DIOS cushca allpapi causaj israelitacunaca allpata yapuna, tarpuna tiempo chayajpica huata ña callarishcatami yachajcuna carca. Chaica septiembre o octubre quillapimi carca.

Israelitacunaca cada quilla ima punlla callarina cashcata yachangapajmi Lunata ricujcuna carca. Shinallataj cada huata ima punlla tucurina cashcata yachangapajpishmi Intita ricujcuna carca. Chaimantami israelitacunapajca cada quillaca 29 o 30 punllacunata charirca. 12 quillacunapica 360 o menos punllacunami tiyarca. Chaimi catij huata tarpuna tiempollapitaj callarichun, israelitacunaca huaquinpica chai huatata ashtahuan punllacunata o shuj quillata mirachijcuna carca.

Shinallataj Moisés causashca tiempopica Jehová Diosca israelitacunataca Diospaj fiestacunata rurachunmi cada huatata nisán (abib) quillapi callarichichun mandarca. Nisán quillaca huatapaj callari quillami tucurca. Chai quillaca marzo o abrilpimi urmarca (Éxodo 12:2; 13:4). Chai quillapica israelitacunaca cebadamanta punta pꞌucushca granocunata cozichana jatun fiestatami rurana carcacuna (Éxodo 23:15, 16).

Emil Schürer historiamanta yachaj runaca: “Nisán quillaca primavera punllacunapi llullu luna ricurijpimi callarij carca. Israelitacunaca Pascua fiestataca 14 de Nisán punllapimi rurana carca. Chai punllapica Luna llenami tiyarca. Ña huata tucurigrijpimi israelitacunaca Pascua fiestata rurana punlla ima fechapi urmagrishcata ricujcuna carca. Chai Pascua punlla, primavera punllacunapi mana urmagrishcata ricushpaca, chai huatataca shuj quillahuanmi mirachijcuna carca” ninmi (Historia del pueblo judío en tiempos de Jesús 175 a. C. - 135 d. C., traducción de J. Cosgaya y A. Piñero).

Testigo de Jehovacunapish Jesús huañushcata yuyarina tandanacuitaca 14 de Nisán punllapimi ruranchij. Chaica marzo o abril quillapimi urman. 14 de Nisán punlla ima fechapi urmagrishcata yachangapajmi israelitacuna rurashca shinallataj alli ricunchij. Ima fecha cashcata yachashpaca tucui testigo de Jehovacunamanmi huillanchij. *

Cunan punllacunapica shuj calendariopi ricushpa o ñucanchij celularpi ricushpaca ima punllapi cashcatami yachanchij. Pero ñaupa tiempopica israelitacunapajca mana chashnallataj jahuallachu carca.

Noé causashca tiempopica cada quillaca 30 punllacunatami charirca (Génesis 7:11, 24; 8:3, 4). Qꞌuipaca israelitacuna causashca tiempopica ña mana tucui quillacunachu 30 punllacunata charirca. Ashtahuanpish llullu luna ricurijpimi quillaca callarirca. Chaimantami cada quillaca 29 o 30 punllacunata charirca.

Shuj cutinca Davidpish, Jonatanpish cayandij punlla mushuj quilla callarigrishcata ricuchingapajca: “Cayaca llullu lunamari” nircacunami (1 Samuel 20:5, 18). Caipi ricushca shinaca chai tiempopajca gentecunaca llullu lunata manaraj ricushpapish catij quilla ima hora callarigrishcatami yachajcuna cashca yuyachin. Cutin Misná nishca libropica Babiloniamanta Jerusalenman tigrashpaca quillacuna ima hora callarigrishcata israelitacuna ima shina yachashcatami parlan. Misná nishca libropica judiocunapaj costumbrecuna, leycunapishmi tiyan. Chai tiempopica Sanedrinpi sirvij sacerdotecunaca huaquinpica quillapaj tucuri punllapi tandanacushpami catij quilla ima hora callarigrishcata ricujcuna carca. Pero ¿paicunaca imata ricushpataj chaita yachajcuna carca?

Sacerdotecunaca cielopi llullu luna ricurishcata o mana ricurishcata ricuchunmi huaquin runacunata Jerusalenpi tiyaj urcucunaman cachajcuna carca. Chai runacuna llullu luna tiyashcata sacerdotecunaman nijpica sacerdotecunaca mushuj  quilla ña callarishcatami tucuicunaman huillajcuna carca. Pero pꞌuyucunamanta luna mana ricurijpica sacerdotecunaca: “Cai quillaca 30 punllacunatami charishca. Caya punllami mushuj quillaca callaringa” nishpami huilladorcuna carca.

Sanedrinpi sirvij sacerdotecunaca mushuj quilla callarishcata tucui israelitacuna yachachunmi olivocuna tiyan urcupi, shujtaj urcucunapipish ninata japichijcuna carca. Qꞌuipaca ninata japichinapaj randica huaquin runacunata tucuicunaman huillachunmi cachajcuna carca. Mushuj quilla callarishcata yachashpaca tucui israelitacunaca Dios nishca punllacunallapitajmi Diospaj fiestacunata rurajcuna carca.

Urapi tiyaj recuadropica israelitacuna ima quillacunapi fiestacunata ruraj cashcata, ima quillacunapi rupai, chiri, tamya tiyashcatapishmi ricuchin.