ACHCA huatacuna huashaman Brookings llajtapi ima tucushcatami yuyarini. Shuj tutamantaca achca chirimi carca. Invierno punllacunami chayamucurca. Shuj corralpimi tanque yacu cꞌuchupi asha gentecuna chirihuan chujchushpa shayacurcanchij. Chai tanquepi tiyaj yacuca dimastij chirimi carca. Imamanta chaipi cashcata huillangapaj ñuca causaimantami ashata parlasha nini.

7 de marzo de 1936 huatapimi huacharircani. Chuscu huauquicuna panicunamantaca ñucami último cani. Estados Unidos llajta inti llujshi ladopimi campopi causarcanchij. Ñuca familiapajca campopi trabajana, animalcunata huiñachina valishca cajpipish Diosta servinami ashtahuan importante carca. Ñuca yaya mamaca 1934 huatapi bautizarishpami testigo de Jehovacuna tucushca carca. Paicunapaj causaitami Diosman mingashcacuna carca. Chaimantami paicunaca Diosta servircacuna. Ñuca yayaca Clarence shutimi carca. Conde pueblopi (Dakota del Sur) uchilla congregacionpimi puntaca ñuca yaya, qꞌuipaca ñuca tío Alfred siervo de compañía carcacuna. Cunan punllacunapica siervo de compañiataca ancianocunata pushaj nishpami rijsinchij.

Ñuca familiaca siempremi tandanacuicunaman rijcuna carca. Huasin huasin rishpami shamuj punllapi shuj sumaj causai tiyanata gentecunaman huillaj carca. Ñuca yaya mamaca ñucanchijmanpish Diosmantami yachachircacuna. Diospaj mandashcacunatapish paicunapaj causaipimi pajtachircacuna. Chaimantami ñucanchijpish Jehová Diosta ashtahuan cꞌuyashpa paita cazunata munarcanchij. Ñuca pani Dorothy, ñucapish 6 huatacunata charishpami publicadorcuna tucurcanchij. 1943 huatapica Escuela del Ministerio Teocraticopimi participai callarircani. Chai huatapimi chai escuela callarirca.

Jatun tandanacuicunaman rinaca ñucanchijpajca achca importantemi carca. 1949 huatapica Sioux  Falls (Dakota del Sur) pueblopimi jatun tandanacui tiyarca. Chai tandanacuipi huauqui Grant Suiterca ‘Dios llaquichina punlla ñallami chayamugrin’ nishpami yachachirca. Chaimantami paica ‘tucui bautizarishcacunami Dios mandagrin alli huillaicunata ashtahuan huillashpa purina canguichij’ nirca. Chai conferenciataca cunancamami yuyarini. Chaita uyashpami Brookings llajtapi 12 de noviembre de 1949-pi bautizarircani. Chaimantami callaripi nishca shinaca chuscupura bautizaringapaj tanque yacu cꞌuchupi shayacurcanchij.

Qꞌuipaca, 1 de enero de 1952 huatapimi 15 huatacunata charishpa precursor tucurcani. Proverbios 13:20-pica: “Yachaisapacunahuan tandanacujca, yachaisapami tucun. Ashtahuanpish rumi shungucunahuan tandanacujca, jatun llaquipimi urman” ninmi. Ñuca familiapica achcacunami yachaisapa carcacuna. Chaimantami precursor tucusha nijpica apoyarcacuna. Ñuca tioca Julius shutimi carca. Paica 60 huatacunatami charirca. Paica ñucapaj achca huatacunahuan ñaupami carca. Chashnapish ishquindijmi cushilla huillanaman rij carcanchij. Paimantaca achcatami yacharcani. Ñuca pani Dorothypish precursorami tucurca.

Ñuca uchilla cajpica ñuca yaya mamaca superintendentecunata paicunapaj huarmicunatapish huasipi saquirichunmi invitadorcuna carca. Chaimantami huauqui Jesse Cantwelltapish paipaj huarmitapish huasiman invitarcacuna. Paicunaca ñucamanta preocuparishpami animajcuna carca. Jessepish paipaj huarmipish ñucanchij causacushca cꞌuchulla congregacioncunata visitacushpaca paicunahuan huillanaman richunmi jacu nijcuna carca. Paicunahuan canataca achcatami munarcani. Paicuna shinami precursor tucushpa, Diospajta rurashpa ocupado casha nircani.

Ñucanchij catij superintendenteca Bud Miller shutimi carca. Paipaj huarmica Joan shutimi carca. Paicuna ñucanchij congregacionta visitajpica 18 huatacunatami charircani. Chai tiempopica cuartelmanmi ñucata cayarcacuna. Soldado tucunata o mana soldado tucunata ricunapajmi cayarcacuna. Chaipica Jesús mandashcata ama cazushpa politicapi yaicuchun nircacunami (Juan 15:19). Pero ñucaca Diospaj Shimita huillaj cashcamantami: “Ñucataca cuartelman ama yaicuchipaichij” nishpa mañarcani.

 Ñucata cayajpica huauqui Millerca ñucahuanmi risha nirca. Paica gentecunata mana manchajchu carca. Diospaj Shimitapish allimi yacharca. Pai ñucahuan rishcamantami cushilla sintirircani. 1954 huatapimi: “Diospaj Shimita huillaj cashcamanta soldado tucuchunca ña mana obligashunchu” nircacuna. Chaimantami Diosta ashtahuan servi tucurcani.

Asha tiempo qꞌuipaca Betelpi servichunmi invitarca. Staten Island (Nueva York) llajtapimi Watchtower haciendapi trabajarcani. Quimsa huatacunatami chaipi trabajarcani. “Yachaisapa huauquicunahuan panicunahuan” trabajashpami cushicurcani.

Haciendapica WBBR radiomi tiyarca. Testigo de Jehovacunaca 1924 huatamanta 1957 huatacamami chai radiota charijcuna carca. Chai haciendapica 15 o 20 betelitacunami trabajaj carcanchij. Casi tucuicuna jovencunalla cashcamantami ashalla experenciata charircanchij. Pero ñucanchijhuanca shuj mayorlla ungido huauquimi trabajaj carca. Paica Eldon Woodworth shutimi carca. Paica ñucanchijpajca shuj yaya shinami carca. Achcatami yachachirca. Shuj problema ñucanchijpurapi tiyajpica huauqui Eldonca: ‘Ñucanchj juchayujcuna cajpipish Diosca achcatami rurashpa caticun’ nijmi carca.

Huauqui Frederick Franzpish ñucanchijhuan cashcamantami achcata ayudarca. Paica yachaisapa runami carca. Bibliamantapish alli yachajmi carca. Chashna cashpapish cada unomantami preocuparirca. Cutin huauqui Harry Petersonca ñucanchijpaj yanushpami trabajaj carca. Paipaj quiquin apellidoca Papargyropoulosmi carca. Pero huauqui Peterson nishpami cayaj carcanchij. Paipish ungidomi carca. Betelpica alli trabajajmi carca. Diospaj Shimitapish achcatami huillanata munarca. Chaimanta tucui quillacuna huillanaman llujshishpami 100 yalli revistacunata gentecunaman saquij carca. Diospaj Shimimantapish allimi yacharca. Ñucanchij achca tapuicunata rurajpipish tucuitami cutichij carca.

Haciendapica frutacunata, verduracunata enlatashpami trabajaj carcanchij. Ñucahuanca Etta Huth shuti panimi trabajaj carca. Paica yachaisapa huarmimi carca. Paimi frutacunata verduracunata  ima shina preparanata yachachirca. Cꞌuchullapi caj congregacioncunamantami achca panicuna ñucanchijhuan trabajangapaj shamujcuna carca. Chai panicunataca pani Ettami ima shina trabajanata ricuchij carca. Pani Etta trabajanata alli yachashpapish siempremi haciendapi pushaj huauquicunata respetarca. Tucuicunamanmi shuj alli ejemplota saquirca.

Shuj joven panipish ñucanchijta ayudanamanmi shamuj carca. Paica Angela shutimi carca. Paitami pani Ettaca Diosta servichun ayudashca carca. Angelahuanmi abril de 1958 huatapi cazararcani. 58 huatacunatami ishquindij Diosta servishcanchij. Ñuca huarmica yachaisapa huarmimi can. Paica Diospajta ruranataca manataj saquishcachu. Chaimantami alli, sumajta causai tucushcanchij. Ima llaquicuna shamujpipish paipi confianataca manataj saquinichu.

1957 huatapimi Staten Island llajtapi tiyaj WBBR radiota cꞌaturcacuna. Radiota cꞌatushca qꞌuipaca asha tiempollatami Betelpi servircani. Angelahuan cazarashpaca Betelpi ña mana ashtahuan servircanichu. Ashtahuanpish Staten Island llajtapimi quimsa huatacunata precursorcuna shina servircanchij. Asha tiempotacarin radiota randijcunapajmi trabajarcani. Chai radiotaca WPOW nishpami shutichircacuna.

Maipipish Diospaj Shimita huillana minishtirijpi, rinapaj listos cashun nishpami minishtirishcacunallahuan causarcanchij. Chashna causashcamantami 1961 huatapi precursores especialescuna shina servichun nijpica ari nircanchijlla. Falls City (Nebraska) llajtapimi precursores especialescuna shina servi callarircanchij. Chaiman chayashca qꞌuipallami Escuela del Ministerio del Reino nishca cursoman shuj quillata invitarca. Chai cursoca South Lansing (Nueva York) llajtapimi carca. Chai cursopica achcata yachacushcamantami cushilla carcanchij. Cursota tucuchishca qꞌuipaca Nebraska llajtamanmi tigrashun yuyarcanchij. Pero Camboya llajtapi misionerocuna shina servichij nijpica mancharircanchijmi. Camboya llajtaca Asiapimi saquirin. Chai llajtaca sumajmi can. Ñucanchijpajca tucuimi mushuj ricurirca. Chai llajtapi tucui shunguhuanmi Diosmanta huillarcanchij.

Camboya llajtapi sinchi causai callarijpimi Vietnam del Sur llajtapi causanaman rircanchij. Chai llajtapi ishqui huatacunata causacushpami ungurcani. Chaimantami Estados Unidosman tigrarcanchij. Ña ungüimanta alliyashca qꞌuipaca cutinmi precursor shina servi callarircanchij.

Cutin marzo de 1965 huatapimi superintendente shina servircani. 33 huatacunatami ñucapish ñuca huarmipish chꞌican chꞌican circuitocunapi, distritocunapi servircanchij. Jatun tandanacuicunapipishmi ayudarcanchij. Chai trabajota ruranata achcatami munarcani. Jatun tandanacuicuna ñucanchijpajca sumajmi carca. Huaquin huatacunatami Nueva York llajtapi tiyaj congregacioncunata, chai llajta cꞌuchullapi tiyaj congregacioncunatapish visitarcanchij. Jatun tandanacuicunataca Yankees nishca estadiopimi charircanchij.

Ñucapish ñuca huarmipish achca huatacunatami huaquin asignacioncunata chasquishcanchij.  1995 huatapica Escuela de Entrenamiento Ministerialpi yachachichunmi invitarca. Quimsa huata qꞌuipaca Betelpi servichunmi cayarcacuna. 40 huatacuna qꞌuipa Betelman tigranata yachashpaca achcatami cushicurcani. Betelpimi joven cashpaca Diosta ashtahuan servi callarircani. Betelman tigrashpaca Departamento de Serviciopimi trabajarcani. Escuelas teocráticas nishcapipish yachachijmi carcani. 2007 huatapica Cuerpo Gobernantepi caj huauquicunaca Betelpi tiyaj escuelacunata organizangapajmi Departamento de Escuelas Teocráticas nishcata callarichircacuna. Huaquin huatacunatami chai escuelacunata superintendente shina pusharcani.

Cai último huatacunapica achca cambiocunami tiyashca. Por ejemplo, 2008 huatapimi Escuela para Ancianos de Congregación nishca curso tiyai callarirca. Chai ishqui huatacunapimi 12.000 yalli ancianocunaca chai cursota chasquingapaj Patterson llajtaman, Brooklyn llajtapi tiyaj Betelman rircacuna. Cai cursoca shujtaj llajtacunapipishmi tiyan. 2010 huatapica Escuela de Entrenamiento Ministerialtaca Escuela Bíblica para Varones Solteros nishpami shutichircacuna. Qꞌuipaca shuj mushuj cursomi tiyai callarirca. Chai cursoca Escuela Bíblica para Matrimonios Cristianos nishcami carca.

Septiembre de 2014 huatapimi cai ishqui escuelacunataca shujllata rurashpa Escuela para Evangelizadores del Reino nishpa shutichirca. Chai cursomanca cazadocunapish, mosocunapish, solteracunapish ri tucuncunami. Achca huauquicunapish panicunapish paicunapaj llajtacunapipish cai cursota charinata yachashpaca cushicurcacunami. Chai cursomanca cunanca achcacunami ri tucun. Shinallataj achca huauquicuna panicuna chai cursota chasquingapaj paicunapaj causaipi cambiocunatami rurashcacuna. Chashna huauquicuna panicunata rijsishcamantami contentarini.

Chai chiri yacupi bautizarishtaca yuyarishpaca Jehová Diostami pagui nini. Yuyaisapa huauquicuna panicunata rijsichishcamantapish pagui ninimi. Paicunami Jehovata rijsingapaj, paita alli servingapajpish ayudashca. Huaquincunaca jovencunami carca. Caishujcunaca ñucata yalli mayorcunami carca. Achcacunaca shujtaj costumbrecunatami charirca. Pero paicunapaj causaihuanmi Jehová Diosta cꞌuyashcata ricuchircacuna. Cashna amigocunata charishcamantami cushilla sintirini. Paicunamantami achcata yachashcani.