Ñucaca 1954 huatapimi huacharircani. Ñuca huacharishca llajtaca Saint Paul nishca Estados Unidos llajtapimi saquirin. Ñuca familiaca catolicocuna, ni cullquiyuj ni pobrella mana carcachu. Ñucanchijca cincopurami canchij. Ñucaca segundo lugarpimi huacharircani. Huahuaraj cashpaca católica escuelapimi estudiarcani. Shinallataj curatami ayudaj carcani. Pero Bibliamantaca ashallatami yacharcani. Dios tiyashcata, pai imallata rurashcata crishpapish Iglesia Católica Diosta adorangapaj mana ayudanatami cuentata curcani.

Abogado canapajmi estudiacurcani. Shuj cusa huarmi testigocunaca ñapish shuj punllaca huillanamanmi shamurcacuna. Ropata tajshacushcamantami tiempotaca mana charinichu nircani. Chaimi paicunaca respetohuan qꞌuipatami tigramushun nircacuna. Paicuna tigrajpica cai ishqui tapuicunatami rurarcani: “¿Mana allicunaca imamantataj alli causancuna? ¿Cushilla causangapajca imataj minishtirin?” nishpami tapurcani. Chaimi paicunaca La verdad que lleva a vida eterna nishca librota curcacuna. Shinallataj Traducción del Nuevo Mundo de las Santas Escrituras nishca Bibliatapishmi curcacuna. Chai Bibliapaj tapaca alaja verdijllami carca. Bibliatami yachai callarircani.  Diospaj Gobierno cai Allpapica gentecunapaj imallata ruranata yachashpaca cushillami sintirircani. Gobiernocuna cai Allpata mandacujpi achca llaquicuna tiyashcatami intindircani.

1982 huatapimi Jehová Diosman mingarircani. Chai huatallapitajmi “Verdad del Reino” nishca jatun tandanacuipi bautizarircani. Chai jatun tandanacuitaca Saint Paul llajtapi caj shuj jatun salonpimi charircanchij. Shuj semana qꞌuipaca abogado tucungapaj examenta cungapajmi chai lugarllamantaj tigrarcani. Octubre quillapica ñami abogado tucurcani.

Chai jatun tandanacuipica Mike Richardson huauquitami rijsircani. Chai huauquica Brooklyn llajtapi saquirij Betelpimi sirvij carca. Central mundialpica leycunahuan ricunata charij casoscunata atindina shuj oficinami tiyan nircami. Hechos 8:36-pi Etiopía llajtamanta eunuco ima nishca shimicunapimi yuyarircani. Chaimi cashna nishpa tapurircani: ¿Central mundialpica leycunahuan ricunata charij casoscunata atindina oficinapi trabajachunca ñucataca imataj jarcan? Chaimi Betelpi sirvingapaj shuj solicitudta jundachircani.

Ñuca yaya mamaca testigo de Jehová tucuchunca mana munarcacunachu. Ñuca yayaca: “¿Canca Betelpi abogado shina trabajashpaca ima beneficiocunatataj charingui?” nishpami tapurca. “Ñucaca chaipica voluntario shinami trabajasha, ñucamanca 75 dolartami quillapica paganga” nishpami cutichircani. Chai tiempopica betelitacunamanca chaitami cujcuna carca.

Shuj tribunalpimi trabajacurcani. Qꞌuipaca 1984-pimi Brooklyn Betelpi sirvi callarircani. Chai tribunalpi trabajanami Betelpi alli trabajachunca ayudarca. Betelpica leycunahuan ricunata charij casoscunata atindina oficinapimi trabajai callarircani.

Noviembre 1983 huatapimi, testigo de Jehovacunaca shuj teatrota Jersey City llajtapi randircacuna. Chai huauqui panicunaca luzcunata alli conectangapaj, yacucunata alli conectangapajmi shuj permisota mañarcacuna. Autoridadhuan tandanacushpaca huauquicunaca “cai teatrotaca jatun tandanacuicunata rurangapajmi utilizashun” nircacunami. Pero chai llajtapi tiyaj leycunapica negociocuna tiyan ladopi Diosta adorana huasicuna tiyachunca mana saquijcunachu carca. Huasicuna tiyan lugarcunallapimi Diosta adorana huasicuna tiyachunca saquijcuna carca. Cai teatroca centropi negociocunapaj cꞌuchullapi cashcamantami permisotaca mana curcacuna. Huauquicunaca chai decisioncunahuan mana de acuerdo cashcamantami autoridadcunaman cutin permisota mañarcacuna. Pero paicunaca permisotaca mana curcacunachu.

Betelpi shuj semanata ñuca trabajai callarijpimi ñucanchij organizacionca permisota  cuchun tribunalman mañarca. Ishqui huatacunata Saint Paul (Minnesota) llajtapi tiyaj tribunalpi trabajashcamantami cai tramitecunata ruranataca alli yacharcani. Ñucanchijta ayudaj shujtaj abogadoca: “Stanley Teatropica chꞌican chꞌican ruraicunata rurangapaj, peliculacunata ricungapaj, hasta conciertocunata rurangapajmi utilizashcacuna. Shinashpaca ¿imamantataj mana jatun tandanacuicunata rurachunca saquincuna?” nishpami tribunalman nirca. Cai tribunalca cai tramitecunata ricushpami ‘Jersey City llajtapi autoridadcunaca Diosta adorana derechota mana respetancunachu’ nirca. Chaimantami autoridadcunataca chai permisota cuchun mandarca. Chashnami Diosta sirvijcuna Diospaj obra ñaupajman catichun leycunata, abogadocunata, juezcunata utilizajpi Jehová bendiciashcata ricurcani. Ñucapish Diospaj obra ñaupajman catichun ayudashcamantami cushilla sintirircani.

Huauqui panicunaca cai edificiotaca manaraj shuj huata tucujpimi tucuita allichircacuna. Chaipica 8 de septiembre de 1985-pimi clase 79 de Galaad escuelamanta graduarircacuna. Cai teatrotaca Jersey City Jatun Tandanacuna Huasi nishpami rijsircacuna. Manaraj Betelpi sirvishpaca shujtaj ladocunapimi abogado shina trabajarcani. Pero Diospaj Gobierno ñaupajman catichun Betelpi shujtaj huauqui abogadocunahuan ayudacushcamantami cushilla sintirircani. Jehová Dios shujtaj casoscunapi ayudachun utilizana cashcataca mana yuyarcanichu.

1980 huatamanta huichimanca testigo de Jehovacuna sangreta mana churachisha nijpica doctorcunapish, hospitalpi atindijcunapish mana respetajcunachu carca. Juezcunaca: ‘Chichu huarmicunaca yahuarta churachichunca mana jarcanachu can. Yahuarta churachichun mana saquishpaca mamacunami huañui tucun. Mama huañujpica huahuaca paillami saquiringa’ nijcunami carca.

29 de diciembre de 1988 huatapimi pani Denise Nicoleauca huahuata ungushca qꞌuipalla achca yahuarta pirdirca. Cai pani mana alli cajta ricushpami doctorca yahuartami churachina cangui nirca. Pero paica yahuarta churachichunca mana saquircachu. Cayandij punllaca hospitalpi trabajajcunaca cai panipi yahuarta churangapajmi juezman permisota mañarcacuna. Juezca cai pani, paipaj cusa yahuarta imamanta mana chasquishcata huillachunpish mana saquircachu. Cai juezca yahuarta churachun hospitalpi trabajajcunata autorizashcatapish cai paniman, paipaj cusamanca mana huillarcachu.

Viernes 30 de diciembretami hospitalpi trabajajcunaca cai panipaj cusa jarcajpi, familiacuna jarcajpipish cai panipi yahuarta churarcacuna. Shinallataj chai panipaj huaquin familiacunata, pushaj huauquicunataca yahuarta churangapajmi jarcarcacuna nishpami denunciarcacuna. Chaimi paicunataca chishi horasca policiacunaca prezupi  churarcacuna. Cayandij tutamantaca Nueva York llajtapica radiopi, televisionpi, periodicocunapica imalla tucushcacunatami noticiacunapi llujchircacuna.

Cayandij tutamantaca ashtahuan importante tribunalpi trabajaj shuj juezhuanmi parlarcani. Cai juezca Milton Mollen shutimi carca. Tucui imalla tucushcatami parlarcani. Shinallataj caishuj juez ñucanchijman mana huillashpa cai panipi yahuarta churachun autorizashcatami huillarcani. Juez Mollenca cai casomanta ima leycunalla tiyashcata parlangapaj chishillata shamungui nircami. Chai juezpajman ringapajca Philip Brumley superintendente huauquimi ñucata acompañarca. Juezca hospitalpi trabajajcunapaj abogadotapishmi richun invitarca. Hospitalpaj abogado mana allicunata nijpimi ñucaca dimastij colerarcani. Chaimi huauqui Brumleyca shuj hojitapi quillcashpa: “Ama yallitaj coleraichu, allimantalla parlai” nirca. Chai consejomi ñucataca achcata ayudarca.

Shuj horata tucuicunahuan parlashca qꞌuipaca juez Mollenca: “Cancunatarajmi caya tutamantaca atindisha” nircami. Juezpaj oficinamanta ña llujshicujpica juezca: “Hospitalta difindij abogadopajca chai huarmipi yahuarta churachun obligashcamanta chaita difindinaca sinchimi canga” nircami. Chaimi Jehová Dios cai casota ganachun ayudagrishcata sintircani. Jehová Dios paipaj munaita pajtachingapaj ñucanchijta utilizacushcata ricushpami cushilla sintirircani.

Cayandij punllapaj imata ningapajmi tuta horascama prepararircanchij. Tribunalca Betel cꞌuchullapimi saquirirca. Leycunahuan ricunata charij casoscunata atindina oficinapi trabajaj huauqui panicunaca chai cꞌuchullapi cashcamantami purishpalla chayarcacuna. Ñucanchijta uyashca qꞌuipami chuscu juezcunaca yahuartaca mana churanachu carca nishpa decidircacuna. Tribunalca pani Nicoleaupaj favormi llujshirca. Manaraj shuj autorizacionta rurashpaca pacientecuna imata nishcatarajmi alli uyana canguichij. Leypi nishca shinaca caita mana rurashpaca gentecunata mana respetashcatami ricuchinguichij nircami.

Asha tiempo qꞌuipaca Nueva Yorkpi tiyaj tucuimanta importante rijsishca tribunalca pani Nicoleauta yahuarta mana churashpami atindichun nirca. Chuscu cutinmi Estados Unidos llajtapi saquirij jatun tribunalcunapica yahuarmanta casoscunata ganachun ayudashcani. Pani Nicoleaupaj casota ganashcami punta cutin carca (“ Jatun tribunalcunapi ganashca juiciocuna” nishca recuadrota ricui). Shinallataj divorciarinamanta, yaya  mama divorciarijpi huahuacuna pihuan saquirinamanta, allpacunamanta, huasicunamanta casoscunatami Betelpica shujtaj abogadocunahuan atindishpa trabajaj carcanchij.

Dawn shuti panitami rijsircani. Paica divorciada, quimsa huahuacunahuanmi cashcarca. Paica familiata mantiningapaj sinchita trabajaj, shinallataj precursorami carca. Sinchi causaita charishpapish paica Jehová Diostami tucui shunguhuan sirvirca. Chaitami paimantaca munarcani. 1992 huatapica “Portadores de Luz” nishca jatun tandanacuimanmi rircanchij. Chai jatun tandanacuica Nueva Yorkpimi carca. Chaipimi paitaca: “Cantaca ashtahuanmi rijsisha nini” nircani. Huata huashaca paihuanmi cazararcani. Diosta alli sirvij huarmihuan causanaca Diosmanta shuj sumaj regalomi can. Proverbios 31:12-pi nishca shinaca ñuca huarmica ñucataca tucuipimi cushichishca.

Ñuca huarmihuan cazarai horasca paipaj huahuacunaca shujca 11, shujca 13, caishujca 16 huatacunatami charishcacuna carca. Ñucaca paicunapajca shuj alli yayami casha nircani. Chaimantami alli padrastro cangapaj huaquin publicacioncunapi imallata rurana cashcata estudiarcani. Chaipi yachashcacunataca ñuca causaipimi pajtachircani. Huaquinpica ima llaquicunatami charishcanchij. Pero cai huahuacuna ñucata shuj cꞌuyaj yayata shina, amigota shina ricujpimi cushilla sintirini. Ñucanchij huahuacunapaj amigocunataca huasipica siempremi alli chasquij carcanchij. Cai jovencuna cushilla cajta ricushpami contentos sintirircanchij.

2013 huatapica ñuca huarmihuanmi ñucanchij yaya mamata cuidangapaj Wisconsin llajtaman rircanchij. Chaiman rishpaca Betelpi ña mana sirvi tucushcatami yuyarcani. Pero voluntario cachunmi invitarcacuna. Chashnami leycunahuan ricunata charij shujtaj casoscunapi huauqui panicunata ayudashpa catircani.

Septiembre de 2018 huatapimi ujucushcata cuentata curcani. Ñuca rijsishca doctorca ñuca ima ungüihuan cajtaca mana yachai tucurcachu. Shujtaj doctorpajman rijpimi chai doctorca: “Umata ricuj doctorpajman ri” nirca. Enero de 2019 huatapimi umata ricuj doctorca: ‘Mana rijsishca ungüimi cantaca japishca. Tiempohuanca chai ungüica cambaj tucui cuerpotami dañanga’ nirca.

Quimsa punlla qꞌuipaca ñuca munashca deportetami ruracurcani. Chai deportetaca tucui vidami pugllaj carcani. Pero chai punllaca urmashpami alli lado maquipaj shuj tulluta pꞌaquircani. Chashnami ñuca cuerpota mana controlai tucushcata cuentata curcani. Chai ungüi rato anchayashpa catishcata ricushpaca sustarishcami saquirircani. Cunanca ñucapajca parlana, cuyurina, micunaca sinchimi can.

Diospaj obra ñaupajman catichun abogado cashpa trabajashcamantami cushilla sintirini. Huaquin revistacunataca doctorcunapaj, abogadocunapaj, juezcunapajmi quillcarcani. Shinallataj paicunata capacitangapajca chꞌican chꞌican llajtacunapimi huaquin conferenciacunata cushcani. Chaimantami cushilla sintirini. Shinami testigo de Jehovacunapi yahuarta ama churachun, cada uno decidishcata respetachun difindircani. Tucui caicunata rurashpapish Lucas 17:10-pi nishca shinami ñucapish cashna nini. Ñucaca alli sirvijca mana canichu, imata rurana cashcallatami rurarcani.