1. ¿Eclesiastés 7:20-pica Salomonca imatataj yachachirca?

 REY SALOMONCA: “Cai pachapica cashcata ruraj cashpapish, manataj ima juchata rurashpa, allillata rurashpa causajca, shujllapish mana tiyanchu” nircami. (Eclesiastés 7:20). Chaica ciertomi. Tucuicunami juchayujcuna canchij (1 Juan 1:8). Chaimantami Jehová Diospish, shujtajcunapish perdonachun minishtinchij.

2. ¿Shuj alli amigo perdonajpica ima shinataj sintirinchij?

² Maipica tucuicunami shuj alli amigota llaquichishcanchij. Pero paihuan apanacushpa catingapajmi shungumanta disculparishcanchij. Ñucanchij amigo perdonajpica cushillami sintirinchij ¿nachu?

3. ¿Cai yachaipica ima tapuicunallatataj cutichishun?

³ Tucuicunami Jehová Diospaj alli amigos casha ninchij. Pero huaquinpica pandarinchijllami. Chaimantami cai yachaipica cai catij tapuicunata yachashun. ¿Jehová Dios perdonasha nishcataca imamantataj seguros canchij? ¿Jehová Dios shina perdonaj ni pi mana tiyashcataca imamantataj crinchij? ¿Picunallatataj Jehová Diosca perdonan?

4. ¿Jehová Dios perdonasha nishcataca imamantataj seguros canchij?

⁴ Bibliapica Jehová Dios perdonangapaj listo cashcatami yachachin. Por ejemplo, Sinaí urcupica Jehová Diosca pai  ima shina cashcatami Moisesman parlarca. Paica: “Mandaj Dios, Mandaj Dios. Tucuita rurai tucuj Dios, llaquij, cꞌuyaj shungu, mana utca pꞌiñarij, yallitaj llaquij, mana llullaj Diosmi cani. Huaranga huaranga huahua huahuacunacama llaquicujllami cani. Millaita rurashcata, cꞌariyashcata, juchallishcata perdonajmi cani” nircami (Éxodo 34:6, 7). Caipi nishca shinaca Jehová Diosca cꞌuyaj, perdonajmi can. Chaimantami juchacunamanta arrepintirijpica perdonangapaj listo can (Nehemías 9:17; Salmo 86:15).

5. Salmo 103:13, 14-pi nishca shinaca ¿Jehová Diosca cada unota alli rijsishcamantaca imata rurangapajtaj listo can?

⁵ Jehová Diosca ñucanchijta rurashcamantami cada unota alli rijsin (Salmo 139:15-17). Ñucanchijcuna juchayuj huacharishcatapish allimi yachan. Ashtahuancarin ñucanchij tucui causaipi ima tucushcatapish allimi yachan. Chaimantami paica cada uno ima shina cashcataca alli intindin. Chashna ñucanchijta alli rijsishcamantami maipica pandarijpipish ñucanchijta perdonangapajca listo can (Salmo 78:39; Salmo 103:13, 14-ta liyipai). Caita yachashpaca cushillami sintirinchij.

6. ¿Jehová Diosca perdonangapaj listo cashcataca ima shinataj ricuchishca?

⁶ Jehová Diosca Adanpaj culpamanta juchayujcuna tucushcata, huañuna cashcatapish allimi yachan (Romanos 5:12). Huañuimanta, juchamanta quishpiringapajca pipish imata mana rurai tucunchijchu (Salmo 49:7-9). Pero Jehová Diosca ñucanchijta llaquishcamantami quishpichinata munarca. Chaimantami Juan 3:16-pica, Jehová Diosca paipaj Churita ñucanchijmanta huañuchunmi cacharca nin (Mateo 20:28; Romanos 5:19). Jesús ñucanchijmanta huañushcamantami paipi feta churajcunaca quishpirina oportunidadta charinchij (Hebreos 2:9). Pero caita yuyashunchij. ¿Jehová Diosca paipaj cꞌuyashca Churi sufricujta, llaquinaita huañucujta ricushpaca ima shinashi sintirishcanga? Dimastij llaquillami sintirishcanga. Pero ñucanchij juchacunata perdonangapajmi Jehová Diosca paipaj cꞌuyashca Churi huañuchun saquirca. Chashnami ñucanchijta perdonangapaj listo cashcata ricuchirca.

7. ¿Cai parrafopi ricushca shinaca Jehová Diosca picunallatataj perdonarca?

 ⁷ Bibliapica Jehová Dios huaquincunata perdonashcatami ricuchin (Efesios 4:32). Canca rey Manasespichari yuyacungui. Rey Manasesca Diospaj ñaupajpica yallitaj millaitami rurarca. Paica yanga dioscunata adorachunmi animarca. Yanga dioscunata adorangapajpish paipaj huahuacunatami rupachirca. Qꞌuipacarin Diosta adorana huasipipish shuj yanga diostami churarca. Chaimantami Bibliapica: ‘Manasesca Mandaj Diospaj ñaupajpi chashna jatun millaita rurashpami, Diostaca yallitaj pꞌiñachirca’ nin (2 Crónicas 33:2-7). Pero Manasés shungumanta arrepintirijpica Jehová Diosca paitami perdonarca. Pai cutin rey tucuchunpishmi saquirca (2 Crónicas 33:12, 13). Rey Davidpipish yuyashun. Paica shuj huarmihuanmi huainayarca, chai huarmipaj cusatapishmi huañuchirca. Pero rey David chai juchacunamanta shungumanta arrepintirijpimi Jehová Diosca perdonarca (2 Samuel 12:9, 10, 13, 14). Cai ejemplocunapi ricushca shinaca Jehová Diosca perdonangapajmi listo can. Cunanca Jehová Dios shina perdonaj ni pi mana tiyashcata ricushun.

8. ¿Jehová Dios alli Juez cashcata, perdonaj cashcataca ima shinataj yachanchij?

⁸ Jehová Diosca tucui cai pachapaj Juezmi can (Génesis 18:25). Shuj alli juezca leycunataca allimi rijsina can. Jehová Diospish ñucanchijman cushca mandashcacunataca allimi rijsin. Imacuna alli cashcata, imacuna mana alli cashcatapish allimi rijsin. Chaimantami paica alli Juez can (Isaías 33:22). Shinallataj shuj alli juezca ima tucushcata alli yachashpami juzgana can. Jehová Diosca tucuita alli yachashcamantami ñucanchijta alli juzgashpa perdonai tucun.

9. ¿Jehová Diosca perdonanata o mana perdonanata decidingapajca imacunallatataj alli yachan?

⁹ Jehová Diosca runacuna shinaca mana juzganchu. Paica ima tucushcata alli yachashpami ñucanchijta juzgan (Génesis 18:20, 21; Salmo 90:8). Jehová Diosca ñahuita ricushpallaca mana juzganchu. Paica ñucanchijcuna ima shina cashcata, ima shina huiñashcata, ñucanchij causaipipish ima tucushcata yachashpami juzgan. Ashtahuancarin paica ñucanchij shunguta, ñucanchij yuyaitapishmi alli rijsin (Hebreos 4:13). Chaimantami Jehová Diosca alli ricushpa, alli juzgashpa pitapish perdonan.

10. ¿Jehová Dios alli juzgaj cashcataca ima shinataj yachanchij?

¹⁰ Jehová Diosca tucuicunatami alli juzgan. Ñahuita ricushpallaca mana juzganchu. Diosca charijcunata, pobrecunata, yachajcunatapish, tucuicunatami igual juzgan (1 Samuel 16:7; Santiago 2:1-4). Jehová Diostaca ñucanchijta perdonachunca mana obligai tucunchijchu, cullquitapish mana cui tucunchijchu (2 Crónicas 19:7). Paica pꞌiñarishpallaca pita mana juzganchu. Ashtahuanpish perdonana cashpaca perdonanmi. Mana cashpaca castiganmi (Éxodo 34:7). Jehová Diosca ñucanchijta alli rijsishcamantami alli juzgai tucun (Deuteronomio 32:4-ta liyipai).

11. ¿Jehová Dios shina perdonaj ni pi mana tiyashcataca ima shinataj yachanchij?

¹¹ Antiguo Testamentopica Jehová Dios shina perdonaj ni pi mana tiyashcatami intindichin. Shuj libropica: ‘Antiguo Testamentotaca hebreo rimaipimi quillcashca carca. Chai shimipica Dios perdonanamanta parlacushpaca, Jehová Dioslla tucui ñucanchij  juchacunata perdonai tucushcatami nisha nirca. Cutin runacunaca mana tucui juchacunata perdonai tucunchijchu’ ninmi. Caipi nishca shinaca Jehová Diosllami arrepintirijpica tucui ñucanchij juchacunata perdonai tucun. Caita yachashpaca dimastij cushillami sintirinchij.

12, 13. a) ¿Jehová Dios perdonashcata crishpaca ima shinataj sintirinchij? b) ¿Jehová Dios perdonashpaca ñucanchij juchacunataca cutinchu yuyarin?

¹² Jehová Dios ñucanchijta perdonashcata tucui shunguhuan crishpaca cushillami sintirinchij. Yuyaipipish, shungupipish tranquilomi sintirinchij. Jehová Dios perdonajllapimi chashna sintirinchij (Hechos 3:19). Jehová Diosca ñucanchijta perdonashpami paipaj amigos tucuchun saquin. Dios perdonajpica paipaj ñaupajpica ima juchata mana rurashca shinami canchij.

¹³ Jehová Diosca pitapish perdonashpaca paipaj juchacunatami cungarin. Juchacunamantapish mana castigacunllachu (Isaías 43:25; Jeremías 31:34). Salmo 103:12-pica: ‘Diosca inti llujshinatapish, inti huashicunataca carupimi churarca. Ñucanchij juchacunatapish chai shinallatajmi ñucanchijmanta anchuchishpa caruyachin’ ninmi. * Caita yachashpaca Jehová Diostami achcata agradicinchij. Shungumantapishmi paita adorasha ninchij (Salmo 130:4). Pero ¿Jehová Diosca picunallatataj perdonan?

14. ¿Jehová Dios perdonaj cashcataca ima shinataj yachanchij?

¹⁴ Ña ricushca shinaca jatun juchata rurashpa shungumanta arrepintirijpica Jehová Diosca ñucanchijtami perdonan. Paica ñucanchij shunguta, ñucanchij yuyaita alli rijsishcamantami perdonanata o mana perdonanata decidi tucun. ¿Jehová Diosca ñucanchijta perdonangapajca imallatataj ricun?

15. Lucas 12:47, 48-pi nishca shinaca ¿Jehová Diosca perdonanata o mana perdonanata decidingapajca imatataj ricun?

¹⁵ Jehová Diosca ñucanchijcuna imamanta juchata rurashcatami ricun. Maijancunaca mana allita ruracushcata yachashca jahuami mana allita rurancunalla. Jesús  nishca shinaca paicunataca Jehová Diosca manachari perdonanga (Lucas 12:47, 48-ta liyipai; Marcos 3:29; Juan 9:41). Pero tucuicuna juchayujcuna cashcamantami, maipica imata mana rurana cashpapish chaita rurashcanchijlla. ¿Chashna pandarijpica Jehová Diosca perdonangachu? Ari, perdonanmi. Pero Jehová Dios perdonachunca imata rurana cashcata ricushunchij.

16. a) ¿Shungumanta arrepintirishcataca ima shinataj ricuchinchij? b) ¿Imamantataj arrepintirina canchij?

¹⁶ Jehová Diosca ñucanchijta perdonangapajca shungumanta arrepintirishcata o mana arrepintirishcatami ricun. ¿Shungumanta arrepintirishcataca ima shinataj ricuchinchij? Shungumanta arrepintirishpaca ñucanchij yuyaipipish, shungupipishmi cambiana canchij. Chaipajca alli yuyaicunata, Jehová Diospajman cꞌuchuyana munaitapishmi charina canchij. Shungumanta arrepintirishpaca mana allicunata rurashcamanta o alli cosascunata mana pajtachishcamantami dimastij llaquilla sintirinchij. Ashtahuancarin Jehová Diosmanta caruyashcata yachashcamantami shungupipish achcata llaquirinchij. Rey Manasespi y rey Davidpi yuyashunchij. Paicuna jatun juchacunata rurajpipish shungumanta arrepintirishcamantami Jehová Diosca paicunata perdonarca (1 Reyes 14:8). Jehová Dios ñucanchijtapish perdonachunca arrepentidos cashcatami ricuchina canchij. Pero mana llaquirishpallachu saquirina canchij. Ashtahuanpish ñucanchij ruraicunahuanpishmi arrepentidos cashcata ricuchina canchij. * Caimanta yachashpa catishun.

17. Isaías 55:7-pi nishca shinaca ¿Jehová Dios perdonachunca imatataj rurana canchij?

¹⁷ Jehová Diosca ñucanchijta perdonangapajca mana allicunata saquishcata, pai munashca shina causangapaj esforzaricushcatapishmi ricun (Isaías 55:7-ta liyipai). Shungumanta arrepintirishpaca ñucanchij yuyaita mushujyachingapajmi cada punlla esforzarina canchij (Romanos 12:2; Efesios 4:23). Mana alli yuyaicunatapish, mana alli ruraicunatapishmi saquina canchij (Colosenses  3:7-10). Pero Dios ñucanchijta perdonachunca ashtahuantajca Jesús ñucanchijmanta huañushcapimi feta churana canchij (1 Juan 1:7). Jehová Diosca ñucanchijcuna mana allicunata saquingapaj esforzaricujta ricushpapishmi perdonanga.

18. ¿Jehová Dios shina perdonaj pi mana tiyashcataca imamantataj crinchij?

¹⁸ Cai yachaipi imata yachashcata yuyarishunchij. Ña ricushca shinaca Jehová Dios shina perdonajca ni pi mana tiyanchu. ¿Imamantataj chashna ninchij? Jehová Diosca ñucanchijta perdonangapajca listomi can. Shinallataj ñucanchij shunguta, ñucanchij yuyaitapish alli rijsishcamantami ñucanchijcuna arrepentidos cashcata ricui tucun. Ashtahuancarin Jehová Diosca perdonashpaca ñucanchij juchacunata ña mana cutin cutin yuyaricunllachu. Chaimantami Diospaj ñaupajpi alli ricurishpa tranquilos sintiri tucunchij.

19. ¿Juchayujcuna cashpapish imamantataj cushilla sintirina canchij?

¹⁹ Tucuicunami juchayujcuna canchij. Pero Perspicacia nishca libropi volumen 1, página 209-pica: “Juchayujcuna cashcamantami maipica cutin cutin pandarinchijlla. Pero Jehová Diosca ñucanchijta llaquishpami perdonan. Chaimanta maipica pandarishpapish mana llaqui llaquilla purinachu canchij (Salmo 103:8-14; 130:3). Chaipaj randica Jehová Diosta sirvingapaj esforzaricushcamantami contentos sintirina canchij” ninmi (Filipenses 4:4-6; 1Juan 3:19-22).

20. ¿Catij yachaipica imatataj yachashun?

²⁰ Jehová Dios ñucanchijta perdonangapaj listo cashcamantami achcata agradicinchij. Pero ¿ñucanchijpish shujtajcunata perdonangapajca imatataj rurana canchij? ¿Jehová Diospaj perdonca ñucanchijpaj perdonhuanca igualchu can? ¿Caitaca imamantataj intindina canchij? Cai tapuicunataca cai catij yachaipimi yachashun.