1. ¿Yaya mamacunaca huahuacuna manaraj bautizarijpica imatataj seguros casha nincuna?

PANI Blossom Brandtmanta parlashun. Paica: “Ñuca yaya mamamanca tauca quillacunatami ‘bautizarisha ninimi’ nishpa purircani. Paicunaca, bautizarina shuj jatun responsabilidad cashcata intindishcata o manaraj intindishcatami alli yachanata munarcacuna. Chaimantami cutin cutin ñucahuan parlarcacuna. Chashnami 31 de diciembre de 1934-pi bautizarircani. Chai punllaca ñucapajca dimastij sumaj punllami carca” ninmi. Cunan punllacunapipish yaya mamacunaca huahuacuna alli decisioncunata japichunmi ayudasha nincuna. Yangamanta bautizarinata qꞌuipayachishpaca Diospaj ñaupajpica huahuacunaca mana alli ricuri tucunchu (Santiago 4:17). Manaraj bautizarijpimi Jesusta catij tucungapaj, huahuacuna alli prepararishca cashcata yaya mamacunaca seguros casha nincuna.

2. a) ¿Huaquin superintendente de circuito huauquicunaca imamantataj preocuparincuna? b) ¿Cai temapica imatataj yachashun?

² Maijan jovencunaca ñami casi 20 huatacunata charin.  Paicunataca huahuamantami Diosmanta yachachishcacuna. Shinallataj tandanacuicunamanpish, huillanamanpishmi ricuncuna. Ña testigo cashca layami purincuna pero manaraj Diosman mingarishpa bautizarishcacunachu. Chaimantami huaquin superintendente de circuito huauquicunaca preocuparishca cancuna. ¿Imamantataj manaraj bautizarishcacuna? Maijancunataca paicunapaj yaya mamami “bautizaringapajca shuyanarajmi cangui” nishcacuna. ¿Imamantataj maijan yaya mamacunaca testigocuna cashpapish huahuacunaman chashna nincuna? Cai temapica yaya mamacuna imamanta preocuparishcatami yachashun. 4 yuyaicunata ricushun.

3. ¿Blossom Brandt panipaj yaya mamaca imamantataj preocuparircacuna?

³ ¿Blossom Brandt panipaj yaya mamaca imamantataj preocuparishca carca? Paicunaca: “Ñucanchij ushushica huahuarajmi. Bautizarina ima cashcata, imamanta bautizarina cashcatapish manaraj alli intindingachu” nishpami preocuparircacuna. Pero ¿huahuacuna Diosman mingaringapaj listo cashcataca yaya mamacunaca ima shinataj yachai tucuncuna?

4. ¿Mateo 28:19, 20-pi yachachishca shinaca yaya mamacunaca imatataj rurana can?

⁴ (Mateo 28:19, 20-ta leyipai). Bibliapica mashna huatacunata charishpa bautizarinataca mana huillanchu. Pero yaya mamacunaca Mateo 28:19-pi nishca shimicunapimi alli yuyana can. Chaipica: “ñuca yachacujcunata ruraichij” ninmi. Griego rimaipica “yachacujcunata ruraichij” nishpaca Jesusta catijcuna tucungacama yachachinatami nisha nin. Jesusta catijca Jesús yachachishcatami yachana, intindina, cazunapish can. Chaimantami yaya mamacunaca Jesusta catijcuna tucuchun, bautizarichunpish huahuacunata llullumanta yachachina can. Shinapish yuyari, shuj llullu huahuaca bautizaringapajca manaraj tucuita pajtachi tucunchu. Chaimantami mana bautizari tucun. Pero Bibliapica uchilla huahuacunapish Diospaj shimipi yachachishcacunataca intindishpami paicunapaj shungupi huaquichi tucun ninmi.

5, 6. a) ¿Timoteomantaca imatataj yachai tucunchij? b) ¿Huahuacuna Diosman mingarishpa bautizarichunca yaya mamacunaca imatataj rurai tucunguichij?

⁵ Jesusta catij Timoteoca jovenraj cashpami Diosta sirvinata agllarca. Apóstol Pabloca Timoteotaca: ‘Canca huahuamantapachami, Diospaj Quillcacunataca yachangui’ nircami. Timoteopaj yayaca Diosta mana sirvijchu carca. Shinapish paipaj mama, abuelapishmi llullumanta Diospaj yachaicunata cꞌuyachun yachachirca. Chaimantami Timoteoca Jehovapi tucui shunguhuan crij tucurca (2 Timoteo 1:5; 3:14, 15). Ña casi 20 huatacunata charijpicarin apóstol Pabloca paihuan huillanaman richunmi mañarca (Hechos 16:1-3).

⁶ Yaya mamacunaca huahuacuna ña bautizarichunca mana obliganachu can. Tucui huahuacunami chꞌican chꞌican can. Por ejemplo, maijancunaca huahuaraj cashpapish ima alli cashcata o ima mana alli cashcata intindishpami bautizarisha nincuna. Cutin shujtajcunaca ashtahuan tiempotami minishtincuna. Yaya mamacunaca caitami alli intindina can. Cancunapaj huahuacuna Proverbios 27:11-pi nishcata pajtachijpica cushillami sintiringuichij (Proverbios 27:11-ta leyipai). Pero cancunapaj huahuacuna Jesusta catijcuna tucuchun ayudanataca mana cungarina canguichij. Chaipajca cashna tapurichij: “¿Ñuca huahuaca Diosman mingarishpa bautizaringapajca  ñachu minishtirishca yachaicunata yachan?”

7. ¿Bautizaringapajca tucui Bibliatachu yachana can?

⁷ Yaya mamacunaca huahuacuna Diosta alli rijsichunmi yachachina can. Chashnami huahuacunaca Diosman mingarisha ningacuna. Shinaca ¿Diosman mingarishpa bautizarichunca tucui Bibliatachu yachana can? Mana. Ña bautizarishpapish tucuicunami Diosmanta yachashpa catina can (Colosenses 1:9, 10-ta leyipai). Shinaca ¿Diosman mingarishpa bautizaringapajca mashnatataj yachana can?

8, 9. a) ¿Filipos llajtapica carcelta cuidaj runaca imataj tucurca? b) ¿Paimantaca imatataj yachai tucunchij?

⁸ Jesusta punta catijcuna causashca punllacunapi shuj familia ima tucushcata parlashun (Hechos 16:25-33). Huata 50-pica Pabloca Filipos llajtatami visitarca. Cai llajtamanca paipaj ishqui viajemi carca. Chaipica llullacunahuanmi Pablotapish Silastapish carcelpi churarcacuna. Chai tutaca shuj terremoto tiyajpimi pambapish cuyurirca, tucui pungucunapish pascarirca. Tucui carcelpi cajcuna cacharirishpa rishcata yuyashpami carcelta cuidajca paillataj huañusha nirca. Pero Pabloca mana saquircachu. Pablopish Silaspish carcelta cuidajman paipaj familiamanpishmi Jesusmanta parlarca. Jesuspi crishpa, paita cazuna cashcata intindishpami carcelta cuidajpish paipaj familiapish utca bautizarirca. ¿Caimantaca imatataj yachacunchij?

⁹ Carcelta cuidajca ñaupaca Roma llajtapi soldadochari carca. Diospaj Shimimantapish mana yacharcachu. Chaimantami Jesusta catij tucungapajca Diospaj Shimimanta ashata yachanaraj carca. Shinallataj Diosta sirvingapaj imata ruranatami yachanaraj carca. Jesús yachachishcatapish cazuna munaitami charina carca. Chai runaca ashalla tiempopi yachashpa, chai yachaicuna valishcata intindishpami bautizarirca. Bautizarishca qꞌuipaca Diosmanta yachashpa catinarajmi carca. Caipi yachashca shinaca cambaj huahuapish “Diostami cꞌuyani paita cazusha nishpami bautizarisha nini” nijpica ¿yaya mamacunaca imatataj rurai tucun? Chashna cajpica ancianocunahuan parlachunmi huahuata animana can. Ancianocunami bautizaringapaj listo cashcata o mana cashcata ricungacuna * (urapi tiyaj notata ricui). Shujtaj bautizarijcuna shinallatajmi bautizarishca qꞌuipaca huiñaita Diosmanta ashtahuan yachashpa catina can (Romanos 11:33, 34).

10, 11. a) ¿Huaquin yaya mamacunaca imatataj yuyancuna? b) ¿Huahuacunata ayudangapajca yaya mamacunaca imatataj rurana can?

¹⁰ Huaquin yaya mamacunaca “manaraj bautizarishpami universidadpi estudiana, shuj alli trabajota mashcana can” nishpami yuyancuna. Paicunaca huahuacunamanta  preocuparishpami chashna yuyancuna. Pero ¿chaicunaca cushilla causangapaj huahuacunata ayudangachu? ¿Bibliaca chaitachu yachachin? ¿Jehová Diosca ñucanchij causaipica imatataj rurachun munan? (Eclesiastés 12:1-ta leyipai).

¹¹ Cai mundopica gentecunapaj ruraicunapish, yuyaicunapish mana Jehová Dios munashca shinachu can. Chaitaca mana cungarinachu canchij (Santiago 4:7, 8; 1 Juan 2:15-17; 5:19). Huahuacunaca Diablomanta, mana alli ruraicunamanta, mana alli yuyaicunamantapish jarcaringapajca Dioshuanmi alli apanacuna can. Yaya mamacuna estudianallapi, alli trabajota charinallapi yuyajpica huahuacunapish Dioshuan apanacunapaj randica chaicuna ashtahuan importante cashcatami yuyangacuna. Diosta sirvij yaya mamacunaca huahuacuna cai mundopi gentecuna laya yuyachun, imatapish rurachunca mana munanguichijmanchu. Chaimantami cushilla causangapajca Diostaraj puntapi churashpa causana canguichij (Salmo 1:2, 3-ta leyipai).

12. ¿Maijan yaya mamacunaca imamantataj huahuacunata amaraj bautizarichun nishcacuna?

¹² Shuj panica paipaj ushushitaca “amaraj bautizarichu” nircami. ¿Imamantataj chaita nirca? Chai panillatajmi: “Caita parlanataca pinganayanmi. Pero ñuca ushushi ima hora congregacionmanta llujshichishca canata manchashpami chaita nircani” nircami. Cai pani shinallatajmi maijan yaya mamacunaca yuyancuna. Chaimantami “alli desicioncunata japinata yachangacama shuyanaraj can. Qꞌuipa bautizaringallami” nincuna (Génesis 8:21; Proverbios 22:15). Shinallataj maijancunaca “mana bautizarishca cajpica ima juchata rurajpipish mana congregacionmanta llujchingachu” nishpami yuyancuna. Pero mana chashnachu can. ¿Imamantataj chaita ninchij? (Santiago 1:22).

13. ¿Yaya mamacunaca imatataj yuyarina can?

¹³ Yaya mamacunaca huahuacuna ima alli cashcata o ima mana alli cashcata alli intindishpami Diosman mingarishpa bautizarichun munan. Pero yuyari, mana bautizarishca  cashpapish Diospaj ñaupajpica tucui rurashcatami ricuchina can. Cambaj huahuaca Dios imata rurachun nishcata yachashca horasmantami Diospaj ñaupajpica cuentasta cuna can (Santiago 4:17-ta leyipai). Chaimantami “amaraj bautizarichu” ninapaj randica alli ejemplota cushpa ayudana canguichij. Llullumantapacha Diospaj mandashcacunata cꞌuyachun yachachichij (Lucas 6:40, QC, 1989). Huahuacuna Diosta cꞌuyashpaca pai tucui mandashcatami siempre cazusha ningacuna. Chashna cajpica ima juchapi mana urmangacunachu (Isaías 35:8).

14. ¿Ancianocunaca ima shinataj yaya mamacunata ayudai tucun?

¹⁴ Ancianocunami huahuacunata yachachichun yaya mamacunata ayudai tucuncuna. ¿Ima shina? Diosta ashtahuan sirvina sumaj cashcatami huahuacunaman parlai tucuncuna. Shuj panica: “Ñuca 6 huatacunata charijpica, huauqui Russellca 15 minutocunapimi Diosta ashtahuan sirvingapaj ñuca imata rurai tucushcata parlarca” nircami. Cai panica 70 huatacunata yallimi precursora carca. ¿Caimantaca imatataj yachanchij? Shujtajcunaman allita parlashpa, animashpaca achcatami ayudai tucunchij (Proverbios 25:11). ¿Ima shinataj ancianocunaca ashtahuan ayudai tucuncuna? Tandancuna Huasicunataca limpiana, allichinami minishtirin. Chaimantami yaya mamacunatapish paicunapaj huahuacunatapish chaipi ayudachun mañai tucuncuna. Huahuacunataca rurana valishcallata rurachunmi mañai tucuncuna.

15. ¿Congregacionmanta jovencunataca ima shinataj ayudai tucunchij?

¹⁵ Congregacionpi jovencunaca Diospajman ashtahuan cꞌuchuyangapajca achcatachari esforzaricuncuna. Shinaca ¿huauqui panicunaca ima shinataj paicunata ayudai tucunguichij? Jovencunamanta preocuparishcatami ricuchi tucunguichij. ¿Ima shina? Por ejemplo, maijan jovenca alli preparashca comentariotachari curca. O shuj asignaciontachari tandanacuipi curca.  Shinallataj ima tentación ricurijpica jarcarircachari. Mana cashpaca escuelapi compañerocunaman huillangapajchari esforzarirca. Chaita ricushpaca tucui shunguhuanmi felicitana canchij. Chashnallataj jovencunata ayudangapajca tandanacui manaraj callarijpi o ña tucurishca qꞌuipa paicunahuan parlanacungapajmi esforzarina canchij. Chashna rurajpica achca huauqui panicunapajpurapi cashcata sintichunmi ayudashun (Salmo 35:18).

16, 17. a) ¿Imamantataj huahuacunaca bautizarina can? b) ¿Diosta sirvij yaya mamacunaca imamantataj cushilla sintiri tucuncuna? (Página 9-pi tiyaj fotota ricui).

¹⁶ Diosta sirvij yaya mamacunapajca huahuacuna Diosta cꞌuyachun yachachinami ashtahuan importante can (Efesios 6:4, NM; Salmos 127:3). Israelitacunapaj huahuacunaca Diosman mingarishcami huacharijcuna carca. Pero cunan punllapica yaya mama Diosta sirvijcuna cajpipish huahuacunaca mana Diosta sirvijcuna cashpa huacharinchu. Shinallataj yaya mama Diosta cꞌuyajpipish, paimanta yachashcacunata valorajpipish huahuacunaca mana chaita rurangacunachu. Chaimantami llullumantapacha Jesusta catij tucuchun, Diosman mingarishpa bautizarichun ayudana can. Chashna ayudanaca importantemi can. ¿Imamantataj chaita ninchij? Paicunaca Diosman mingarishpa, bautizarishpa, Diosta alli sirvishpallami jatun llaqui punllapica salvaringacuna (Mateo 24:13).

¹⁷ Callari parrafopi parlashca Blossom Brandt shuti panita yuyarishun. Yaya mamaman “bautizarisha ninimi” nijpica paicunaca bautizaringapaj ña alli prepararishcata yachanatami munarcacuna. Alli prepararishcata yachashpaca bautizarichunmi yaya mamaca apoyarcacuna. Cai panica cayandijtami bautizarigrirca. Chaimantami yayaca cungurichun tucuicunata mañashpa: “Ñuca uchilla ushushi mingarinata decidishcamantaca cushillami sintirini” nishpa Jehová Diosta mañarca. 60 yalli huatacuna qꞌuipaca cai panica: “Ñuca yaya chai tuta Diosta ima shina mañashcataca huañushpallami cungarisha” nircami. Caipi ricushca shinaca huahuacuna Diosman mingarishpa, bautizarishpa Diosta sirvij tucujpi tucui yaya mamacuna cushilla sintirichunmi munanchij.