1. a) ¿Maijancunataca imamantataj respetanchij? b) ¿Cai yachaipica imatataj ricugrinchij?

SHUJTAJCUNATACA alli tratashpami respetana canchij. Maijancunataca allita rurashcamanta o autoridadta charishcamantami respetanchij. Cai yachaipica picunata respetana cashcata, imamanta respetana cashcatami yachashun.

2, 3. a) ¿Imamantataj Jehová Diosta jatunyachina canchij? (Jahuapi tiyaj dibujota ricui). b) ¿Apocalipsis 5:13-pi ‘Ovejamanta’ parlashpaca pimantataj parlacun? c) ¿Imamantataj Jesusta jatunyachina canchij?

² Apocalipsis 5:13-pica: “Jatun tiyarinapi tiyacujtapish, Ovejatapish” jatunyachinami canchij ninmi. Jatun tiyarinapi tiyacujca Jehová Diosmi can. Shinallataj Apocalipsis 4-pica imamanta Jehová Diosta jatunyachina cashcatami parlan. Verso 9-pica Jehová Diosca ‘huiñai huiñaipaj causaj Dios’ cashcatami nin. Cutin verso 11-pica jahua pachapi causajcunaca Jehová Diostaca cashna nishpami alabarcacuna: “Jatun Dios, canca jatunmari cangui, allimari cangui, Tucuita rurai tucujmari cangui nishcataca chasquipaj allimari cangui. Canmari tucui ima tiyajtapish  rurashcangui. Can munashpa rurashcamantami tucui imapish tiyan” nircacunami (Apocalipsis 4:9-11).

³ Apocalipsis 5:13-pica ‘Ovejamanta’ parlashpaca Jesusmantami parlacun. ¿Chaitaca ima shinataj yachanchij? Bautizaj Juanca Jesusta ricushpaca: “¡Caimari cai pachapi causajcunapaj juchata anchuchij Taita Diospaj malta Ovejaca!” nircami (Juan 1:29). Jesusllami ñucanchijmanta huañunata munashca, chaimantami paita jatunyachina canchij. Ashtahuanpish “jatun mandajcunapajpish jatun mandaj, mandajcunapajpish” mandaj cashcamantami Jesustaca jatunyachina canchij (1 Timoteo 6:14-16). Jesusmanta parlashpaca jahua pachapi causajcunaca cashna nishpami cantarcacuna: “Tucuita rurai tucuj nishca canata, tucuita charij nishca canata, yachaisapa nishca canata, imatapish rurai tucujmi nishca canata, alli nishca canata, jatunyachishca canata, alabashca canatapish chai huañuchishca caj Ovejallami japipajca can” nishpami cantarcacuna (Apocalipsis 5:12). ¿Manachu ñucanchijpish paicuna shina Jesusta jatunyachisha ninchij?

4 ¿Imamantataj Jehovatapish Jesustapish jatunyachina canchij?

⁴ Juan 5: 22, 23-pica: ‘Jehová Diosca Jesustaca tucui gentecunata juzgachunmi churarca’ ninmi. Chaimantami Jesusta jatunyachina canchij. Shinallataj Jesusta jatunyachishpami Jehovatapish jatunyachinchij. Paicunata jatunyachishpaca huiñai causaitami charishun (Salmo 2: 11, 12-ta leyipai).

5. ¿Imamantataj tucuicunata respetana canchij?

⁵ “Taita Diosca paiman rijchaj runatami rurarca” (Génesis 1:27). Chaimantami Jehová Dios shina ñucanchijpish shujtajcunata llaquinchij, cꞌuyanchij. Ñucanchij shungupipish ima alli cashcata ima mana alli cashcatapish yachanchij (Romanos 2: 14, 15). Jehová Diosca tucuita alli, imatapish mana maipish cachun charinchu. Chaimantami ñucanchijpish limpio, sumajta causanata munanchij. Caipi ricushca shinaca tucuicunami Diosman rijchajta rurashca canchij. Chaimantami tucuicunata respetana canchij (Salmo 8:5).

6, 7. a) ¿Huaquin gentecunaca shujtaj gentecunataca ima shinataj ricuncuna? b) ¿Testigo de Jehovacunaca shujtaj gentecunataca ima shinataj ricuncuna?

⁶ Shujtajcunata respetana cashcatami yachanchij. Shinapish cunan punllacunapica achca gentecunami huaquin cꞌaricunatapish huarmicunatapish shuj diosta shina ricuncuna. Jehová Dios mandashca shina respetanapaj randica yallitajmi paicunata jatunyachincuna. Chaimantami shujtajcunata mashnata respetana cashcata manachari alli yachanchij. Por ejemplo, huaquincunaca famoso gentecuna layami churarincuna, paicuna layami imatapish rurancuna. Chashnallataj politicocuna shina, religionta pushajcuna shina o rijsishca pugllajcuna shinami casha nincuna.

⁷ Testigo de Jehovacunaca shujtajcunata  mana yallitaj jatunyachina cashcatami yachanchij. Ashtahuanpish Jesusllatami catina canchij. Pai layami tucuita rurana canchij (1 Pedro 2:21). Yuyarishunchij, ‘tucuicuna juchayuj cashcamantami Dios alli nishca canaca mana cai tucunchij’ (Romanos 3:23, Nuevo Testamento en quichua Chimborazo, 1973). Chaimanta shujtaj gentecunata mana adoranachu canchij. Shujtajcunata yallitaj jatunyachijpica Diosca llaquiringami.

8, 9. a) ¿Testigocunaca autoridadcunataca ima shinataj ricunchij? b) ¿Imata rurachun mandajpitaj autoridadcunata mana cazunchij?

⁸ Huaquincunataca paicunapaj trabajomantami respetana canchij. Gobiernopaj trabajajcunata yuyarishun. Paicunaca ñucanchij alli, tranquilo causachunmi trabajan. Ima minishtishcacunata charichunmi ayudan. Paicuna chashna trabajashcamantami alli causanchij. Apóstol Pabloca cai trabajajcunataca ‘jatun mandajcunata’ shina ricushpa paicunata cazunami canguichij nircami. Shinallataj, “imallamanta pagana cashcata pagaichij: Tributotaca, tributota japijman, impuestotaca, impuestota japijman, cumurina cajtaca cumurichij, alli nina cajtaca alli nichij” nircami (Romanos 13:1, 7).

⁹ Testigo de Jehovacunaca autoridadcunata respetangapajmi esforzarinchij. Cada llajtacunapimi chꞌican chꞌican costumbrecuna tiyan. Chaimantami cada llajtapi mandajcunaca chꞌican chꞌican leycunata churancuna. Ñucanchijca maipi causashpapish autoridadcuna paicunapaj trabajota rurachunmi apoyanchij. Pero Dios cushca leycunata huashaman saquishpa imata rurachun mandajpica mana cazunchijchu. Chaipica ‘runacunata cazunapaj randica Diostami cazushpa’ paita jatunyachinchij (1 Pedro 2:13-17-ta leyipai).

10. ¿Ñaupa tiempopi Diosta servijcunamantaca imatataj yachanchij?

¹⁰ Bibliapica ñaupa tiempopi Diosta servijcuna jatun mandajcunata, autoridadcunata respetashcatami huillan. Josemanta Mariamanta parlashun. Roma llajtamanta mandajcunaca paicuna mandacushca pueblocunapi mashna gentecuna causashcata yachanatami munarcacuna. Chaipajca gentecuna maijan pueblomanta cashpaca chaiman rishpami shuticunata quillcarinaman rina carca. Chaimantami Joseca Mariandij shuticunata quillcachingapaj Belenman rirca. Mariaca chichumi carca (Lucas 2:1-5). Apóstol Pablopish jatun mandajcunata respetajmi carca. Pꞌiñajcuna paita juchachijpipish rey Herodes Agripapaj ñaupajpipish, Judea llajtata mandaj Festopaj ñaupajpipish respetohuanmi parlarca (Hechos 25:1-12; 26:1-3).

11, 12. a) ¿Imamantataj panda religioncunata pushajcunata mana alabanchij? b) ¿Shuj testigo autoridadta charij runata respetashcamantaca imataj tucurca?

¹¹ ¿Panda religioncunata pushajcunataca alabanachu canchij? Mana. Tucui gentecunata shinami respetana canchij. Paicuna alabachun munajpipish mana alabanachu canchij. ¿Imamantataj paicunata mana alabana canchij? Paicunaca Diosmantami llullacunata  yachachin. Jesusca panda yachachijcunataca mana alli pushajcuna cashcamantami ‘mishqui shimi jayaj shungu canguichij’ nirca (Mateo 23:23, 24). Cutin mandajcunata, autoridadcunataca respetanallami canchij. Paicunata respetashcamantami huaquinpica ñucanchijta ayudashca.

¹² Por ejemplo, Heinrich Gleissner runaca Austria llajtamanta abogadomi carca, politicapipish trabajaj runami carca. Segunda Guerra Mundial tiyajpimi soldacunaca paita carcelpi churangapaj trenpi cacharca. Trenpi ricushpaca huauqui Leopold Engleitnertami rijsirca. Cai huauquipish Austriamantami carca. Huauqui Leopoldca chai abogadoman Diospaj Shimita parlacushpaca respetohuanmi parlarca. Chashna parlajpimi paica atento uyarca. Guerra tucurishca qꞌuipaca chai abogadoca autoridadta charishcamantami Austriamanta testigo de Jehovacunata ayudarca. Testigo de Jehovacunaca mandajcunata respetancunami. Chaimanta ¿mandajcuna paicunata ima shina ayudashcata ricushcanguichu?

13. a) ¿Picunatataj ashtahuan respetana canchij? b) ¿Imamantataj pushajcunata respetana canchij?

¹³ Huauquicunatapish panicunatapish respetana canchij. Pero congregacioncunata pushajcunatami ashtahuantajca respetana canchij. Por ejemplo, ancianocunata, superintendentecunata, Comité de Sucursalpi servij huauquicunata, Cuerpo Gobernantepi servij huauquicunatami respetana  canchij (1 Timoteo 5:17-ta leyipai *). Paicunami Diospaj pueblota cuidacun. Bibliapica ‘paicunaca Jehová Dios cushca regalo shinami can’ ninmi (Efesios 4:8, QC, 1989). Chaimantami maijan llajtamanta cajpipish, estudiashca cajpipish, charij o mana charij cajpipish respetana canchij. Jesusta punta catijcunaca pushaj huauquicunatami respetaj carca. Ñucanchijpish chaillatatajmi rurana canchij. Pero angelcunata shina o ñucanchijta yalli cashca shinaca mana tratanachu canchij. Ashtahuanpish sinchita trabajashcamanta, humilde cashcamantami respetanchij (2 Corintios 1:24; Apocalipsis 19:10-ta leyipai).

14, 15. a) ¿Panda religioncunata pushajcunaca ima shinataj can? b) Cutin ¿Ancianocunaca ima shinataj can?

¹⁴ Ancianocunaca humilde michijcuna shinami can. Famosocunata shina tratachunca mana munancunachu. Paicunaca mana panda religioncunata pushajcuna shinachu can. Jesusca panda religioncunata pushajcunamanta parlashpaca caitami nirca: ‘Paicunaca jatun micuicunapipish, tandanacuna huasicunapipish puntapi tiyarinatami munancuna. Plazacunapi tupajcunapish, allillachu cangui nishpa saludachun munajcunami can’ nircami (Mateo 23:6, 7).

¹⁵ Ancianocunaca Mateo 23:8 al 12-pi Jesús ima nishcatami cazuncuna. Chaipica Jesusca cashnami nirca: ‘Yachachij nichunca, ama munanguichij. Cancunata Yachachijca shujllami tiyan, paica Cristomi. Cancunaca tucuicunami huauquindijcuna canguichij. Cai pachapica, cancunaca pitapish ama yaya ninguichij. Cancunapaj Yayaca shujllami tiyan, paica jahua pachapimi. Pushajcuna nichunpish, ama munanguichij. Cancunata Pushajca shujllami tiyan, paica Cristomi. Cancunapurapi maijanpish jatun cajca, cancunapajta ruraj cachun. Maijanpish jatun tucujtaca, pingachishcami canga. Mana jatun tucujtaca, jatunyachishcami canga’ nircami. Ancianocuna humildes cajpi, Jesús nishcata cazujpica paicunata respetashunmi, cꞌuyashunmi.

16. ¿Shujtajcunata respetangapajca imamantataj shuj esfuerzota rurana canchij?

¹⁶ Shujtajcunata ima shina tratana cashcata yachangapajca tiempomi minishtirin. Jesusta punta catijcunapish tiempohuanmi Jehová munashca shina shujtajcunata tratanata yacharcacuna (Hechos 10:22-26; 3 Juan 9, 10). Ñucanchijpish Jehová Dios munashca shina shujtajcunata respetangapaj shuj esfuerzotami rurana canchij. Chashna rurashpaca achca bendicioncunatami chasquishun.

17. ¿Autoridadcunata respetajpica paicunaca imatataj rurangacuna?

¹⁷ Ñucanchij comunidadpi autoridadcunata respetajpica paicunaca: ‘Cancunaca allitami ruracunguichij, Diospaj Shimita yachachishpa catichun ayudashunmi’ ningacunachari. Shuj ejemplota ricushun. Pani Birgitca Alemania llajtapi precursorami can. Achca  huatacuna huashamanca paipaj ushushi escuelata tucuchishcamanta graduaricushcata ricunamanmi rirca. Profesoracunaca pani Birgittaca: “Achca huatacunata testigo huambracunaman yachachishcamantami cushicunchij. Paicuna alli comportarishcamantami alli cainanchij” nircacunami. Chashna nijpica Birgitca: “Testigo de Jehovacuna cashcamantami ñucanchij huahuacunata Yaya Dios munashca shina alli causachun, profesorcunata respetachun yachachinchij” nircami. Cutin shujtaj profesoraca cashnami nirca: “Tucui huambracuna testigo huambracuna laya cajpica jahuallami yachachi tucunchijman” nircami. Cai profesoracunaca testigo huambracunataca alli ñahuihuanmi ricurcacuna. Shuj profesoracarin jatun tandanacuimanmi rirca.

18, 19. ¿Imamantataj ancianocunata mana yallitaj alabana canchij?

¹⁸ Bibliapi nishcacunata yachashpami ancianocunata ima shina tratana cashcata entendishun (Hebreos 13:7, 17-ta leyipai). Paicuna sinchi trabajota rurashcamantami felicitana canchij. Shinallataj paicuna nishcacunata cazunami canchij. Chaita rurajpica cushillami Diosta servingacuna. Bibliaca “paicuna crishpa ima shina caticushca shina cancunapish catichij” ninmi. Pero paicuna rimashca shina, churarishca shina catinataca mana ninchu. Paicuna ima laya yachachishca shinallataj yachachinatapish mana ninchu. Chaita rurashpaca Jesusta catinapaj randica runacunatami caticunchijman. Ama cungarishunchij, ancianocunaca ñucanchij shinallataj juchayujcunami can.

¹⁹ Ancianocunataca mana famoso gentecunata shinachu alabana canchij. Ashtahuanpish respetohuanmi tratana canchij. Chashna rurajpica paicunaca humildes canataca manataj saquingacunachu. Shinallataj shujtajcunamanta yalli cashcata mana yuyangacunachu. Ashtahuanpish paicunapish pandarijlla cashcatami yuyaringacuna.

20. ¿Shujtajcunata respetashpaca ima shinataj causashun?

²⁰ Shujtajcunata respetohuan, alli tratashpaca ñucanchijllapi mana yallitaj yuyashunchu. Shinallataj ñucanchijta alli tratajpipish mana jatun tucushunchu. Shujtajcuna mana allita rurajpipish Diosmanta mana caruyashunchu. Ashtahuanpish ñucanchij huauquicunahuan panicunahuanmi tandalla cashun. Testigo de Jehovacunaca ni maijan gentecunata mana yallitaj jatunyachinchu.

21. ¿Shujtajcunata respetajpica Diosca ima shinataj sintiringa?

²¹ Yaya Diosca tucuicunata respetachun ninmi. Pai nishcata cazujpica cushicungami. Diabloca Diostaca ni pi mana cazungachu nircami. Pero ñucanchij cazujpica Diosca Diablo llulla cashcatami ricuchinga (Proverbios 27:11). Gentecunaca shujtajcunata ima shina tratana cashcata mana yachancunachu. Pero Diosca ñucanchijmanca shujtajcunata ima shina tratana cashcatami yachachishca. Chaimantami Jehová Diostaca achcata pagui ninchij.