1, 2. ¿Imatataj cada uno alli yuyana canchij? (Jahuapi tiyaj dibujota ricui).

ÑAUPA temapi yachashca shinaca Diabloca: ‘Jehová Diosca mana mandanachu can. Gentecunaca paicunallataj mandashpami cushilla causangacuna’ nircami. ¿Chaica ciertochu can? Yuyashun. ¿Gentecuna huiñaita causashpa paicunallataj mandashpaca cushilla causanmanchu? ¿Huiñai causaita charishpa, tucui can munashcata rurashpaca cushilla causanguimanchu?

² Cada unomi cai tapuicunapi alli yuyana canchij. Cai tapuicunapi yuyashca qꞌuipaca Jehová Dioslla mandana cashcata, pailla alli Mandaj cashcatapishmi entendishun. Shinallataj paita apoyana cashcatami entendishun. Caita alli entendingapajca Bibliatami leyina canchij. Cunanca Jehová Dioslla imamanta mandana cashcatami Bibliapi ricushun.

3. ¿Imamantataj Jehová Dioslla mandana can?

³ Jehová Diosca tucuita ruraj, tucui poderta charijmi  can. Chaimantami pailla mandana can (1 Crónicas 29:11; Hechos 4:24). Apóstol Juanca muscuipi shinami Jesushuan mandagrij 144.000-ta ricurca. Paicunaca: ‘Jatun Dios, canca jatunmari cangui, allimari cangui, tucuita rurai tucujmari cangui nishcataca chasquipaj allimari cangui. Canmari tucui ima tiyajtapish rurashcangui. Can munashpa rurashcamantami tucui imapish tiyan’ nircacuna (Apocalipsis 4:11). Jehová Diosmi tucuita rurarca. Chaimantami gentecunatapish, angelcunatapish pailla mandana can.

4. ¿Ñucanchijllataj agllai tucushpapish imamantataj Diospaj contra tucunata mana agllana canchij?

⁴ Jehová Diosmi tucuita rurarca. Diabloca imata mana rurashcachu. Chaimantami Diabloca mana mandana can. Diablopish, Adanpish Evapish cꞌariyashpami Diosta mana cazurcacuna (Jeremías 10:23). Diosca paicunallataj decidichunmi rurarca. Chaimantami Diosta cazunata o mana cazunata paicunallataj decidi tucurcacuna. Pero paicunallataj decidi tucushpapish ¿Diospaj contra tucunata agllanallachu carca? Mana. Diosca cada uno imata ruranata agllachunmi rurashca. Pero paimanta caruyashpa paipaj contra tucuchunca mana rurashcachu. Diospaj contra tucushpaca mana alli decidishcatami ricuchishun. Ñucanchijca Jehová Dios mandachunmi minishtinchij.

5. ¿Imamantataj Diosca tucuita allita ruran?

⁵ Jehová Diosca cashcata ruraj Diosmi can. Chaimantami pailla mandana can. Paillatajmi: ‘Ñucaca Jehovami cani. Cai pachapipish ñucaca cꞌuyaihuanmi allita rurani. Chaita rurashpami cushicuni’ ninmi (Jeremías 9:24, NM). Diosca tucuitami allita ruran. Chaimantami ima alli cashcata o ima mana alli cashcata yachangapajca runacunapaj leycunata mana minishtin. Pai cushca leycunaca mana pandachu. Bibliaca ninmi: “Can mandacuntaca cashcata rurashpa allita mandanami pilarcuna shina charicun” ninmi. Chaimantami Diospaj tucui leycunaca mana panda cashcata yachanchij (Salmo 89:14, QC, 1989; 119:128). ‘Diosca mana alli mandajchu’ nishpapish Diabloca cai pachapi mana alli ruraicunataca mana anchuchi tucushcachu.

6. ¿Cai pachataca imamantataj Diosca alli mandai tucun?

⁶ Jehová Diosca alli yachaj, tucuita yachaj cashcamantami tucuita alli cuidai tucun. Chaimantami pailla mandana can. Por ejemplo, maijan doctorpish mana jambi tucushcata jambichunmi Jesusman poderta curca (Mateo 4:23, 24; Marcos 5:25-29). Jesús milagrocunata ima shina rurashcataca mana entendinchijchu. Pero Jehová Diosca ñucanchij cuerpo ima shina cashcataca allimi yachan. Chaimantami ima ungüitapish alliyachi tucun. Shinallataj Diosca huañushcacunata ima shina causachinatami yachan. Terremotocuna, o shujtaj llaquicuna ama tiyachunpishmi paica imata ruranata alli yachan.

7. ¿Jehová Dios alli yachaj cashcamantaca imatataj pailla rurai tucun?

 ⁷ Gentecunaca llajtapura ama macanacuchunmi imata ruranata ricushpa catincuna. Pero Diablo mandacujpimi paicunaca imata mana rurai tucun. Jehová Diosllami cai mundopi macanacuicuna ama tiyachun imata ruranata yachan (Isaías 2:3, 4; 54:13). Apóstol Pablo sintirishca layami sintirinchij. Paica: “¡Diosca tucuita yalli yachaj canata, yuyaiyuj canata yallitaj charijmari! ¡Pai imata yuyacushcatapish, pi mana yachai tucunchu! ¡Pai imata ruracushcatapish, pi mana entendi tucunchu!” nircami (Romanos 11:33).

8. ¿Jehová Diosca ima shinataj ñucanchijta mandan?

⁸ Bibliapica Jehová Dioslla mandana cashcatami yachashcanchij. Shinallataj imamanta tucuicunamanta ashtahuan alli Mandaj cashcatami Bibliaca yachachin. Jehová Diosca cꞌuyaihuanmi mandan. Paica ‘cꞌuyaj, mana utca pꞌiñarij, yallitaj llaquij, mana llullaj Diosmi’ can. Chaita yachashpami paipajman ashtahuan cꞌuchuyanata munanchij (Éxodo 34:6). Diosca ñucanchijtaca respetohuan, allimi tratan. Ñucanchijcunallataj cuidari tucujpipish Yaya Diosmi ñucanchijta ashtahuan alli cuidan. ‘Diosca allicunataca gentecunamanca mana cunchu’ nishpami Diabloca juchachirca. Pero chaica llullami can. Jehová Diosca huiñai causaita charichun munashpami paipaj cꞌuyashca Churita cacharca (Salmo 84:11; Romanos 8:32-ta leyipai).

9. ¿Jehová Dios cada unomanta preocuparijtaca ima shinataj yachanchij?

⁹ Jehová Diosca paita tucui servijcunamanta preocuparishpapish cada unomantami preocuparin. Ñaupa Israelpi ima tucushcata yuyarishun. Jehová Diosca 300 huatacunatami enemigocunamanta israelitacunata quishpichingapaj juezcunata churarca. Chai tucui llaquicuna tiyajpipish Rut huarmitami ayudarca. Paica mana israelitachu carca. Cai huarmica Jehová Diosta servingapajmi tucuita huashaman saquishca carca. Chashna rurashcamantami Jehová Diosca shuj cusata, shuj huahuata cushpa bendiciarca. Shinallataj Jesusca Rutpaj familiacunamantami huacharirca. Chashnallataj Rutpaj causaitaca Jehová Diosca Bibliapimi escribichirca. Chai libroca paipaj shutillatatajmi charin. Rut causarishpa cai tucuita yachashpaca dimastijmi contentaringa (Rut 4:13; Mateo 1:5, 16).

10. ¿Ima shinataj Jehová Diosca mana millai Mandaj cashcata yachanchij?

¹⁰ Jehová Diosca mana millai Mandajchu can. Chaimantami paita cazujcunaca cushilla sintirin (2 Corintios 3:17, NM). Davidca: “Paipaj ñaupajpica alabanapish, cushicunapishmi tiyan. Pai causacunpica,  tucuita rurai tucunapish, cushicuipishmi tiyan” nircami (1 Crónicas 16:7, 27). Etán runapish cashnami nirca: “Mandaj Dioslla, quiquinta mañajcunaca cushichishcami. Quiquinpaj ñahui achijyachishcapimi puringacuna. Quiquinpaj shutipimi punllanta cushicungacuna. Quiquin cashcata rurashcapimi cꞌari cꞌari cangacuna” nircami (Salmo 89:15, 16).

11. ¿Jehová Dioslla alli Mandaj cashcata ama cungaringapajca imatataj rurana canchij?

¹¹ Jehová Dios cꞌuyaj cashcata punllanta yuyarishpaca pailla alli Mandaj cashcata mana cungarishunchu. Shinallataj salmota quillcaj runa layami sintirishun. Paica: “Shuj punllallatapish quiquinpaj huasi canllapi canaca, huaranga punllacunata shujtajpi canata mai yalli allimari” nircami (Salmo 84:10). Jehová Diosmi ñucanchijcunata rurarca. Chaimantami cushilla causangapaj imata minishtishcata yachan. Paica tucuitami mana mitsashpa cun. Imata rurachun mandashpapish ñucanchij allipajmi mandan. Imata huashaman saquina cashpapish, Diosta cazushpaca cushillami causashun (Isaías 48:17-ta leyipai).

12. ¿Ima shinataj tucuita Mandaj Jehová Diosllata apoyanchij?

¹² Bibliapica, ‘1.000 huatacunata Jesús mandashca qꞌuipaca huaquin gentecunaca Jehovapaj contrami tucungacuna’ ninmi (Apocalipsis 20:7, 8). Diabloca prezumanta cacharichishcami canga. Chaimi gentecunataca paicunallapi yuyachun pandachinga. ‘Diosta mana cazushpapish huiñaita causanguichijllami’ nishpachari Diabloca pandachisha ninga. Pero gentecunaca paicunalla mana causai tucunchu. Chaimantami “¿Diablopaj llullacunata crishachu?” nishpa tapurina canchij. Jehovata cꞌuyashpa, paita servishpa, pailla alli Mandaj cashcata crishpaca Diablo nishcacunapi mana yuyashunllapishchu. Ashtahuanpish Jehová Dios cꞌuyaihuan ñucanchijta mandachunmi munashun.

13. ¿Jehová Diosta apoyangapajca imatataj rurana canchij?

¹³ Ña yachashca shinaca Jehová Diosllami mandana can. Pai layaca ni pi mana mandai tucunchu. Chaimantami paita apoyana canchij. ¿Ima shinataj paita apoyashun? Paimanta mana caruyashpa, tucuipi cazushpa, pai munashca shina causashpami Jehová Diosta tucui shunguhuan apoyanchij (Efesios 5:1, 2-ta leyipai).

14. ¿Jehová Dios laya rurangapajca familiata pushajcunapish, ancianocunapish imatataj rurana can?

¹⁴ Bibliapica, Jehová Diosca cꞌuyaihuanmi mandan ninmi. Chaimantami familiata pushajcunapish, ancianocunapish cꞌuyaihuan pushana can. Mana paicuna munashca shina ruranachu can. Ashtahuanpish Jehová Diospaj ejemplotami catina can. Pabloca chaitami rurarca. Paica Jehovapaj, Jesuspaj ejemplotami catirca (1 Corintios 11:1). Chaimantami shujtajcunataca mana pingaipi churarca. Shinallataj ‘allita ruranatajmi canguichij’ nishpa mana obligarcachu. Ashtahuanpish cꞌuyaihuanmi allita rurachun animarca (Romanos 12:1; Efesios 4:1; Filemón 8-10). Jehová Diosca cꞌuyaihuanmi imatapish ruran. Ñucanchijpish chashnallatajmi rurana  canchij. Chashnami Mandaj Diosta tucui shunguhuan apoyashun.

15. ¿Imamantataj congregacionpi pushajcunata cazuna canchij?

¹⁵ Diosca huaquin huauquicunatami congregacionpi pushachun agllashca. Paicunaca decisioncunatami japincuna. Imamanta chashna decidishcata mana alli entendishpapish, o chai decisión mana alli cashcata yuyashpapish paicunata respetana, cazunami canchij. Diosta mana rijsijcunaca pitapish mana cazuncunachu. Pero ñucanchijca tucuita Mandaj Jehová Diosta apoyashcamantami pushajcunata cazunchij (Efesios 5:22, 23; 6:1-3; Hebreos 13:17). Diosca alli causachunmi munan. Paita cazushpaca achca bendicioncunatami charishun.

16. ¿Mandaj Jehová Diosta apoyangapajca ima shinataj decidina canchij?

¹⁶ Imata ruranata decidishpaca Mandaj Diosta apoyashcata o mana apoyashcatami ricuchishun. Paica ‘cashna o chashnami rurana cangui’ mana nicunllachu. Chaipaj randica, pai imata yuyashcatami huillan. Por ejemplo, ima ropacunallata churarinataca mana ninchu. Pero paita servijcuna cashcamantaca mana maipish cachun churarichun ninmi (1 Timoteo 2:9, 10). Shinallataj shujtajcunata ama  llaquichingapaj imata rurashpapish alli yuyashpa rurachunmi mandan (1 Corintios 10:31-33). Mandaj Dios munashca shina imatapish rurashpami paita tucui shunguhuan apoyanchij.

17, 18. ¿Cazadocunaca ima shinataj Mandaj Jehová Diosta apoyai tucun?

¹⁷ Cazadocunapishmi tucuita Mandaj Jehová Diosta apoyai tucun. Huaquincunaca achca llaquicunatami charincuna. Paicunaca, “ñuca huarmi o ñuca cusaca mana ñuca yuyashca shinachu cashca” nishpachari yuyancuna. Chashna sintirishpaca israelitacunata Jehová ima shina tratashcatami yuyarina can. Jehová Diosca, ‘israelitacunapajca shuj cusa layami cani’ nircami (Isaías 54:5; 62:4). Israelitacunaca cutin cutinmi Diosta mana cazurcacuna. Chaimantami cusa huarmi llaquicunata charishca laya carca. Pero Jehová Diosca paicunataca mana saquircachu. Ashtahuanpish cutin cutin perdonashpami pai nishcacunata pajtachirca (Salmo 106:43-45-ta leyipai).

¹⁸ Cazadocunaca Diosta cꞌuyashcamantami pai laya tucuita rurasha nincuna. Jatun llaquicunata charishpapish Diospaj Shimita cazushcamantami mana imamantapish divorciarinllacuna. Diospaj ñaupajpica cazaranaca mana shuj pugllai cashcatami alli entendincuna. Jehová Dios tandachishcataca ni pi mana chꞌicanyachinachu can. Bibliapi nishca shinaca cusa o huarmi huainayajllapimi divorciarishpa cutin cazarai tucun (Mateo 19:5, 6, 9). Cusa huarmi alli causangapaj sinchita esforzarishpaca Mandaj Jehová Diosta apoyashcatami ricuchincuna.

19. ¿Pandarishpaca imatataj rurana canchij?

¹⁹ Tucuicunami juchayujcuna canchij. Chaimantami maijan ratoca pandarishpa Jehová Diosta llaquichishun. Chaita yachashpami Diosca ñucanchijta quishpichingapaj paipaj Churita curca. Chaimantami imapi pandarishpaca perdonahuai nishpa Diosta mañana canchij (1 Juan 2:1, 2). Pandarishcamanta llaquilla puricunapaj randica ama chaillapitaj urmangapajmi esforzarina canchij. Diosmanta mana caruyajpica paica perdonangami, tranquilo alli sintiringapajmi ayudanga. Shinallataj paita servishpa catingapajmi ayudanga (Salmo 103:3).

20. ¿Imamantataj tucuita Mandaj Jehová Diosta apoyana canchij?

²⁰ Cai pachaca ñallami shuj paraíso tucunga. Chaipica Jehová Diosllami tucuicunata mandanga. Paraisopica tucuicunami paimanta ashtahuan yachashun (Isaías 11:9). Pero cunanllatajmi Jehovamanta yachai tucunchij. Shinallataj Jehová Diosca mana mandanachu can nijcunaca ñallami tucuringa. Chaimantami paimanta mana caruyashpa, imata rurashpapish paipaj ejemplota catina canchij. Chashnami Jehová Diosta apoyashun.