▪ Jesusca huata 29-pi bautizarishpami sacerdotecunata mandaj tucurca. ¿Caitaca ima shinataj yachanchij? Jesusca bautizarishpaca Jehová Diospaj munaita rurasha nishcatami ricuchirca. Shinami gentecunamanta huañusha nishcata ricuchirca (Gálatas 1:4; Hebreos 10:5-10). Diospaj munaica templopi caj altar shinami can. Jesusca paipaj causaita Jehová Diosman cushpaca shuj altarpi ofrendata cucuj shinami carca. Cai altarca Jesús bautizarishcamanta huichimanmi tiyai callarirca. Jesús huañushcamantami Jehová Diostaca alli adorai tucunchij, paita chashna adoranami Diospaj templo shina can. Cai temploca Jesús bautizarishca huichimantami tiyai callarirca. Templopi tiyaj altarmi valishca carca. Shinallataj Jehová Diosta alli adorangapajca paipaj ruranami valishca can (Mateo 3:16, 17; Hebreos 5:4-6).

Jesús huañushcamanta Jehová Diosta alli adoranaca ñami callarishcarca. Chaimi templo tiyai callarishca shina carca. Pero templopajca sacerdotecunata mandajmi tiyana carca. Sacerdotecunata mandaj cachunmi Jehová Diosca paipaj espíritu santohuan, poderhuan Jesusta agllarca (Hechos 10:37, 38; Marcos 1:9-11). ¿Ima shinataj Jesús manaraj huañujpi, manaraj causarijpi paitaca sacerdotecunata mandaj cachun agllashcata yachanchij? Aaronmanta, paipaj qꞌuipa sacerdotecunata mandajcunamanta yachashpami cai tapuitaca cutichi tucunchij.

Leypi nishca shinaca sacerdotecunata mandajllami Diospajlla chꞌicanyachishca ucumanca yaicuna carca. Diospajlla caj punta ucutaca shuj linsomi Diospajlla ashtahuan chꞌicanyachishca ucutaca chaupij carca. Sacerdotecunata mandajca huatapi shuj cutinllami Diospajlla ashtahuan chꞌicanchishca ucumanca yaicuj carca (Hebreos 9:1-3, 6, 7). Aaronpish caishuj mandajcunapish Diospaj carpa huasipi linsohuan chaupishcata manaraj pasashpami sacerdotecunata mandaj cangapajca ña agllashcaraj cana carca. Shinallataj Jesús manaraj huañujpimi Diospaj templopi sacerdotecunata mandaj cachun ña agllashca carca. Pai huañushpaca jarcachishca linsota pascaj shinami jahua pachaman yaicurca. Chai linsota nishpaca paipaj aichatami nisha nin (Hebreos 10:20). Chaimi apóstol Pabloca ‘Cristoca ñamari shamurca, paica sacerdotecunata mandajmi can. Chai huashaca Jesusca Diospajlla sumaj ucumanmi yaicurca. Chai ucuca mana runacuna rurashcachu carca. Jesusca jahua pachamantajmi yaicurca’ nirca (Hebreos 9:11, 24).

▪ ¿Jehová Diosca mushuj ari ninacushcataca ima horataj chasquirca? Jesusca jahua pachaman rishpami ñucanchijmanta huañushcata Jehová Dios chasquichun mañarca. Chashnami Jesusca mushuj ari ninacushcata Dios chasquichun ayudai callarirca.

Puntapica Jesusmi jahua pachaman cutin tigrarca. Ishquipica Jesús ñucanchijmanta huañushcata Jehová Dios chasquichunmi mañarca. Qꞌuipaca Jehová Diosmi chaita chasquirca. Caicunata pajtachishca qꞌuipami mushuj ari ninacushcaca callarirca.

Bibliapica Jesús huañushcata Jehová Dios ima hora chasquishcataca mana huillanchu. Chaimantami mushuj ari ninacushcata Dios ima hora chasquishcataca mana allitaj yachanchij. Pero Pentecostés fiesta manaraj callarijpi 10 punllacuna faltajpiraj Jesús jahua pachaman rishcatami yachanchij (Hechos 1:3). Chai punllacunapimi Jesusca pai huañushca ofrendata Jehová Dios chasquichun mañashcanga. Chaimi paipaj ofrendataca Jehová Diosca chasquirca (Hebreos 9:12). Huata 33-pi Pentecostés fiestapi ima tucushcata ricushpami Jehová Dios mushuj ari ninacushcata chasquishcata intindi tucunchij (Hechos 2:1-4, 32, 33). Chashnami chai punllapaj mushuj ari ninacushca ña callarishcata intindinchij.

Jesús cushca causaita Jehová Dios chasquijpimi mushuj ari ninacushcaca pajtari callarirca. Cai mushuj ari ninacushcapica Jesusmi sacerdotecunata mandaj can. Paillamantami cai mushuj ari ninacushcaca pajtari tucun (Hebreos 7:25; 8:1-3, 6; 9:13-15).