1-3. a) ¿Diosta tucui shunguhuan servinaca imata nisha nin? b) ¿Asapish Amasiaspish ima laya runacunataj carca?

TUCUICUNAMI juchayujcuna canchij, imapipish pandarinchijlla. Chaimantami Yaya Dios ñucanchijta quishpichingapaj paipaj Churita cachashcamanta pagui ninchij. Diosca ñucanchij juchacunatami perdonasha nin. Mana jatun tucushpa, juchacunamanta arrepintirishpaca perdonahuai nishpami Diosta mañana canchij. Diosca, ‘ñucanchij juchacunamantaca cuna cashca shinaca mana cungachu’ (Salmo 103:10). Chashna cajpipish Diosca paita ‘tucui shunguhuanmi’ servichun munan (1 Crónicas 28:9). ¿Juchayujcuna cashpapish ima shinataj Diosta tucui shunguhuan servi tucunchij?

² Cai tapuita cutichingapajca rey Asapaj causaita rey Amasiaspaj causaitapish ricushun. Ishquindijmi allicunata rurarcacuna. Pero juchayujcuna cashcamantapish pandarircacunami. Chashna jahuapish Diospaj Shimipica, ‘rey Asaca Mandaj Diosta tucui shunguhuan cazushpa causarca’ ninmi  (2 Crónicas 15:16, 17; 25:1, 2; Proverbios 17:3). Rey Asaca siempremi Jehová Diosta tucui shunguhuan servingapaj achca esfuerzota rurarca (1 Crónicas 28:9). Pero rey Amasiasca mana chashnachu carca. Paica ‘mana tucui shunguhuanchu allita rurarca’. Diospaj contracunata tucuchishpaca paicunapaj dioscunata huasiman apashpami rirca. Chai qꞌuipaca chai dioscunapaj ñaupajpimi cungurishpa adorarca (2 Crónicas 25:11-16).

³ Jehová Diosta “tucui shunguhuan” servijcunaca achcata cꞌuyashcamantami huiñaipaj paita servisha ninchij. Bibliapica shungu nishpaca ñucanchij munaicunamanta, yuyaicunamanta, ima munaihuan imatapish rurashcamanta, shamuj punllapi imata rurasha nishcamantami nicun. Juchayujcuna cashpapish Diosta tucui shunguhuanmi servi tucunchij. Mana pi obligashcallamanta o servina cashcallamantachu servisha ninchij. Ashtahuanpish paita cꞌuyashcamantami servisha ninchij (2 Crónicas 19:9).

4. ¿Cai yachaipica imatataj yachashun?

⁴ Diosta tucui shunguhuan ima shina servina cashcata yachangapajca chuscu reycunamantami yachashun. Paicunaca Asá, Josafat (Jehosafat), Ezequías, Josías shuticunami carca. Cai cꞌaricunaca Judá llajtata alli mandajcunami carca. Paicuna imapi pandarishpapish Diosta cazushpami causarcacuna. Chaimantami Jehová Diosca ñucataca tucui shunguhuanmi servinguichij nirca. ¿Diosca imamantataj chashna yuyarca? ¿Ima shinataj chai reycuna shina cai tucunchij?

5. ¿Asá runa mandai callarishpaca imatataj rurarca?

⁵ Israel llajtaca ishqui llajta shinami tucurca. Shujca Israel, caishujca Judami carca. Judá llajtata ishqui reycuna mandashca qꞌuipami Asaca mandai callarirca. Pai mandai callarishpaca templopi mapata rurajcunatami llujshichirca, rurashcalla dioscunatapish tucuitami ñutushpa tucuchirca. Paipaj abuelatapish shuj yanga diosta rurachishcamantami mandaj canamanta anchuchirca (1 Reyes 15:11-13). Asaca, ‘mandaj Diosman cutirishpa Dios cushca mandashcacunata pajtachichunmi gentecunata achcata animarca’ (2 Crónicas 14:4).

6. ¿Judá llajtata etiopecuna llaquichisha nijpica Asaca imatataj rurarca?

⁶ Rey Asá callari 10 huatacunata mandacujpica tucuicunami tranquilo causarca. Qꞌuipaca Etiopía llajtamanta millón soldacunami 300 carrocunandij shamushpa Judá llajtapi causajcunata llaquichisha nirca (2 Crónicas 14:1, 6, 9, 10). Pero Asaca Jehová Dios ayudanatami crirca. Chaimantami enemigocunata mishangapaj ayudahuai nishpa Diosta mañarca (2 Crónicas 14:11-ta leyipai). Huaquin reycunaca Diosta mana cazurcacunachu. Chashna jahuapish contracunahuan macanacushpa paipaj pueblo mishachunmi Diosca ayudarca. Chashnami pailla Diostaj cashcata ricuchirca (1 Reyes 20:13, 26-30). Pero Asaca Diospimi confiarca.  Chaimantami Diosca Etiopía llajtamanta soldadocunata israelitacuna mishachun ayudarca (2 Crónicas 14:12, 13). Shinapish shuj cutinca Asaca Diospaj ayudata mashcanapaj randica Siria llajtata mandajtami ayudachun mañarca (1 Reyes 15:16-22). Chashna pandarishpapish Asaca Diosta cꞌuyajmi carca. Diosca chaita allimi yacharca. Chaimantami 1 Reyes 15:14-pica: ‘Asaca Jehová Diosta tucui shunguhuan cazushpami causarca’ ninmi. ¿Ñucanchijpish ima shinataj Asá shina cai tucunchij?

7, 8. ¿Asá shina imatataj rurana canchij?

⁷ Diosta tucui shunguhuan servicushcata yachangapajca: “¿Maipica sinchi ricurijpipish Jehovata cazunichu? ¿Congregacionpi mapa ruraicuna ama tiyachun ayudacunichu?” nishpami yuyarina canchij. Asá imata rurashcata yuyarishun. Asaca mana manchashpami paipaj abuela mandaj canamanta anchuchirca. Asá shinami maipica mana manchaj cana canchij. Por ejemplo, ¿shuj familia o shuj amigo juchata rurashcamanta mana arrepintirijpi congregacionmanta llujshichijpica imatataj rurashun? ¿Paihuan apanacushpa catishunchu? ¿Ñucanchij shungu munashcatachu ruranchijman?

⁸ Maipica Asá shinachari tucui gentecunami ñucanchij contracuna tucushca ninchij. Por ejemplo, escuelapi compañerocuna o profesorcunachari ñucanchij testigo de Jehová cashcamanta burlarincuna. Mana cashpaca jatun tandanacuicunaman ringapaj huaquin punllacunata mana trabajashcamantachari trabajopi compañerocuna ñucanchijmanta burlarincuna. O ashtahuan cullquita ganangapaj yalli horascunata mana trabajajpichari burlarincuna. Chaipimi Asá shina Jehová Diospi confiana canchij. Ama manchangapaj Jehová Diosta mañashpa, allita rurashpa catishunchij. Jehová Diosca Asata sinchiyachishca shina, ñucanchijtapish sinchiyachinataca amataj cungarishunchijchu.

9. ¿Huillacushpaca ima shinataj Diosta cushichinchij?

⁹ Asaca mana paillapichu yuyaj carca. Ashtahuanpish shujtajcuna Jehová Diosta mashcachunmi animarca. Ñucanchijpish shujtajcuna Diosta mashcachunmi ayudana canchij. Ñucanchijca Diosta cꞌuyashcamanta, gentecuna alli causachun munashcamantami huillanchij. Chaita ricushpa Jehová Diosca cushillami sintirin.

10, 11. ¿Ima shinataj Josafatpaj ejemplota cati tucunchij?

¹⁰ Asapaj churica Josafat shutimi carca. Diospaj Shimipica: Josafatca “paipaj yaya Asá purishca shinallataj mana maiman anchurishpa chai ñancunallapi purirca” ninmi (2 Crónicas 20:31, 32). Paica paipaj yaya shinami Judapi causajcunata Diosta adorashpa catichun ayudarca. Josafatca Judapi tiyaj pueblocunapi Dios quillcachishcacunata yachachichunmi huaquin cꞌaricunata cacharca (2 Crónicas 17:7-10). Josafatca Efraín urcucunapi causaj gentecunapish Diosta cutin alli adorachunmi ayudanaman rirca (2 Crónicas 19:4). Cai reyca ‘mana nij  tucushpalla, tucui shunguhuanmi Diosta catirca’ (2 Crónicas 22:9).

¹¹ Diosca tucui gentecuna paimanta yachachunmi munan. Chaipajca ñucanchijmi ayudana canchij. Chaimantami tucui quillacuna huillanaman llujshingapaj shuj esfuerzota rurana canchij. ¿Shujtajcunapish Diosta servijcuna tucuchun Bibliamanta yachachinata munanchijchu? ¿Estudiocunata charingapaj Diosta mañanchijchu? Shuj estudiota charingapaj empeñota churajpica Jehová Diosca ayudangami. Pero huaquinpica samana horaschari shuj estudiota cunaman rina tucunga. ¿Chaipica imatataj rurashun? Josafatca Diosman cutirichunmi gentecunata ayudarca. Ñucanchijpish huillanaman ña mana llujshijcunatami ayudana canchij. Huaquincunaca congregacionmanta llujshichishca cajpipish ña mana juchapi causancunachu. Paicuna congregación cꞌuchullapi causacujpica ancianocunaca ayudangapajmi visitana can.

12, 13. a) ¿Josafat manchaita charishpaca imatataj rurarca? b) ¿Imamantataj Josafat shina cana canchij?

¹² Shuj punllaca enemigocunami Judá llajtapi causaj gentecunahuan macanacusha nirca. Josafatca paipaj yaya shinallatajmi Jehová Dios ayudanata tucui shunguhuan crirca (2 Crónicas 20:2-4-ta leyipai). Josafatca manchaitami charirca. Chaimantami Jehová Dios ayudachun cashna nishpa mañarca: “Chai tucui achcacunami ñucanchijhuan macanacungapaj shamushcacuna, ñucanchijca chai tucuicunahuanca mana shayari tucunchijchu. Imatapish mana rurai tucunchijchu. Ashtahuanpish canllatami chaparacunchij” nircami (2 Crónicas 20:12).

¹³ Josafat shina problemacunata ima shina allichinata mana yachashpachari manchaita charinchij (2 Corintios 4:8, 9). Pero Josafat imata rurashcata yuyarishun. Paica tucui gentecunapaj ñaupajpimi: ‘Enemigocunata ima shina mishanatapish mana yanchanchijchu’ nishpa Diosta mañarca (2 Crónicas 20:5). Familiata ñaupajman pushacushpaca canpish Josafat shinami rurai tucungui. Problemacunata charishpa, imata ruranata mana alli yachashpaca Diosta mañai. Familiapaj ñaupajpi Diosta mañanataca ama pingaichu. Chashna mañajpica paicunaca Diospi confiashcatami ricungacuna. Jehová Diosca Josafatta ayudashca shinami cantapish cambaj familiatapish ayudanga.

14, 15. ¿Jehová Diospi tucui shunguta churashcamanta Ezequiasca imatataj rurarca?

¹⁴ Rey Ezequiaspaj yayaca mana alli runami carca, yanga dioscunatami adoraj carca. Pero Ezequiasca mana paipaj yaya layachu carca. Paica Diospaj ñaupajpi alli ricuringapajmi tucuita rurarca. Chaimantami ‘Ezequiasca lomacunapi tiyaj altarcunatapish anchuchirca. Rurashcalla dioscunatapish pꞌaquirca’. Chai punllacamami israelitacunaca Moisés rurashca bronce culebrata adoracurcacuna. Chaimantami Ezequiasca chai culebrata ñutushpa tucuchirca. Ezequiasca Jehová Diosmantaca manataj anchurishpa, paillatami catirca. Mandaj Diosllataj Moisesman cushca mandashcacunataca, tucui shunguhuanmi pajtachishpa causarca (2 Reyes 18:1-6).

¹⁵ Ezequías mandacun punllacunapica asirio soldadocunaca Judá llajtaman chayashpami Jerusalenta tucuchisha nirca. Asiriata mandajca Jehová Diosmanta burlarishpami paicunahuan ama macanacuchun  Ezequiasta manchachirca. Chashna manchachijpimi Ezequiasca Jehová Diospi shunguta churashpa ayudachun mañarca. Ezequiasca Jehová Dios asirio soldadocunata ashtahuan yalli poderta charishcatami yacharca. Chaimantami Judá llajtapi causajcunata quishpichinata crirca (Isaías 37:15-20-ta leyipai). Jehová Diosca Ezequías mañashcata cutichircami. Chaimantami shuj angelta cachashpa 185 mil asirio soldadocunata huañuchirca (Isaías 37:36, 37).

16, 17. ¿Ezequiaspaj ejemplotaca ima shinataj cati tucunchij?

¹⁶ Qꞌuipa huatacunaca Ezequiasca ungushpami ñalla huañugrirca. Chaipimi Ezequiasca: ‘Ñuca allita ruraj cashcata yuyarishpa ayudahuayari’ nishpa Diosta mañarca (2 Reyes 20:1-3-ta leyipai). Jehová Diosca Ezequías mañashcata uyarcami. Chaimantami jambirca. Cunan punllacunapica Jehová Diosca milagrocunata rurashpa mana jambinchu. Chaitami Bibliapi yachashcanchij. Shinallataj Ezequiasta shina shuj milagrota rurashpa ashtahuan huatacunata causanata saquichun mana shuyanchijchu. Pero Ezequías shinami Jehová Dios ñucanchijta ayudanata crina canchij. Pai shinami Jehová Diostaca: “Cambaj ñaupajpica mana nij tucushpalla tucui shunguhuan can munashcata rurashpa, cambaj ñaupajpi purishcata yuyarichunmi rogani” nishpami mañana canchij. ¿Ungushca horascunapish Jehová Dios ñucanchijta cuidanata tucui shunguhuanchu crinchij? (Salmo 41:3).

¹⁷ ¿Ezequiasmantaca imatataj ashtahuan yachai tucunchij? Huaquinpica imacunapi ocuparishcamantami Diospajta rurangapaj ña mana achca tiempota charinchij o Diosmanta caruyai pudinchij. Por ejemplo, achca gentecunami shujtajcunahuan parlanacungapaj Internetta utilizan. Internetpica famoso gentecuna, mana rijsishca gentecunami ricurin. Huaquincunaca chai gentecunata shuj diosta shinami ricuncuna. Chaimantami paicunapaj fotocunata ricushpa, paicuna imata rurashcata leyishpa pasancuna. Internetta utilizanaca mana malochu can. Familiahuan, amigocunahuan parlanacunapajca allimi can. Pero Internetpi yalli ocuparishpaca achca tiempotami perdishun. Internetpi ñucanchij fotocunata o imata churajpi shujtajcuna ricushpa “me gusta” nishpa churajpica jatun tucunchijmanmi. O ñucanchij churashcata ña mana ricushpa catijpica pꞌiñarinchijmanmi. Chaipaj randica apóstol Pablo, Áquila, Priscila shinami cana canchij. ¿Paicunaca Diosta mana adorajcuna imata rurashcata yachangapaj achca tiempotachu dedicashca cangacuna? Mana. Ashtahuanpish Bibliapica, ‘Pabloca Diospaj Shimita huillana yuyaillami carca’ ninmi. Priscilapish Aquilapish Diospaj Shimita ‘alli yachachingapajmi’ achca tiempota dedicajcuna carca (Hechos 18:4, 5, 26). Chaimanta ¿shujtajcunata diosta shinachu ricuni? ¿Mana importante cosascunapi achca tiempotachu dedicani? nishpami yuyarina canchij (Efesios 5:15, 16-ta leyipai).

18, 19. ¿Josías rurashca shina ñucanchijpish imatataj rurana canchij?

¹⁸ Rey Josiaspish Dios mandashcacunata “tucui shunguhuanmi” cazurca. Paica Ezequiaspaj bisnietomi carca (2 Crónicas 34:31). Pai huambraraj cashpaca “paipaj  ñaupa yaya Davidpaj Diostami mashcai callarirca”. Ña 20 huatacunata charishpaca Judá llajtapi tiyaj yanga dioscunatami ñutushpa chingachirca (2 Crónicas 34:1-3-ta leyipai). Josiasca Diosta alli servingapajmi achca esfuerzota rurarca. Paimi shujtaj reycunata yalli Diospajta ashtahuan rurarca. Shuj punllaca Hilcías shuti curaca Dios quillcachishca mandashcacunatami tarirca. Chai quillcachishcacunataca Moisesllatajmi quillcashca canga. Chai quillcashcacunata leyijta uyashpaca Josiasca Diospajta ashtahuan rurana cashcatami ricurca. Josiasca shujtajcunapish chaillatataj rurachunmi animarca. Chaimi ‘pai causashcacamaca gentecunaca Diosmanta mana anchurircacuna’ (2 Crónicas 34:27, 33).

¹⁹ Josiasca rey Manasespaj nietomi carca. Rey Manasés juchacunamanta shungumanta arrepentirijpica Jehová Diosca perdonarcami. Josías chaita yachashpaca Jehová Dios perdonaj Dios cashcatami ricurca. Solteracunapish mosocunapish Josías shinami Diosta alli rijsi tucun. Familiapi canta yalli huatacunata charijcunamanta, huauqui panicunamantapish achcatami yachai tucungui. Paicunaca Jehová Dios paicunamanta ima allicunata rurashcatami parlangacuna. Yuyari, ¿Dios quillcachishca mandashcacunata leyijpi Josías uyashpaca ima shinashi sintirishca canga? Josiasca Diosta cushichisha nishcamantami Diospajta ashtahuan rurarca. Canpish Bibliata punllanta leyishpaca Diostami ashtahuan cazunata munangui. Shinami Diospajman ashtahuan cꞌuchuyashpa cushilla sintiringui. Shujtajcunamanpish Diosmanta parlanatami munangui (2 Crónicas 34:18, 19-ta leyipai). Bibliata estudiashpaca cambaj causaipi Diosta alli servingapaj ima cambiocunata ruranatachari ricungui. Chaita yachashpaca Josías shina Diospajta ashtahuan rurangapaj cambiocunata rurailla.

20, 21. a) ¿Cunan parlashca chuscu reycunaca ima shinataj Diosta servircacuna? b) ¿Catij yachaipica imatataj yachashun?

²⁰ Asá, Josafat, Ezequías, Josiaspish Diosta tucui shunguhuanmi servircacuna. ¿Paicunamantaca imatataj yachanchij? Paicunaca Diosta cushichingapaj, tucui causaipi paillata adorangapajmi achca esfuerzota rurarcacuna. Enemigocuna paicunata mishasha nijpica Diospimi tucui shunguhuan confiarcacuna. Ashtahuantajca Diosta cꞌuyashcamantami paita servircacuna.

²¹ Cai chuscu reycuna juchayujcuna cashcamanta pandarishpapish Diosta allimi servircacuna. Diosca paicunapaj shungupi ima tiyashcatami ricurca. Paita achcata cꞌuyashcatapishmi ricurca. Ñucanchijpish juchayujcuna cashcamantami pandarinchij. Chashna jahuapish Diosca paita tucui shunguhuan servijpica cushillami sintirin. Catij yachaipica ¿cai chuscu reycuna pandarishcacunamantaca imatataj yachanchij? nishca tapuimantami yachashun.