarca. Ashtahuancarin ñallami Diablotaca tucuchinga (Apocalipsis 12:9, 12). Chaita yachashpaca Diabloca achcata pꞌiñarishpami Diospaj pueblota llaquichicun (Apocalipsis 12:13, 17). Diablo chashna llaquichisha nishcamantami gentecunapish ñucanchijta achcata pꞌiñacun. Pero Diablotapish, paita catijcunatapish mana manchanachu canchij. Ashtahuanpish apóstol Pablo shinami yuyana canchij. Apóstol Pabloca: “Dios ñucanchijhuan cajpica ¿pitaj ñucanchij contra cai tucungari?” nircami (Romanos 8:31). Ima shinami ricushcanchij, Génesis 3:15-pi parlaj profeciaca pajtaricushcami. Chaita ricushpaca Jehová Dios nishcacuna tucui pajtarinatami tucui shunguhuan crinchij.

16-18. ¿Génesis 3:15-ta intindishcamantaca huauqui Curtis, pani Ursula y pani Jessicapish ima shinataj beneficiarircacuna?

¹⁶ Génesis 3:15-pica Jehová Dios ñalla tucui llaquicunata allichinatami yachachin. Chaita yuyarishpaca ima llaquicuna ricurijpipish tucui chaicunatami ahuantai tucushun. Curtis shuti huauquica, Guam nishca llajtapimi misionero shina sirvicun. Paica: “Ñuca causaipi huaquin llaquicunata, jarcaicunata charishcamantami maipica Diosta tucui shunguhuan sirvinaca mana jahualla cashca. Pero Génesis 3:15-pi Jehová Dios imata ruranata yuyarishpami, paipi ashtahuan confiashpa  caticushcani” ninmi. Huauqui Curtisca Jehová Dios ñalla tucui llaquicunata tucuchinatami tucui shunguhuan shuyacun.

¹⁷ Alemania, Baviera llajtamanta pani Ursulaca Bibliapi tiyaj shujtaj profeciacunapish Génesis 3:15-pi parlaj profeciamanta yachachishcatami cuentata curca. Chaimi Biblia, Diospaj Shimi cashcata tucui shunguhuan confiarca. Pani Ursulaca: “Adán y Eva juchapi urmajpica Jehová Diosca chai ratomi tucui llaquicunata ima shina allichinata huillarca. Dios ñucanchijta ayudasha nishcata yachashpaca Jehová Diosta ashtahuanmi cꞌuyai callarircani” ninmi.

¹⁸ Micronesia llajtamanta pani Jessicaca: “Bibliapi nishcacuna ciertotaj cashcata cuentata cushpaca achcatami cushicurcani. Génesis 3:15-pi parlaj profecía pajtaricushcatapishmi cuentata curcani. Chaita intindishpaca Jehová Dios llaquicunata mana cachaj cashcatami yacharcani. Ashtahuanpish Jehová Diosta sirvishpalla cunan punllacunapipish, shamuj punllacunapipish alaja causaita charinatami cuentata curcani” ninmi.

19. ¿Jesús, Diablota tucuchinata, achca bendicioncunapish tiyanataca imamantataj seguros canchij?

¹⁹ Cai yachaipi ricushca shinaca Génesis 3:15-pi parlaj profeciaca pajtaricunmi. Cai yachaipica huarmipaj huahuacunapish, culebrapaj huahuacunapish picuna cashcatami yachashcanchij. Huarmipaj punta huahuaca Jesusmi can. Paica causarishcami. Jahua pachapipish mana huañunalla, achca poderta charij Mandajmi can. Shinallataj Jehová Diosca Jesushuan mandagrijcunataca ñami la mayoriata agllashca. Caicuna ima shina pajtarishcata ricushpaca, Jesús ñalla Diablota tucuchinatami crinchij. Diablota tucuchijpica Diosta sirvij tucui gentecunaca cushillami sintirishun. Huarmipaj huahuacunamantami Jehová Diosca tucui gentecunamanca achca bendicioncunata cunga (Génesis 22:18). Chai punlla chayangacamaca mana shaicushpa, Jehová Diospi confiashpa catishunchij.