1. ¿Animalcunamantaca imapitaj chꞌican canchij?

JEHOVÁ DIOSCA ñucanchijtaca shuj concienciahuanmi rurarca. Animalitocunata shinaca mana rurashcachu. Por ejemplo, Adán Evaca Dios mandashcacunata mana cazushca huashami pacatucunaman rircacuna. Paicunapaj conciencia mana alli sintichishcamantami chaita rurarcacuna.

2. ¿Imamantataj ñucanchij concienciaca shuj barcopaj volante shina can? (Jahuapi tiyaj dibujota ricui).

² ¿Concienciaca imataj can? Shungu ucupi ima alli cashcata, ima mana alli cashcata sintichijmi can. Ñucanchij concienciaca barcopaj volante shinami can. Barcopaj volante alli ajustashca cajpica barcota pushajca jahuallami maiman chayana cajpica alli chayanga. Pero, ¿mana alli ajustashca cajpica? Yacu jatarishpaca jahuallami chai barcotaca shujtaj ladoman apanman. Barcopaj volante shina ñucanchij conciencia alli cajpica alli decisioncunatami agllashun. Cutin conciencia mana alli cajpica mana alli cosascunatami rurashun.

3. ¿Ñucanchij conciencia mana alli cajpica imatataj rurashun?

³ Ñucanchij conciencia mana alli cajpica mana alli cosascunata ruranamantaca mana jarcarishunchu. Ashtahuancarin  ‘mana allitaca alli cashcata’ layami ricushun (1 Timoteo 4:1, 2; Isaías 5:20). Chaimantami Jesusca: “Cancunata maijanpish huañuchishpaca, Taita Diospajtami ruracuni nishpa yuyana punllacunapish chayamucunmi” nirca (Juan 16:2). Huaquin cꞌaricunaca Diospajtami ruracunchij yuyashpami Estebantaca huañuchircacuna (Hechos 6:8, 12; 7:54-60). Cai tucui huatacunatami mana alli religionpi cajcunaca gentecunata huañuchishpa Diostami alli adoracunchij nincuna. Pero Dios mandashcacunatami huashaman saquicushcacuna (Éxodo 20:13). Shinami mana alli concienciata charishcata ricuchishcacuna.

4. ¿Conciencia alli cachunca imatataj rurana canchij?

⁴ Dios mandashcacunapish Bibliapi tiyaj yuyaicunapish: “Yachachingapaj, ima shina cashcatataj rimangapaj, cunangapaj, cashcata ruraj cachun yachachingapajpish allimi can” (2 Timoteo 3:16). Ñucanchij conciencia alli cachunca ¿imatataj rurana canchij? Bibliatami alli estudiana canchij. Imata estudiashcatapish yuyarinami canchij. Ñucanchij causaipipish imata yachashcatami pajtachina canchij. Chashnami Dios yuyashca shina alli ñanpi purishun. Cunanca Dios mandashcacuna, Bibliapi tiyaj yuyaicuna ñucanchij conciencia alli cachun ima shina ayudashcata yachashun.

5, 6. ¿Dios mandashcacunata cazushpaca ima shinataj causashun?

⁵ Dios mandashcacunaca ñucanchijmanca alli causaitami cun. Chaimantami Dios mandashcacunataca mana leyishpalla saquirina canchij. Ashtahuancarin shungupimi huaquichina canchij. Bibliapica: ‘Millaitaca pꞌiñanami canguichij. Allitaca cꞌuyanami canguichij’ ninmi (Amós 5:15). Pero chaipajca Dios munashca shinami causana canchij. Caipi yuyashun. Achca punllacunatachari mana alli dormicunchij. Chaimantami doctorca ejerciciota rurachun, alli micuchun mandanga. Pai mandashcata pajtachishpaca allichari sintirishun. ¿Manachu alli doctor cashcamanta paitaca achcata pagui nishun?

⁶ Chai doctor shinallatajmi Diospish ñucanchijman mandashcacunata cushca. Chai mandashcacunata cazushpaca llaquicunata mana charishunchu. Por ejemplo, Bibliapica llullanamanta, shuhuanamanta, huainayanamanta, macanacunamanta, demoniocunahuan chagrurishca ruraicunamanta jarcarichun ninmi. Chaicunamanta jarcarishpaca allimi causashun (Proverbios 6:16-19-ta leyipai; Apocalipsis 21:8). Chashna alli causashpaca ¿manachu Diostaca ashtahuan cꞌuyashun?

7. ¿Ñaupa tiempopi shujtajcuna pandarishcamantaca imatataj yachai tucunchij?

⁷ Ima alli cashcata, ima mana alli cashcata yachangapajca Diosta mana cazushpa llaquicunata apanataca mana minishtinchu. Bibliapica ñaupa tiempopi shujtajcuna pandarishcamantami parlan. Paicunamantaca achcatami yachai tucunchij. Proverbios 1:5-pica: “Yachaisapa runa caita uyashpaca, ashtahuan yachajmi tucunga” ninmi. Dios yachachijllapimi yachaisapa tucunchij. Por ejemplo, Davidca Diosta mana cazushpami Betsabehuan juchapi urmashpa llaquicunata charirca (2 Samuel 12:7-14). Davidmanta yachacushpaca ¿Davidadca chai llaquicunata ama charingapajca imatataj rurana carca? Chai tentación ricurijpica  ¿David shinachu juchapi urmaiman o José shinachu chai tentacionmanta caruyaiman? nishpami tapurina canchij (Génesis 39:11-15). Juchapi urmashpa llaquicunata charinata yuyarishpaca mana allita ruranataca ashtahuanmi pꞌiñashun.

8, 9. a) ¿Conciencia alli cajpica imatataj rurashun? b) ¿Imamantataj Bibliapi tiyaj yuyaicuna shunguman chayachun saquina canchij?

⁸ Ñucanchijca Dios millashca cosascunataca mana ruranchijchu. Shinapish Bibliapica chaitami rurana cangui, chaitaca mana ruranachu cangui nishpaca mana tucuita mandanchu. Shinashpaca Dios munashca shina causacushcataca ¿ima shinataj yachanchij? Bibliata estudiashpami alli concienciata charishun. Chashnami alli decisioncunata agllashpa Dios munashca shina causacushcata ricuchishun.

⁹ Yaya Diosca ñucanchijtaca achcatami cꞌuyan. Chaimantami ñucanchij conciencia alli cachunca Diosca paipaj yuyaicunataca Bibliapi churashca. Isaías 48:17, 18-pica: “Ñucaca Mandaj Diosmi cani. Cambaj allipaj yachachij cambaj Diosmi cani. Can catina ñanta yachachij Diosmi cani” ninmi. Bibliapi tiyaj yuyaicuna shunguman chayajpimi ñucanchij concienciataca allita rurachun yachachicunchij. Chaita rurashpami alli decisioncunata agllashun.

10. a) ¿Alli decisioncunata agllangapajca imatataj rurana canchij? b) ¿Jesusca paita catijcuna alli decisioncunata agllachunca imatataj rurarca?

¹⁰ Bibliapica mana mandashcacunallachu tiyan. Shujtaj yuyaicunapishmi tiyan. Chai yuyaicunami alli decisioncunata agllachun ayudan. Bibliapi tiyaj yuyaicunata yachashpaca Dios ima shina yuyashcatami intindishun. Shinallataj imamanta Bibliapi huaquin mandashcacunata churashcatami yachashun. Jesuspish valishca yuyaicunatami yachachirca. Chaimantami huaquin ruraicuna llaquicunaman apaj cashcata intindichirca. Por ejemplo, ‘gentecunata pꞌiñashpaca paicunata llaquichinguichijmi. Cutin mapa munaicunata charishpaca huainayanapimi urmai tucunguichij’ nircami (Mateo 5:21, 22, 27, 28). Chaimanta, Bibliapi tiyaj yuyaicunata cutin cutin yuyarishpaca ñucanchij concienciatami allita ruranata yachachishun. Shinallataj alli decisioncunata agllashpami Diosta jatunyachishun (1 Corintios 10:31).

11. ¿Bibliata yachashpapish imamantataj mana igual yuyanchij?

¹¹ Diosta sirvijcunaca Bibliata yachashpami paicunapaj concienciata allita ruranata yachachin. Chashna jahuapish mana tucuicunachu igual decisioncunata japincuna. Por ejemplo, Bibliapica tragota yallitaj ubyana o machanaca mana allichu can ninmi. Pero ashallata ubyanaca allimi can ninmi (Proverbios 20:1; 1 Timoteo 3:8). Chaimanta, tragota ubyagrishpaca ¿mashnata ubyanallatachu yuyarina canchij? Mana. Asha tragota ubyashpa ñucanchij concienciapi alli sintirishpapish shujtajcunapaj concienciapimi yuyana canchij.

12. ¿Romanos 14:21-pi ima nishcata yachashpaca imatataj mana rurashun?

¹² Apóstol Pabloca: ‘Aichata micushpapish, vinota ubyashpapish, cambaj huauquita ñitcachina cajpica, chaicunata mana ruranami ashtahuan alli can’ nircami (Romanos 14:21). Chaihuanca shujtajcunapaj concienciapi yuyana cashcatami nicurca. Chaimanta, shuj huauqui tragota ñucanchij ubyajta ricushpa mana alli sintirijpica manachari ubyashun. Paica manaraj testigo cashpaca machadorchari carca. Pero cunanca ni imata mana ubyanatachari decidishca. Ñucanchij culpamanta chai huauqui cutin tragota ubyana viciopi urmachunca mana munanchijchu (1 Corintios 6:9, 10). Cutin maipica shuj huauquiman shuj copitata cujpica, paica manachari ubyasha ninga. Chai huauquita cꞌuyashpaca ubyanatajmi cangui nishpaca mana obligashunchu ¿nachu?

13. ¿Gentecuna Diospaj Shimita chasquichunca Timoteoca imatataj rurarca?

¹³ Timoteoca joven cashpami judiocunata mana ñitcachisha nishpa circuncisionta rurarirca. Chaipajca shuj operaciontami rurarina carca. Chaimi Diospaj Shimita paicunaman huillai tucurca. Chashnami Pablopaj ejemplota caticushcata ricuchirca (Hechos 16:3; 1 Corintios 9:19-23). ¿Ñucanchijpish shujtajcunata ayudangapaj imata ruranchijchu?

14, 15. a) ¿Espiritualmente sinchi tucungapajca imatataj rurana canchij? b) ¿Espiritualmente sinchi cajcunaca ima shinataj shujtajcunata tratan?

¹⁴ Tucuicunami ‘callaripi Cristomanta chaillatataj chaillatataj yachacushcata saquishpa, ashtahuan sinchiyangapaj ñaupajman rina’ canchij (Hebreos 6:1). Pero achca huatacunata Diosta sirvicushcallamantaca espiritualmente mana sinchi cashunchu. Sinchi cangapajca Diostami ashtahuan rijsina canchij. Imatapish alli yuyashpami rurana canchij. Chaipajca Bibliata cada punlla leyingapajmi esforzarina canchij (Salmo 1:1-3). Chashnami Dios mandashcacunata, paipaj yuyaicunata ashtahuan intindishun.

¹⁵ Tucui mandashcacunamantaca cꞌuyaimi yalli alli can. Jesusca paita catijcunamanca: “Caishuj chaishuj cꞌuyanacujpimi, cancunataca ñuca yachacujcunataj cashcata tucuicuna rijsingacuna” nircami (Juan 13:35). Santiagopish tucui mandashcacunamanta cꞌuyaimi yalli alli can nircami (Santiago 2:8). Pablopish: “Shujtajta cꞌuyajmi, Mandashcata pajtachin” nircami (Romanos 13:10). Jehová Diosca cꞌuyajmi can. Chaimantami Bibliapica cꞌuyaita ricuchina importante cashcata huillan (1 Juan 4:8). Diosca cꞌuyanimi nishpallaca mana saquirinchu. Ashtahuanpish ruraicunahuanmi cꞌuyashcata ricuchin. Chaimantami Juanpish: “Diosca paipaj shujlla Churitami ñucanchijta quishpichichun cai pachaman cacharca. Chashnami pai cꞌuyaj cashcataca ricuchirca” ninmi (1 Juan 4:9). Ñucanchijpish Yaya Diosta, Jesusta, huauqui panicunata, shujtajcunatapish cꞌuyaita ricuchishpaca espiritualmente sinchi cashcatami ricuchishun (Mateo 22:37-39).

16. ¿Espiritualmente sinchi cashpaca Bibliapi tiyaj yuyaicunataca ima shinataj ricushun?

¹⁶ Dios mandashcacunaca imata ruranata o imata mana ruranatami ricuchin. Cutin  Bibliapi tiyaj yuyaicunaca imatapish alli yuyarishpa rurangapajmi can. Espiritualmente ashtahuan sinchi tucushpami Bibliapi tiyaj yuyaicunaca valishca cashcata ricushun. Huahuacunapi yuyashun. Huahuacunaca mana allicunahuan tandanacushpa llaquicunata charinataca mana intindincunachu. Chaimantami yaya mamacunaca paicunata cuidangapaj imata ruranata mandan (1 Corintios 15:33, QC, 1989). Pero, huahuacuna huiñashpaca Bibliapi tiyaj yuyaicunatami ashtahuan intindincuna. Chashnami alli amigocunata agllancuna (1 Corintios 13:11; 14:20-ta leyipai). Ñucanchijpish Bibliapi tiyaj yuyaicunapi ashtahuan yuyashpaca alli concienciatami charishun. Chashnami imatapish Jehová munashca shina rurashun.

17. ¿Alli decisioncunata agllangapajca imatataj charinchij?

¹⁷ Jehová Dios munashca shina alli decisioncunata agllangapajca achca ayudacunatami charinchij. ¿Imamantataj chaita ninchij? Dios mandashcacuna, Bibliapi tiyaj yuyaicunaca ‘tucui imatapish allita rurangapaj’ preparado cachunmi ayudan (2 Timoteo 3:16, 17). Pero Diospaj munai maijan cashcata yachangapajmi achcata esforzarina canchij (Efesios 5:17, NM). Chaipajca Indice de las publicaciones Watch Tower, Guía de estudio para los testigos de Jehová, Watchtower Library, INTERNETPI BIBLIOTECA Watchtower, JW Library nishca programacunatami alli utilizanata yachana canchij. Cai programacunahuanmi familiahuan yachacushpa o canlla yachacushpaca Bibliata alli estudiai tucungui.

18. ¿Imamantataj Dios mandashcacunata, Bibliapi tiyaj yuyaicunata catina canchij?

¹⁸ Dios mandashcacunata, Bibliapi tiyaj yuyaicunata catishpaca ashtahuan allimi causashun. Salmo 119:97-100-pica: “¡Quiquin mandashcataca ñucaca mashnatamari cꞌuyani! Chai mandashcaca punllanta ñuca cutin cutin yuyaricunallami. Quiquin mandashcacunahuanca ñucata pꞌiñajcunata yalli yachajtamari ñucataca rurashcangui. Chaicunaca ñucamantaca manataj anchunchu. Ima shina causanata quiquin yachachishcacunatamari cutin cutin yuyaricujlla cani. Chaimi ñucata yachachijcunatapish yalli intindini. Quiquin mandashcacunata huaquichishcamantaca yuyajcunata yallimari intindishcani” ninmi. Dios mandashcacunata, Bibliapi tiyaj yuyaicunata tucui shunguhuan yuyarishpaca imatapish alli yuyashpami rurashun. Ñucanchij concienciatapish allita ruranatami yachachishun. Chashnami: “Cristo ima shina cashcahuan junda canaman chayashun” (Efesios 4:13).