1. 3 Juan 3, 4-pi nishca shinaca ¿imamantataj cushilla sintiri tucunchij?

APÓSTOL Juanca tauca gentecunatami Diosmanta mana llullata rijsichun ayudarca. Paicuna Jehová Diosta sirvishpa caticujta yachaj chayashpaca cushillami sintirishcanga. Apóstol Juanca paicunataca paipaj churicunata, ushushicunata shinami ricuj carca. Paicuna achca problemacunata charijpimi apóstol Juanca paicunapaj feta sinchiyachirca. Shinallataj ñucanchij huahuacuna, ñucanchijhuan Bibliamanta yachacujcuna Jehová Diosman mingarijpi, paita sirvishpa catijpica cushillami sintirinchij (3 Juan 3, 4-ta liyipai).

2. ¿Apóstol Juanca quimsa cartacunataca imapajtaj quillcarca?

² Huata 98-pi apóstol Juanca Patmos islapi prezu canamanta llujshishca huashaca Éfeso llajtapi o chai llajta cꞌuchullapi causanamanmi rishcanga. Chaimi Jehová Diosca paipaj espíritu santohuan quimsa cartacunata quillcachirca. Juanca Jesusta catijcunapaj feta sinchiyachingapaj, mana llullapi purishpa catichun animangapajmi cai quimsa cartacunataca quillcarca.

3. ¿Cai yachaipica ima tapuicunatataj cutichishun?

³ Chai tiempopica tucui apostolcunamantaca apóstol Juanllami causacurca. Paica congregacioncunapi umajcuna tiyai callarijta ricushpami preocuparirca (1 Juan 2:18, 19, 26). * Cai umajcuna o apostatacunaca Diostami rijsinchij nishpapish pai mandashcacunataca mana respetajcunachu carca. Cai yachaipimi  apóstol Juan cushca consejocunata ricushun. Shinallataj cai quimsa tapuicunatami cutichishun: ¿Mana llullapi purinaca imatataj nisha nin? ¿Mana llullapi purichunca imacunataj jarcai tucun? ¿Shujtajcunapish mana llullapi purishpa catichunca ima shinataj ayudai tucunchij?

4. 1 Juan 2:3 al 6 y 2 Juan 4, 6-pi nishca shinaca ¿mana llullapi puringapajca imatataj rurana canchij?

⁴ Mana llullapi puringapajca Bibliamantami alli yachana canchij. Ashtahuancarin Dios cushca mandashcacunatami pajtachina canchij (1 Juan 2:3-6; 2 Juan 4, 6-ta liyipai). Jesusca tucuipimi Jehová Diosta cazurca. Chaimantami Dios cushca mandashcacunata cazungapajca Jesuspaj ejemplota catina canchij (Juan 8:29; 1 Pedro 2:21, QC, 1989).

5. ¿Imatataj tucui shunguhuan crina canchij?

⁵ Mana llullapi purishpa catingapajca Jehová Dios mana llullaj cashcata, paipaj Shimipi verdadta yachachishcatami tucui shunguhuan crina canchij. Shinallataj Jesuspish Dios cachashca Mesías cashcatami crina canchij. Cunan punllacunapica achcacunaca Jesús Diospaj Reinopi mandachun Dios agllashcataca mana crincunachu. Chaimi Juanca “umajcunami” Diospi, Jesuspi mana tanto crijcunataca jahualla pandachinga nirca (2 Juan 7-11). Shinallataj paica: “¿Pitaj llulla? Maijanpish Jesusta mana Cristochu nijmi llullaj” nishpami escribirca (1 Juan 2:22). Panda yachachijcuna ñucanchijtapish ama pandachichunca Bibliatami alli estudiana canchij. Shinami Jehová Diosta Jesustapish alli rijsishun (Juan 17:3). Chashnami mana llullapi puricushcataca tucui shunguhuan crishun.

6. ¿Diosta sirvij jovencunaca escuelapica ima jarcaicunatataj charincuna?

⁶ Gentecuna yachachishca yuyaicunamantami cuidarina canchij (1 Juan 2:26). Ashtahuantajca jovencunami cai trampamantaca cuidarina can. Francia llajtamanta Alexia * shuti panica 25 huatacunatami charin. Paica: “Escuelapi cashpaca evolucionmanta, shujtaj yuyaicunamantami yacharcani. Chaimantami Bibliapi tiyaj yachachishcacunamanta dudai callarircani. Huaquinpica escuelapi yachachishcacunaca valishca shinami ricurirca. Pero profesorcuna yachachishcacunata mana  tucuita crina cashcatami cuentata curcani. Cutin ñucallataj Bibliata alli estudiana cashcatami intindircani” ninmi. Alexiaca La vida... ¿cómo se presentó aquí? ¿Por evolución, o por creación? nishca librotami estudiarca. Huaquin semanacuna qꞌuipaca dudacunataca ña mana charircachu. Paica: “Ñucallatajmi Bibliapi yachachishcacuna verdad cashcata tucui shunguhuan crircani. Shinallataj Dios mandashcacunata cazushpa cushilla causanatami intindircani” ninmi.

7. ¿Imatataj mana rurana canchij?

⁷ Diosta sirvijcunaca jovencunapish mayorcunapish mana alli ruraicunata pacallaca mana ruranachu canchij. Apóstol Juanca: ‘Diostami sirvinchij nishpapish mana allicunata rurashpaca llullanchijmi’ nircami (1 Juan 1:6). Pacalla mana allita ruracujtaca gentecunaca mana ricui tucunchu. Pero Jehová Diosca tucuitami ricucun. Paipaj ñaupajpi alli ricuringapajmi chaitaca mana cungarina canchij (Hebreos 4:13).

8. ¿Imatataj mana yuyana canchij?

⁸ Cai mundopaj gentecunaca ima juchata mana charinchijchu nincunami. Pero ñucanchijca mana paicuna shina yuyanachu canchij. Apóstol Juanca: “Mana juchata charinchijchu nishpaca, ñucanchijllatajmi umarinchij” nircami (1 Juan 1:8). Apóstol Juan causashca punllacunapica apostatacunaca Dios mana rurachun nishcacunata rurashpapish paipaj amigocunami cai tucunchij nijcunami carca. Cunan punllacunapish gentecunaca chashnallatajmi yuyancuna. Jehová Diosca huainayana, shujtaj mana alli ruraicunapish juchami can ninmi. Pero huaquincunaca Diospimi crinchij nishpapish chaicunata ruranaca mana juchachu can nincunami.

9. ¿Bibliapi nishcacunata cazuj jovencunaca ima shinataj causancuna?

⁹ Escuelapi o trabajopica huaquin jovencunaca chayarinamantaca mana alli yuyaicunatami charincuna. Chaimi Diosta sirvij jovencunapajca Bibliapi nishca shina yuyanaca  sinchi ricurin. Diosta sirvij Aleksandarhuan ima tucushcata ricushun. Paica: “Colegiopi huaquin compañeracunaca ñucataca paicunahuan chayarichunmi obligasha nircacuna. Paicunaca: ‘Homosexual cashcamantami noviataca mana charingui’ nijcunami carca” ninmi. Joven, canpish chashna pruebacunatachari chꞌimbapuracungui. Pero caita yuyari, Bibliapi nishcacunata cazushpaca yuyaipipish shungupipish saludpipish allimi sintiringui. Ashtahuancarin Jehová Dioshuanmi alli apanacungui. Tentacioncunata vincishpaca shujtaj tentacioncunapica mana urmanguichu. Satanasca cai mundopaj gentecuna chayarinamanta mana allicunata yuyachunmi pandachishca. Ñucanchijca paicuna shina mana yuyashpaca Diablo pandachichunca mana saquishunchu (1 Juan 2:14).

10. 1 Juan 1:9-pi nishca shinaca ¿imamantataj concienciapi tranquilo sintiri tucunchij?

¹⁰ Jehová Diosllami ima ruraicuna jucha cashcataca huillan. Chaimantami juchapi ama urmangapajca esforzarinchij. Pero juchapi urmashpaca chai ratomi Jehová Diosman tucuita huillana canchij (1 Juan 1:9-ta liyipai). Cutin jatun juchapi urmashpaca ancianocunatami ayudachun mañana canchij. Jehová Diosmi paicunataca ñucanchijta cuidachun agllashca (Santiago 5:14-16). Pero ima juchacunata rurashca cashpaca mana llaquirishpallachu pasana canchij. ¿Imamanta? Cꞌuyaj Yaya Diosca ñucanchij juchacunata perdonangapajmi paipaj Churita cushca. Chaimantami shungumanta arrepintirijpica paica perdonan. Chaimi concienciapi alli sintirishpa Jehová Diosta sirvishun (1 Juan 2:1, 2, 12; 3:19, 20).

11. ¿Apostatacuna ñucanchijta ama pandachichunca imatataj rurana canchij?

¹¹ Apostatacuna nishcacunataca mana uyanachu canchij. Apostolcuna causashca punllacunamantami Diabloca Diosta sirvijcunapaj fetaca chiriyachisha nishca. Chaimantami ima llulla cashcata, ima mana llulla  cashcataca alli yachana canchij. * Diospaj contracunaca Jehová Diospi confiachun, huauqui panicunatapish cꞌuyachunca mana munancunachu. Chaipajca paicunaca Internetpi o redes socialescunapimi llullacunata nincuna. Chai llullacunaca Diablomantami shamun. Chaimantami mana crina canchij (1 Juan 4:1, 6; Apocalipsis 12:9).

12. ¿Imamantataj ñucanchij fetaca sinchiyachina canchij?

¹² Diablo ñucanchij feta ama chiriyachichunca Jesuspimi tucui shunguhuan crina canchij. Shinallataj Jehová Dios paipaj munaita Jesushuan pajtachicushcatami crina canchij. Diosca paipaj organizacionta ñaupajman pushangapajca Cuerpo Gobernante huauquicunatami churashca. Chaimantami paicunapi confiana canchij (Mateo 24:45-47, QC, 1989). Punllanta Bibliata estudiashpaca Jesuspi, Cuerpo Gobernante huauquicunapimi ashtahuan confiashun. Chashnami ñucanchij feca sapiyashca yura shina canga. Pabloca Colosas llajtapi huauqui panicunaman quillcacushpaca: ‘Ima shinami Mandaj Jesucristota chasquircanguichij, chai shinallataj paihuan shuj shinalla purichij. Cristopi sapiyachishca, paipaj jahuapi huasichicujcunami canguichij. Crinapi sinchi caichij’ nircami (Colosenses 2:6, 7). Ñucanchij feta sinchiyachijpica Diablopish paita apoyajcunapish ñucanchijtaca mana pandachingachu (2 Juan 8, 9).

13. ¿Diosta sirvijcunaca imatataj yachanchij?

¹³ Cai pachapaj cajcuna ñucanchijta pꞌiñanataca allimi yachanchij (1 Juan 3:13). Apóstol Juanca cai pachataca Diablomi mandacun nircami (1 Juan 5:19). Pero mana allicunaca ñallami tucuringa. Chaita yachashpami Diabloca dimastij pꞌiñaricun (Apocalipsis 12:12). Diabloca ñucanchijta pandachisha nishpaca huainayanata, apostatacunapaj llullacunallataca mana utilizanchu. Ashtahuanpish contracuna ñucanchijta catirashpa llaquichichunmi yuyaita cun. Ashalla tiempota charishcata yachashpami Diabloca huillanata jarcasha nin. Shinallataj ñucanchij crishcacunatami chiriyachisha nin. Huaquin llajtacunapica testigo de Jehovacuna huillachun, tandanacuchunca mana saquincunachu. Chaita rurajpipish huauqui panicunaca chai llaquicunata ahuantashpami catincuna. Ñucanchijpish Diablo llaquichisha nijpipish Jehová Diostami sirvishpa catishun.

14. ¿Huauqui panicuna mana llullapi purishpa catichunca imatataj rurana canchij?

¹⁴ Huauqui panicunata llaquishpa mana llullapi purichun ayudashunchij (1 Juan 3:10, 11, 16-18). Llaqui horaspish cushi horaspish caishujmanta chaishujmantami cꞌuyanacuna canchij. Por ejemplo, shuj huauquichari o panichari paipaj familiataca huañuipi chingachirca. Mana cashpaca, terremoto tiyashcamanta o acapana tiyashcamanta paicunapaj huasicunata o tandanacuna huasicunata pirdishcacuna. Chai llaquicuna ricurijpica huauqui panicunata ayudashunchij. Ñucanchij huauqui panicunata cꞌuyashcataca mana shimicunallahuanchu ricuchishun. Ashtahuanpish ruraicunahuanmi ricuchishun.

15. 1 Juan 4:7, 8-pi nishca shinaca ¿imatataj rurana canchij?

¹⁵ Jehová Dios ñucanchijta cꞌuyashca shinallatajmi huauqui panicunata cꞌuyana canchij (1 Juan 4:7, 8-ta liyipai). Chaimantami shuj huauqui o pani ñucanchijta llaquichijpica paita cꞌuyashpaca perdonashun. Shinallataj imata rurashcatapish cungarishun (Colosenses  3:13). Aldo shuti huauquimanta parlashun. Shuj punllaca Aldo respetashca huauquica paipaj raza gentecunamantami mana allicunata nirca. Chaimi Aldoca pꞌiñarirca. Aldoca: “Cai huauquimanta mana allita ama yuyangapajmi Jehová Diosta cutin cutin mañarcani” ninmi. Pero mana chaillatachu rurarca. Ashtahuanpish paihuan huillanaman llujshichunmi invitarca. Paihuan predicacushpami pai ima shina sintirishcata huillarca. Aldoca: “Chai huauquica ñuca ima shina sintirishcata intindishpami ñucata perdonahuai nirca. Pai caita nijta uyashpami shungumanta arrepintirishca cashcata intindircani. Chai qꞌuipaca paihuanmi cutin alli amigos tucurcanchij” ninmi.

16, 17. ¿Imacunallatataj rurasha ninchij?

¹⁶ Apóstol Juanca huauqui panicunata achcata cꞌuyashcamantami paicunapaj fe sinchi cachun ayudarca. Huauqui panicunata cꞌuyashcataca pai quillcashca quimsa cartacunapimi yachai tucunchij. Jesushuan mandangapaj jahua pachaman rigrij huauqui panicunaca Juan shinallatajmi ñucanchijta cꞌuyan. Ñucanchijmanta sustarin. Chaita yachashpami cushilla sintirinchij (1 Juan 2:27).

¹⁷ Caipi yachashca consejocunata tucui shunguhuan cazushunchij. Jehová Diosta cazushpa mana llullapi purishpa catishunchij. Bibliata estudiashunchij, chaipi yachachishcacunatapish crishunchij. Shinallataj Jesuspi ashtahuan crishpa catishunchij. Gentecuna yachachishca yuyaicunata, apostatacuna nishcacunatapish ama uyashunchij, ama crishunchij. Jehová Diosta sirvicushpaca mana allicunataca ama rurashunchij. Imata ruracushpapish Jehová Diospaj mandashcacunata cazushunchij. Ñucanchij huauqui panicuna crinapi sinchi cachunca ñucanchijta llaquichijpipish paicunata perdonashunchij. Ayudata minishtijcunatapish ayudashunchij. Chashnami ima llaquicunata, jarcaicunata chꞌimbapurana cashpapish mana llullapi purishpa causashun.