1. ¿Huaquin gentecunaca shujtajcunata yalli canata munashcamantaca imatataj rurancuna?

CAI MUNDOPI tiyaj gentecunaca shujtajcunata yalli casha nishpami shujtajcunata llaquichincuna. Por ejemplo, negociocunata charij runaca tal vez shujtajcunata yalli charisha nishpami shujtaj negociocunata charijcunata llaquichin. Cutin shuj pugllajca pai ganasha nishpachari shujtaj equipopi pugllajtaca chaquita lisian. Shuj estudiajca shuj rijsishca Universidadpi estudiasha nishpachari examencunata cungapajca trampacunata ruran. Diosta sirvijcunaca cai ruraicuna mana allicuna cashcataca allimi yachanchij (Gálatas 5:19-21). Pero congregacionpipish maijan huauqui panicunaca mana cuentata cushpami shujtajcunata yalli casha nincuna. Chashna yuyashpaca huauqui panicunatami congregacionmanta chꞌicanyachi tucuncuna.

2. ¿Cai yachaipica imatataj yachashun?

² Cai yachaipica imacunamanta shujtajcunata yalli casha nishpa yuyai tucushcatami ricushun. Shinallataj Bibliapi tiyaj Diosta sirvijcunapish shujtajcunamanta yalli cashcata ama yuyangapaj imata rurashcatami ricushun. Pero puntaca shujtajcunata yalli canata yuyacushcata o mana yuyacushcatami ricushun.

3. ¿Imatataj tapurina canchij?

³ Cai catij tapuicunapi yuyashun. ¿Ñucallataj alli sintiringapajca shujtajcunata yalli cashcatachu yuyani? ¿Imamantataj congregacionpi sirvingapaj esforzaricuni? ¿Shujtajcunata  yalli cashcata ricuchingapajlla o Jehová Diosta tucui shunguhuan sirvingapaj? Cunanca shujtajcunahuan compararinamanta Biblia imata yachachishcatami ricushun.

4. Gálatas 6:3, 4-pi nishca shinaca ¿imamantataj mana shujtajcunahuan compararina canchij?

⁴ Bibliaca shujtajcunahuan mana compararichunmi yachachin (Gálatas 6:3, 4-ta liyipai). Shujtajcunahuan compararishpa, paicunamanta yalli cashcata yuyashpaca jatun tucushunmi. Shinallataj shujtajcunahuan compararishpa paicunamanta menos cashcata yuyashpaca desanimarishunmi (Romanos 12:3). Grecia llajtamanta pani Katerinaca: * “Ñuca congregacionpica alaja ñañacuna, alli huillajcuna, cꞌuyaita ricuchij ñañacunami tiyarca. Ñucaca siempre paicunahuan compararishpami imapaj mana valishca shina sintirircani” ninmi. Pero Jehová Diosca ñucanchijtaca alaja cashcallamanta o rijsishca cashcallamantaca mana paipaj puebloman pushamushcachu. Ashtahuanpish paita cꞌuyashcamanta, paipaj Churita cazushcamantami paipaj puebloman pushamushca (Juan 6:44; 1 Corintios 1:26-31).

5. ¿Canca Hyun shuti huauquimantaca imatataj yachai tucungui?

⁵ Cashna nishpapishmi tapurina canchij. ¿Huauqui panicunaca ñucataca shujtajcunahuan alli apanacuj cashcatachu rijsincuna o shujtajcunahuan rato pꞌiñarij cashcatachu rijsincuna? Corea del Surmanta huauqui Hyunca congregacionpi responsabilidadta charij huauquicunataca contracunata shinami ricuj carca. Paica: “Huauquicuna ima nijpipish casi siempre mana de acuerdochu carcani. Paicunamantapish mana allimi parlaj carcani. Ñuca chashna comportarishcamantami congregacionpipish huauqui panicunaca mana tandalla Diosta sirvircacuna” ninmi. Huauqui Hyuntaca achca huauquicunami cambiachun ayudarcacuna. Paipaj causaipi cambiocunata rurashcamantami cunanca alli anciano can. ¿Caimantaca imatataj yachanchij? Shujtajcunamanta yalli cashcata yuyacushpaca huauqui panicunahuan Diosta tandalla sirvingapajmi huaquin cambiocunata rurana canchij.

6. Gálatas 5:26-pi nishca shinaca ¿imacunamantataj caruyana canchij?

⁶ (Gálatas 5:26-ta liyipai). Jatun tucushpa ñucanchijllapi yuyashpa, envidiashpaca shujtajcunata yalli canatami mashcashun. Envidiashpaca shujtajcunapajta charinatami munashun. Shinallataj “paicunaca imata mana charinachu can” nishpami yuyashun. Chashna envidiashpaca shujtajcunata pꞌiñashcatami ricuchishun. Chaimanta ama cai trampapi urmangapajmi utca caruyana canchij.

7. ¿Jatun tucushpa, envidiashpaca imataj tucushun? Shuj ejemplohuan intindichi.

⁷ Jatun tucuna, ñucanchijllapi yuyana, envidianaca shuj yurata cꞌurucuna asha asha micuj shinami can. Cꞌurucuna yurata asha asha micujpica yuraca urmangami. Chashnallatajmi jatun tucushpa, envidiashpaca llaquipi urmashun (Proverbios 16:18). Yayitu Diosta sirvinatapishmi saquishun. Shujtajcunatapishmi llaquichishun. ¿Cai trampacunapi ama urmangapajca imatataj rurana canchij?

8. ¿Ama jatun tucungapaj, ama ñucanchijllapi yuyangapajca imatataj rurana canchij?

⁸ Ama jatun tucungapaj, ama ñucanchijllapi yuyangapajca apóstol Pablopaj consejotami cazuna canchij. Paica: “Imata rurashpapish mishanacushpa yanga jatun tucunapajllaca ama ruraichijchu. Chaipaj randica, ama jatun  tucushpa caishujcunaca canta yalli cashcata yuyashpa, caishuj chaishuj cꞌuyanacuichij” nircami (Filipenses 2:3). Cai verso nishca shinaca shujtajcuna ñucanchijta yalli cashcatami yuyana canchij. Chashnami shujtajcuna Yayitu Diosta sirvingapaj tucui allicunata rurajpica paicunamanta cushicushun. Shinallataj imatapish allita rurajcunaca Pablopaj consejota catishpami shujtajcunapaj alli ruraicunamanta valorancuna. Caicunata pajtachishpaca tucuicunami congregacionpica tandalla, sumajta Jehová Diosta sirvishun.

9. ¿Shujtajcunamanta ama envidiangapajca imatataj rurana canchij?

⁹ ¿Ama envidiangapajca imatataj rurana canchij? Mana tucuita alli ruraj cashcatami intindina canchij. Chaita intindishpaca shujtajcunapaj alli ruraicunamanta yachangapajmi esforzarishun. Por ejemplo, shuj huauqui congregacionpi alli conferenciata cujpica cai huauqui ima shina chai conferenciata cungapaj allichirishcatami tapuna canchij. Shuj pani mishqui micunitata yanunata yachajpica cai panitami ñucanchijpish alli yanungapaj ima shina yanunata tapuna canchij. Shinallataj shuj jovenpaj amigocunata charina sinchi cajpica paica amigocunata charingapaj pi ayudachunmi mañana can. Caicunata rurashpaca shujtajcunata mana envidiashunchu. Ashtahuanpish shujtaj cosascunatami ruranata yachashun.

10. ¿Gedeonca imacunahuantaj chꞌimbapurana carca?

¹⁰ Manasés llajtamanta Gedeón nishca runapi yuyashunchij. Gedeonca Jehová Diospaj ayudahuanmi 300 runacunallahuan Diospaj contracunata misharcacuna. Chashna mishashpapish paicunaca mana jatun tucurcacunachu. Pero Efrainmanta huaquin runacunaca Gedeonta felicitanapaj randica achcata pꞌiñarishpami rimarcacuna. Chai runacunaca paicunata macanacungapaj mana cayashcamantami achcata pꞌiñarircacuna. Paicunaca shujtajcuna paicunata respetachun yuyaillami carcacuna. Chaimantami chai runacunaca Gedeón macanacuipi mishashpa  Diospaj shutita jatunyachishcata, Diospaj pueblota cuidashcataca mana cuentata curcacuna (Jueces 8:1).

11. ¿Gedeonca Efrainpaj runacunamanca imatataj cutichirca?

¹¹ Gedeonca humildadhuanmi Efrainpaj runacunamanca: ‘Cancuna rurashcahuan chꞌimbapurashpa ricujpica ¿ima allitataj rurashcani?’ nirca. Chai huashaca Jehová Dios paicunata ima shina bendiciashcatami parlarca (Jueces 8:2, 3). Chaimi Efrainpaj runacunaca pꞌiñarinata saquircacuna. Gedeonca humilde cashcamantami Diospaj pueblo ucupi tucuicuna tandalla sirvichun ayudarca.

12. ¿Efrainpaj runacunamanta, Gedeonmantaca imatataj yachai tucunchij?

¹² ¿Efrainpaj runacunamantaca imatataj yachanchij? Ñucanchijta jatunyachichun mashcanapaj randica siempremi Jehová Diosta jatunyachina canchij. ¿Gedeonmantaca imatataj yachanchij? Familiata pushajcuna, congregacionta pushajcunaca pi paicunahuan pꞌiñarijpi, paicuna imamanta pꞌiñarishcata intindingapajmi esforzarina can. Shinallataj paicunapaj alli rurashcacunamantami felicitana can. Chaita rurangapajca humildes canami minishtirin. Chaimanta shujtajcuna pandarishcata ricuchinapaj randica paicunahuan alli apanacungapajmi esforzarina canchij.

13. a) ¿Anaca ima problematataj charirca? b) ¿Anaca llaquilla ama sintiringapajca imatataj rurarca?

¹³ Anapaj ejemplomanta ricushun. Paica Leví familiamanta Elcaná shuti runahuanmi cazararca. Pero Elcanaca Peniná shuti shujtaj huarmitami charirca. Elcanaca Anatami Peninata yalli cꞌuyaj carca. Peninaca achca huahuacunatami charirca. Pero Anaca ima huahuacunata mana charircachu. Chaimi Peninaca Anataca siempre burlashpa mana alli trataj carca. Anaca paita chashna tratashcamantami achcata huacaj carca, maipicarin mana micuj carca (1 Samuel 1:2, 6, 7). Pero Bibliapica Peniná chashna tratajpipish Ana chashnallataj llaquichishcataca mana parlanchu. Ashtahuanpish Anaca pai ima shina sintirishcatami shungumanta Jehová Diosman parlarca. Pai ayudanapimi confiarca. Mana yachanchijchu Peniná Anata llaquichinata saquishcata. Pero Anaca Jehová Diospi confiashcamantami paica tranquila sintirirca. Bibliapica: ‘Anaca ña mana ashtahuan llaquilla purircachu’ ninmi (1 Samuel 1:10, 18).

14. ¿Anamantaca imatataj yachanchij?

¹⁴ ¿Anamantaca imatataj yachanchij? Pi ñucanchijta yalli canata munashpa, mana alli tratashpa llaquichijpica mana chashnallataj llaquichinachu canchij. Ashtahuanpish paicunahuan alli apanacungapajmi esforzarina canchij (Romanos 12:17-21). Chashnami  ñucanchijta llaquichij mana cambiajpipish ñucanchijllataj tranquilo sintirishun.

15. ¿Apoloshuan, apóstol Pablohuanca imapitaj igual carcacuna?

¹⁵ Cunanca Apolospaj, Pablopaj ejemplomanta yachashun. Paicunaca Diospaj Shimimanta achcata yachaj, alli yachachijcunami carca. Shinallataj achcacunatami Yayitu Diosta sirvichun ayudarcacuna. Pero paicunapuraca mana envidianacurcacunachu.

16. ¿Apolosca ima shinataj carca?

¹⁶ Apolosca Alejandría llajtamantami carca. Chai llajtapica alli yachana escuelacunami tiyarca. Apolosca Diospaj Shimimanta achcata yachaj, alli yachachijmi carca (Hechos 18:24). Apolos Corinto llajtapi sirvinaman rijpica huaquin huauqui panicunaca: “Apolosca shujtaj huauquicunamanta, Pablomanta yallimi can” nishpami yuyajcuna carca (1 Corintios 1:12, 13). ¿Apolosca huauqui panicuna chashna tratachunchu munarca? Mana. Paica mana jatun tucurcachu. Chaimantami apóstol Pabloca Apolostaca cutin Corintopi sirvinaman richun invitarca (1 Corintios 16:12). Apolos huauqui panicunata chꞌicanyachishca cajpica Pabloca mana chashna mañanmanchu carca. Ashtahuanpish Apolosca alli yachachij cashcamantami gentecunaman predicangapaj, huauqui panicunata sinchiyachingapaj esforzarirca. Shinallataj paica humildemi carca. Chaimantami Áquila, Priscila paiman yachachijpica paica alli uyarcalla (Hechos 18:24-28).

17. ¿Pabloca huauqui panicuna Diosta tandalla sirvichunca ima shinataj ayudarca?

¹⁷ Pabloca Apolos, Diosta alli sirvij cashcatami yacharca. Pero Apolos alli yachachij cajpipish mana envidiarcachu. Ashtahuanpish  Pabloca humilde cashcatami ricuchirca. Chaimanta Corintomanta huauqui panicuna ‘ñucanchijca Pablopajtajmi canchij’ nijpica paica mana jatun tucurcachu. Pabloca paicunataca Jehová Diosta, Jesucristota jatunyachichunmi animarca (1 Corintios 3:3-6).

18. 1 Corintios 4:6 y 7-pi nishca shinaca ¿Apolosmanta, Pablomantaca imatataj yachanchij?

¹⁸ ¿Apolosmanta, Pablomantaca imatataj yachanchij? Yayitu Diosta sirvingapajca quizás achcatami esforzaricunchij. Mana cashpaca achcacunatami bautizarichun ayudashcanchij. Caicunata rurashpapish Jehová Dios ayudajllapi chaicunata pajtachi tucushcatami yuyarina canchij. Ancianocunapish, siervo ministerialcunapish huauqui panicunatami Diosta tandalla sirvichun ayudana can. Chaimantami siempre Bibliahuan consejocunata cuna can. Shinallataj paicunata jatunyachichunpish mana mashcanachu can. Ashtahuanpish huauqui panicunataca Jesusta cazuchun, paipaj ejemplota catichunmi ayudana can. Ancianocuna, siervo ministerialcuna chashna ayudashcamantami paicunataca achcata agradicinchij (1 Corintios 4:6, 7-ta liyipai).

19. ¿Imatataj cada uno rurana canchij? (“ Paimi yalli alli ruran nishpaca mana shujtajcunahuan comparanachu canchij” nishca recuadrota ricui).

¹⁹ Jehová Diosca ñucanchij alli ruraicunahuan caishuj chaishuj ayudanacushpa causachunmi rurashca (1 Pedro 4:10). Pero maipica ñucanchij ruraicunaca ashallami can nishpachari yuyanchij. Caipi yuyashun, shuj ropata alajata tandachishpa rurangapajca uchilla hilocunahuanmi siranchij. Chashnallataj ñucanchij alli ruraicuna uchilla cajpipish huauqui panicuna congregacionpi tandalla Diosta sirvichunmi ayudashun. Chaimanta shujtajcunata yalli canata ama mashcashunchij. Ashtahuanpish congregacionpi tandalla Jehová Diosta sirvingapaj esforzarishunchij (Efesios 4:3).