Jehová Diosca shuj huarmihuan shuj cꞌarihuan cazarashpa tandalla, cushilla causachunmi munan (Mateo 19:4-6). ¿Can cazaranata munashpaca ima shinataj shuj alli cusata o alli huarmita tari tucungui? Jehová Diosca ñucanchijta ruraj cashcamantami matrimonio ucupi cushilla causangapaj imata ruranata yachachin. Chaimantami Biblia yachachishcacunata pajtachina canchij. Cunanca huaquin consejocunata ricushunchij.

Puntaca ñucanchij ‘shungu umajlla’ cashcatami yuyarina canchij (Jeremías 17:9). Shuj cꞌari, shuj huarmi cazarangapaj rijsinacucushpaca shungu pandachijpimi maipica rato enamorarincuna. Pero chashna rato enamorarishcamantami mana alli decisioncunata agllangacuna. Cazarashca huashacarin achca llaquicunatami charingacuna (Proverbios 28:26). Chaimantami cazarangapaj pihuan rijsinacucushpaca mana rato enamorarina can. Ima promesacunatapish mana ruranachu can.

Proverbios 22:3-pica: “Alli yuyaiyuj runaca, ima llaqui japina cajpica anchurinmi. Ashtahuanpish yachai illaj runaca, quiquin chaquihuan llaquipi yaicunllami” ninmi. ¿Internetpi pihuan cazaranata mashcashpaca ima llaquicunatataj charishun? Maijancunaca mana rijsishcacunahuanmi Internetpica llujshi callarishcacuna. Chaimantami cai gentecunaca huauqui panicunataca engañashca. Huaquincunacarin hasta cullquitami shuhuashcacuna. Chai engañaj, shuhuaj gentecunaca maipica “testigo de Jehovami cani” nishpami llullashcacuna.

Internetpica huaquincunaca pihuan cazaranata tarisha nishpami maipica chꞌican chꞌican programacunata utilizancuna. Pero ¿ciertochu chai runacuna rurashca programacunapica alli huarmita, alli cusata tari tucushun? Mana. Chaipaj randica alli cusata, alli huarmita taringapajca Biblia yachachishcacunatami cazuna canchij (Proverbios 1:7; 3:5-7).

Proverbios 14:15-pica: “Yachai illaj runaca imata nijpipish, crishpa catinllami. Ashtahuanpish yachajcunaca imata rurangapajpish, alli yuyarinrajmi” ninmi. Maijanpish alli cusa, alli huarmi canata yachangapajca puntaca allimi rijsinaraj canchij. Pero Internetpi maijanpaj fotocunata, datocunata ricushpapish, paihuan achcata parlashpapish paitaca mana alli rijsishunchu. Maijancunaca Internetpica alli cusata, alli huarmita  tarishcatami yuyarcacuna. Pero ñahui ñahui tupashpaca paicuna mana alli cashcatami cuentata cushcacuna.

Shuj salmota quillcajca: “Mishqui shimi jayaj shungucunahuanca, mana tiyarircanichu. Ñahui ricuillapi alli tucushca purijcunapajmanca mana yaicushcanichu” nircami (Salmo 26:4). Achca gentecunaca ñahui ricuipi alli ricuringaraicullami Internetpica paicunamantaca panda yuyaicunata quillcashpa churancuna. Paicuna pi cashcata, ima shina cashcataca mana churancunachu. Huaquincunaca testigo de Jehovami canchij nincunami. Pero ¿de verdadchu paicunaca bautizarishca can? ¿Diosta alli sirvijcunachu can? ¿Jehová Dioshuanpish allichu apanacuncuna? ¿Congregacionpipish shujtajcuna respetashcachu can? O ¿mana alli ejemplocunachu can? (1 Corintios 15:33; 2 Timoteo 2:20, 21). ¿Cazarangapajpish Biblia mandashca shinachu libre can? Cai tapuicunata yachangapajca, cai persona ima shina cashcata yachangapajca paita alli rijsij huauqui panicunatami tapuna canchij (Proverbios 15:22). Ashtahuancarin Diosta alli sirvijcunaca Diosta mana sirvijcunahuanca cazaranataca mana yuyanachu can (2 Corintios 6:14; 1 Corintios 7:39).

Ña ricushca shinaca Internetpi shuj noviota, noviata mashcashpaca llaquipimi urmashun. Shinaca ¿shuj alli cusata o alli huarmita japingapajca maipitaj mashcai tucunchij? Huauqui panicunahuan tandanacungapaj ima jarcaicunata mana charishpaca tandanacuicunapi, jatun tandanacuicunapimi rijsi tucunchij.

Shinapish COVID-19 ungüi shina shujtaj pandemiacuna tiyajpi o ima jarcaicuna tiyajpica huauqui panicunahuan tandanacuna huasicunapica mana tandanacui tucunchijchu. Pero Internetpi conectarishpami tandanacuicunataca huauqui panicunahuan charinchij. Chai tandanacuicunapimi solteros huauqui panicunata rijsi tucungui. Chaipica shuj soltero huauqui o shuj soltera pani ima shina comentajta o ima shina yachachijta, paipaj fe ima shina cashcatami ricui tucungui (1 Timoteo 6:11, 12). Tandanacui qꞌuipapish uchilla salacunapimi huauqui panicunahuan parlanacui tucungui. Cutin maipica huauqui panicunaca shujtaj huauqui panicunahuan alli pasangapajmi Internetpi conectarincuna. Chaipica cai huauqui o pani ima shina shujtajcunata tratajta, pai ima shina cajtami ricui tucungui (1 Pedro 3:4). Cashna ishquindij rijsinacucushpaca ima metacunata charishcata, alli cusa alli huarmi canata o mana canatami yachai tucungui.

Solteros huauqui panicunaca Biblia yachachishcacunata pajtachishpa pihuan cazaranata agllashpaca cushillami causangacuna. Proverbios 18:22-pica: ‘Maijanpish cazarashpa alli huarmiyuj o alli cusayuj tucujca, ima charinacunayuj tucushcatapish yallimi. Taita Dios cꞌuyashpa cushcatamari chasquin’ ninmi.