1, 2. a) ¿Llaquicunahuan cajpica Diosca ima shinataj ayudan? b) ¿Jeremías 29:11, 12-pi Jehovamantaca imatataj yachachin?

HUAUQUI Eduardoca asha preocupado cashcatami shuj cazado ancianoman huillarca. Eduardoca 1 Corintios 7:28-pi nishcatami yuyacushca carca. Chai versopica, ‘cazarashcacunaca llaquicunatami charingacuna’ ninmi. Chaimantami Eduardoca chai ancianotaca: “¿Chai ‘llaquicunaca’ imataj can? ¿Ñuca cazarashpaca ima shinataj chai llaquicunata chꞌimbapurasha?” nishpa tapurca. Huauqui ancianoca manaraj chai tapuicunata cutichishpami Eduardotaca: “2 Corintios 1:3, 4-pi ima nishcatapish yuyarinami cangui. Chaipica: ‘Yaya Diosca, ñucanchijta jatunta llaquij Yayami, tucui imapipish cushichij Diosmi’ ninmi” nircami.

² Jehová Diosca cꞌuyaj Yayami can. Llaquicunahuan cajpica ñucanchijta cushichishpami ayudan. ¿Bibliapi consejocunahuan Jehová Dios quiquinta ima shina ayudashcata  yuyaringuichu? Ñaupa punllacunapi paita servijcunata ayudashca shinallatajmi ñucanchijtapish ayudasha nin (Jeremías 29:11, 12-ta leyipai).

3. ¿Cai yachaipica imatataj yachashun?

³ Cusa huarmicunapish, huahuacunapish problemacunatami charincuna. Chai problemacuna imamanta tiyashcata yachashpaca ahuantai tucushunmi. Chaimantami cai yachaipica familia ucupi imamanta llaquicuna tiyashcata yachashun. Shinallataj llaquicunata ahuantangapaj Diosta servijcunapaj ejemplota catina cashcatami yachashun.

4, 5. ¿Cusa huarmicunaca ima problemacunatataj charin?

⁴ Adán Evata cazarachishpaca Jehová Diosca cashnami nirca: ‘Cꞌarica, paipaj yayata mamata saquishpa paipaj huarmihuan tandanacushpami ishquindijmanta shuj aichalla tucunga’ nircami (Génesis 2:24). Pero juchayujcuna cashcamantaca cazarashca qꞌuipaca huaquin problemacunami ricuringa (Romanos 3:23). Por ejemplo, manaraj cazarashpaca huarmica yaya mamatami cazuna carca. Pero Bibliapica cazarashca qꞌuipaca cusami paipaj uma tucun ninmi (1 Corintios 11:3). Callaripica cusapajpish huarmita ñaupajman pushanaca sinchichari canga. Cutin huarmipajpish yaya mamata cazunapaj randi cusata cazunaca sinchichari canga. Shinallataj huaquinpica familiacunahuanpish pꞌiñanacuicunachari tiyanga.

⁵ Huahuata charigrijpica ashtahuan preocupacioncunami tiyanga. Huahuata charigrishcamanta cushilla sintirishpapish ima ungüi o ima problema ricurinata manchashpami preocuparincuna. Shinallataj ashtahuan gastocunata charigrishcamantapishmi cusa huarmicunaca preocuparincuna. Ña huahuata charijpica shujtaj cambiocunapishmi tiyanga. Huarmica huahuata cuidana cashcamantami cusahuan pasangapaj ashalla tiempota charinga. Yayapish huasipi ama imapish illachunmi preocuparinga. Chaimantami cusapish huarmipish ñaupa laya ishquindijlla cangapaj mana tanto tiempota charingacuna.

6-8. ¿Huahuacunata mana chari tucushpaca huaquin cusa huarmicunaca ima shinataj sintirincuna?

⁶ Huaquin cazadocunaca huahuacunata charisha nishpapish mana chari tucuncunachu. Chaimantami huaquin huarmicunaca huahuata mana chari tucushpa llaquilla sintirincuna (Proverbios 13:12). Ñaupa punllacunapica huahuata mana charinaca huarmipajca jatun llaquimi carca. Por ejemplo, Jacobpaj huarmi Raquelca huahuata mana chari pudircachu. Paipaj ñaña huahuacunata charijta ricushpaca Raquelca llaquillami sintirirca (Génesis 30:1, 2). Huaquin llajtacunapica achca huahuacunatami charincuna. Chaimantami chai llajtacunapi servij misionerocunataca: “¿Imamantataj huahuacunata mana charinguichij?” nishpa tapuncuna. Paicunata alhajata entendichijpipish gentecunaca: “Huahuacunata mana charinaca llaquimi. Quiquincuna huahuacunata charichunmi  Diosta mañagrinchij” nincunami.

⁷ Inglaterra llajtapi causaj shuj panimanta parlashun. Paica huahuacunata charinatami achcata munashcarca. Pero huahuacunata mana chari tucushcata yachashpaca achcatami llaquirirca. Chaimantami paipaj cusandij shuj huahuata adoptanata decidircacuna. Cai panica cashnami nin: “Huahuata adoptashpapish ñucallataj shuj huahuata mana chari pudishcamantami llaquilla purij carcani” ninmi.

⁸ 1 Timoteo 2:15-pica cashnami nin: ‘Huarmica huahuacunayuj tucushpa, mana maipish cachun causashpaca quishpiringami’ ninmi. Cai shimicunaca huahuacunata charishpa huiñai causaita japinataca mana nicunchu. Ashtahuanpish huahuacunayuj huarmica huasita, huahuacunata atendina cashcamantaca manachari shujtajcunapaj causaipi satirishpa, imatapish shujtajcunamanta rimashpa puringa (1 Timoteo 5:13). Pero huahuacunata charijpipish problemacunaca familiapica ricuringami.

9. ¿Huaquin cazadocunaca ima jatun llaquitataj charincuna?

⁹ Cusa o huarmi huañunataca mana yuyanchijchu. Cai llaquitaca ni pi mana charisha ninchijchu. Diosta servijcunaca huañushcacunata Dios causachinatami tucui shunguhuan crinchij. Chaimantami cusa o huarmi huañujpica paicunata cutin ricunata yachashpa ñaupajman catinchij (Juan 5:28, 29). Ñucanchij Yayito Diosca llaquihuan cajpica Bibliahuan yachachishpa, cushichishpami ayudan. Huaquincunata Jehová Dios ima shina ayudashcata ricushun.

10. ¿Alli sintiringapajca Anaca imatataj rurarca? (Página 3-pi tiyaj dibujota ricui).

¹⁰ Elcanapaj huarmi Anaca mana huahuacunata chari pudircachu. Cutin caishuj huarmi Peninaca huahuacunata charircami (1 Samuel 1:4-7-ta leyipai). Penina huarmica huatantami Anamanta burlarij carca. Chaimantami Anaca achcata llaquirij carca. ¿Alli sintiringapajca Anaca imatataj ruraj carca? Bibliapica Anaca paipaj llaquicunata huillangapajmi ‘Diospaj ñaupajpi unita mañaj carca’ ninmi. Anaca Jehová Dios paipaj mañaicunata cutichinata yachashpami ‘ña mana ashtahuan llaquilla purirca’ (1 Samuel 1:12, 17, 18). Anaca Jehová Dios shuj huahuata cushpa o ima shinapish cushichishpa ayudanatami crirca.

11. ¿Ima shinataj Diosta mañana canchij?

¹¹ Cai pachata Diablo mandacushcamanta, juchayujcuna cashcamantapish llaquicunata charishpa catishunmi (1 Juan 5:19). Pero “tucuipi cushichij  Diosmi” ñucanchijta ayudanga. Ana shinallataj tucui shunguhuan Diosta mañajpica paica ayudangami. Ñucanchijpish ima problemacunata charishpaca mana jahua jahuallachu mañana canchij. Chaipaj randica tucui shunguhuan rogarishpami ima shina sintirishcata Diosman huillana canchij (Filipenses 4:6, 7).

12. ¿Llaquicunahuan cashpapish imata rurashpataj Anaca cushilla causarca?

¹² Huahuacunata mana chari tucushpa o shuj familia huañujpica llaquillami sintirinchij. Shinapish, ¿alli sintiringapajca imatataj rurai tucunchij? Jesuspaj tiempopi causaj Ana huarmimanta parlashun. Paica profetami carca. 7 huatacunata cazarashca qꞌuipallami viuda saquirirca. Anaca shuj huahuallatapish charishcataca Bibliaca mana parlanchu. Anaca 84 huatacunata charishpapish ‘Diospaj huasimanta mana anchushpami tutapish, punllapish Diosta servishpa, mañashpa causaj carca’ (Lucas 2:37). Anaca llaquicunahuan cashpapish Diosta servishpami cushilla causarca.

13. ¿Ima shinataj shuj panica Paulata ayudarca?

¹³ Huauqui panicunami ñucanchijta cushichishpa ayudai tucun (Proverbios 18:24). Paulamanta parlashun. 5 huatacunallata charijpimi paipaj mamaca testigo de Jehová canata saquirca. Achca llaquimi carca. Chashna llaquihuan cajpica shuj panimi Diosta servishpa catichun Paulata ayudarca. Paulaca: “Mana ñuca familia cashpapish paica achcatami ayudarca. Chashna ayudajpimi Diosta servishpa caticuni” ninmi. Paulapaj mamaca cutinmi Diospajman tigrarca. Chaimantami Paulaca cushilla sintirirca. Paulata ayudaj panipish Diosta servishpa catichun ayudashcamantami cushilla sintirin.

14. ¿Shujtajcunata cushichishpaca ima shinataj sintirishun?

¹⁴ Shujtajcunaman cꞌuyashcata ricuchishpaca  allimi sintirishun. Achca panicunaca cazarashca o mana cazarashca cashpapish Diosmanta yachachishpami paita jatunyachincuna. Chashnami cushilla sintirincuna. Gentecunaman Diosmanta yachachishpaca paicunamanta preocuparishcatami ricuchinchij. Ñucanchij huauqui panicunamanta preocuparishpacarin congregacionpica tandallami causashun (Filipenses 2:4). Ima shinami ‘shuj mamaca’ paipaj huahuata cuidan, chashnallatajmi apóstol Pabloca Tesalonicapi causaj huauquicunata panicunata cuidarca. Shinallataj Pabloca ‘shuj yaya’ layami paicunata cushichishpa ayudarca (1 Tesalonicenses 2:7, 11, 12-ta leyipai).

15. ¿Huahuacunamanca picunataj Bibliamanta yachachina can?

¹⁵ Familiacunatapish cushichishpami ayudana canchij. Bibliapica yaya mamacunatami huahuacunata yachachichun mandan (Proverbios 23:22; Efesios 6:1-4). Chashna jahuapish huaquin yaya mamacunaca cunanllami testigo de Jehovacuna tucushca. Chaimantami huahuacunata Bibliamanta yachachingapaj shujtaj testigocunata ayudachun mañancuna. Maijan yaya mamacunacarin huahuacunaman Bibliamanta estudiota cuchunmi mañancuna. Pero ayudachun mañashpapish yaya mamacunallatajmi huahuacunata alli rijsishpa, paicunahuan parlanacushpa yachachina can.

16. ¿Huahuacunata yachachishpa ayudachun mañajpica imatataj mana cungarina canchij?

¹⁶ Huaquin yaya mamacunaca paicunapaj huahuacunaman Bibliamanta estudiota cuchunmi mañancuna. Cutin huaquinpica yaya mamacuna mana testigo cajpipish paicunapaj huahuacunamanmi Bibliamanta yachachinchij. Chashna yachachishpapish chai huahuacunapaj yaya o mama shina cashcataca mana yuyanachu canchij. Shinallataj huahuapaj huasipi yaya o mama o experienciata charij shuj testigo chaipi cajpimi yachachinaman rina canchij. O gentecuna tiyaj pushtucunapimi yachachina canchij. Chashnami ni pi mana pandata yuyangacuna. Qꞌuipaca yaya mamacunallatajchari Jehová mandashca shina paicunallataj huahuacunaman yachachinga.

17. ¿Huahuacunaca ima shinataj familiata cushichi tucun?

¹⁷ Diosta cazuj jovencunaca yaya mamata respetashpa, imapipish ayudashpami cushichincuna. Huahuacuna Diosmanta mana caruyajpicarin tucui familiami cushicuncuna. Lamec runamanta parlashun. Paica yacu juillu manaraj tiyajpimi causarca. Paipaj churi Noemanta parlashpaca cashnami nirca: “Mandaj Dios allpata mana alli nishcamanta, ñucanchij maquihuan allpapi imata rurashpapish sinchita trabajashpa llaquita apacunmantaca cai huahuami samachinga” nircami. Yacu juillu pasashca qꞌuipami cai shimicunaca pajtarirca (Génesis 5:29; 8:21). Diosta cazuj huahuacunaca paicunapaj familiatami cushichin. Shinallataj cunan punllapi llaquicunatapish, shamuj punllapi llaquicunatapish ahuantachunmi familiata ayudai tucun.

18. ¿Llaquicunata ahuantangapajca imatataj rurana canchij?

¹⁸ Cunan punllacunapica Diosta servijcunaca paita mañashpa, Bibliapi tiyaj ejemplocunapi yuyashpa, shujtaj huauqui panicunahuan apanacushpami cushilla sintirincuna (Salmo 145:18, 19-ta leyipai). Jehová Diosca ñucanchijta cushichishpa ayudanata manataj saquingachu. Chaita yachashpaca cunan punllacunapi shamuj punllapipish ima llaquicunatapish ahuantai tucushunmi.