1. ¿Disciplinamantaca Bibliaca imatataj yachachin?

DISCIPLINA shimita ¿uyashcanguichu? Cai shimita uyashpaca achca gentecunaca castiganapimi yuyancuna. Pero disciplina shimica mana chaillata nisha ninchu. Shinaca ¿disciplinaca imataj can? Bibliapica disciplinaca ñucanchijpaj alli cashcatami ricuchin. Shinallataj disciplina shimica huaquinpica “yachai”, “cꞌuyai”, “causai” shimicuna ladopimi Bibliapica ricurin (Proverbios 1:2-7; 4:11-13, NM). Jehová Diosca ñucanchijta cꞌuyashcamanta, huiñai causaita charichun munashcamantami disciplinan (Hebreos 12:6, NM). Jehová Dios disciplinangapaj huaquinpi castigashpapish paica nunca mana yallitaj castiganchu. Disciplinaca shuj huahuaman paipaj cꞌuyaj yaya yachachishca layami can.

2, 3. ¿Ima shinataj disciplinata cui tucuncuna? (Jahuapi tiyaj fotota ricui).

² Cai ejemplopi yuyashun. Carlitos shuti huahuaca huasi ucupimi pelotahuan pugllacun. Paipaj mamaca: “Carlitos, huasi ucupica pelotahuan ama pugllaichu, ñataj imata pꞌaquinguiman” ninmi. Pero Carlitosca mana cazushpami pugllashpa catin. Chashna pugllacushpami ñapish shuj jarrata urmachishpa pꞌaquin ¿Mamaca ima shinataj Carlitosta disciplinan? Puntapica yaya mamata cazuna alli cashcata, imata rurachun mañashpapish minishtirishca  cashcata, mana yalli mañashcatapish intindichunmi munan. Chaipajca mana cazuna imamanta mana alli cashcatami parlashpa yachachin. Qꞌuipaca chaita ama cungarichun nishpami mamaca asha tiempota pelotata quichushpa castigan. Chashna castigachun mana munashpapish Carlitosca mana cazushpa, llaqui tucuna cashcataca mana cungaringachu.

³ Ñucanchijcunaca ‘Diospaj huasipimi’ sirvicunchij (1 Timoteo 3:15). Chaimantami Jehová Diosca mandashcacunata churana derechota charin. Shinallataj pai mandashcacunata mana cazujpica cꞌuyaihuan disciplinana derechotami charin. Dios mandashcacunata mana cazushpaca llaquicunatami charishun, disciplinashcapishmi cashun. Chaimantami Yayitu Jehová Diosta siempre cazuna cashcata intindinchij (Gálatas 6:7). Diosca ñucanchijta achcata cꞌuyashcamantami llaquicunata ama charichun munan (1 Pedro 5:6, 7).

4. a) ¿Jehová Diosca ima shinataj shujtajcunata yachachichun munan? b) ¿Cai temapica imatataj yachashun?

⁴ Huahuacunaman, Bibliata estudiajcunaman ima disciplinata cuna cashpaca Bibliapi tiyaj consejocunahuanmi ayudana canchij. Chashnami paicunataca Jesusta catijcuna tucuchun ayudashun. Bibliata estudiajcunamanca Bibliahuanmi cashcata rurachun, Jesús mandashcacunata intindichun, tucuita cazuchunpish yachachinchij (2 Timoteo 3:16; Mateo 28:19, 20). Jehová Diosca Bibliahuanmi yachachichun munan. Chashna rurajpica Bibliata estudiajcunapish shujtajcunata Jesusta catijcuna tucuchunmi ayudangacuna (Tito 2:11, 12, 14-ta leyipai). Cai temapica quimsa tapuicunamantami yachashun. 1) ¿Dios disciplinashpaca imamantataj cꞌuyashcata ricuchin? 2) ¿Jehová Dios disciplinashca runacunamantaca imatataj yachanchij? 3) ¿Disciplinata cuna cashpaca ima shinataj Jehová shina, Jesús shina cai tucunchij?

5. ¿Jehová Diosca ima shinataj cꞌuyaihuan disciplinan?

⁵ Jehová Diosca paihuan alli apanacushpa catichun, huiñai causaita charichunmi munan. Chaimantami ñucanchijta cꞌuyaihuan yachachin, disciplinanpish (1 Juan 4:16). Jehová Diosca rimashpa, imapaj mana valishcataca mana sintichinchu (Proverbios 12:18). Ashtahuanpish paica ñucanchij allicunatami ricun. Shinallataj ñucanchijllataj imatapish decidichunmi saquin. Jehová Diosca Bibliapi, publicacioncunapi consejocunata cushpami disciplinan. Shinallataj yaya mamata, ancianocunata utilizashpami disciplinan. Chashna disciplinajpica ¿Jehová Dios canta cꞌuyashcata ricushcanguichu? Mana cuentata cushpa ima mana allita rurajpica ancianocunaca cꞌuyaihuan, pacienciahuanmi ñucanchijta disciplinan. Chashna rurashpami paicunaca Jehová cꞌuyashca shina cꞌuyashcata ricuchincuna (Gálatas 6:1).

6. Disciplinajpi asignacioncunata mana chasqui tucushpapish ¿imamantataj ‘Diosca cꞌuyashcamantami chashna disciplinan’ ni tucunchij?

 ⁶ Disciplinaca maijan ratoca mana consejota cunallachu can. Por ejemplo, shuj huauqui o pani jatun juchata rurashca cajpica congregacionpica ima asignacionta ña mana chasqui tucungachu. Chashna disciplinashpaca Jehová Diosca chai huauquita o panita cꞌuyashcatami ricuchin. ¿Imamantataj chaita ninchij? Ima asignacionta chasquichun ña mana saquijpica tal vez juchata rurajca Bibliata ashtahuan estudiana, yachashcapi ashtahuan yuyangapaj tiempota surcuna, Diosta ashtahuan mañana cashcatachari cuentata cunga. Chaicunata rurashpaca Jehová Diospajman ashtahuanmi cꞌuchuyanga (Salmo 19:7). Tal vez tiempohuanca cutinllatajmi asignacioncunata chasquinga. Congregacionmanta llujchishpapish Jehová Diosca cꞌuyashcamantami chashna ruran. Maijanta congregacionmanta llujchishpaca shujtajcunapish chashnallataj ama rurachunmi Jehová Diosca ayudan (1 Corintios 5:6, 7, 11). Jehová Dios disciplinashpaca cashcata ruraj cashcatami ricuchin. Shuj huauqui o pani congregacionmanta llujchishca cashpaca, “jatun juchatami rurashcani” nishpachari yuyanga. Chashnallataj arrepintirishca cashcatachari ricuchisha ninga (Hechos 3:19).

7. a) ¿Sebná runaca pitaj carca? b) ¿Sebnaca ima laya runataj tucurca?

⁷ Disciplinana minishtirishca cashcata intindingapajca ishqui runacunata Jehová Dios ima shina disciplinashcata ricushun. Shujca Sebná shuti runami can. Paica rey Ezequías causashca tiempopimi causarca. Caishujca Graham shutimi can. Paica cunan punllacunapi causaj huauquimi can. Sebná runamanta parlashpa callarishun. Paica Ezequiaspaj huasipi ‘mayordomomi’ cashca yuyachin. Chashna cashcamantami achca autoridadta charirca (Isaías 22:15). Pero jatun tucushpami pailla ashtahuan importante cashcata gentecuna yuyachun munarca. Shinallataj shuj caro pambana jutcutami rurarca. ‘Jatun tucushpa purina carrocunapipishmi’ purirca (Isaías 22:16-18).

8. a) ¿Jehová Diosca ima shinataj Sebnata disciplinarca? b) ¿Disciplinashca qꞌuipaca Sebnaca ima laya runataj tucurca?

 ⁸ Sebnaca tucuicunamanta ashtahuan importante canatami mashcarca. Chaimantami Diosca Sebnapaj puestota quichushpa Eliaquim runaman curca (Isaías 22:19-21). ¿Ima horataj chashna tucurca? Asiriamanta rey Senaquerib Jerusalenta ima shina llaquichinata yuyacujpimi chashna tucurca. Asha tiempo qꞌuipaca Senaqueribca judiocuna mancharichun, rey Ezequiaspish pai nishcata rurachun munashpami mandajcunata, achca soldadocunatapish Jerusalenman cacharca (2 Reyes 18:17-25). Ezequiasca chai runacunata chasquichunca Eliaquimta shujtaj ishqui cꞌaricunatapishmi cacharca. Shuj cꞌarica Sebnami carca. Cunanca paica Ezequiaspaj secretariomi carca. Caipica disciplinata chasquishpapish shungupi pꞌiñarishca o llaquirishca saquirishcataca mana ricunchijchu. Ashtahuanpish Sebnaca humilde tucushcatami ricunchij. ¿Imamantataj chaita ni tucunchij? Sebná runaca cunanca ashtahuan humilde puestotami chasquishca carca. ¿Caimantaca imatataj yachai tucunchij?

9-11. a) ¿Sebná runamantaca imatataj yachai tucunchij? b) ¿Sebná runata Jehová Dios ima shina tratashcata ricushpaca ima shinataj sintiringui?

⁹ Sebná ima tucushcaca Proverbios 16:18-pi nishca shimicunatami yuyachin. Chaipica: “Manaraj llaqui tucushpaca, jatun tucushcami causancuna” ninmi. Tal vez quiquinca, congregacionpica achca asignacioncunatachari charingui. Chaimanta shujtajcunaca quiquinca importante cashcatachari yuyangacuna. Chashna cajpica ¿humilde cangapaj esforzaricunguichu? ¿Jehová Dios ayudashcallamanta imata rurai valishcatapish, imata charishcatapish yuyaipi charinguichu? (1 Corintios 4:7). Apóstol Pabloca: ‘Cancunapurapica, caishujta yalli cashcataca ama yuyaichijchu. Ashtahuanpish canca ima shina cashcata alli yuyaringui’ ninmi (Romanos 12:3).

¹⁰ Sinchita disciplinajpi Sebná cambiana cashcataca Jehová Diosca yachashcami canga (Proverbios 3:11, 12). ¿Imatataj caica yachachin? Cunan punllacunapica maijancunaca disciplinashcami cashca. Chaimantami asignacioncunata quichushca cashcacuna. Chashna cashpaca pꞌiñarishca o resentirishca saquirinapaj randica Diostami sirvishpa catina can. Shinallataj Jehová Diosca cꞌuyaimanta disciplinashcatami yuyarina can. Ñucanchijcuna humildecuna cajpica Jehová Diosca bendiciangami (1 Pedro 5:6, 7-ta leyipai). Jehová Diosca pai munashca shina cachunmi cꞌuyaihuan disciplinan. Chaimantami humilde, alli allpa barro shina cana canchij.

¹¹ ¿Sebná runata ima shina Jehová Dios tratashcamantaca imatataj yachanchij? Jehová Diosca juchata millanayachishcamantami disciplinan. Shinapish maijan juchata rurajpi disciplinashpaca cꞌuyashcatami ricuchin. Jehová Diosca gentecunapaj allicunatami mashcan. Can disciplinana cashpaca ¿Jehová Dios disciplinashca shina cꞌuyaihuanchu disciplinata cungui? (Judas 22, 23).

12-14. a) ¿Disciplinashca cashpaca maijancunaca imatataj rurancuna? b) ¿Shuj anciano huauquica ima shinataj Bibliahuan Graham huauquita ayudarca? c) ¿Anciano huauqui ayudashcamantaca Graham huauquica imatataj rurarca?

¹² Maijancunaca disciplinata chasquishpaca dimastij shungupi nanarishca sintirishpami Jehovamantapish, congregacionmantapish caruyashcacuna (Hebreos 3:12, 13). ¿Paicunata ayudai tucunchijchu? Caita contestangapajca Graham huauquimanta parlashun. Paica congregacionmantami llujshichishca carca. Tiempo qꞌuipaca cutinmi congregacionpi chasquishca carca. Pero chai qꞌuipaca tandanacuicunaman  rinata, huillanaman llujshinatami saquirca. Asha huatacuna qꞌuipaca shuj ancianomi paihuan amigo tucungapaj esforzarirca. Chaipimi Grahamca: “Bibliamantami canhuan yachasha nini” nishpa mañarca.

¹³ Chai anciano huauquica: “Graham huauquica jatun tucushcami carca. Congregacionmanta paita llujshichij ancianocunamantami mana allita rimaj carca. Chaimantami jatun tucushca canamanta Biblia imata yachachishcata estudiarcanchij. Paica Bibliata estudiashpaca paillataj espejopi ricurij shinami carca. Ima shina pai cashcataca mana munarcachu. Jatun tucunaca ‘jatun caspi’ ñahuita tapacushca shina cashcata, pai chashna cana mana alli cashcatami cuentata curca. Chaita cuentata cushpaca ratomi cambiai callarirca. Tandanacuicunamanpish mana faltajchu carca, Bibliatapish allimi yachai callarirca. Tucui punllacunami Diostapish mañai callarirca. Shinallataj familiamanpishmi Diosmanta yachachi callarirca. Chaimantami paipaj huarmipish, ushushicunapish cushilla sintirirca” ninmi (Lucas 6:41, 42; Santiago 1:23-25).

¹⁴ Chai anciano huauquica cashnapishmi nin: “Shuj punllaca Graham huauquica, ‘Achca huatacunatami Diosta rijsini. Precursorpishmi carcani. Pero cunanmi Jehová Diosta cꞌuyani’ nircami. Asha tiempo qꞌuipallami tandanacuicunapi microfonocunata pasachishpa ayudachun mañarca. Chai asignaciontaca achcatami valorarca. Paipaj ejemploca Jehová Diospaj disciplinata humildadhuan chasquijpica achca bendicioncunata chasquina cashcatami yachachin” ninmi.

15. ¿Shujtajcuna ñucanchij consejota chasquichunca imatataj rurana canchij?

¹⁵ Alli yachachijcuna cangapajca ñucanchijrajmi yachachichun saquina canchij (1 Timoteo 4:15, 16). Chashnallatajmi Jehová Dios shujtajcunata disciplinachun canta utilizajpica humildadhuan, Jehová ayudachun saquina cangui. Shujtajcuna can humilde cajta ricushpaca respetangacunami, shuj consejota cujpipish agradicishpami pajtachingacuna. Cunanca Jesuspaj ejemplota ricushun.

16. ¿Jesús yachachishcamanta, disciplinashcamantaca imatataj yachai tucunchij?

¹⁶ Sinchi cajpipish Jesusca paipaj Yaya mandashcacunataca tucuitami cazurca (Mateo 26:39). Shinallataj paipaj sabiduriapish, pai yachachishcacunapish Diosmanta shamushcatami nirca (Juan 5:19, 30). Paica humilde, tucuita cazuj cashcamantami llaquishpa, cꞌuyaihuan yachachij carca. Chaimantami alli shunguta charij gentecunaca paipajman cꞌuchuyanata munajcuna carca (Mateo 11:29-ta leyipai). Jesusca desanimarishca, llaquilla caj gentecunataca alhaja shimicunahuanmi cushichij carca (Mateo 12:20). Apostolcunaca ‘maijanshi jatun cashun ninacushpami’ rimanacujcuna carca. Jesusca pꞌiñarinapaj randica cꞌuyaihuanmi consejarca (Marcos 9:33-37; Lucas 22:24-27).

17. ¿Ancianocunaca huauqui panicunata cuidangapajca imatataj rurana can?

¹⁷ Ancianocunaca, Bibliapi tiyaj consejocunahuan  disciplinata cucushpaca Jesús shina cangapajmi esforzarina can. Chashna rurashpaca Jehovapish Jesuspish ayudachun munashcatami ricuchincuna. Apóstol Pedroca: “Dios cancunaman mingashca canlla ovejacunataca alli michichij, ama cuidachun nishcallamanta cuidaichijchu. Ashtahuanpish Dios munashca shina cuidanata munashcamanta cuidaichij. Cullquita japinga raicullaca ama ruraichijchu. Ashtahuanpish ama qꞌuillashpalla ruraichij. Cancuna cuidacushcacunataca, ama quiquin munaita rurashpa mandanguichijchu. Ashtahuanpish canlla ovejacuna ricushpa catinallata ruranguichij” nircami (1 Pedro 5:2-4). Jehová Diosta, Jesusta cazushpaca ancianocunapish, huauqui panicunapish achca bendicioncunatami chasquinga (Isaías 32:1, 2, 17, 18).

18. a) ¿Jehová Diosca imatataj yayacunamanca mandan? b) ¿Jehová Diosca ima shinataj yaya mamacunataca ayudan?

¹⁸ ¿Familia ucupica ima shinataj disciplinata cuna can? Jehová Diosca familiata pushajcunataca: “Cancunapaj huahuacunata ama pꞌiñachichijchu. Chaipaj randica cunashpa, Jehová Diosmanta yachachishpa huiñachichij” ninmi (Efesios 6:4, NM). ¿Imamantataj caita rurana minishtirishca can? Bibliapi nishca shinaca yaya mamacunaca huahuacunata yachachina, disciplinanami can. Chaita mana rurajpica Jehová Diosca yaya mamacunataca cuentastami mañanga (1 Samuel 3:12-14). Jehová Diosllatajmi huahuacunata yachachingapaj sabiduriata, fuerzasta cushpa ayudanga. Chaipajca paitami ayudachun nishpa mañana canchij. Shinallataj Bibliapish, Diospaj espiritupish ayudachunmi saquina canchij (Santiago 1:5-ta leyipai).

19, 20. a) ¿Jehová Diospaj disciplinata chasquishpaca ima bendicioncunatataj charishun? b) ¿Catij temapica imatataj yachashun?

¹⁹ Jehová Diospaj disciplinata chasquishpa, Jehová shina, Jesús shina disciplinata cushpaca achca bendicioncunatami charishun. ¿Ima bendicioncunatataj charishun? Por ejemplo, familiapipish, congregacionpipish sumaj causaitami charishun. Chashnallataj tucuicunami cꞌuyashca, valorashca, tranquilos sintirishun. Caicunaca paraíso Allpapi ima bendicioncunalla tiyagrishcatami ricuchin (Salmo 72:7). Diospaj disciplinata chasquishpaca paraisopi huiñaita tandalla, sumajta causangapajmi listos cashun. Jehovami ñucanchij yaya canga (Isaías 11:9-ta leyipai). Caita mana cungarishpaca Dios disciplinajpica paica cꞌuyaimanta cashna rurashcatami intindishun.

²⁰ Catij temapica familia ucupi ima shina disciplinata cuna cashcata, congregacionpipish disciplinata ima shina cunata o chasquina cashcatami yachashun. Shinallataj ñucanchijllataj disciplinata charij cangapaj imata ruranata, disciplinata mana chasquina ashtahuan llaqui cashcatapishmi yachashun.