1. ¿Jesusta punta catijcunaca ima llaquicunatataj charirca?

PEDROCA ‘quiquin llajtamanta llujshishpa caita chaita rishpa Pontopi, Galaciapi, Capadociapi, Asiapi, Bitiniapi causacuj huauqui panicunamanmi’ quillcarca. Huata 61 qꞌuipa o huata 65 manaraj pajtarijpimi quillcashca canga (1 Pedro 1:1). Paicunaca chꞌican chꞌican ladocunamantami carcacuna. Shinallataj catirashpa llaquichisha nijpimi animota, ayudata minishtircacuna. Chai llaquitaca Pedroca “nina” shina llaquicuna nishpami shutichirca. Shinallataj Pedroca: “Tucui imalla tiyajcuna tucurinaca chayamucunmi” nircami. Chaita nishca qꞌuipaca casi 10 huatacunapica Jerusalenca tucuchishcami cagrirca. Chaimantami chai punllacunapi causanaca sinchi carca. Shinaca ¿chai llaqui punllacunapica huauqui panicunaca imatataj rurarcacuna? (1 Pedro 4:4, 7, 12).

2, 3. ¿Pedroca imamantataj huauqui panicunataca caishuj chaishuj chasquinacuichij nirca? (Jahuapi tiyaj dibujota ricui).

² Pedroca huauqui panicunataca: ‘Caishuj chaishuj chasquinacuichij’ nishpami consejarca (1 Pedro 4:9, QC, 1989). Griego rimaipica chasquinacuichij nishpaca “mana rijsishcacunahuan alli cana,  cꞌuyaita ricuchinatami” nin. Shinallataj yuyarishun, Pedroca: “Caishuj chaishuj” nircami. ¿Chaita nishpaca imatataj nisha nicurca? Rijsishcacunata o paicunahuan apanacujcunata chasquinacuna cashcatami nicurca. ¿Chaita rurashpaca ima shinataj beneficiarircacuna?

³ Caishuj chaishuj huasipi chasquinacushpaca tandallami cajcuna carca. Ñucanchijpish yuyashun, ¿shuj huauqui o pani paipaj huasiman invitajpi alli pasashcata yuyaringuichu? Cutin shuj huauqui o panita ñucanchij huasiman invitashpaca ¿manachu ashtahuan apanacushcanchij? Caishujhuan chaishujhuan chasquinacuj cashpaca ashtahuanmi huauqui panicunata rijsishun. Pedro causashca punllacunapica ashtahuan llaquicuna mirashpa caticushcamantami tandalla canata minishtircacuna. Ñucanchijpish ‘cai tucuri punllacunapica’ tandalla canatami minishtinchij (2 Timoteo 3:1).

4. ¿Cai temapica ima tapuicunamantataj yachagrinchij?

⁴ ¿Ima shinataj “caishuj chaishuj” chasquinacuj cai tucuchij? Caishujhuan chaishujhuan chasquinacuj cana sinchi cajpica ¿imatataj rurai tucunchij? ¿Pi ñucanchijta invitajpica imatataj rurana canchij?

5. ¿Ima shinataj tandanacuicunapica alli chasquijcuna cai tucunchij?

⁵ Tandanacuicunapi. Jehová Diospish, tucui huauqui panicunapish tandanacuicunaman shamuchunmi invitanchij. Chaimantami tandanacuiman shamujcuna alli sintirichun munanchij (Romanos 15:7). Maijancunaca primera vezmi shamuncuna. Ima laya cajpipish, ima ropahuan cajpipish allimi chasquina canchij. Paicunapish Jehovapaj invitashcacunami can (Santiago 2:1-4). Shuj huauqui o pani mana paicunata atindicujpica ñucanchijhuan tiyarichunmi mañai tucunchij. Shinallataj tandanacuipi cada partepi imata yachachicushcata ricuchishpa, Bibliapi versocunata mashcashpami ayudai tucunchij. Chashna rurajpica agradicingami. Chashnallataj ‘alli chasquichij’ nishca consejota cazushcatami ricuchishun (Romanos 12:13).

6. ¿Picunatataj huasiman invitana canchij?

⁶ Ñucanchij huasipi micunaman invitashpa. Ñaupa punllacunapica huasipi micunamanmi shujtajcunata casi siempre invitajcuna carca. ¿Imamantataj invitajcuna carca? Paicunahuan alli cangapaj, ashtahuan alli amigocuna tucungapajmi invitajcuna carca (Génesis 18:1-8; Jueces 13:15; Lucas 24:28-30). ¿Ñucanchijcunaca picunatataj invitana canchij? Llaqui punllacuna chayamujpica caishujhuan chaishujhuan ayudanacunatami minishtishun. Chaipica alli amigocunatami charina canchij. Chaimantami alli amigocuna tucungapaj ñucanchij congregacionpi caj huauqui panicunata invitana canchij. Estados Unidos Betelpica ñaupaca Estudio de La Atalaya nishca tandanacuica 6:45 tutatami carca. Pero 2011 huatapica, caishujhuan chaishujhuan ashtahuan tiempota pasachun nishpami 6:15 tutata rurai callarircacuna. Shujtaj Betelcunapipish chashnallatajmi rurarcacuna. Chai cambiocuna tiyashcamantami Betelcunapi trabajaj huauqui panicunaca ashtahuan tandalla cancuna.

7, 8. ¿Conferenciata cunaman shamuj huauquicunataca ima shinataj chasqui tucunchij?

⁷ Shujtaj congregacionmanta huauquicuna, superintendente de circuito huauqui o Betelmanta huauquicunami ñucanchij congregacionpi conferenciata cunaman shamuncuna. Chai huauquicuna shamuchunca achcatami munanchij. ¿Chai huauquicunamanca ima shinataj alli chasquijcuna cashcata ricuchi tucunchij? (3 Juan 5, 7, 8-ta leyipai). Paicuna ñucanchij congregacionman shamujpica imallatapish carangapajmi invitai tucunchij.

 ⁸ Estados Unidosmanta shuj panica: “Ñuca cusandijmi conferenciata cunaman shamuj turitapish paipaj huarmitapish invitashcanchij. Achca huatacunatami chashna ruracushcanchij. Huasiman shamujpica siempremi alli pasashcanchij. Ashtahuantajcarin Diospi ashtahuan cringapajmi paicunaca ayudashcacuna. Cai turi ñañacunata ñucanchij huasipi chasquishcamantaca mana arrepintirishcanchijchu” ninmi.

9, 10. a) ¿Picunataj huasipi pozadata cuchun minishtincuna? b) ¿Corea del Sur llajtapi causaj shuj huauquimantaca imatataj yachai tucunchij?

⁹ Achca punllacunata ñucanchij huasipi saquirijpi. Ñaupa punllacunapica achca gentecunami visitajcunataca paicunapaj huasipi chasquijcuna carca (Job 31:32; Filemón 22). Cunan punllapish chashnallatajmi rurana canchij. Por ejemplo, superintendente de circuito huauqui shuj congregacionta visitacushpaca maijan huauqui o pani huasipi pozadata cuchunmi minishtincuna. Shinallataj Bibliamanta yachachij chꞌican chꞌican escuelacunami tiyan. Chai escuelacunaman invitashcacunami pozadata cuchun minishtincuna. Cutin, construccionpi ayudaj huauqui panicunapishmi pozadata minishtincuna. Chashnallataj terremoto, acapanacuna o chashna laya llaquicuna tiyajpica huasi illaj, tucui illajmi saquirincuna. Chaimantami maijan familiacunaca huasita allichingacama maipi saquirinata minishtincuna. Yuyarishunchij, jatun, alli huasicunallata charijcunalla pozada cui tucushcataca mana yuyanachu canchij. Tal vez paicunaca ñachari achca cutincuna pozadata cushpa ayudarcacuna. Shinaca uchilla huasi cajpipish, humilde cajpipish ñucanchij huasipi chasquishunchij.

¹⁰ Corea del Sur llajtapi causaj shuj huauquimanta parlashun. Paica Bibliamanta yachachij chꞌican chꞌican escuelacunaman shamujcunatami paipaj huasipi chasquirca. Chaita yuyarishpami cai huauquica: “Cunanllami cazarashca carcanchij. Shuj uchilla huasipimi causacurcanchij. Chaimantami ‘huasiman invitanaca allichu canga’ nishpa yuyacurcanchij. Pero chai escuelacunaman rij huauqui panicunata huasipi chasquinaca alhajami carca. Cusa huarmicunapish ishquindij Jehová Diosta ashtahuan sirvingapaj esforzarishpaca cushilla causajcunatami ricurcanchij” ninmi.

11. ¿Ñucanchij llajtapi causanaman shamujcunataca imamantataj alli chasquina canchij?

¹¹ Mushuj huauqui panicunata alli chasquishunchij. Maijan huauqui panicunaca Diosmanta huillashpa ayudangapaj o ñucanchij congregacionpi precursor shina sirvichun cachajpimi ñucanchij llajtapi causanaman shamuncuna. Callaripica sinchichari canga. ¿Imamanta? Mana rijsishca llajtapi cashcamanta, huauqui panicunata manaraj alli rijsishcamanta, mana cashpaca shujtaj shimita o costumbrecunata yachana cashcamantachari sinchi canga. Shinaca ¿imatataj rurai tucunchij? Imallatapish carangapajmi invitai tucunchij. Mana cashpaca maiman ringapajmi invitai tucunchij. Chashnami alli amigocunata charichun, ñucanchij llajtapi amañarichunpish ayudai tucunchij.

12. ¿Alli chasquijcuna cangapajca mana achcata minishtishcata ima shinataj yachanchij?

¹² Caishujhuan chaishujhuan chasquijcuna cangapajca mana achcata ruranata minishtinchijchu (Lucas 10:41, 42-ta leyipai). Shuj huauquimanta parlashun. “Ñucapish, ñuca huarmipish misionerocuna shina sirvi callarishpaca jovencunarajmi carcanchij. Ñucanchij llajtata, huasita yuyarishpami llaquilla sintirij carcanchij. Shuj chishica, ñuca huarmica llaquillami carca. Alli sintirichunca imata mana rurai tucurcanichu. Chashna tiyacujpimi 7:30 tutataca pungupi tac tac nishpa uyarirca. ¿Pitaj carca? Bibliata estudiacuj shuj huarmimi carca. Paica, ‘alli shamushca canguichij’ ningapajmi quimsa naranjacunahuan shamushca  carca. Chaita ricushpami ucuman yaicuchircanchij. Asha vaso yaquituta cushca qꞌuipaca. Mishqui yacuta, asha chocolatetapishmi rurarcanchij. Ñucanchijcunaca manaraj suajili shimita yacharcanchijchu. Paipish mana ñucanchij shimita yacharcachu. Pero, chai punllamantami chai llajtapi causaj huauqui panicunahuan alli apanacui callarircanchij. Chashnami ashtahuan cushilla causai callarircanchij” ninmi.

13. ¿Caishujhuan chaishujhuan chasquinacuj canaca imamantataj alli can?

¹³ Caishujhuan chaishujhuan chasquinacuj canaca huaquinpica sinchichari can. Chaimantachari huauqui panicunahuan alli pasanata o alli amigocunata charinata pirdishcanchij. Maijan amigocunaca tucui vidapajmi can. Shujtajcunata chasquij cashpaca mana ñucanchijlla sintirishunchu. Shinaca, ¿Caishujhuan chaishujhuan chasquinacunaca imamantataj sinchi cai tucun? Ima jarcaicuna tiyashcata ricushun.

14. ¿Alli chasquijcuna cangapaj tiempopish, fuerzapish illaj laya cajpica imatataj rurai tucunchij?

¹⁴ Tiempopish, fuerzapishmi minishtirin. Diosta sirvijcunaca achca ruraicunata charishcamantami achca ocupados canchij. Chaimantami huaquincunapajca alli chasquijcuna cashcata ricuchingapajca mana tiempo tiyaj laya, fuerzapish illaj laya ricurin. Chashna cajpica tiempota surcungapajmi imata ruranata ricuna canchij. Chaipajca, ¿huauqui panicunata invitangapaj o paicuna invitajpipish ringapajca ima cambiocunatataj rurai tucuni? nishpa tapurishunchij. Bibliapica: “Puzachinataca, amataj cungaringuichijchu” ninmi (Hebreos 13:2). Huauqui panicunahuan pasangapaj tiempota surcunaca allimi can. Chaimanta mana minishtishca cosascunapi tiempota pirdinapaj randica paicunahuan cangapajmi tiempota surcuna canchij.

15. ¿Ima nishpataj preocupari tucunchij?

¹⁵ Pingaita charishcamanta. ¿Maijanta invitanata munashpapish sinchi ricurishcachu? Tal vez “pinganayanmi o imatapish mana parlai tucunichu, visitanaman shamujcunaca mana cushilla sintiringachu” nishpachari preocuparinchij. O mana cashpaca “ashalla cullquita charishcamanta, shujtaj huauquicuna shina imatapish mana cui tucunichu, huasipish uchilla, huajcha huasimi can” nishpachari preocuparinchij. Pero yuyarishunchij, jatun o alli huasita charinaca mana minishtinchijchu. Ashtahuanpish limpio, ima tiyashcapish ordenpi cajpica invitashcacunaca allimi sintiringacuna.

16, 17. ¿Invitashcacunata huasipi chasquigrishcamanta, preocuparicushpaca imatataj yuyarina canchij?

¹⁶ Pita ñucanchij huasipi chasquigrishpaca ciertomi preocupados sintirinchij. Pero mana ñucanchijlla chashna sintirinchijchu. Gran Bretaña llajtapi causaj shuj anciano huauquimanta parlashun. Paica: “Invitashcacuna ña shamucujta yachashpaca asha preocupadomi sintirinchij. Jehovata sirvingapaj maijan ruraicunataca ¿pajtachi valishachu? nishpami asha preocupado sintirinchij. Chashnallatajmi huasipi visitajcunata charigrishpaca asha preocupado sintirinchij. Pero ima preocupacioncuna jahuapish achca beneficiocunata charishpami cushilla sintirinchij. Ñucaca huauquicunahuan asha cafecitota ubyaihuan parlashpaca allimi pasashcani” ninmi. Huasipi visitajcuna tiyajpica paicuna alli cachunmi atindina canchij (Filipenses 2:4). Achcacunaca paicunapaj causaimantami parlanata munancuna. Chaimantami paicunahuan pasangapaj, uyangapaj tiempota surcuna canchij. Shujtaj anciano huauquica: “Congregacionmanta huauquicunata invitashpaca paicuna imata yuyashcata, ima shina sintirishcatami yachai tucuni. Jehová Diostapish ima shina rijsishcatami yachai tucuni” ninmi. Invitashcacunamanta preocuparishcata ricuchishpaca tucuicunami alli pasashun.

 ¹⁷ Shuj precursora panica chꞌican chꞌican Bibliamanta yachachij escuelacunaman shamujcunatami huasipi pozadata curca. Paica: “Ñuca huasica pobrella, tiyarinacunapish regalashcallami carca. Chaimantami callaripica preocuparishca carcani. Shinapish chai escuelacunapi yachachij shuj turipaj huarmimi ñucata achcata animarca. Paica: ‘Ñuca cusahuan congregacioncunata visitacushpaca Dioshuan alli apanacuj huauqui panicunapaj huasipi saquirishpami ashtahuan cushicunchij. Paicunaca mana achcata charishpapish ñucanchij layallatajmi minishtirishcacunallahuan Diosta sirvingapaj esforzarincuna. Chaimantami cushilla sintirinchij’ nircami. Chaita nijpica uchilla cajpi ñuca mama imata nishcatami yuyarircani. Paica: “Yuyu calditollata micushpapish, cꞌuyanacushpa causanamari alli” nijmi carca (Proverbios 15:17). Shinaca ashallata charishpapish mana preocuparinachu canchij. Visitajcunaman cꞌuyaita ricuchinami ashtahuan alli can.

18, 19. ¿Ima shinataj shujtajcunahuan alli apanacui tucunchij?

¹⁸ Mana alli apanacushcamanta. ¿Congregacionpica pihuan mana alli apanacunchijchu? Tal vez shuj huauqui o pani ima nishcatapish, imata rurashcatapish manachari munanchij. Chaimantachari mana invitasha ninchij. Mana cashpaca imata rurashpachari ñucanchijta llaquichirca. Chaita mana cungari valishpachari ñucanchij huasiman shamuchun mana invitasha ninchij. Alli apanacungapaj imata mana rurashpaca paicunahuan chashnallatajmi catishun.

¹⁹ Bibliapica, caishujhuan chaishujhuan chasquinacuj cashpaca shujtajcunahuanpish, ñucanchijta pꞌiñajcunahuanpish alli apanacuna cashcatami yachachin (Proverbios 25:21, 22-ta leyipai). Pita ñucanchij huasiman invitashpaca  paicunahuan pꞌiñarishca cashcatami cungarishun. Chashnami ashtahuan alli apanacushun. Shinallataj ima shinami paicunata Jehová Dios allicunata ricushpa, paipaj puebloman pushamurca. Chashnallatajmi ñucanchijpish allicunata ricui callarishun (Juan 6:44). Mana alli apanacuj huauqui o panica manachari huasiman invitachun shuyacurca. Shinapish paita cꞌuyashcamanta huasiman invitajpica allichari apanacui callarishun. ¿Cꞌuyaimanta invitangapajca imatataj rurai tucunchij? Filipenses 2:3-pi nishca shinaca humildemi cana canchij. Shinallataj shujtajcuna ñucanchijta yalli cashcatami yuyarina canchij. Tucuicunami imapica ñucanchijmanta yalli can. Por ejemplo, maijancunaca ashtahuan sinchi crijmi can, cutin shujtajcunaca llaquicunata charishpapish ahuantashpami catincuna. Ñucanchij huauqui panicuna imapi ashtahuan yalli cashcata ricushpami cꞌuyaimanta ñucanchij huasiman invitashun.

20. a) ¿Maijan ñucanchijta invitajpica imatataj rurana canchij? b) ¿Imamantataj chaita rurana canchij?

²⁰ Davidca “cambaj carpa huasipica ¿maijantaj causagringari?” nishpami Jehová Diosta tapurca (Salmo 15:1). Chai qꞌuipaca Davidca Jehová Diospaj huasipi causagrijcuna ima shina cana cashcatami nirca. Por ejemplo, ‘imata ari nishcataca paipaj mana alli cajpipish chaitataj pajtachijmi cambaj huasipica causanga’ nircami (Salmo 15:4). Chaimanta maijan “ñuca huasiman shuj ratitota shamupangui” nijpica ¿imatataj rurana canchij? Ari nishca jahua yangamanta mana pajtachinaca mana allichu can. Maijan invitashpaca ñucanchijta chasquingapaj achca esfuerzotami rurashca canga. Mana rishpaca paicuna rurashcata mana valichishcatami sintichishun (Mateo 5:37). Maijancunaca ari nishca jahuami shujtaj invitación alli ricurijpi mana nincuna. Chashna rurashpaca mana cꞌuyashcata, mana respetashcatami ricuchishun. Chaita ruranapaj randica tucui shunguhuanmi pagui nishpa paicuna cushcata chasquina canchij (Lucas 10:7). Manataj ri tucushpaca ñucanchijta invitajmanmi “mana ri pudishachu” nishpa utca huillana canchij. Chashnami cꞌuyaj cashcata, paicunamantapish preocuparishcata ricuchishun.

21. ¿Ñucanchijta invitajpica ima costumbrecunatataj respetana canchij?

²¹ Shinallataj maipi causashca costumbrecunata respetanami canchij. Por ejemplo, maijan ladocunapica mana huillashpa huasiman chayajpica mana pꞌiñarincunachu. Cutin shujtaj ladocunapica manaraj visitanaman rishpami huillanaraj can. Maijan ladocunapica imata carashpapish invitashcacunamanmi ashtahuan allita carancuna. Cutin shujtaj ladocunapica familiapish, invitashcacunapish chaillatatajmi micuncuna. Maijan ladocunapica invitashcacunami micunapaj imallatapish apancuna. Cutin shujtaj ladocunapica invitashcacuna imata apanaca mana minishtirinchu. Maijan ladocunapica shuj, o ishqui cutin alli shimicunahuan mana nishca huasha ari ninami alli ricurin. Cutin shujtaj ladocunapica chaita ruranaca mana agradicijcuna cashcatami ricuchincuna. Maijan costumbreta charijpipish ñucanchijta invitajcunapish cushicuchunmi esforzarina canchij.

22. ¿Imamantataj ‘caishuj chaishuj chasquinacuj’ cana canchij?

²² Pedroca: “Tucui imalla tiyajcuna tucurinaca chayamucunmi” nircami (1 Pedro 4:7). Jatun llaqui punllacunaca ñami chayamucun. Llaquicunaca mirashpami caticun. Chaimantami caishuj chaishuj cꞌuyanacuna canchij. Shinallataj Pedro nishca consejota catishunchij. Paica: ‘Pozadata mañajpica caishuj chaishuj chasquinacuichijlla’ nircami (1 Pedro 4:9). Shinaca cunanpish shamuj punllacunapipish caishuj chaishuj chasquinacujmi cana canchij. Chashna cashpaca cushillami causashun.