ÑAUPA tiempomantami israelitacunaca Diosta adorangapaj cullquita cujcuna carca. Pero Jesús causashca punllacunapica judiocunaca achca impuestocunatami pagana carcacuna. Chaimantami paicunapaj causaica sinchi carca.

20 huatamanta huichimanmi judiocunaca Diospaj carpa huasipaj, templopaj ishqui dracma cullquicunata pagana carcacuna. Jesús causashca punllacunapica judiocunaca Herodes rurashca templota allichingapaj, chaipi ofrendacunata cungapajmi chai cullquitaca cujcuna carca. Huaquin judiocunaca Pedrotaca: “¿Chai impuestota paganamantaca Jesusca imatataj yuyan?” nishpami tapurcacuna. Chaimi Jesusca impuestota paganaca mana juchachu can nirca. Ashtahuancarin Pedrotami cullquita mashcashpa pagachun mandarca (Mateo 17:24-27).

Chai tiempopica judiocunaca cosechashca granocunamanta, shujtaj cosascunamantami diezmotapish cuna carcacuna (Levítico 27:30-32; Números 18:26-28). Cutin religionta pushajcunaca mentamanta, anismanta, cominomanta, tucui imalla cosechashcamantami diezmocunata cuchun mañajcuna carca. Jesusca cai impuestomantaca religionta pushajcunataca mana rimarcachu. Ashtahuanpish cai leycunata churashpa Diosta ñahui ricuillapi sirvij tucujcunamantami sinchita rimarca (Mateo 23:23).

Ashtahuancarin chai tiempopica romanocunami judiocunata mandajcuna carca. Chaimantami romanocunamanca judiocunaca impuestota pagana carca. Por ejemplo, chagrayujcunaca cullquihuan o granohuanmi shuj impuestota pagana carca. Chaimi cosechashcacunamantaca 20 a 25 porcientota pagajcuna carca. Shinallataj judiocunaca cada unomantami romanocunamanca shuj impuestota pagana carca. Fariseocunaca: “¿Cai impuestota paganaca allichu can?” nishpami Jesusta tapurcacuna. Chaimi Jesusca: “Cesarpajtaca paiman cuichij, Diospajtaca Diosman cuichij” nishpa cutichirca (Mateo 22:15-22).

Maijan llajtacunapica mercaderiacunata yaicuchingapaj, llujshichingapajca impuestocunatami pagana carcacuna. Cai impuestocunataca maipimi barcocuna shayarin lugarcunapi, puentecunapi, ciudadman yaicuna pungucunapi o mercadocunapimi cobrajcuna carca.

Caipi ricushca shinaca judiocunaca achca impuestocunatami romanocunamanca pagajcuna carca. Historiamanta yachaj Romamanta Tácito runa nishca shinaca Jesús cai Allpapi cajpica Roma llajtata mandaj Tiberio mandacujpica Siriamanta, Judeamanta gentecunaca impuestocunata ama yallitaj cobrachunmi rogarircacuna.

Impuestota cobrana trabajota cuchunmi achca cullquita pagana carca. Chai gentecunaca ashtahuan cullquita ganangapajllami chai trabajotaca japijcuna carca. Paicunaca cutin shujtaj runacunatami impuestocunata cobrachunca contratajcuna carca. Cai contratashca gentecunapish cullquita ganangapajmi ashtahuan yalli cobrajcuna carca. Zaqueo runaca impuestocunata cobrashpa trabajaj runacunatami charishcanga. Chaimantami judiocunaca impuestocunata cobrajcunataca manataj ricunayachijcuna carca (Lucas 19:1, 2).