1. ¿Jehová Diosca cada unomantaca imatataj rurashca?

JEHOVÁ DIOSCA cada unotami paipaj puebloman pushamushca (Juan 6:44). Paica alli shungu gentecunata mashcacushpaca cai muyundij Allpapi millones gentecunapuramantami ñucanchijta paita sirvichun agllashca (1 Crónicas 28:9). Chaimantami paica ñucanchijta alli rijsin, intindin, cꞌuyan. ¿Manachu caita yachashpaca cushilla sintirinchij?

2. ¿Jesusca Jehová Dios cada unota cꞌuyashcata yachachingapajca ima ejemplotataj churarca?

² Jehová Diosca canta, tucui huauqui panicunatami achcata cꞌuyan. Caita alli intindichingapajca Jesusca cai ejemplotami churarca. Paica: “¿Shuj michij runaca paipaj 100 ovejacunapuramanta shuj oveja chingarijpica imatashi ruranga? ¿Manachu japingacama mashcanga?” nircami. Michijca ovejata japishpaca mana pꞌiñarinchu. Ashtahuanpish dimastijmi cushicun. ¿Caimantaca imatataj yachanchij? Jehová Diospajca cada unomi tucuimanta yalli valishca can. Chaimantami Jesusca: ‘Jahua pachapi caj cancunapaj Yayapish, cai uchillacunamanta shujllapish chingarichunca manataj munanchu’ nirca (Mateo 18:12-14).

3. ¿Cai yachaipica ima tapuicunatataj yachashun?

³ Ñucanchij huauqui panicunataca manataj llaquichisha ninchijchu. Chaimantami cai yachaipica cai tapuicunata yachashun. ¿Shujtajcunata ama ñitcachingapajca imatataj rurana canchij? ¿Shujtajcuna ñucanchijta llaquichijpipish imatataj  rurana canchij? Pero caita manaraj yachashpami Mateo 18-pi Jesús parlashca uchillacunamanta yachashun.

4. ¿Jesús parlashca uchillacunaca picunataj can?

⁴ Jesús parlashca uchillacunaca cai muyundij Allpamanta paita catijcunami can. Paicunaca ima edad cashpapish, mai lugarmanta cashpapish, ima culturamanta cashpapish huahuacuna shinami Jesús paicunaman yachachichun saquincuna. Shinallataj Jesuspimi feta churancuna (Mateo 18:3). Chaimantami Jesusca tucui paicunataca achcata cꞌuyan (Mateo 18:6; Juan 1:12).

5. ¿Jehová Diosca paita sirvijcunata llaquichijpi, ñitcachijpica ima shinataj sintirin?

⁵ Jehová Diosca tucui huauqui panicunataca cꞌuyashca huahuacunata shinami ricun. Caipi yuyashunchij. Huahuacunaca ñucanchijpajca achca valishcami can. Huahuacuna ima fuerzata o ima experienciata mana charishcamanta, jatuncuna shina imatapish mana yuyashcamantami paicunataca cuidanchij. Chaimanta huahuacunata pi llaquichijpica chai llaquichijcunahuanmi achcata pꞌiñarinchij. Jehová Diospish chashnallatajmi paita sirvijcunataca cuidasha nin. Chaimantami pi paicunata llaquichijpi o ñitcachijpica paipish achcata pꞌiñarin (Isaías 63:9; Marcos 9:42).

6. 1 Corintios 1:26 al 29-pi nishca shinaca ¿cai mundopaj gentecunaca Jesusta catijcunamantaca imatataj yuyancuna?

⁶ ¿Jesusta catijcunaca imallapitaj uchilla huahuacuna shina can? Cai mundopi tiyaj gentecunapajca cullquiyujcuna, famosocuna, autoridadta charijcunami valishca can. Pero casi la mayoría Diosta sirvijcunaca mana chashnachu can. Chaimantami cai mundopaj gentecunaca Jesusta catijcunataca uchillacunata shina, imapaj mana valijcunata shina ricuncuna (1 Corintios 1:26-29-ta liyipai). Pero Jehová Diospajca Jesusta catijcunaca valishcami can.

7. ¿Jehová Diosca paita sirvijcunataca ima shinataj tratachun munan?

⁷ Jehová Diosca achca huatata paita sirvijcunatapish ashalla huatacunata paita sirvijcunatapish tucuicunatami cꞌuyan. Ñucanchijpish tucui huauqui panicunamanmi cꞌuyaita ricuchina canchij (1 Pedro 2:17). Huauqui panicunata cꞌuyashcamantami paicunata cuidangapaj esforzarina canchij. Chaimanta shuj huauquita o panita llaquichishca cashpaca ‘paica ratomi resintirin, ima tucushcataca cungarinallami can’ nishpaca mana yuyanachu canchij. ¿Imamantataj huaquincunaca rato resintirincuna? Huaquincunaca uchillaraj cashpa ima problemacunata charishcamantami shujtajcunata menos cashcata yuyancuna. Cutin maijancunaca cunanllami Diospaj pueblopi cancuna. Chaimantami huauqui panicuna pandarijpica paicunata perdonanaca sinchi can. Ima laya cajpipish paicunahuan alli tucungapajmi esforzarina canchij. Pero maijanpish rato resintirijlla cashpaca chaipi mejorana cashcatami cuentata cuna can. Chaita rurashpaca paipish cushillami sintiringa, shujtajcunatapishmi cushichinga.

8. ¿Apostolcuna causashca punllacunapica gentecunaca ima layataj carca?

⁸ Jesuspaj discipulocunaca Jesustaca: “Jahua pachamanta mandacujpica ¿maijanshi jatun cashun?” nishpami tapurcacuna. Chaimi Jesusca: ‘Huahuacuna shinami cana canguichij’ nirca (Mateo 18:1). Apostolcuna causashca punllamanta parlashpaca shuj yachaj runaca: “Chai punllapi caj judiocunaca  paicunata alabachun, jatunyachichun, famoso cashcata shina ricuchun, paicunata respetachunmi munajcuna carca” ninmi.

9. ¿Jesusta catijcunaca imata rurangapajtaj esforzarina carca?

⁹ Achca judiocunaca shujtajcunata yalli cashcatami yuyajcuna carca. Chaimi Jesusca paita catijcuna humilde cangapaj esforzarina cashcata alli yacharca. Paica: “Cancunapurapi maijan alli nishca cajca, tucuimanta yalli qꞌuipa huiñai shinalla caichij. Tucuicunata mandajca, paicunapajta ruraj caichij” nircami (Lucas 22:26). Ñucanchijpish huahuacuna shina cangapajca shujtajcuna ñucanchijta yalli cashcatami yuyana canchij (Filipenses 2:3). Chashna humilde cangapaj esforzarishpaca shujtajcunataca manataj ñitcachishunchu.

10. ¿Apóstol Pablo ima nishcacunatataj yuyarina canchij?

¹⁰ Huauqui panicunapaj alli cualidadcunata ricushpaca paicuna ñucanchijta yalli cashcatami cuentata cushun. Chaimanta apóstol Pablo ima nishcatami yuyarina canchij. Paica: “¿Pitaj cantaca caishujta yalli jatunyachin? ¿Can charishcacunataca manachu tucuita Dios cushca? Pai cushcallata charishpaca ¿ima nishpataj canllataj charishca shina jatun tucungui?” nircami (1 Corintios 4:7). Chaimanta imata ruranata yachashpapish shujtajcuna ñucanchijta jatunyachichunca mana saquinachu canchij. Shuj huauquica alli conferenciacunata cushpa o shuj pani Bibliamanta achca yachacujcunata charishpaca siempremi Jehová Diosta jatunyachina can.

11. ¿Jesús parlashca chꞌimbapuraimantaca imatataj yachanchij?

¹¹ Jesusca shujtajcunata ama ñitcachinguichij nishca qꞌuipaca cai chꞌimbapuraitami parlarca. Shuj jatun mandajca shuj esclavotami charirca. Chai esclavo achca cullquita debijpi paiman mana pagai tucujpica mandajca paitami perdonarca. Pero qꞌuipaca cai esclavoca caishuj esclavo ashalla cullquita debijpipish paitaca mana perdonasha nircachu. Chaimi jatun mandajca mana perdonaj esclavotaca pꞌiñarishpa carcelpi churarca. ¿Caimantaca imatataj yachanchij? Jesusca: “Ñucanchijpish huauqui panicunata shungumanta mana perdonajpica Jehová Diospish ñucanchijtaca mana perdonangachu” nircami (Mateo 18:21-35).

12. ¿Mana perdonashpaca ima shinataj shujtajcunata llaquichishun?

¹² Cai millai esclavoca paillatajmi llaquipi urmarca. Shujtajcunatapishmi llaquichirca. Cai millai esclavoca paipaj compañerotaca ashalla cullquita mana pagasha nijpimi paica prezupi churachun mandarca. Caita yachaj chayashpaca shujtaj esclavocunapish achcatami llaquirircacuna. Ñucanchijpish shuj huauqui o pani ñucanchijta mana alli tratajpi paicunata mana perdonashpaca chai millai esclavo shinami cashun. Paicunata mana perdonashpaca paicunatami llaquichishun, cꞌuyaitapish mana ricuchishun. Maipicarin mana rijsishcata shinami tratashun. Chaita ricushpami shujta huauqui panicunapish llaquilla sintiringacuna.

13. ¿Pani Crystalmantaca imatataj yachanchij?

¹³ Huauqui panicunata perdonashpaca ñucanchijllataj, shujtajcunapishmi beneficiarishun. Pani Crystalpi yuyashun. Paica precursorami can. Paica: “Shuj ñañaca ñucataca llaquichij shimicunahuanmi trataj carca. Chaimantami huillanaman llujshishpapish carropica paihuanca mana llujshisha nij carcani. Cushilla huillanatapishmi saquircani” ninmi. Pani Crystalca caishuj pani paita llaquichishcapi yuyanapaj randica paita perdonanatami decidirca. Crystalca humilde cashcamantami  La Atalaya del 15 de octubre de 1999 huatapi llujshishca “Perdonemos de corazón” nishca yachaita pajtachirca. Chashnami paita llaquichij panitaca perdonarca. Paica: “Yayitu Diospaj consejocunata pajtachingapajca tucuicunami esforzaricunchij. Yayitu Diospish ñucanchijtaca cada punllami perdonan. Cunanca cai ñañata perdonashcamantami tranquila, cushilla sintirini” ninmi.

14. a) Mateo 18:21, 22-pi nishca shinaca ¿Jesusca apóstol Pedromanca imatataj yachachirca? b) ¿Ñucanchijpish perdonangapajca imatataj rurana canchij?

¹⁴ Shujtajcunata perdonana cashcataca allimi yachanchij. Pero maipica chaita ruranaca sinchimi can. Apóstol Pedrohuanpish chashnami tucurca (Mateo 18:21, 22-ta liyipai). ¿Perdonangapajca imatataj rurana canchij? Puntapica, Jehová Dios ñucanchijta mana mitsashpa pai perdonashcapimi cutin cutin yuyarina canchij (Salmo 103:8-10; Mateo 18:32, 33). Jehová Dios cꞌuyaimanta ñucanchijta perdonashcamantami ñucanchijpish huauqui panicunataca cꞌuyaimanta perdonana canchij (1 Juan 4:11). Ishquipica, perdonajcuna cashpaca shujtajcunata ayudai tucushcatami yuyarina canchij. Por ejemplo, perdonashpaca ñucanchijta llaquichijcunatami ayudashun. Congregacionpipish huauqui panicunahuan tandallami causashun. Jehová Dioshuanpish allimi apanacushun. Shinallataj ñucanchijllatajmi tranquilos sintirishun (2 Corintios 2:7; Colosenses 3:14). Quimsapica, shujtajcunata perdonangapajmi Jehová Diosta ayudachun mañana canchij. Huauqui panicunahuan tandalla causanata Diablo jarcachunca manataj saquinachu canchij (Efesios 4:26, 27).

15. Colosenses 3:13-pi nishca shinaca ¿shuj huauqui o pani mana alli tratajpica imatataj rurana canchij?

¹⁵ Shuj huauqui pani ñucanchijta llaquichijpica maipica achcatami pꞌiñarinchij. Chashna  sintirishpaca paicunahuan alli apanacungapajmi esforzarina canchij. Chaipajca ñucanchij ima shina sintirishcatami Jehová Diosmanca tucuita parlana canchij. Shinallataj ñucanchijta mana alli tratajcunata bendiciachun mañashunchij. Jehová Dios shina paicunapaj alli ruraicunata valorangapajpish mañashunchij (Lucas 6:28). Caita rurashpapish pꞌiñarishca catishpaca huauquihuan o panihuan parlangapajmi esforzarina canchij. Paihuan parlacushpaca pai llaquichina munaihuan llaquichishcataca mana yuyanachu canchij (Mateo 5:23, 24; 1 Corintios 13:7). Pero ¿pai mana alli tucusha nijpica imatataj rurana canchij? Caishuj chaishuj ahuantanacushpa perdonangapajmi esforzarina canchij (Colosenses 3:13-ta liyipai). Shungupipish ama resintirishca saquirishunchij. Resintirishca saquirishpaca Jehová Dioshuan alli apanacunatami saquishun. Chaimanta imapish ñitcachichunca ama saquishunchij. Chashnami Jehová Diosta tucuimanta yalli cꞌuyashcata ricuchishun (Salmo 119:165).

16. ¿Organizados libropi nishca shinaca imatataj cada uno rurana canchij?

¹⁶ Ñucanchij huauqui panicunahuan Jehová Diosta tandalla sirvicushcamantami cushilla sintirinchij (Juan 10:16). Organizados para hacer la voluntad de Jehová nishca libropi, página 165-pica: “Congregacionpica tucuicuna alli apanacuchunmi cada uno esforzarina canchij. Ima shinami Jehová Dios huauqui panicunata valoran. Chashnallataj ñucanchijpish paicunata valorashpaca paicunahuanmi alli apanacushun” ninmi. Jehová Diosca paita sirvijcunataca paipaj cꞌuyashca huahuacunata shinami ricun. Shinallataj ñucanchijpish huauqui panicunata ayudajpi, cuidajpica Jehová Diosca cushillami sintiringa (Mateo 10:42).

17. ¿Imata rurangapajtaj esforzarina canchij?

¹⁷ Ñucanchij huauqui panicunataca achcatami cꞌuyanchij. Chaimantami paicunata ama ñitcachingapaj esforzarinchij (Romanos 14:13). Huauqui panicuna ñucanchijta yalli cashcata siempre yuyashunchij. Paicuna pandarijpi, llaquichijpipish shungumanta perdonashunchij. Chaimanta amataj ñitcarishunchij. Ashtahuanpish caishujmanta chaishujmanta sinchiyanacushpa shuj yuyailla ñaupajman catishunchij (Romanos 14:19).