HUATA 2012-pica allpa manga pꞌaquirishcacunatami tarircacuna. Chai mangaca 3.000 huatacuna huashamanmi tiyashca carca. Chai allpa manga pꞌaquirishcacunapica quillcashca letracunami ricurirca. Chaita ricushpami tarijcunaca cushicurcacuna.

Pꞌaquirishcacunata allichishpami cananea shimipi tiyaj letracunata leyi tucurcacuna. Chai letracunata tandachishpa leyijpica “Esbaal ben Bedá” nishca shimicunami ricurirca. Chai shimicunaca: “Es-baal Bedapaj churi” nisha ninmi. Tarijcunaca punta cutinmi ñaupa mangapi Es-baal shutita quillcashcata ricushcacuna.

Bibliapica Es-baal shuti runamantapishmi parlan. Cai runaca Saulpaj churimi carca (1 Crónicas 8:33; 9:39). Yosef Garfinkel shuti runapish cai allpa mangata tarijcunahuanmi carca. Cai runaca: ‘Rey David causacun punllacunapimi Bibliapi cai shutica ricurij carca. Pero cunanca chai tiempopi imalla tiyashca tarishcacunapipishmi cai shutica ricurin’ nircami. Huaquincunaca Rey David causacun punllacunallapimi cai shutica tiyarca nincunami. Es-baal shuti chai mangapi ricurishcamantami Bibliapi tiyaj yuyaicuna mana llulla cashcata yachanchij.

Bibliapica Es-baal runataca Is-bóset ninpishmi (2 Samuel 2:10). ¿Imamantataj Bibliapica “baalpaj” randica “bóset” nishpa churarca? Huaquincunaca: ‘Israelitacuna Canaán llajtapi adoraj diosta ama yuyaringapaj nishpami Es-baal shutitaca segundo de Samuel libropi mana churarcacuna’ ninmi. Pero Primero de las Crónicas libropica Es-baal shutica ricurinmi.