1, 2. a) ¿Ñucanchijpajca imataj ashtahuan importante cana can? b) ¿Imamantataj Dioslla tucuita mandana cashcata mana cungarina canchij?

ACHCA gentecunapajca cullquimi ashtahuan valishca can. Chaimantami ashtahuan charinallapi yuyancuna, mana cashpaca ña charishcacunata ama perdingapajmi imatapish rurancuna. Shujtajcunapajca alli saludta charina, familiacuna, paicunapaj munaita ruranami ashtahuan valishca can.

² Pero ¿imataj ashtahuan importante can? Jehová Dioslla tucuita mandana cashcata ricuchinami ashtahuan importante can. Pero mana cuidarishpaca Diosta apoyanapaj randica ñucanchij ruraicunallapi, problemacunallapimi yuyai callarishun. Cutin, Dioslla tucuita mandana cashcata mana cungarishpaca, llaquicuna tiyajpipish chai llaquicunata chꞌimbapurai tucushun. Ashtahuanpish Jehová Diospajman ashtahuanmi cꞌuchuyashun.

3. ¿Diabloca ima nishpataj Jehová Diosta juchachishca?

³ Diabloca: ‘Diosca mana mandanachu can. Paica mana alli mandajchu. Gentecuna cushilla causachunca mana munanchu, gentecunallataj mandashpami cushilla causangacuna’ nircami (Génesis 3:1-5). Shinallataj Diabloca: ‘Cꞌuyaimantaca ni pi mana cazungachu, llaquicunata charishpaca tucuicunami Diosmanta caruyanga’ nircami (Job 2:4, 5). Jehová Dios mana mandajpica causaica llaquimi can. Chaita ricuchingapajmi Diosca tiempo pasachun saquishca.

4. ¿Diosca imamantataj pailla Mandaj cashcata ricuchina can?

⁴ Diablo nishcacuna llulla cashcataca Diosca allimi yachan. Chashna jahuapish, ¿imamantataj Diablo llullacushcata o mana llullacushcata ricuchichun tiempota saquishca? Jahua pachapi angelcunapish, cai pachapi gentecunapish maijan llullashcatami alli entendina can (Salmo 83:18-ta leyipai). Adán Eva layallatajmi achcacunaca Diosta mana cazushcacuna. Chaita ricushpaca huaquincunaca Diablo ciertota nicushcatachari yuyangacuna. Angelcunapish, gentecunapish Diablo llulla cashcata alli entendingacamaca sumaj causaica mana tiyangachu. Pero Jehová Dioslla Mandaj cashcata ricuchishca qꞌuipaca, tucuicunami tranquilo, maravillata causashun (Efesios 1:9, 10).

5. ¿Ima shinataj Jehová Dioslla alli Mandaj cashcata ricuchishun?

⁵ Jehová Diosca pailla alli Mandaj cashcatami ricuchinga. Diablopish gentecunapish mana alli mandashcamantami paicuna mandashpa catichun ña mana saquinga. Dios churashca Mandanami mishanga. Alli gentecunaca Diosta cazushpami pailla mandana cashcata ricuchingacuna (Isaías 45:23, 24). ¿Diosta cazushpa pailla mandana cashcata ricuchisha ninguichu? Chaipajca Dioslla alli Mandaj cashcata ricuchina ashtahuan importante cashcatami entendina canchij.

6. ¿Ñucanchij munaicunamanta yallica imataj ashtahuan importante can?

⁶ Ima shinami ña yachashcanchij, ñucanchij munaicunamanta yallica, Dioslla tucuita mandana cashcata ricuchinami ashtahuan importante can. Chashna importante cajpipish ñucanchijmanta preocuparishpami Diosca quishpichisha nin. ¿Imamantataj chashna ninchij?

7, 8. ¿Jehová Dios pailla mandana cashcata ricuchishpaca ñucanchijmantaca imatataj ruranga?

⁷ Diospajca achca valishcami canchij. Paica achcata cꞌuyashcamantami ñucanchijta quishpichichun Jesusta cacharca. Chashnami huiñai causaita chari tucushun (Juan 3:16; 1 Juan 4:9). Jehová Dios cusha nishcacunata mana cumplijpica Diabloca: “Diosca llullami, gentecunata mana alli mandanchu, ima allicunatapish mana cunchu” ninmanmi. Shinallataj Diosta pꞌiñajcunaca: ‘¿Maitagari Cristo cutin shamushami nishcaca? Mana pajtanchu. Ñucanchij yayacunapish ñami huañushca. Tucui imalla tiyajcunata  Dios rurashcamantapacha cunancama tucui imapish chashnallatajmari caticun’ nishpami burlarinman (2 Pedro 3:3, 4). Diosca paita cazujcunataca quishpichingami. Chaita rurashpapish pailla mandana cashcatami ricuchinga (Isaías 55:10, 11-ta leyipai). Jehová Diosca cꞌuyaihuanmi mandan. Chaimantami paita cazujcunataca cꞌuyaihuan mandanata yachanchij (Éxodo 34:6).

⁸ Jehová Dioslla mandana cashcata ricuchinaca achca importantemi can. Pero Diosca achcata preocuparishpami ñucanchijta quishpichisha nin. Chaimantami ima ashtahuan importante cashcata entendina canchij. Chashnami Mandaj Jehová Diosllata apoyashpa catishun.

9. ¿Jobtaca ima shinataj Diabloca juchachirca? (Página 15-pi tiyaj dibujota ricui).

⁹ Job librotaca achca tiempo huashamanmi quillcarcacuna. Chaipimi Dioslla mandana cashcata alli entendi tucunchij. Diabloca: ‘Job achca llaquicunata charishpaca Diostaca ladomanmi saquinga’ nircami. Jehová Diosllataj Jobta llaquichichunmi Diabloca mañarca. Pero Jehová Dios mana chaita rurarcachu. Diablo nishcacuna cierto cashcata o mana cierto cashcata ricuchichunmi saquirca. Chaimantami Diosca: Job “imalla charishcacunaca cambaj maquipimi” nirca (Job 1:7-12-ta leyipai). Jobca asha tiempollapimi paipaj tucui charishcacunata chingachirca. Shinallataj paipaj 10 huahuacunapish, servijcunapishmi huañurca. Diabloca chai llaquicunata Dios cachashcata yuyachunmi chashna llaquichirca (Job 1:13-19). Chai qꞌuipaca Diabloca shuj millai ungüita cachashpami Jobta llaquichirca (Job 2:7). Jobpaj huarmipish, paipaj quimsa mana alli amigocunapish sinchita rimashpami ashtahuan llaquichircacuna (Job 2:9; 3:11; 16:2).

10. a) ¿Jobca ima shinataj Diosta cazushcata ricuchirca? b) ¿Jobca ima shinataj pandarirca?

¹⁰ Achca llaquicunata apashpapish Jobca Diosmantaca mana caruyarcachu. Diabloca pandarishcami carca (Job 27:5). Shinapish Jobca shuj ratoca ima ashtahuan importante cashcatami cungarirca. Chaimantami ‘imapipish mana pandarishcanichu’ nirca. Shinallataj imamanta chai llaquicunata charishcata entendichichunmi mañarca (Job 7:20; 13:24). Achca llaquicunata charishcamanta Job ima shina sintirishcataca allichari entendinchij. Pero Diosca paipaj panda yuyaita cambiachunmi ayudarca. ¿Ima shinataj ayudarca?

11, 12. a) ¿Jobmanca Diosca imatataj entendichirca? b) ¿Dios rimajpica Jobca imatataj rurarca?

¹¹ Job capítulo 38 al 41-pica Jehová Dios nishcacunami tiyacun. Jehová Diosca imamanta llaquicunata apacushcata Jobmanca mana huillarcachu. Chaipaj randica Diosca Jobmanta ashtahuan yalli cashcatami entendichirca. Paipaj llaquicunallapi yuyacunapaj randica shujtaj ashtahuan importante cosascunapi yuyana cashcatami entendichirca (Job 38:18-21-ta leyipai). Jehová Dios chashna ayudajpimi Jobca paipaj panda yuyaicunata cambiarca.

 ¹² ¿‘Cai tucui llaquicunata charishca jahuami Jehová Diosca sinchita riman’ nishpachu Jobca yuyarca? Mana. Paica Jehová nishcata allimi chasquirca. Ashtahuanpish Jobca: ‘Mana chaita nisha nircanichu. Yallitaj llaquirishpami arrepentirini’ nircami (Job 42:1-6). Eliú runapish Job pandata ama yuyachunmi ayudashca carca (Job 32:5-10). Jehová Dios cushca consejocunataca Jobca cazurcami. Chaimantami Diosca, ‘Job ñucata cazushcamantaca cushicunimi’ nirca (Job 42:7, 8).

13. ¿Llaquicuna tucurishca qꞌuipapish Dios nishcacunaca ima shinataj Jobtaca ayudarca?

¹³ Jehová cushca consejocunaca llaquicuna tucurishca qꞌuipapishmi Jobta ayudarca. Jobca ñaupa charishcacunatapish yallimi charirca. Shinallataj ‘7 churicunata, 3 ushushicunatami cutin charirca’ (Job 42:12-14). Cai huahuacunata charishpapish huañushca huahuacunata yuyarishpachari llaquilla sintirishcanga. Tucui apashca llaquicunataca manachari cungarirca. Chai tucui llaquicunata imamanta charishcata entendishca cashpapish, huaquinpica, “¿imamantashi yallitaj sufrichun Diosca saquirca?” nishpami tapurishcanga. Chaipica Dios nishcacunatami yuyarishcanga. Chashnami llaquicunata Jehová ricushca shina ricushpa tranquilo sintirishcanga (Salmo 94:19).

14. ¿Jobpaj causaimantaca imatataj yachanchij?

¹⁴ Job runapaj causaimanta yachashpami llaquicunataca Jehová ricushca shina ricushun. Chashnami alli sintirishun. Job librotaca ‘ñucanchijta yachachingapajmi Diosca quillcachirca. Mana pꞌiñarishpalla, cushilla, shuyana yuyailla canata yachachingapajmi quillcachirca’ (Romanos 15:4). ¿Jobpaj causaimantaca  imatataj yachanchij? Ñucanchij llaquicunallapi yuyanapaj randica, tucuita Mandaj Diostami apoyana canchij. Achca llaquicunata charishpapish Mandaj Diosmanta mana caruyashpami paita apoyanchij.

15. ¿Imamantataj llaquicunata ahuantana canchij?

¹⁵ ¿Jobmanta yachashpaca imatataj entendinchij? Llaquicunata charishpaca Jehová Dios mana ñucanchijhuan pꞌiñarishcatami entendinchij. Ashtahuanpish llaquicunahuan cashpaca Jehová Diosta cꞌuyashcatami ricuchi tucunchij (Proverbios 27:11). Llaquicunata ahuantashpaca Diostami cushichishun. Dios cusha nishcacunatapish mana shaicushpami shuyashun (Romanos 5:3-5-ta leyipai). Job librota leyishpaca ‘Diosca cꞌuyaj, llaquij’ cashcatami yachanchij (Santiago 5:1, QC, 1989). Jehová Dioslla mandana cashcata ricuchijpica paica bendiciangami. Chaita yachashpami llaquicunata cushicushpa ahuantashun (Colosenses 1:11).

16. ¿Imamantataj Jehová Diosta apoyana cashcata yuyaipi charina canchij?

¹⁶ Llaquicunahuan cashpaca Jehová Dioslla mandana cashcata ricuchinaca sinchichari canga. Maipica uchilla problemacunatami charinchij. Pero chaicunallapi yuyajpica jatun llaqui layami ricuringa. Chaimantami ima problemacunata charishpapish Jehová Diosta apoyana cashcata yuyaipi charina canchij.

17. ¿Imamantataj Jehová Diosmanta huillana canchij?

¹⁷ Diospajta rurana yuyailla causashpaca Jehová Diosta apoyanata mana cungarishunchu. Shuj panimanta parlashun. Paica umapimi shuj ungüita charirca, cancertapishmi charirca, ancha ungushcami  carca. Hospitalman rishpaca tucui chaipi trabajajcunaman, ungushcacunaman, visitajcunamanpishmi huillaj carca. Shuj cutinca hospitalpimi casi quimsa semanacunata pasarca. Chaipica 80 horascunatami huillarca. Ñalla huañugrishpapish Jehová Dios rurachun nishcataca manataj cungarircachu. Chashna rurashcamantami paica tranquila sintirirca.

18. ¿Pani Jennifermantaca imatataj yachanchij?

¹⁸ Tucui punllacunami problemacunaca ricurin. Chashna jahuapish Mandaj Jehová Diosta apoyanataca manataj saquinachu canchij. Pani Jennifermanta parlashun. Paica avionpimi huasiman tigrana carca. Pero avioncuna aeropuertomanta mana llujshi tucujpimi quimsa punllata chaipi shuyana carca. Pailla cashpapish, shaicushca sintirishpapish mana yallitaj llaquirircachu. Jenniferca, ‘caipi shuyacuj gentecunaman huillangapaj ayudahuai’ nishpami Diosta mañarca. Chai qꞌuipaca achca gentecunamanmi huillai tucurca, publicacioncunatapishmi curca. Paica: “Chaipi shuyana sinchi cajpipish, Jehová Diosllatajmi paipaj shutita jatunyachingapaj ayudarca” ninmi.

19. ¿Diosta servijcunaca imatataj rurana canchij?

¹⁹ Jehová Diosta servijcunallami paita siempre apoyashcanchij. Panda religioncunaca chaita mana rurashcacunachu. Chaimantami cada uno Mandaj Jehová Diosta apoyanataca manataj cungarina canchij.

20. ¿Jehová Diosta apoyajpica paica ima shinataj sintirin?

²⁰ Llaquicunahuan cashpapish Diosmanta mana caruyashpaca Jehová Dioslla tucuita mandana cashcatami ricuchinchij. Ñucanchijcuna chashna apoyajpica Diosca cushicunmi (Salmo 18:25). Catij yachaipica Jehová Diosta imamanta apoyana cashcata, ima shina chaita ruranatapishmi yachashun.