1. ¿Chingarishca oveja cutin tigrajpica Jehová Diosca ima shinataj sintirin?

PASAJ yachaipi ricushca shinaca Jehová Diosca paillatajmi shuj alli michijhuan chꞌimbapurarin. Chingarishcacunapish paipajman tigrachunmi mashcan. Shuj cutinca israelitacuna paimanta caruyajpimi Jehová Diosca: “Ñucapajman tigramuichij, ñucapish cancunapajman tigrashami” nirca. Cunan punllacunapish Diosca chashnallatajmi sintirin. Paica: “Ñucaca manataj shujtajyanichu” nircami (Malaquías 3:6, 7). Shinallataj Jesusca chingarishca oveja tigrajpica Jehovapish angelcunapish cushillami sintirin nircami (Lucas 15:10, 32).

2. ¿Cai yachaipica imallatataj yachashun?

² Cai yachaipica Jesús parlashca quimsa chꞌimbapuraicunamantami yachashun. Caicunapica Jehovamanta caruyashcacunata paipajman tigrachun ima shina ayudanatami ricushun. Imalla cualidadcunata minishtishcatapishmi yachashun. Diosmanta caruyashcacunata ayudashpaca cushilla sintirinatapishmi yachashun.

3, 4. Lucas 15:8 al 10-pi parlashca huarmica ¿imamantataj dracma cullquita mashcangapajca esforzarirca?

³ Jehovapajman tigranata munajcunata mashcangapajca achcatami esforzarina canchij. Lucas libropica Jesusca shuj huarmi dracma cullquita chingachishcatami parlan. Chai cullquica achcami valij carca. Cai chꞌimbapuraipi nishca shinaca cai huarmica cullquita mashcangapajmi achcata esforzarirca (Lucas 15:8-10-ta liyipai).

⁴ Jesús causashca punllacunapi, judía huarmicuna cazarana punllapica paicunapaj mamacunaca 10 dracma cullquicunatami cujcuna carca. Jesús parlashca huarmica paipaj mama cushca dracma cullquitami chingachishcanga. Cullqui pambapi  urmajta yuyashpami shuj lamparata japichishpa mashcan. Pero lámpara mana tucuita achijyachishcamantachari dracma cullquitaca mana japi tucun. Chaimantami paica huasi ucuta tucui pꞌichan. Pꞌichashca huashaca allpata tandachicushpachari chai chaupipica achijlla dracma cullquita japin. Cai huarmica cushilla sintirishpami amigacunata, vecinacunata cayashpa paipaj dracma cullquita japishcata huillan.

5. ¿Diosmanta caruyashcacunata mashcanaca imamantataj sinchi can?

⁵ Jesús parlashca chꞌimbapuraipica ima chingarishcata mashcangapajca achca esfuerzo minishtirishcatami intindichin. Diosmanta caruyashcacunata mashcangapajpish chashnallatajmi tucuita rurana canchij. Paicunaca achca huatacunatachari huauqui panicunahuan mana tandanacuncuna. Mana cashpaca shujtaj llajtapi causanaman rishcamantachari chaipi causaj huauquicunaca paicunataca mana rijsin. Pero maijancunaca cunanllatajchari Yayitu Diospajman tigranata munancuna. Paicunaca Diosta huauqui panicunahuan tigra sirvinatami munancuna. Pero paicunaca ñucanchij ayudachunmi minishtincuna.

6. ¿Diosmanta caruyashcacunata mashcangapajca ima shinataj ayudai tucunchij?

⁶ ¿Diosmanta caruyashcacunataca picunallataj mashcashpa ayudai tucuncuna? Congregacionmanta tucui publicadorcuna, familiacuna, ancianocuna, precursorcunapishmi ayudai tucuncuna. ¿Cambaj amigo o familiaca Diosmantachu caruyashca? ¿Huasin huasin huillacushpa o carritohuan huillacushpa Diosmanta caruyashcacunahuan tupashpaca imatataj rurana cangui? Diosmanta caruyashca huauqui o pani paita visitachun munajpica, “¿Can cusha nishca numerota o direccionta ancianocunaman cui tucunichu?” nishpami tapuna cangui. Pero cai datocunata ancianocunaman manaraj huillashpaca ñucanchij llajtapi gobiernocuna caicunamanta imata yuyashcatami alli ricuna canchij.

7. ¿Huauqui Thomasmantaca imatataj yachanchij?

⁷ Jehovapajman tigrasha nijcunata ayudangapajca ancianocunaca ¿imatataj rurana can? Españapi causaj Thomas * shuti ancianomanta parlashun. Paica Diosmanta caruyashca 40 yalli Testigocunatami Diospajman tigrachun ayudashca. Thomasca: “Puntapica huaquin huauqui panicunatami ¿Diosmanta caruyashcacuna maipi causashcata yachanguichijchu? nishpa tapuni. Huaquinpica publicadorcunatami ¿picunataj tandanacuiman ña mana shamucuj yuyachin? nishpa tapuni. Huauqui panicunaca Jehová Diosmanta caruyashcacunata mashcashpa ayudaichij nijpica cushillami ayudancuna. Qꞌuipaca Diosmanta caruyashca huauquita o panita visitashpaca paicunapaj huahuacunamanta o familiamantami tapuni. Diosmanta manaraj caruyashpaca maijancunaca paicunapaj huahuacunataca tandanacuicunamanmi apajcuna carca. Tal vez cai huahuacunaca publicadorcunami tucushcanga. Paicunatapishmi Diospajman tigrachun ayudai tucunchij” ninmi.

8. Lucas 15:17 al 24-pi nishca shinaca ¿shuj yayaca paipaj churi arrepintirijpica ima shinataj tratarca?

⁸ ¿Jehová Diosmanta caruyashcacunata paipajman tigrachun ayudangapajca imalla cualidadcunatataj charina canchij? Jesusca shuj churi huasimanta llujshishpa rishcatami parlarca. Cai chꞌimbapuraimanta imata yachai tucushcata ricushun (Lucas 15:17-24-ta liyipai). Jesús nishca shinaca cai jovenca mana allita rurashcata cuentata cushpami huasiman  tigran. Paipaj yayaca paipaj churi tigramujpica ugllashpami chasquin. Chashnami paipaj churita cꞌuyashpa catishcata ricuchin. Cai jovenca pandarishcapi yuyashpami, “ñucaca ña mana cambaj churitaj shinachu cani” nishpa nin. Paipaj churi shungumanta arrepintirishcata ricushpami yayaca cꞌuyaihuan tratan. Chaimantami paipajta rurajcunataca jatun fiestata ruraichij, tucuimanta yalli alli churanata churachichij nishpa mandan. Chashnami yayaca mana shuj trabajadorta shina tratashcata ricuchin. Ashtahuanpish shuj cꞌuyashca churita tratashcata shinami ricuchin.

9. ¿Diosmanta caruyashcacunata ayudangapajca ima cualidadcunatataj charina canchij? (“ ¿Diospajman tigrasha nijcunataca ima shinataj ayudai tucunchij?” nishca recuadrota ricui).

⁹ Jehová Diosca cai chꞌimbapuraipi parlashca yaya shinami can. Paimanta caruyashcacunataca achcatami cꞌuyan. Paipajman tigrachunpishmi munan. Paipaj ejemplota catishpami paicunata ayudai tucunchij. Chaipajca pacienciata, cꞌuyaitami charina canchij. Paicuna ima shina sintirishcatapish intindinami canchij. ¿Imamantataj cai cualidadcunata charinaca minishtirin? ¿Cai cualidadcunataca ima shinataj ricuchina canchij?

10. ¿Diosmanta caruyashcacunata ayudangapajca imamantataj pacienciata minishtinchij?

¹⁰ Diosmanta caruyashcacunaca Diospajman tigrangapajca tiempotami minishtincuna. Chaimantami paicunata ayudangapajca pacienciata charina canchij. Maijancunaca congregacionman tigrachun huauqui panicuna, ancianocunapish cutin cutin visitashcatami yuyarincuna. Asia llajtamanta Nancy shuti panica cashna nispami escribin. Paica: “Congregacionmanta shuj ñañaca ñuca minishticun horaspimi achcata ayudarca. Ñucataca punta  ñañata shinami cꞌuyarca. Paihuan sumajta pasashcatami yuyachij carca. Ñuca ima shina sintirishcata parlajpica pacienciahuanmi uyaj carca. Imapipish consejana cajpica utcami consejarca. Chashnami ñuca alli amiga cashcata ricuchirca” ninmi.

11. ¿Llaquilla o pꞌiñarishca cajcunata intindingapaj esforzarinaca imamantataj alli can?

¹¹ Maijancunaca resentirishca cashcamantami shuj chugririshca shina can. Pero paicuna ima shina sintirishcata intindishpaca shuj pomada jambita churacuj shinami alli sintirichun ayudashun. Huaquincunaca congregacionpi shuj huauqui o pani paicunata llaquichijpimi achca huatacunata resentirishca can. Chaimantami Diospajmanca mana tigrasha nincuna. Maijancunaca paicunata yangamanta rimashcata o mana alli tratashcatami yuyancuna. Chaimi paicuna parlashcata uyachun, ima shina sintirishcata intindichun minishtincuna (Santiago 1:19). María shuti panica Diosmantami asha tiempota caruyashca carca. Paica: “Ñucaca pi uyachun, ñucata animachun, consejotapish cuchunmi minishtircani” ninmi.

12. ¿⁠Jehová Diospaj cꞌuyaitaca imamantataj shuj huascahuan chꞌimbapuran?

¹² Bibliapica Jehová Diospaj cꞌuyaitaca shuj huascahuanmi chꞌimbapuran. ¿Imamanta? Cai ejemplopi yuyashun. Canchari shuj jatun jutcupi urmangui. Can chai jatun jutcumanta llujshichunca pichari shuj huascata shitashpa cantaca allimanta llujchichun minishtirin. Jehová Diosca israelitacunamantaca: “Ñucaca paicunataca cꞌuyaihuanmi huascahuan huataj shina pushamurcani” nircami (Oseas 11:4). Huaquincunaca yallitaj llaquicunapi, problemacunapi urmashcamantami imata ruranata mana yachashpa Diostaraj sirvinata  saquishcacuna. Pero Yayitu Diosca paicunatapishmi cꞌuyaihuan ayudasha, pushamusha nin. Chaimantami Diosca paicunata achcata cꞌuyashcata intindichun munan. Paicunata cꞌuyashcata ricuchingapajca ñucanchijtami cachai tucun.

13. ¿Diosmanta caruyashcacunaman cꞌuyaita ricuchijpica paicunaca imatataj rurangacuna? Shuj ejemplomanta parlai.

¹³ Diosmanta caruyashcacunataca Jehovapish ñucanchijpish cꞌuyashcatami yuyachina canchij. Pasaj yachaipica huauqui Pablomantami yacharcanchij. Paica 30 huatacunata yallimi Diosmanta caruyashca carca. Pabloca: “Shuj punllaca huasimanta ricushpami shuj mayorlla panihuan tuparcani. Paica ñucata saludashpami cꞌuyaihuan parlarca. Chaimantami shuj huahua shina huacai callarircani. Diosmi ñucahuan parlachun cantaca cachashca yuyachin nishpami nircani. Chai horasmantami Jehovapajman tigranataca decidircani” ninmi.

14. Lucas 15:4, 5-pi nishca shinaca ¿shuj michijca paipaj oveja chingarishcata japishpaca imatataj ruran?

¹⁴ Diosmanta caruyashcacuna congregacionman tigrajpica paicunata animashpa, ayudashpami catina canchij. Paicunaca chingarishca jovenmanta Jesús parlashca shinami llaquilla sintirincuna. Shinallataj Diosmanta caruyashcamantami espiritualmenteca mana sinchi can. Chaimi paicunapaj fe sinchiyachun ayudana canchij. Jesús nishca shinaca shuj michijca paipaj chingarishca ovejata mashcangapajca tiempota, fuerzatami surcun. Cai ovejita fuerza illaj cashcamantami michijca paipaj rigrapi apashpa caishuj ovejacunahuan tandachin (Lucas 15:4, 5-ta liyipai).

15. ¿Fuerza illajcuna Diospajman tigrachunca imatataj rurana canchij? (“ Valishca ayuda” nishca recuadrota ricui).

¹⁵ Huaquincunapajca cutin Diosta sirvinaca sinchimi can. Chaimantami paicuna espiritualmente  sinchi cachunca ñucanchij fuerzahuan, tiempohuan ayudana canchij (Romanos 15:1). Paicunata ayudangapajca Diospaj espíritu santota, paipaj Shimita, publicacioncunatapishmi charinchij. Achca experienciata charij shuj ancianoca: “Diosmanta caruyashcacuna congregacionman cutin tigrashpaca Bibliamanta yachachichunmi minishtincuna” ninmi. * Diosmanta caruyashcacuna congregacionman tigrajpica ancianocunaca cai huauquita o panita ayudachunmi mañangacuna. Chaipica cushillami ayudana canchij. Cai ancianollatajmi: “Congregacionman cutin tigrajcunaca alli amigocunata, paicunapi confianalla cajcunatami minishtincuna” ninmi.

16. ¿Ima shinataj angelcuna ayudacushcataca yachanchij?

¹⁶ Diosmanta caruyashcacunata taringapajmi angelcunaca achca huauqui panicunata ayudashca (Apocalipsis 14:6). Por ejemplo, Ecuador llajtamanta Silvio shuti huauquica Jehová Diostami congregacionman tigrangapaj ayudahuai nishpa mañarca. Pai mañacuj ratomi ishqui ancianocunaca paipaj huasiman chayarca. Shinallataj chai ratomi paitaca cushilla ayudarcacuna.

17. ¿Diosmanta caruyashcacunata ayudashpaca ima shinataj sintirinchij?

¹⁷ Diosmanta caruyashcacunata Diospajman tigrachun ayudashpaca cushillami sintirinchij. Salvador shuti precursor ima nishcapi yuyashun. Paica Diosmanta caruyashcacunata ayudangapajca achcatami esforzarin. Salvadorca: “Jehová Diosca paimanta caruyashcacunataca Diablopaj mundomantami llujshichun ayudashca. Cai huauqui panicunata Diospajman tigrachun ayudashpa, Dioshuan trabajashcamantami cushilla sintirini” ninmi (Hechos 20:35).

18. ¿Diosmanta caruyashca cashpapish imatataj yuyarina cangui?

¹⁸ Can congregacionmanta caruyashca cajpipish Jehová Diosca cantaca cꞌuyashpami catin. Paipajmanpish cutin tigramuchunmi munan. Chaipajca canllatajmi esforzarina cangui. Jesús parlashca yayatami yuyarina cangui. Jehová Diosca chai yaya shinami canpish paipaj puebloman tigrachun shuyacun. Paica cantaca cushicushpami chasquinga.