1. ¿Huaquinpica imamantataj sololla sintirinchij?

HUAQUINPICA casin tucuicunami sololla sintirinchij. Huaquincunaca ashalla tiempotami sololla sintirincuna. Cutin shujtajcunaca achca tiempotami sololla sintirincuna. Achcacunaca achca gentecunapaj chaupipi cashpapish solollami sintirincuna. Cutin maijancunaca mushuj congregacionman rishcamantami sololla sintirincuna. Huaquincunaca paicunapaj familiahuan tandalla causaj cashcamantami caru ladoman viajashpaca sololla sintirincuna. Shinallataj maijancunaca paicunapaj cꞌuyashca familiatami huañuipi chingachishcacuna. Chaimantami sololla sintirincuna. Diospaj puebloman cunanlla yaicujcunapish paicunapaj familiacuna o amigocuna mana chasquisha nijpi o jarcaicunata churajpimi sololla sintirincuna.

2. ¿Cai yachaipica ima tapuicunatataj yachashun?

² Ñucanchij sololla sintirijpica Jehová Diosca allimi intindin. Chaimantami paica ñucanchijta ayudasha nin. ¿Ñucanchij sololla sintirijpica Jehová Diosca ima shinataj ayudan? ¿Sololla sintirishpaca imatataj rurana canchij? ¿Congregacionpi sololla sintirij huauqui panicunata ayudangapajca imatataj rurana canchij? Cai tapuicunatami cai yachaipica yachashun.

3. ¿Jehová Diosca ima shinataj Eliasmanta preocuparishcata ricuchirca?

³ Jehová Diosca paita sirvijcunamantami preocuparin. Chaimantami cada uno desanimado cajpica ñucanchijta ayudan  (Salmo 145:18, 19). Profeta Eliasca Diosta mana sirvijcunapaj chaupipimi causarca. Ashtahuancarin contracunaca paitaca huañuchisha nircacunami (1 Reyes 19:1, 2). “Diosta sirvijcunamantaca ñucallami saquirishcani” nishpami Eliasca pailla sintirirca (1 Reyes 19:10). Chaimi Jehová Diosca shuj angelta cachashpa Eliastaca: ‘Mana canllachu cangui. Achca israelitacunami ñucataca adoracuncuna’ nishpa animarca (1 Reyes 19:5, 18).

4. Marcos 10:29, 30-pi nishca shinaca ¿Jehová Diosca ima shinataj ñucanchijmanta preocuparishcata ricuchin?

⁴ Jehová Diosca paita sirvingapaj achca sacrificiocunata rurashcataca allimi yachan. Ñucanchij Jehová Diosta sirvinata agllajpimi familiacuna, amigocunaca tal vez ñucanchijmanta caruyashcacuna. Apóstol Pedropish chaicunamantami preocuparirca. Chaimi paica Jesustaca: “Ñucanchij tucuita saquishpa, quiquinta catishcamantaca ¿imatataj charishun?” nirca (Mateo 19:27). Chaimi Jesusca cꞌuyaihuan paita catijcunamanca: ‘Cai tucuita saquishcamantaca achca huauqui panicunami cancunapajca familiacuna shina canga’ nirca (Marcos 10:29, 30-ta liyipai). Jehová Diosca paita sirvijcunatami ayudasha nin (Salmo 9:10). Ñucanchij sololla sintirijpi Yayitu Dios ima shina ayudanata ricushun.

5. ¿Imamantataj Jehová Dios ima shina ayudacushcapi yuyana canchij?

⁵ Jehová Dios ñucanchijta ima shina ayudacujta yuyashunchij (Salmo 55:22). Chashna yuyashpaca mana ñucanchijlla cashcata sintishunchu. Pani Carolca solterami can. * Paillami familiamantaca Testigo can. Paica: “Ñucalla ama sintiringapajca ima llaquicunahuan cajpi Jehová Dios ima shina ayudashcapimi yuyani. Chashnami shamuj punllacunapipish Jehová Dios ñucata manataj cungarinata intindini” ninmi.

6. ¿1 Pedro 5:9, 10-ca sololla sintirij huauqui panicunataca ima shinataj animan?

⁶ Sololla sintirij huauqui panicunata Jehová Dios ima shina ayudashcata yuyashunchij (1 Pedro 5:9, 10-ta liyipai). Hiroshi shuti huauquica achca huatacunatami paipaj familiamantaca pailla Testigo can. Paica:  “Congregacionpica tucuicunami chꞌican chꞌican llaquicunata charinchij. Pero Jehová ayudajpimi paita sirvingapaj tucui pudishcata ruranchij. Chaita yachashpaca ñucanchij familia mana Testigo cajpipish cushillami sintiri tucunchij” ninmi.

7. ¿Yaya Diosta mañashpaca ima shinataj sintirishcangui?

⁷ Jehová Diosta mañashunchij, Bibliata liyishunchij, tandanacuicunaman rishunchij. Ñucanchij ima shina sintirishcataca shungumantami Jehová Diosmanca tucuita parlana canchij (1 Pedro 5:7). Pani Massielpi yuyashunchij. Pai Jehová Diosta sirvinata agllajpimi paipaj familiacunaca paimanta caruyarca. Paica: “Ñucalla ama sintiringapajca Yayitu Diostami shungumanta mañarcani. Ñuca ima shina sintirishcataca punllapica achca cutinmi paiman parlaj carcani. Chaimi Jehová Diosca ñucapajca shuj cꞌuyaj Yaya cashca” ninmi.

8. ¿Bibliata liyishpa, chaipi cutin cutin yuyashpaca ima shinataj beneficiarishcangui?

⁸ Jehová Dios ñucanchijta cꞌuyashcata ricuchij versocunata liyishpami chaipi cutin cutin yuyana canchij. Pani Biancataca huashallami paipaj familiaca rimancuna. Paica: “Ñucaca ñaupajman catingapajca Bibliapi, publicacioncunapimi ñuca layallataj llaquicunata charij Diosta sirvijcunamanta liyini, chaipi yuyani” ninmi. Huaquin huauqui panicunaca Salmo 27:10, Isaías 41:10 animaj versocunatami de memoria yachancuna. Cutin shujtajcunaca tandanacuicunapaj preparangapaj o Bibliata liyingapajca grabashca audiocunatami uyancuna. Chashnami paicunaca mana sololla sintirincuna.

9. ¿Tucui tandanacuicunaman rishpaca ima shinataj beneficiarishcangui?

⁹ Tucui tandanacuicunaman ringapajmi esforzarina canchij. Chaipimi caishujmanta chaishujmanta animanacunchij, huauqui panicunatapish ashtahuan rijsinchij (Hebreos 10:24, 25). Párrafo 7-pi parlashca pani Massielca: “Ñucaca achca pingaitami charij carcani. Pero tucui tandanacuicunaman ringapaj por lo menos shuj comentariota cungapajmi esforzarircani. Chashnami turi ñañacuna ñucapaj familia cashcata sintircani” ninmi.

10. ¿Imamantataj Diosta alli sirvij huauqui panicunahuan amigos tucuna canchij?

¹⁰ Diosta alli sirvij huauqui panicunahuan amigos tucushunchij. Huauqui panicuna mana ñucanchij edad cajpi o shujtaj culturamanta cajpi paicunahuan alli apanacungapaj esforzarishunchij. Bibliapica: “Yuyajcunami alli yachaita charincuna” ninmi (Job 12:12). Pero mayorlla huauqui panicunapish jovenlla huauqui panicunamantami yachai tucuncuna. Davidca Jonatanpaj qꞌuipa cashpapish  paihuanmi alli amigo tucurca (1 Samuel 18:1). Paicunaca sinchi llaquicunata charishpapish ishquindijmi Jehová Diosta sirvishpa catingapaj apoyanacurcacuna (1 Samuel 23:16-18). Pani Irinaca familiamantaca paillami Testigo can. Paica: “Jehová Diosca ñucanchijmanca turi ñañacunatami shuj familiata shina cun. Chashnami Jehová Diosca tucuicunata cuidan” ninmi.

11. ¿Alli amigocunata charingapajca imatataj rurana canchij?

¹¹ Manchaita charij huauqui panicunapajca shujtaj huauqui panicunahuan amigos tucunaca sinchimi can. Pani Ratnaca Yayitu Diosta sirvi callarishpami paipaj familiamanta jarcaicunata charirca. Paica: “Ñucaca manchai siqui cashpapish turi ñañacunapaj ayudata mashcangapajmi esforzarircani” ninmi. Maipica cada uno ima shina sintirishcata shujtajcunaman huillanaca sinchimi can. Pero alli amigocunata charingapajmi chaita rurana canchij. Ñucanchij amigocunaca ñucanchijta ayudanatami munancuna. Pero paicuna ayudachunca ñucanchij ima shina sintirishcata, ima problemacunahuan cashcatami huillana canchij.

12. ¿Alli amigocunata charingapajca imamantataj huauqui panicunahuan predicana canchij?

¹² Huauqui panicunahuan huillanaman llujshishpaca paicunahuanmi alli amigocuna tucushun. Párrafo 5-pi parlashca pani Carolca: “Ñañacunahuan huillanaman llujshishpa, Dios mingashca huaquin ruraicunata pajtachishpami paicunahuan alli amigas tucushcanchij. Yayitu Diosca ñuca causaipica cashna ñañacunahuanmi animashpa caticun” ninmi. Diosta alli sirvij huauqui panicunahuan amigos tucungapaj esforzarishunchij. Llaquilla sintirijpi, sololla sintirijpica Jehová Diosca paicunahuanmi ñucanchijta animanga (Proverbios 17:17).

13. ¿Congregacionpica shujtajcuna alli sintirichunca imatataj rurana canchij?

¹³ Tucuicunami congregacionpi shujtajcuna alli sintirichun cꞌuyaita ricuchina canchij (Juan 13:35). Ñucanchij ima rurashcacunahuan, nishcacunahuanmi shujtajcunata animai tucunchij. Shuj panica: “Jehová Diosmanta ñuca yachai callarijpica congregacionpi turi ñañacunami ñuca familia shina tucurcacuna. Paicuna mana ayudashca cajpica mana testigo de Jehová tucuimanchu carcani” ninmi. ¿Ñucanchijpish mana Testigo familiacunata charij huauqui panicunamanca ima shinataj cꞌuyaita ricuchina canchij?

14. ¿Mushuj huauqui panicunahuan amigos cangapajca imatataj rurana canchij?

¹⁴ Mushuj huauqui panicunahuan amigos tucungapaj esforzarishunchij. Paicunataca cꞌuyaihuanmi congregacionpica chasquina canchij (Romanos 15:7). Shinallataj respetota ricuchishpa, cꞌuyaita ricuchishpami paicunamantaca de verastij preocuparina canchij. Ashtahuancarin paicuna ima problemacunata charishcata intindingapajca cꞌuyaihuan, respetohuanmi tapuna canchij. Por ejemplo: “¿Canca Jehová Diostaca ima shinataj rijsircangui?” nishpami tapui tucunchij. Pero paicuna mana parlasha nishcata parlachunca mana obliganachu canchij. Ashtahuanpish paicuna ima nishcatami pacienciahuan uyana canchij.

15. ¿Sinchi feta charij huauqui panicunaca ima shinataj shujtaj huauqui panicunata ayudana can?

¹⁵ Sinchi feta charij huauqui panicuna, congregacionta pushaj huauquicuna cꞌuyaita ricuchijpica congregacionpica tucuicunami sinchiyarinchij. Pani Melissataca paipaj mamami uchillamanta Diosmanta yachachirca. Paica: “Ñucataca uchillamantami huaquin turicunaca ñucamanca shuj yaya shina  cꞌuyaita ricuchishcacuna. Paicunaca ñuca imata parlasha nijpica uyangapajca listosmi can. Chaimantami paicunataca achcata agradicini” ninmi. Cutin huauqui Mauriciopi yuyashunchij. Paiman yachachij huauqui Diosta sirvinata saquijpica paica achcatami desanimarirca. Mauricioca: “Ancianocunami ñucataca achcata ayudarca. Paicunaca ñucahuan siempre parlangapaj, predicanaman llujshingapajmi tiempota surcujcuna carca. Shinallataj Bibliamanta valishca yuyaicunata yachashpaca chaitami compartijcuna carca. Pugllanamanpishmi ñucataca invitajcuna carca” ninmi. Pani Melissapish, huauqui Mauriciopish ancianocuna cꞌuyaita ricuchijpimi cunanca tiempo completota Jehová Diosta sirvicuncuna.

16, 17. ¿Huauqui panicuna ama sololla sintirichunca ima shinataj ayudana canchij?

¹⁶ Shujtajcunata cꞌuyaihuan ayudashunchij (Gálatas 6:10). Familiamanta carupi sirvij Leo shuti misionero huauquica: “Shuj cutinca ñucaca ñuca carrohuanmi accidenteta charircani. Huasiman chayashpaca achca preocupadomi carcani. Chaimi shuj cusa huarmica paicunapaj huasipi micunata carangapaj invitarcacuna. Chaipi imata micushcataca mana yuyarinichu. Pero paicuna ñucata cꞌuyaihuan uyashcatami yuyarini. Paicuna chashna ayudajpica tranquilomi sintirircani” ninmi.

¹⁷ Jatun tandanacuicunapica huauqui panicunahuan tandalla cashpa, paicunahuan parlashpaca cushillami sintirinchij. Pero pani Carol ima nishcata ricushun. Paica: “Ñucapajca jatun tandanacuicunaman rinaca sinchimi can. Chaipica achca huauqui panicunami casin tucuicuna paicunapaj familiahuan cancuna. Cutin ñuca familiamanta ñucalla Diosta sirvicushcamantami sololla sintirini” ninmi. Shujta huauqui panicunapajpish cusa o huarmi huañujpica tandanacuicunaman rinaca sinchimi can. Cashna sintirij huauqui panicunataca ñucanchij familiacunahuan jatun tandanacuicunapi pasachun invitashunchij.

18. 2 Corintios 6:11 al 13-pi nishca shinaca ¿ima shinataj shujtajcunaman cꞌuyaita ricuchina canchij?

¹⁸ Huauqui panicunahuan pasangapaj tiempota surcushunchij. Sololla sintirij huauqui panicunataca micunaman, paseanaman ringapaj invitashunchij. Shuj punguta pascaj  shina paicunata shungumanta chasquishunchij (2 Corintios 6:11-13-ta liyipai). * Párrafo 15-pi parlashca pani Melissaca: “Ñucata, ñuca mamitata turi ñañacuna paicunapaj huasipi pasachun invitajpi o viajanaman ringapaj invitajpica cushillami sintirircanchij” ninmi. ¿Ñucanchijpish picunatataj chashna ayudai tucunchij?

19. ¿Ima punllacunapitaj huauqui panicunahuan pasangapaj tiempota surcuna canchij?

¹⁹ Huaquin huauqui panicunaca paicunapaj mana Testigo familia panda fiestacunata rurai horasmi llaquilla sintirincuna. Cutin shujtajcunaca paicunapaj familiacuna huañushca fecha chayajpimi llaquilla sintirincuna. Chai punllacunapimi paicunahuan pasangapajca tiempota surcuna canchij. Chashnami paicunaman cꞌuyaita ricuchishun (Filipenses 2:20).

20. ¿Sololla sintirijpica Mateo 12:48 al 50-pi nishcacunaca ima shinataj ñucanchijta sinchiyachin?

²⁰ Diosta sirvijcunaca maipica imamantapish solollami sintiri tucunchij. Pero Jehová Diosca ñucanchij ima shina sintirishcataca allimi yachan. Chaimantami paica huauqui panicunahuan ñucanchijta sinchiyachishpa caticun (Mateo 12:48-50-ta liyipai). Shinallataj ñucanchijpish huauqui panicunata ayudashpa catishunchij. Maipica ñucanchijlla sintirijpipish Jehová Diosca ñucanchijhuanmi canga. Paica ñucanchijtaca manataj saquingachu.