Salomonpaj churica Roboammi carca. Salomonca Israel llajtataca cuarenta huatacunatami mandarca (1 Reyes 11:42). Salomón huañushca qꞌuipami Roboamca rey tucungapaj Jerusalenmanta Siquem llajtaman rirca (2 Crónicas 10:1). Roboamca rey tucushcamantaca ¿manchaita charishcachu canga? Paipaj yayaca yachaisapa runami carca. Cunanca Roboammi sinchi problemacunata allichi tucushcata ricuchina carca.

Roboam mandai callarijpica Israel llajtapica achca problemacunami tiyarca. Chaimantami huaquin israelitacunaca Roboamtaca: “Cambaj yayaca ñucanchijtaca, yallitaj llaquichishpami charirca. Llashaj yugota apachij shina paillata servichishpa charicushcamantaca, cunanca can ashata samachiari. Chaita rurajpica, canta servishpa causashunmi” nircacunami (2 Crónicas 10:3, 4, QC, 1989).

Israelitacuna nishcata uyashpaca Roboam, paipaj familiapish paihuan palaciopi causajcunapish alhaja causanatami saquina carca. Cutin israelitacuna nishcata mana uyajpica gentecunaca paita mana cazunmanchu carca. ¿Roboamca imatashi rurarca? Salomonta cunaj ancianocunatami consejachun mañarca. Pero qꞌuipaca pai layallataj jovencuna consejachunmi mañarca. Chai jovencunaca israelitacunata ashtahuan sinchita trabajachichunmi mandarcacuna. Chaita uyashpami Roboamca: “Ñuca yaya yallitaj llashaj yugota apachishca cajpica, ñucacarin ashtahuan llashaj yugotami apachisha. Ñuca yaya azotishpa llaquichishca cajpica, ñucacarin escorpioncunahuanmi llaquichisha” nirca. Escorpioncuna nijpica cuerohuan rurashca huascacunamantami parlacun. Cai huascapaj puntaca fierrocunahuan rurashcami carca (2 Crónicas 10:6-14).

¿Imatataj caimanta yachanchij? Yuyajlla huauqui panicunaca achca huatacunatami tucui shunguhuan Diosta sirvicushcacuna. Paicunami alli decisioncunata japichun ayudanga. Chaimantami paicuna cunashcata uyana canchij (Job 12:12).

Roboam chaita nijpimi gentecunaca paipaj contra tucushpa chꞌicanyarircacuna. Chaimantami Roboamca paicunahuan macanacungapaj achca soldadocunata tandachirca. Pero Diosca profeta Semaiasta cachashpami: ‘Cancunapaj quiquin huauqui israelcunapajmanca ama richijchu, paicunahuanca ama macanacugrichijpishchu. Cancunapaj huasicunaman tigraichijlla. Ñucallatajmi chꞌicanyashpa ishqui llajta tucuchun munarcani’ nirca (1 Reyes 12:21-24) * (urapi tiyaj notata ricui).

Pai israelitacunataca cuerohuan, fierrohuan rurashca huascacunahuanmi llaquichisha nishca jahua mana llaquichijpica ¿gentecunaca paimantaca imatashi yuyashca canga? (2 Crónicas 13:7-ta ricui). Gentecuna imata yuyajpipish reyca paipaj soldadocunandijmi ‘Dios nishcata uyashpa’ paicunapaj huasiman tigrarcacuna.

¿Roboammantaca imatataj yachacunchij? Shujtajcuna burlajpipish Diosta cazunami ashtahuan alli can. Shinami paipaj ñaupajpica alli ricurishun. Achca bendicioncunatapishmi charishun (Deuteronomio 28:2).

Roboamca Diosta cazushpami Israel mushuj llajtahuan mana macanacurca. Paica Judá, Benjamín llajtacunatami mandacurcaraj. Chaipimi mushuj pueblocunata rurarca. Shujtaj pueblocunapicarin jatun pircacunata, torrecunatami rurarca (2 Crónicas 11:5-12). Tucuimanta yallica Roboamca Diostami cazurca. Israel llajta janaj ladopi causajcunaca yanga dioscunatami adoracurcacuna. Shinapish achcacunami Jerusalenman rishpa Roboamta apoyashpa Diosta adorarcacuna (2 Crónicas 11:16, 17). Roboamca Diosta cazushcamantami asha tiempotaca alli mandarca.

Roboamca alli mandacushpapish Diosta cazunata saquishpami yanga dioscunata adorai callarica. ¿Imamantataj chaita rurarca? Paipaj mamaca ammonitami carca. ¿Paichu yanga diosta adorachun inquitashca canga? (1 Reyes 14:21). Mana yachanchijchu. Pero, Judapi causajcunaca paipaj mana alli ejemplotami catircacuna. Judapi huaquin pueblocuna jatun pircacunata charijpipish Jehová Diosca Egiptota mandaj Sisac runa llaquichichunmi saquirca (1 Reyes 14:22-24; 2 Crónicas 12:1-4).

Roboamca Jerusalenmantami mandaj carca. Sisacca chaicamami llaquichisha nishpa chayarca. Jerusalenta llaquichigrijpimi profeta Semaiasca Roboamta, shujtaj mandajcunatapish: “Diosca, ‘cancunami ñucamanta anchurircanguichij. Chaimantami cunanca ñucapish cancunataca, Sisacpaj maquipi churagrini’ ninmi” nircami. Roboampish israelcunata mandajcunapish chaita uyashpami: “Mandaj Diosca cashcatamari rurashca” nishpa tucui shunguhuan llaquirircacuna. Chaimi Jehová Diosca Jerusalenta llaquichichun mana saquirca. Roboamtapish huañuchichunca mana saquircachu (2 Crónicas 12:5-7, 12).

Chai qꞌuipaca Judá llajta ura ladotami Roboamca mandashpa catirca. Roboamca manaraj huañushpami paipaj huahuacunamanca achca regalocunata curca. ¿Imamantataj chaita rurarca? Paipaj churi Abiasmi catij mandaj tucuna carca. Shujtaj huahuacuna ama Abiasta llaquichichunmi Roboamca alli yuyashpa chaita rurarca (2 Crónicas 11:21-23). Ñaupamanca paica mana chashna ruranmanchu carca.

Roboamca allicunata rurashpapish Diospaj ñaupajpica mana alli ricurircachu. Bibliapica: “Roboamca millaitami rurashpa causarca” ninmi. ¿Imamantataj chashna nin? Diosta mana tucui shunguhuan mashcashcamantami shina nin (2 Crónicas 12:14).

Roboamca huaquinllapimi Diostaca cazurca. Diospaj pueblotapish achcatami ayudarca. Chashna ruracushpapish mana tucui shunguhuan Diostaca sirvircachu. Chaimantami yanga dioscunata adorarca. Jehová Dios disciplinajpica ¿Roboamca tucui shunguhuanchu arrepintirirca? O ¿shujtajcuna nijllapichu arrepintirirca? (2 Crónicas 11:3, 4; 12:6). Tiempohuanca cutinllatajmi Roboamca mana allicunata rurarca. Roboamca mana  paipaj abuelo rey David shinachu carca. Davidca jatun juchacunapi urmashpapish tucui shunguhuanmi arrepintirirca. Shinallataj Diosta cꞌuyashcamantami paillata tucui vida sirvirca (1 Reyes 14:8; Salmo 51:1, 17; 63:1).

¿Roboampaj causaimantaca imatataj yachanchij? Familiata alli mantenina, shujtajcunatapish ayudana importante cashcatami ricushcanchij. Pero tucuimanta yallica Diospaj ñaupajpi alli ricuringapajca paitami alli adorana canchij.

Chaipajca tucui shunguhuanmi Diosta cꞌuyana canchij. Caipi yuyashun. Nina rupashpa catichunca yantatami ashtahuan churanchij ¿nachu? Chashnallatajmi Diosta cꞌuyashpa catingapajca Bibliata cada punlla estudiana canchij. Imata estudiashcatapish yuyarinami canchij. Diosta mañanatapish manataj saquinachu canchij (Salmo 1:2; Romanos 12:12). Diosta cꞌuyashcamantaca pai munashcatami rurashun. Juchapi urmashpapish shungumantami arrepintirishun. Shinami Roboam shina cashcata mana ricuchishun. Ashtahuanpish Jehová Diosta tucui shunguhuan sirvicushcatami ricuchishun (Judas 20, 21).