1. ¿Diosca ima shinataj ñucanchijtaca paipaj puebloman pushamushca?

¿IMA SHINATAJ Jehová Diosta sirvi callarircanchij? Tal vez ñucanchij yaya mama, escuelapi, trabajopi compañerocuna o shuj Testigo huasin huasin predicajpimi ñucanchijca Jehová Diosta rijsi callarircanchij (Marcos 13:10). Qꞌuipaca pi ñucanchijman achca tiempota Bibliamanta yachachijpimi Yayitu Diosta cꞌuyai callarircanchij. Jehová Diospish ñucanchijta cꞌuyaj cashcatami intindircanchij. Chashnami Yayitu Diosca ñucanchijtaca paipaj puebloman pushamushca. Cunancarin Jesusta catijcuna cashcamantami huiñai huiñaita causana esperanzata charinchij (Juan 6:44). Jehová Dios ñucanchijta pi yachachichun saquishcamanta, paita sirvichun saquishcamantami achcata agradicinchij.

2. ¿Cai yachaipica imatataj ricushun?

² Cunanca Diospaj pueblopi cashcamantami ñucanchijpish gentecuna huiñai causaiman apaj ñanpi purichun ayudasha ninchij. Huaquincunapajca huasin huasin predicanaca jahuallami can. Pero Bibliamanta yachacujcunata charinaca sinchimi can. Maipica ñucanchijpajpish chashnallatajmi sinchi cashca. Chaimantami cai yachaipica gentecunata Jesuspaj discipulocuna tucuchun imamanta ayudana cashcata, gentecunaman yachachina maipica sinchi laya ricurijpipish imata ruranata ricushun. Pero caita manaraj yachashpaca puntaca gentecunaman huillashpalla mana saquirina cashcata, ashtahuanpish paicunaman Bibliamanta yachachina cashcatami ricushun.

3. ¿Imamantataj predicana canchij?

³ Jesús cai Allpapi cashpaca paipaj discipulocunamanca predicachun, yachachichunmi mandarca. Chaimantami paica puntaca Diospaj Gobiernomanta ima shina predicanata yachachirca (Mateo 10:7; Lucas 8:1). Gentecuna uyajpipish, mana uyajpipish ima shina predicanatapishmi yachachirca (Lucas 9:2-5). Shinallataj muyundij Allpapi predicana cashcatapishmi yachachirca (Mateo 24:14; Hechos 1:8). Chaimantami Jesuspaj discipulocunaca gentecuna uyajpipish, mana uyajpipish Diospaj Gobierno imata ruranata predicana carcacuna.

4. Mateo 28:18 al 20-pi nishca shinaca ¿Jesusca imatataj ashtahuan rurachun mandarca?

⁴ Jesusca paita catijcunataca: ‘Tucui ñuca mandashcacunata gentecuna cazuchun yachachinguichijpish’ nircami. ¿Caitaca apostolcunallachu pajtachina carcacuna? Mana. Jesús nishca shinaca cai shina causai tucuringacamami gentecunaman predicashpa, yachachishpa catina canchij (Mateo 28:18-20-ta liyipai). Jesusca 500 yalli discipulocunaman ricurishpami cai mandatotaca cushcanga (1 Corintios 15:6). Apóstol Juanpish shuj muscuipica Jesuspaj tucui discipulocuna gentecunaman Diosmanta yachachina cashcatami ricurca (Apocalipsis 22:17).

5. Apóstol Pabloca 1 Corintios 3:6 al 9-pi nishca shinaca ¿predicanata, yachachinataca imahuantaj chꞌimbapurarca?

⁵ Apóstol Pabloca Jesuspaj discipulocunata ruranataca shuj plantitata huiñachinahuanmi chꞌimbapurarca. Paica: ‘Ñucaca tarpurcanimi, Apolosca yacutami churarca. Cancunaca Diospaj chagrami canguichij’ nircami (1 Corintios 3:6-9-ta liyipai). Apóstol Pablo nishca shinaca gentecunaman predicashpaca muyuta tarpuj shinami canchij. Pero mana chaillatachu ruranchij. Ashtahuanpish plantitapi yacuta churaj shina, cuidaj shinami gentecunaman yachachishpa catinchij (Juan 4:35). Pero caicunata rurajpipish Diosmi shuj plantitata huiñachij shina gentecunataca Jesuspaj discipulocuna tucuchun ayudan.

6. ¿Bibliamanta yachacujcunataca ima shinataj ayudana canchij?

⁶ Alli shungu gentecunaman yachachingapaj mashcashunchij (Hechos 13:48). Paicuna Jesuspaj discipulocuna tucuchunca Biblia yachachishcacunata intindichun, chasquichun, paicunapaj causaipi pajtachichunmi ayudana canchij (Juan 17:3; Colosenses 2:6, 7; 1 Tesalonicenses 2:13). Pero congregacionpi caj tucuicunami yachacujcunaman cꞌuyaita ricuchishpa, tandanacuicunaman rijpi paicunata alli chasquishpa ayudana canchij (Juan 13:35). Yachachijca yachacuj ima panda crishcata saquichun o mana alli ruraita saquichunmi achca tiempota yachachishpa pasana canga (2 Corintios 10:4, 5). Chashna ayudana mana jahualla cajpipish tiempohuanca yachacujcunaca bautizaringacunami.

7. ¿Imamantataj gentecunaman predicanchij, yachachinchij?

⁷ ¿Imamantataj gentecunaman predicanchij, yachachinchij? Jehová Diosta cꞌuyashcamantami chaita ruranchij. Gentecunaman predicashpa, Jesuspaj discipulocuna tucuchun ayudashpaca Jehová Diosta cꞌuyashcatami ricuchishun (1 Juan 5:3). Caipi yuyashun, callaripica huasin huasin predicanaca ñucanchijpajca sinchimi carca. Tal vez punta cutin huillanaman llujshishpaca achca manchaitachari charircanchij. Pero Jehová Diosta cꞌuyashcamanta, Jesús chai obrata pajtachichun nishcamantami predicai tucurcanchij.  Chaimantami cunanca huasin huasin predicanata ña mana manchanchij. Cutin pimanpish Bibliamanta yachachingapajchari manchaita charinchij. Chashna sintirishpaca Jehová Diostaca mana manchashpa shujtajcunaman yachachingapaj fuerzasta cuchunmi mañana canchij.

8. Marcos 6:34-pi nishca shinaca ¿imamantataj gentecunamanca yachachinchij?

⁸ Gentecunata cꞌuyashcamantami paicunaman yachachinchij. Shuj cutinca Jesuspish, paipaj discipulocunapish punlla enterota gentecunaman predicashcamantami shaicushca carcacuna. Chaimantami samarinaman rircacuna. Pero achca gentecunaca paicunatami catishpa rircacuna. Chaimi Jesusca chai tucui gentecunamanca achca yachaicunata yachachirca (Marcos 6:34-ta liyipai). ¿Imamantataj Jesusca chai gentecunaman yachachingapaj esforzarirca? Jesusca cai gentecuna achca llaquicunata charishcata, ima esperanzata mana charishcataca allimi yacharca. Chaimantami paicunata ayudarca. Cunan punllacunapish gentecunaca ñahui ricuillapica cushilla shinami can. Pero ima esperanzata mana charincunachu. Paicunaca chꞌingarishca ovejacuna shina, michij illajcuna shinami causancuna. Shinallataj Diosta mana sirvishcamantami paicunaca chingarinaman apaj ñanpi shina causacuncuna (Efesios 2:12; Mateo 7:13). Ñucanchij causan lugarpi gentecuna ima shina sintirijta ricushpami paicunata ayudana munaita charishun. Paicunata ayudangapajca Bibliamantami yachachina canchij.

9. Filipenses 2:13-pi nishca shinaca ¿Jehová Diosca ñucanchijtaca ima shinataj ayudanga?

⁹ “Pimanpish yachachingapajca achca tiempomi minishtirin” nishpami maipica gentecunaman yachachinataca mana decidinchij. Chashna sintirishpaca Jehová Diosman tucuita huillashunchij. Gentecunaman yachachina munaita cuchunpish mañashunchij (Filipenses 2:13-ta liyipai). Apóstol Juanca: ‘Jehová Diosta mañajpica Diosca paipaj munaihuan ima cajpica cutichingami’ nircami (1 Juan 5:14, 15). Chaimantami Jehová Dios gentecunaman yachachingapaj ayudanataca seguros canchij.

10, 11. ¿Maipica imamantataj Bibliamanta yachacujcunataca mana chari tucushcanchij?

¹⁰ Jesuspaj discipulocunata rurana importante cashcataca allimi yachachij. Pero maipica chꞌican chꞌican jarcaicunahuanmi chꞌimbapuranchij. Cunanca cai jarcaicunahuan ima shina chꞌimbapuranata ricushun.

¹¹ Maipica ungushca cashcamanta, mayorlla cashcamanta o ima shujtaj jarcaita charishcamantami Bibliamanta yachacujcunata charinaca sinchi cashca. Chashna jarcaicunata charishpaca COVID-19 ungüi tiyajpi gentecunaman ima shina yachachishcatami yuyarina canchij. Ñucanchij huasillamantatajmi gentecunataca telefonomanta, Internetmanta cayashpa yachachi tucunchij. Cutin maijan gentecunaca paicuna munashca horaspimi yachasha nincuna. Pero huaquin huauqui panicunaca mana chai horaspi yachachi tucuncunachu. Chaimi ñucanchijca tal vez tutamanta lado o chishi lado yachachi tucunchij. Jesuspish Nicodemo tuta horas yachasha nijpimi tuta horas yachachirca (Juan 3:1, 2).

12. ¿Bibliamantaca mana yachachi tucunichu nishpa yuyashpaca ima quimsa yuyaicunapitaj yuyana canchij?

¹² Maipica ñucaca Bibliamantaca mana tanto yachanichu, alli yachachijpish mana canichu nishpami Bibliamanta yachacujcunataca mana charisha ninchij. Chashna sintirishpaca cai quimsa yuyaicunapi yuyashun. Puntaca, Jehová Diosca ñucanchijcuna gentecunaman  yachachi tucushcataca allimi yachan (2 Corintios 3:5). Ishquipica, jahua pachatapish, cai pachatapish mandana derechota charij Jesusmi gentecunaman yachachichunca mandashca (Mateo 28:18). Quimsapica, gentecunaman yachachicushpaca mana ñucanchijllachu canchij. Ñucanchijpish Jesús shinallatajmi Jehová Dios ayudanapi confiana canchij (Juan 8:28; 12:49). Ashtahuancarin superintendente del grupo huauquita o alli yachachij precursorta o achca experienciata charij publicadortami Bibliamanta yachachinata callaringapajca ayudachun mañana canchij. Shinallataj paicunahuan Bibliamanta yachachinaman llujshishpaca paicunamantami achcata yachashun.

13. ¿Imamantataj cai mushuj librohuan yachachingapaj esforzarina canchij?

¹³ Bibliamanta yachachingapajca huaquin cambiocunami tiyashca. Chaicunahuan acostumbranaca tal vez sinchimi canga. Cunanca Huiñai huiñaita cushilla causai nishcahuanmi yachachina tucun. Chai librohuan yachachingapajca allimi prepararina canchij. Cai librohuanca ña mana ñaupa laya yachachinchijchu. Cunanca ashalla parrafocunata liyishpami yachacujcunahuanca ashtahuan parlana canchij. Shinallataj JW Librarypi^® ricurij videocunahuanmi yachachinchij. Cashna yachachinaca sinchichari canga. Maipica ñaupa laya yachachinatachari munashun. Pero sinchi cajpipish huauqui panicuna ayudachun mañashunchij. Jehová Dios, huauqui panicuna ayudajpica cushillami cai librohuanca yachachishun. Shuj precursorca: “Cai mushuj libroca yachacujpish jahualla intindichun, yachachijpish jahualla yachachichunmi ayudan” nircami.

14. a) ¿Gentecuna mana uyasha nijpipish imatataj yuyarina canchij? b) ¿1 Corintios 3:6 y 7 versocunaca cushilla huillashpa catichunca ima shinataj animan?

¹⁴ Gentecuna mana uyasha nijpi o huaquincuna Diospaj contracuna cajpimi Bibliamanta yachacujcunata charinaca sinchi ricurin. Pero gentecunapaj causaipi ima cambiocuna tiyai tucushcatami yuyarina canchij. Chaimantachari qꞌuipaca gentecunaca Bibliamanta yachana munaita charingacuna (Mateo 5:3). Huaquincunaca ñucanchij publicacioncunataca mana chasquijcunachu carca. Pero qꞌuipaca Bibliamantami yachai callarishcacuna. Shinallataj Jehová Dios chagrayuj shina cai obrata alli pushacushcatami yuyarina canchij (Mateo 9:38). Paica plantacunata tarpuj shina, yacucunata churaj shina gentecunaman predicashpa, yachachishpa catichunmi munan. Shinapish Jehová Diosmi shuj plantitata huiñachij shina gentecunataca paita sirvichun ayudan (1 Corintios 3:6, 7). Ashtahuancarin Bibliamanta yachacujcunata mana charijpipish Jehová Diosca ñucanchij esfuerzocunataca achcatami valoran. *

15. ¿Yachacujcuna Biblia yachachishcacunata pajtachijpica Jehová Diosca ima shinataj sintirin?

¹⁵ Jehová Diosca gentecuna Bibliamanta yachanata chasquijpi, paicunapish shujtaj gentecunaman yachachijpica cushillami sintirin (Proverbios 23:15, 16). Por ejemplo, 2020 huatapica huauqui panicunaca pandemia tiyajpipish 7.705.765 estudiocunatami charishcacuna. Shinallataj 241.994 gentecunatami Jehová Diosman mingarishpa bautizarichun ayudashcacuna. Cai mushuj huauqui panicunaca paicunapish ashtahuan Jesusta catijcunata rurashpami ayudangacuna (Lucas 6:40). Gentecunata Yayitu Diosta sirvichun  ayudashpaca Jehová Diospaj shungutami cushichishun.

16. ¿Imata rurangapajtaj esforzarina canchij?

¹⁶ Pimanpish Jehová Diosta cꞌuyachun yachachingapajca achca esfuerzomi minishtirin. Pero Jehová Diospaj ayudahuanmi chaita pajtachi tucushun. Chaimanta siquiera shuj yachacujta charingapaj esforzarishunchij. Predicacushpaca gentecunataca: “¿Bibliamanta yachasha ninguichu?” nishpa tapushunchij. Chashna tapujpica gentecunaca tal vez Bibliamanta yachasha nishcatami cutichingacuna. Jehová Diosca ñucanchij esfuerzocunataca bendiciangatajmi.

17. ¿Bibliamanta yachacujcunata charishpaca ima shinataj sintirishun?

¹⁷ Gentecunaman predicana, yachachinaca Dios cushca sumaj regalomi can. Caicunata pajtachishpaca cushillami sintirinchij. Apóstol Pabloca Tesalónica llajtapimi achca gentecunataca Jesuspaj discipulocuna tucuchun ayudarca. Paica chai mushuj discipulocunataca: “Amito Jesús tigramuna punllacunapica paipaj ñaupajpica ¿pitaj ñucanchij shuyana, ñucanchij cushicuna, cushichij premiopish canga? ¿Manachu cancuna canguichij?” nircami (1 Tesalonicenses 2:19, 20, NWT; Hechos 17:1-4). Cunan punllacunapish achca huauqui panicunami gentecunataca Diosta sirvichun ayudashcacuna. Pani Stephanieca paipaj cusandijmi achcacunata bautizarichun ayudashcacuna. Paica: “Gentecunata Jehová Diosta sirvichun ayudashpaca dimastij cushillami sintirinchij” ninmi.