1, 2. ¿Imamantataj chuscu reycunamanta cunanca parlagrinchij?

CAITA yuyashun. Shuj runaca lluchca ñanta ricushpachari urman. Chaita ricushpaca mana chaillatataj pasanchijmanchu ¿nachu? Chashnallataj shujtajcuna imapi pandarishcata ricushpa ñucanchijpish mana chaillapitaj urmasha ninchijchu. Bibliapica huaquin gentecuna imapi pandarishcatami parlan. ¿Paicuna pandarishcacunamantaca imatataj yachanchij?

² Ñaupa yachaipi parlashca reycunaca Diosta tucui shunguhuanmi servircacuna. Chashna jahuapish pandarircacunami. Paicuna imapi pandarishcacunaca Bibliapimi quillcashca tiyacun. Chaicunamanta yachana, yuyarinami canchij. ¿Chai reycunaca imatataj rurarcacuna? ¿Paicuna shina ama pandaringapajca imatataj rurana canchij? Cai tapuicunatami cunanca yachashun (Romanos 15:4-ta leyipai).

3-5. a) ¿Asaca Diosta tucui shunguhuan cazushpa causashca cashpapish imatataj rurarca? b) ¿Asaca imamantataj shujtajcunapi confiashca canga?

³ Asamanta parlashun. Etíope soldadocuna Judá llajtata  llaquichisha nijpica Asaca Diospimi confiarca. Pero mandaj Baasahuan macanacushpaca Diospi mana confiarcachu. Baasaca Israel llajtata mandajmi carca. Paica Ramá llajtapimi pircacunata shayachicurca. Chai llajtaca Judá llajta cꞌuchullapimi carca. Asaca chai pircacunata shayachichun mana munarcachu (2 Crónicas 16:1-3). Chaimantami Siria llajtata mandajtaca ‘ñucahuan shujlla tucushun’ nirca. Siriocuna Israel llajtata llaquichigrijpica ‘Baasaca, Ramá pueblopi jatun pircacunata ruracushcata saquishpami rirca’ (2 Crónicas 16:5). Asaca allitami rurashcani yuyashcangami.

⁴ Asaca Jehová Diospi mana confiarcachu. Chaita ricushpami Diosca pꞌiñarirca. Chaimantami Asá mana allita ruracushcata ricuchichun profeta Hananita cacharca (2 Crónicas 16:7-9-ta leyipai). Hananí chayashpaca Asataca: “Chashna rurashcamantaca cunanmantapachaca, ashtahuanmi canhuan macanacungapaj shamungacuna” nircami. Asaca Ramá llajtata mandaj tucurcami. Pero pai tucui mandashca huatacunapimi shujtaj llajtacunahuan macanacushpa causarca.

⁵ Ñaupa yachaipica Asaca juchayuj cashpapish Jehová Diosta cushichishcatami yacharcanchij. Chaimantami Diosca paita tucui shunguhuan servicushcata ricurca (1 Reyes 15:14). Shinapish Diosta ayudahuai nishpa mana mañashcamantami Asaca llaquicunata charirca. ¿Asaca Jehová Diospi shunguta churanapaj randica imamantataj paillapi shunguta churarca? ¿Imamantataj shujtajcunapipish shunguta churarca? Paica: ‘Sirio soldadocunahuan shujlla tucushpa enemigocunataca mishashunllami’ nishpami yuyashca canga. Mana cashpaca shujtajcunapaj consejota uyashpami chashna rurashca canga.

6. a) ¿Asá shina ama pandaringapajca imatataj rurana canchij? b) ¿Imacunallapitaj Diospi confiashcata ricuchi tucunchij?

⁶ Asá shina ama pandaringapajca mana ñucanchijllapichu shunguta churana canchij. Ashtahuanpish ñucanchij problemacuna jatun o uchilla cajpipish Dios ñucanchijta ayudachunmi mañana canchij. Yuyashun, ¿shuj problemata charishpaca imatataj ruranchij? ¿Ñucanchijllachu allichisha ninchij? o ¿Bibliapi ima nishcata yuyarishpachu allichinchij? Por ejemplo, ¿ñucanchij familiacuna tandanacuicunaman o jatun tandanacuicunaman richun mana munajpica imatataj rurashun? ¿Imata ruranata yachangapajca Diosta ayudahuai nishpa mañashunchu? O achca tiempotachari shuj trabajota mashcacushcanchijman. ¿Shuj trabajota cusha nijpica imatataj rurashun? ¿Chai trabajota mana cuna cajpipish tucui semanacuna tandanacuiman rinami cani nishpa huillashunchu? Ima problemacunata charishpapish Salmo 37: 5-pi ima nishcata yuyarishunchij. Chaipica: “Cambaj purinataca Mandaj Diosman mingai.  Paillapi shunguta churai. Paica imatapish can munashcata rurangami” ninmi.

7, 8. a) ¿Josafatca imacunata rurashpataj pandarirca? b) ¿Josafat pandarishcamantaca ima llaquicunatataj charirca? (Página 21-pi tiyaj dibujota ricui).

⁷ Cunanca Asapaj churi Josafatmanta parlashun. Josafat alli runa cashcamantami Diosca cushilla sintirirca. Josafat Diospi confiashpaca allicunatami rurarca. Chashna jahuapish mana alli decisioncunatami agllarca. Por ejemplo, paipaj churitaca millai rey Acabpaj ushushihuanmi cazarachirca. Qꞌuipaca profeta Micaías (Micaya) ama richun nijpipish Josafatca Acabdijmi siriocunahuan macanacunaman rirca. Macanacuipica siriocunaca Josafattaca casimi huañuchircacuna (2 Crónicas 18:1-32). Josafat Jerusalenman tigrajpica profeta Jehuca: “Diosta mana manchaj runatamari ayudanaman rishcangui. Mandaj Diosta pꞌiñajcunahuanmari apanacungui” nishpami rimarca (2 Crónicas 19:1-3-ta leyipai).

⁸ Josafatca macanacuipi casi huañushpapish, profeta Micaías rimajpipish Diosta mana cazurcachu. Paica Diosta cushichisha nishpapish Diosta mana adoraj runahuanmi apanacurca. Chai runaca Acabpaj churi Ocoziasmi carca. Josafatca Ocoziashuanmi ishquindij barcocunata rurarca. Pero chai barcocuna pꞌaquirijpimi ña mana maimanpish ri tucurcacuna (2 Crónicas 20:35-37).

9. ¿Mana allicunahuan apanacushpaca imataj tucushun?

⁹ ¿Josafatmantaca imatataj yachanchij?  Paica allicunata rurashpami ‘tucui shunguhuan Jehová Diosta catirca’ (2 Crónicas 22:9). Pero Diosta mana cꞌuyaj gentecunahuanmi apanacurca. Chaimantami problemacunata charirca. Shuj cutincarin casimi huañurca. Proverbios 13:20-pi ima nishcata ama cungarishunchij. Chaipica: “Yachaisapacunahuan tandanacujca, yachaisapami tucun. Ashtahuanpish rumi shungucunahuan tandanacujca, jatun llaquipimi urman” ninmi. Ñucanchijca, gentecuna Diospaj Shimita yachachunmi ayudasha ninchij. Pero Diosta mana servij gentecunahuan yallitaj apanacushpaca llaquipimi urmashun.

10. a) ¿Cazaranata munacushpaca imatataj Josafatmanta yachai tucunchij? b) ¿Imatataj mana cungarina canchij?

¹⁰ ¿Cazaranata munacushpaca imatataj Josafatmanta yachai tucunchij? Maipica ‘congregación ucupi pihuan cazaranapaj mana tiyanchu’ nishpachari yuyanchij. Chaimantachari Diosta mana servijta cꞌuyai callarinchij. O huaquin familiacunaca, ‘solteromi saquiricungui, ñami cazarana cangui’ nishpachari atirincuna. Jehová Diosca cꞌuyanacushpa causachunmi ñucanchijtaca rurashca. Pero ¿alli cꞌarita o alli huarmita mana tarishpaca imata rurashun? Josafatta yuyarishun. Josafatca casi siempremi paita ayudachun Diosta mañaj carca (2 Crónicas 18:4-6). Pero Jehová Dios mana allicunahuan ama apanacungui nijpica Josafatca Acab runahuanmi amigo tucurca. Josafatca ‘Mandaj Diosca tucui shunguhuan paita cazujcunapaj allita rurashpa, tucuita rurai tucuj cashcata ricuchingapaj, tucui cai pachata ricuracuj cashcatami yuyarina’ carca (2 Crónicas 16:9). Ñucanchijtapish Jehová Dios ayudasha nishcataca manataj cungarinachu canchij. Paica ñucanchijta cꞌuyanmi. Ñucanchij ima shina sintirishcatapish yachanmi. Canca shuj alli cꞌarihuan o shuj alli huarmihuanchari cazarasha ningui. Jehová Diosca chaita yachanmi, chaimantami ayudasha nin. Shuj alli cꞌarita o shuj alli huarmita tarichunca paimi ima horas ayudanata yachan. ¿Pai ayudanataca tucui shunguhuanchu cringui?

11, 12. a) ¿Ezequiasca paipaj shungupi ima tiyashcata ima shinataj ricuchirca? b) ¿Imamantataj Diosca Ezequiasta perdonarca?

¹¹ Cunanca Ezequiasmanta yachashun. Shuj punllaca Ezequiasmanca paipaj shungupi ima tiyashcatami Diosca ricuchisha nirca (2 Crónicas 32:31-ta leyipai). Ezequías ungushca cajpica Diosca alliyachisha nircami. Paita alliyachinata crichunmi Diosca llandutaca ña chunga gradacunata ñaupajman rishcata huashaman tigrachirca. Babilonia llajtata mandajcuna chaita yachaj chayashcami carca. Chaimanta ashtahuan yachangapajca huaquin cꞌaricunatami Ezequiaspajman cacharca (2 Reyes 20:8-13; 2 Crónicas 32:24). Diosca Ezequiasmanca chai cꞌaricuna shamujpi ima shina chasquinataca mana huillarcachu. Bibliapica Diosca imata rurajta ricungapajmi saquircalla ninmi. Ezequiasca ‘paipaj huasipi imalla huaquichishcacunata, cullquita, curitami chai cꞌaricunaman ricuchirca’. Chashnami Ezequiasca paipaj shungupi ima tiyajta ricuchirca.

¹² Ezequiasca jatun tucurcami. Chaimantami Jehová Dios ayudajpipish mana  pagui nirca. Bibliapica imamanta Ezequías jatun tucushcata mana huillanchu. Asiriocunata mishashcamanta o Jehová Dios paita alliyachishcamantachari jatun tucushca canga. O tucuicunapaj rijsishca cashcamanta, charij tucushcamantachari jatun tucushca canga. Ezequiasca Diosta tucui shunguhuan servishca cashpapish asha tiempota jatun tucurcami. Chaita ricushpami Diosca pꞌiñarirca. Pero qꞌuipaca Diospaj ñaupajpi cumurishcamantami Diosca perdonarca (2 Crónicas 32:25-27; Salmo 138:6).

13, 14. a) ¿Ima horastaj ñucanchij shungupi ima tiyashcata ricuchinchij? b) ¿Shujtajcuna alabajpica imatataj rurana canchij?

¹³ ¿Ezequías pandarishmantaca imatataj yachanchij? Yuyarishun. Jehová Diospaj ayudahuan asiriocunata mishashca qꞌuipa, ungüimanta sanoyashca qꞌuipallami Ezequiasca jatun tucurca. Cunan punllacunapipish ñucanchijta alabajpi o imapipish alli rijpica ñucanchij shungupi ima tiyashcatami ricuchishun. Por ejemplo, shuj huauquichari alli prepararishpa shuj sumaj conferenciata cun. ¿Sumaj conferenciata cushcamanta achcacuna paita alabajpica imatashi ruranga?

¹⁴ Shujtajcuna ñucanchijta alabajpica Lucas 17:10-pi Jesús nishcatami yuyaipi charina canchij. Chaipica: “Cancunapish, Taita Dios tucui mandashcacunata rurashpaca, ‘ñucanchijca alli servijcuna mana canchijchu, imata rurana cashcallatami rurarcanchij’ ninami canguichij” ninmi. Yuyarishunchij, Ezequías jatun tucushpaca Dios ayudashcamanta mana pagui nircachu. Shinashpaca, ¿shuj conferenciata cushcamanta shujtajcuna alabajpi, humildes catingapajca imatataj rurana canchij? Dios ñucanchijmanta tucui imata rurashcatami yuyarina canchij. Chaita yuyarishpami ‘Diosmi ñucataca ayudahuarca, chaimantami paita pagui nini’ ni tucunchij. Ñucanchijca Jehová paipaj espíritu santohuan ayudashcamanta, Bibliata cushcamantami alli conferenciacunata cui tucunchij.

15, 16. ¿Imamantataj rey Josiasca huañurca?

¹⁵ Rey Josiasta yuyarishun. Josiasca alli rey cashpapish pandarircami. Chaimantami huañurca (2 Crónicas 35:20-22-ta leyipai). Josiasca deganamantami Egiptota mandaj Necao (Nekó) runahuan macanacusha nirca. Bibliapica ‘Taita Diosllatajmi Josiashuan ama macanacuchun Necao runamanca yuyaita curca’ ninmi. Chaimantami Necao runaca ‘mana macanacusha ninichu’ nishpa huillanaman cacharca. Chashna nijpipish Josiasca macanacunaman rishpami huañurca. Josías imamanta macanacusha nishcata Bibliapica mana huillanchu.

 ¹⁶ Manaraj macanacunaman rishpami Josiasca Necao nishca shimicuna Jehovamanta shamushcata o mana shamushcata ricuna carca. Chaipajca profeta Jeremiastami tapunalla carca (2 Crónicas 35:23, 25). Chashnallataj Josiasca alli yuyanarajmi carca. Por ejemplo, Necao runaca mana Jerusalenta llaquichisha nircachu. Paica Carquemis llajtatami llaquichisha nirca. Shinallataj Necao runaca Jehovatapish judiocunatapish mana cꞌamishcachu carca. Ñucanchijca mana Josías shinachu rurasha ninchij. Shuj problemata allichingapajca puntaca Jehová ima shina allichichun munashcatami yuyana canchij.

17. ¿Shuj decisionta agllagricushpa Josías shina ama pandaringapajca imatataj rurana canchij?

¹⁷ Manaraj shuj decisionta japishpami Bibliapi tiyaj consejocunata yuyarina canchij. Chai consejocunata yuyarishpa ima shina pajtachinatapish ricunami canchij. Publicacioncunapipish shujtaj consejocunatami mashcai tucunchij. Ancianocunapish ayudachunmi mañai tucunchij. Paicunaca Bibliamanta shujtaj consejocunata cushpami yuyachinga. Shuj panihuan ima tucushcata yuyashun. Paica mana testigo cusahuanmi cazarashca can. Cai panica ‘cai punllami Diospaj Shimita huillanaman llujshigrini nishpami’ yuyarin (Hechos 4:20). Pero paipaj cusaca: ‘Cai punllacunaca ishquindijlla maimanpish mana rishcanchijchu, huillanaman rinapaj randica paseanaman jacu’ ninmi. Chashna nijpica chai panica alli decisionta agllangapajmi huaquin versocunata yuyarin. Paica Diosta cazuna cashcata, Jesús mandashcatapish pajtachina cashcatami yuyarin (Mateo 28:19, 20; Hechos 5:29). Shinallataj cusata cazuna cashcata, imata rurangapajpish alli yuyarinaraj cashcatami yuyarin (Efesios 5:22-24; Filipenses 4:5, NM). Chai panica: ‘¿Ñuca cusaca huillanaman ama llujshichun nishpachu paseanaman pushasha nicun? o ¿ñucahuan casha nishcallamantachu paseanaman pushasha nicun?’ nishpami yuyarina can. Ñucanchijca Jehovatami cushichisha ninchij. Chaimantami puntaca alli yuyashpa imatapish decidina canchij.

18. ¿Imamantataj cai chuscu reycuna imalla rurashcata yuyarina canchij?

¹⁸ Huaquinpica cai chuscu reycuna shinachari imapipish pandarishun. Ñucanchijllapi confiashpa, mana allicunahuan apanacushpa, jatun tucushpa o mana alli decisioncunata agllashpami pandarishun. Pandarishpapish Jehová Diosta ña mana cushichi tucushashu nishpaca mana yuyanachu canchij. Diosca cai chuscu reycunapica allicunatami ricurca, ñucanchijpipish allicunatami ricunga. Diosca paita cꞌuyashcamanta tucui shunguhuan servisha nishcata yachanmi. Chaimantami llaquicunapi ama urmangapaj Bibliapi huaquin gentecunapaj pandarishcacunamanta quillcachirca. Shinaca cai chuscu reycuna imalla rurashcacunata yuyarishunchij. Cai chuscu reycunamanta Bibliapi quillcachishpa saquishcamanta Jehová Diosta pagui nishunchij.