Jesusta catijcuna tucungapajca bautizarinami canchij
‘Cunanca bautizarinaca cancunatapishmi quishpichin’ (1 PEDRO 3:21).
1, 2. a) ¿Diosta sirvij yaya mamacunaca paicunapaj huahuacuna bautizarisha nijpica ima nishpataj preocuparincuna? b) ¿Imamantataj bautizarigrijcunata “Diosman mingarishcanguichu” nishpa tapuncuna? (Jahuapi tiyaj fotota ricui).
“CUNAN bautizarigrijcuna shayaripaichij” nijpica Mariapish shujtaj bautizarigrijcunapishmi shayarin. Bautizaringapaj ishqui tapuicunata rurajpica Mariaca sinchitami “ari” nishpa contestan. Paipaj yaya mamapish cushillami huashamanta ricucuncuna. Mariaca bautizaringapaj tapuicunata contestashca qꞌuipallami bautizarirca.
2 Diosman mingarishpa María bautizarijpica paipaj yaya mamaca cushillami sintirincuna. Pero manaraj bautizarishca huashaca Mariapaj mamaca: “María bautizaringapajca yalli huambrarajmi yuyachin. ¿Bautizarinaca shuj jatun responsabilidad cashcataca allichu intindinga? ¿Ashata shuyanaca allichu canman?” nishpami preocuparicurca. Achca yaya mamacunami paicunapaj huahuacuna bautizarisha nijpica chashna preocuparin (Eclesiastés 5:5). ¿Imamantataj chashna preocuparin? Diosman mingarishpa bautizarinaca shuj jatun decisionmi can (“ ¿Jehová Diosman mingarishcanguichu?” nishca cuadrota ricui).
3, 4. a) ¿Bautizarina importante cashcata ricuchingapajca Pedroca imamantataj parlarca? b) ¿Pedroca imamantataj bautizarinataca arcata ruranahuan chꞌimbapurarca?
3 Pedroca bautizarinamanta parlashpaca huambuj huasita ruranahuanmi chꞌimbapurarca. Chaimi: ‘Chaipi ima tucushcaca bautizarinatami ricuchin. Cunanca bautizarinaca cancunatapishmi quishpichin’ nirca (1 Pedro 3:20, 21-ta leyipai *). Arca huasica Diospajllata rurashpa Noé causacushcatami ricuchirca. Noeca tucui shunguhuan crishcamantami Jehová mandashca shina tucuita rurarca. Chashna rurashcamantami paipish, paipaj familiapish jatun juillu tamyapica quishpirircacuna. ¿1 Pedro 3:20, 21-pi nishca shimicunahuanca Pedroca imatataj yachachisha nicurca?
4 Arcata ricushpaca gentecunaca Noé Diospi tucui shunguhuan crishcatami yacharcacuna. Chashnallatajmi maijan bautizarijta ricushpaca Jesusta catij cashcata shujtajcunaca yachancuna. Shinallataj Jesús huañushpa causarishcatapish crishpa Diosman mingarishcatami yachancuna. Bautizarishpaca Noé shinallatajmi Diosta cazushpa, pai mingashcata pajtachincuna. Jehová Diosca juillu tamyamantami Noeta quishpichirca. Shamuj punllacunapipish cai mundopi mana allicunata tucuchicushpaca alli sirvicuj bautizarishcacunataca Diosca quishpichingami (Marcos 13:10; Apocalipsis 7:9, 10). Chaimantami Jehová Diosman mingarishpa bautizarinaca importante can. Maijanpish paipaj munaimanta mana utca bautizarishpaca huiñai causaita chasquina oportunidadtami pirdi tucun.
5. ¿Cai yachaipica ima tapuicunamantataj yachashun?
5 Ima shinami ricunchij bautizarinaca importantemi can. Chaimantami cai quimsa tapuicunamanta yachana canchij: 1) ¿Bautizarinamantaca Bibliaca imatataj yachachin? 2) ¿Bautizaringapajca imatataj rurana canchij? 3) Huahuacunaman o piman Bibliamanta yachachicushpaca ¿imamantataj bautizarinaca importante cashcata mana cungarina canchij?
BAUTIZARINAMANTACA BIBLIACA IMATATAJ YACHACHIN
6, 7. a) ¿Gentecunaca imamantataj Juanta bautizachun mañajcuna carca? b) ¿Bautizaj Juanca ima bendiciontataj charirca? c) ¿Jesusca imamantataj bautizarirca?
6 Bibliapica punta cutin bautismocunamanta parlashpaca bautizaj Juan rurashca bautismocunamantami parlan (Mateo 3:1-6). ¿Gentecunaca imamantataj Juanta bautizachun nishpa mañajcuna carca? Paicunaca Moisesman cushca leycunata mana pajtachishcamantami arrepintirishcata ricuchingapaj Juanpajman rijcuna carca. Shinallataj Juanca Diospaj Churita bautizana sumaj bendiciontami charirca (Mateo 3:13-17). Pero ¿Jesusca imamantataj Juanta bautizachun mañarca? Paica mana ima juchata rurarcachu. Imamanta arrepintirinatapish mana minishtircachu (1 Pedro 2:22). Jesusca paipaj Yayapaj munaita rurangapaj listo cashcata ricuchingapajmi bautizarirca (Hebreos 10:7).
7 Jesús yachachicui punllacunapica paita catijcunapishmi huaquin gentecunata bautizarcacuna (Juan 3:22; 4:1, 2). Chai gentecunapish Moisesman cushca leycunata mana cazushcamanta arrepintirishcata ricuchingapajmi bautizarijcuna carca. Pero Jesús huañushpa causarishca qꞌuipaca Jesusta catisha nijcunaca ¿imamantataj bautizarijcuna carca?
8. a) ¿Causarishca qꞌuipaca Jesusca imatataj mandarca? b) ¿Jesusta catijcunaca imamantataj bautizarina can?
8 Huata 33-pica Jesusca ña causarishcami 500 yalli cꞌaricuna, huarmicuna ñaupajpi ricurirca. Tal vez huahuacunapishmi chaipi cashca canga. Chaipimi Jesusca: ‘Tucui cai pachata richij, ñuca yachacujcunata ruraichij. Paicunataca Yayapaj, Churipaj, jucha illaj espiritupaj shutipi bautizaichij. Cancunata ñuca tucui imalla mandashcacunata paicunapish rurachun yachachinguichij’ nishca canga (Mateo 28: 19, 20; 1 Corintios 15:6). Cai versocunapi nishca shinaca Jesusca paita catijcuna tucuchun yachachichunmi mandarca. Shinallataj pipish paita catisha nishpaca bautizarina cashcatami nirca (Mateo 11:29, 30). Diospaj ñaupajpi alli ricurisha nijcunaca Jehová Dios paipaj munaita pajtachichun Jesusta agllashcatami alli intindinaraj can. Chai qꞌuipami bautizari tucun. Cashna bautizarishpallami Diospaj ñaupajpica alli ricuri tucun. Jesusta punta catijcunaca bautizarina importante cashcataca allimi intindircacuna. Chaimantami bautizarinataca mana qꞌuipacunapaj saquircacuna (Hechos 2:41; 9:18; 16:14, 15, 32, 33).
BAUTIZARINATA AMA QꞌUIPAYACHICHU
9, 10. Etiopía llajtamanta runapish, apóstol Pablopish bautizarircacunami ¿paicuna bautizarishcamantaca imatataj yachanchij?
9 (Hechos 8:35, 36-ta leyipai). Etiopía llajtamanta shuj runamanta parlashun. Paica judiomi tucushca carca. Shuj punllaca Jerusalenpi Diosta adorashpami paipaj huasiman tigramucurca. Felipeman shuj ángel ricurishpaca: ‘Ri, chai runaman Jesusmanta alli huillaita huillagri’ nircami. Felipe huillajpica Etiopiamanta runaca Jesusca Mandaj, Quishpichij cashcatami alli intindirca. Chaita intindishca huashaca Diospaj munaita rurasha nishpami chai rato bautizarirca.
10 Cunanca Saulo shuti runamanta parlashun. Paica judiomi carca. Judiocunaca Diospajllata rurajcunami carca. Pero paicuna mana cazushcamantami Diospaj ñaupajpica ña mana alli ricurircacuna. Sauloca: ‘judiocunaca Diosta allimi sirvicunchij’ yuyashpami Jesusta catijcunataca llaquichingapaj catirashpa purij carca. Pero shuj punllaca Jesusca jahua pachamantami Saulohuan parlarca. Chai qꞌuipaca Jesusta catij Ananiaspaj ayudata chasquishpami Sauloca ‘jatarishpa bautizarirca’ (Hechos 9:17, 18; Gálatas 1:14). Qꞌuipa punllacunaca Saulotaca apóstol Pablo nishpami tucuicuna rijsirca. Paica Jehová Dios paipaj munaita pajtachichun Jesusta agllashcata alli intindishca qꞌuipallami bautizarirca (Hechos 22:12-16-ta leyipai).
Bibliamanta yachacujcunaca Bibliapi yachashcacunata valorashpami bautizarinata munancuna
11. a) ¿Bibliata estudiajcunaca imamantataj bautizarinata munancuna? b) ¿Pi bautizarijpica ima shinataj sintirinchij?
11 Cunan punllacunaca jovencunapish, mayorcunapishmi Bibliamanta yachacuncuna. Bibliapi yachashcacunata valorashpami paicunaca Jehová Diosman mingarishpa bautizarinata munancuna. Jatun tandanacuicunapica bautizarigrijcunapajca shuj sumaj conferenciami tiyan. Testigo de Jehovacunaca ñucanchijhuan Bibliata estudiacuj bautizarijpica cushillami sintirinchij. Yaya mamacunapish paicunapaj huahuacuna bautizarijpica cushillami sintirincuna. 2017 huatapica 284.000 yallicunami Diosman mingarishpa bautizarircacuna (Hechos 13:48, NM). Paicunaca Jesusta catijcuna bautizarina cashcata alli intindishpami bautizarircacuna. Pero ¿bautizaringapajca imatataj rurarcacuna?
12. ¿Bautizaringapajca imatataj rurana cangui?
12 Bautizaringapajca Jehová Diosmanta, pai imata munashcatapish, ñucanchijta quishpichingapaj pai imata rurashcatapishmi yachana cangui (1 Timoteo 2:3-6). Caicunata yachashpami Diospi ashtahuan crishpa ima mana allita ruranata saquingui. Shinallataj tucui pai mandashcacunatami cazunata munangui (Hechos 3:19). Shinapish yuyari, ima mana allita rurashpa catijpica Diosman mingarishpa mañajpipish paica mana chasquingachu (1 Corintios 6:9, 10). Bautizaringapajca Diospaj mandashcacunatami cazuna can. Chaita rurashpapish tandanacuicunaman rina, huillanaman llujshina, shujtajcunamanpish Bibliamanta yachachinami can. Jesusca paita catijcuna cai pacha tucui llajtacunapi huillana cashcatami nirca (Hechos 1:8). Cai tucuita ruracushca huashami Diostaca “canllatami tucui vida sirvisha nini” nishpa mañai tucungui. Chai qꞌuipaca tucuicunapaj ñaupajpi bautizaringapajmi ña listo cangui.
BIBLIAMANTA YACHACUJCUNA BAUTIZARICHUN AYUDASHUNCHIJ
¿Bibliamanta shujtajcunaman yachachicushpaca bautizarina importante cashcata intindichun ayudacunguichu? (Párrafo 13-ta ricui).
13. Bibliamanta yachachicushpaca ¿imamantataj Jesusta catijcuna cangapajca bautizarina cashcata mana cungarina canchij?
13 Huahuacunata o ñucanchijhuan Bibliata estudiacujcunataca párrafo 12-pi nishca yuyaicunata pajtachichunmi ayudana canchij. Chashna ayudacushpaca Jesusta catijcuna tucungapaj bautizarina importante cashcataca mana cungarinachu canchij. ¿Imamantataj chaita ninchij? Diosman mingarishpa bautizarina importante cashcata yuyaipi charishpaca chaimanta paicunaman parlanataca mana saquishunchu. Ñucanchij huahuacunapish, Bibliamanta estudiacujcunapish Dios mandashcacuna pajtachishpa bautizarichunmi munanchij.
14. ¿Imamantataj bautizarichun nishpa mana obligana canchij?
14 Yaya mamacunapish, Bibliamanta yachachijpish, o congregacionmanta shuj huauqui o panipish Bibliamanta yachacujtaca “bautizarinami cangui” nishpa mana obligai tucunchu. Jehovapish mana pita obliganchu (1 Juan 4:8). Obliganapaj randica Bibliamanta yachachicushpaca Diospaj amigo tucuna importante cashcatami yachachina can. Bibliamanta yachacujca Diosta cꞌuyashcamanta, Jesuspaj ejemplota catinata munashpami paillataj bautizarinata munana can (2 Corintios 5:14, 15).
15, 16. a) ¿Mashna huatacunata charishpataj bautizarina can? b) ¿Bibliamanta yachacujca shujtaj religioncunapi bautizarishca cashpapish imamantataj testigo de Jehová shina bautizarina can?
15 ¿Bautizaringapajca mashna huatacunatataj charina can? Bautizaringapajca mana shuj huata tiyanchu. ¿Imamantataj chaita ninchij? Maijancunaca Bibliapi yachashcacunata rato pajtachingapajmi esforzarincuna. Cutin shujtajcunaca ashtahuan tiempotami minishtin. Achcacunaca jovenraj bautizarishca cashpapish huañungacamami Diosta sirvishcacuna. Cutin shujtajcunaca ña yuyaj cashpami Diosmanta yachashcacuna. Por ejemplo maijancunacarin 100 yalli huatacunata charishpami Jehová Diosmanta yachashpa bautizarishcacuna.
16 Manaraj Jehová Diosmanta yachashpa shujtaj religioncunapi bautizarishca cashpapish Jesusta catijcuna tucungapajca bautizarinami can. Jehová Diosca paipaj munai maijan cashcata alli yachajcunallatami chasquin. Por ejemplo, 80 huatacunata charij shuj huarmimanta parlashun. Paica achca religioncunapimi bautizarishca carca. Chaimantami Bibliamanta yachachijtaca: “¿Cutin bautizarinachu cani?” nishpa tapurca. Bibliamanta yachachij panica huaquin versocunata leyishpami bautizarinamanta Biblia imata yachachishcata ricuchirca. Chaita alli intindishca huashallami chai huarmica bautizarircami (Hechos 19:3-5-ta leyipai).
17. ¿Bautizarina punllaca imapitaj yuyana can?
17 Bautizarina punllaca achcata cushicuna punllami can. Chashna cajpipish chai punllaca Diosman ari nishcata pajtachishpa causangapaj imata ruranatami alli yuyana can. Jesusta catijcunaca ‘ña mana paicunapajlla causanchu, ashtahuanpish paicunamanta huañujpaj, cutin causarijpajmi causancuna’ (2 Corintios 5:15; Mateo 16:24).
18. ¿Catij temapica imatataj yachashun?
18 Cai temapica Jesusta catij tucuna mana shuj pugllailla cashcatami ricushcanchij. Callaripi parlashca Mariapaj mamamanta parlashun. Paica bautizarina mana shuj pugllailla cashcata intindishpami paipaj ushushimanta preocuparirca. Canpish huahuacunata charishpaca “¿Ñuca huahuaca ñachu bautizaringapaj listo can? ¿Diosman mingarishpa bautizaringapajca ñachu Diosmanta alli yachan? ¿Universidadpi estudiana o alli trabajotaraj mashcanachu alli canman? ¿Bautizarishca qꞌuipa jatun juchapi urmajpica?” nishpachari tapurishcangui. Cai tapuicunamantaca catij temapimi yachashun. Shinallataj yaya mamacunapish bautizarinata ima shina ricuna cashcatami yachashun.
^ par. 3 1 Pedro 3:20, 21 (NM): “Paicunaca Noepaj tiempopica mana cazurcacunachu. Arca ruraricujpica Diosca pacienciahuanmi shuyarca. Chai arcapica pusaj runacunallami yacumanta quishpirircacuna. Chaipi ima tucushcaca bautizarinatami ricuchin. Cunanca bautizarinaca cancunatapish Jesús causarishcamantami quishpichin. Bautismoca mana aichapaj mapata anchuchingapajchu can. Ashtahuanpish Diospaj ñaupajpi alli concienciata charingapaj mañanami can”.
