TUCUICUNAMI alli gentecuna casha ninchij. Pero alli canaca sinchimi can. ¿Imamanta? Achca gentecunaca ‘allita pꞌiñajcunami’ can (2 Timoteo 3:3). Chaimantami paicunaca ‘mana allitaca alli nincuna. Allitaca mana alli nincuna’. Chashna nishpami paicuna yuyashca shina causancuna (Isaías 5:20). Shinallataj ñaupa millai cosascunata rurashcamanta, juchayujcuna cashcamantami allita ruranaca sinchi can. Chaimantami shuj pani shina sintiri tucunchij. Paica achca huatacunata Diosta sirvishpapish “ñuca alli persona cashcataca mana crinichu” nircami.

Tucuicunami alli gentecuna cai pudinchij. ¿Imamanta shina ninchij? Alli canaca Diospaj espiritupaj granomi can. Chaimantami millai gentecunapurapi causashpapish, ñaupa mana allita rurashpapish alli gentecuna cai pudinchij. Cunanca alli cana ima nisha nishcata, chaita ima shina ricuchinata yachashunchij.

Alli gentecunaca millai shunguta mana charincunachu. Ima pandatapish mana rurancunachu. Ashtahuanpish shujtajcunata imapi ayudanatami munancuna.

Chashna gentecuna paicunapaj familiamanta, amigocunamanta allicunata rurashcatachari ricushcangui. Pero Diospaj ñaupajpi alli ricurij runaca chaitapish yallimi ruran. Chashna jahuapish tucuicunami siempre pandarinchij. Bibliapica: “Cai pachapica cashcata ruraj cashpapish, manataj ima juchata rurashpa, allillata rurashpa causajca, shujllapish mana tiyanchu” ninmi (Eclesiastés 7:20). Apóstol Pablopish: “Ñuca aichapica, ima alli mana causashcatami yachani” nircami (Romanos 7:18). Ñucanchijca alli gentecunami casha ninchij ¿nachu? Chaipajca Jehová Diosmanta yachashunchij. Paica tucuipimi alli Dios can.

Jehová Diosmi ima alli cashcata yachachin. Salmota quillcaj runaca Diostaca: “Quiquinca allimari cangui, allicunata rurajmari cangui. Quiquin chaitataj pajtachichun nishcacunata yachachihuayari” nircami (Salmo 119:68). Cai versopica ishqui cosascunatami Jehová Diosmanta nin. Chaicunamanta yachashunchij.

Jehová Diosca allimari can. Jehová Diosca Moisestaca: “Ñuca alli cashcataca tucuitami canman ricuchigrini” nircami. Shina nishpami pai jatun cashcatapish, alli cashcatapish ricuchirca. Qꞌuipaca: “Mandaj Dios, Mandaj Dios. Tucuita rurai tucuj Dios, llaquij, cꞌuyaj shungu, mana utca pꞌiñarij, yallitaj llaquij, mana llullaj Diosmi cani. Huaranga huaranga huahua huahuacunacama llaquicujllami cani. Millaita rurashcata, cꞌariyashcata, juchallishcata perdonajmi cani. Yallitaj millaitaca imata mana rurashcata shinaca manataj saquishachu” nijtami Moisesca uyarca (Éxodo 33:19; 34:6, 7). Caita yachashpami Jehová Diosca tucuipi alli Dios cashcata ricunchij. Jesuspish cai Allpapi cashpaca pai tucuipi alli cashcatami ricuchirca. Chashna jahuapish: “Allica pi mana tiyanchu, ashtahuanpish Taita Diosllami allica tiyan” nircami (Lucas 18:19).

Jehová Diosca allita rurajmi can. Bibliapica: “Mandaj Diosca tucuicunahuan allimari. Pai llaquij canaca tucui rurashcacunapaj jahuapimari” ninmi (Salmo 145:9). Chaimantami paica tucui  laya gentecunaman causaita cushca. Causangapaj tucui ima minishtishcacunatapish cushca (Hechos 14:17). Shinallataj ñucanchij juchacunata perdonashpami alli cashcata ricuchishca. Salmota quillcaj runaca: “Jatun Dios quiquinca allimari cangui, perdonajmari cangui” nircami (Salmo 86:5). Caita yachashpami Diosca ‘tucuipi mana juchachipaj cajcunamanca paicunapaj cuna cashcata mana anchuchina’ cashcata crinchij (Salmo 84:11).

Yaya Diosca ñucanchijtaca pai layatami rurashca. Chaimantami pai shina allita rurajcuna, alli gentecuna cai pudinchij (Génesis 1:27). Chashna jahuapish Diosta sirvijcunataca Bibliapica: “Allita ruranata yachaichij” ninmi (Isaías 1:17). Alli gentecuna cangapajca ¿imatataj rurana canchij? Ricushun.

Espíritu santota cuchunmi Diosta mañana canchij. Diospaj espirituca allitaca cꞌuyachun, mana allitaca pꞌiñachunmi ayudan (Romanos 12:9). Chashnami Diospaj ñaupajpi alli ricurichun ayudan (Gálatas 5:22). Ashtahuancarin Bibliapica Diosca ‘tucui ima allita ruranapipish, rimanapipish chaitataj rurachinmi’ ninmi (2 Tesalonicenses 2:16, 17).

Diospaj Shimitami liyina canchij. Chaita rurajpica Diosca ‘tucuipi alli canatami’ yachachinga. Shinallataj “tucuita allita ruranapajca alli allichishca” cachunmi ayudanga (Proverbios 2:9; 2 Timoteo 3:17). Por ejemplo, Bibliata liyishpaca Diospaj munaimanta, pai imalla rurashcamantami yachanchij. Chaicunata cutin cutin yuyarishpaca ñucanchij shungupimi huaquichishun. Chaimi shamuj punllapica imapi allicunata rurana cajpica rurashun (Lucas 6:45; Efesios 5:9).

Allita ruraj gentecuna shina cashunchij (3 Juan 11). Bibliapica Jehová Diospish Jesuspish tucuimanta yalli allicuna cashcatami yachachin. Pero shujtajcunapish allicuna cashcatami yachachin. Por ejemplo, Bernabé, Tabitapish chashnami carcacuna (Hechos 9:36; 11:22-24). Canca ¿paicuna shujtajcunata ima shina ayudashcata yachanata munanguimanchu? ¿Ayudashcamanta ima bendicioncunata chasquishcata yachanata munanguimanchu? Chaipajca Bibliapimi paicunamanta estudiana cangui. Qꞌuipaca ñucanchijpish familiacunata, huauqui panicunata ima shina ayudanata yuyashunchij. Chaita rurashpami ñucanchijpish bendicioncunata chasquishun.

¿Congregacionpica picunataj shujtajcunamanta allita rurancuna? Paicunapi yuyashunchij. Por ejemplo, ancianocunaca allita ruranata munashpami sinchita trabajancuna. Shinallataj achca panicunami paicunapaj rimashcacunahuan,  ruraicunahuanpish “allita yachachijcuna” can (Tito 1:8; 2:3). Pani Roslynca: “Ñucaca shuj amigatami charini. Paica shujtajcuna ima shina causashcata ricushpami regalocunata cun. Mana cashpaca ima laya ayudanatami ricun. Chashnami ima laya tucushpapish turi ñañacunata animan. Ñucapajca paica shuj alli huarmimi can” ninmi.

Jehová Diosca paita sirvijcunataca: “Allita ruranallata yuyaichij” ninmi (Amós 5:14). Chaita rurashpaca mana paipaj mandashcacunata shungupi huaquichishunllachu. Ashtahuanpish pajtachinatami munashun.

Pero alli gentecuna cangapajca mana mancharina cosascunata ruranachu canchij. Caita alli intindingapajca caipi yuyashun. Shuj planta huiñachunca mana shuj cutinllachu achca yacuta regana canchij. Ashtahuanpish asha ashami cutin cutin regana canchij. Ñucanchijpish shujtajcunata cꞌuyashcata ricuchingapajca cutin cutinmi uchilla cosascunata rurashpa ayudai pudinchij.

Bibliapica ima allita rurangapajca alli allichirishca caichij ninmi (2 Timoteo 2:21; Tito 3:1). Chaimi shujtajcunahuan ima tucucushcata yachashpaca ‘paicunata sinchiyachinapaj’ ima shina ayudanata ricushun (Romanos 15:2). Chaipajca maipica ñucanchij charishca cosascunatachari compartina tucunga (Proverbios 3:27). Mana cashpaca ñucanchij huasipimi shuj micunitaman invitai tucunchij. Pi ungushca cashcata yachashpaca ¿imatataj rurana canchij? Paita visitanamanmi ri pudinchij. Mana pudishpaca telefonomanta o celularmantami cayai tucunchij. Shinashpaca ñucanchij shimicunahuan paicunata ima shina animachinata ricushunchij (Efesios 4:29).

Jehová Dios shinami tucuicunapaj allita rurasha ninchij. Chaipajca tucui laya gentecunamanmi Diospaj Gobiernomanta huillana canchij. Shinallataj Jesús mandashca shinami ñucanchijta pꞌiñajcunapajpish allicunata rurana canchij (Lucas 6:27). Chashna allicunata shujtajcunapaj rurashpaca ima malotaca mana ruracunchijchu. “Chaicunataca, Mandashcaca mana imata ni tucunchu” (Gálatas 5:22, 23). Ashtahuancarin shujtajcuna llaquichijpipish ima problemacuna tiyajpipish allita ruranata mana saquijpica huaquin gentecunaca Diosmanta yachanatami munangacuna. Ñucanchijpish Yaya Diostami jatunyachishun (1 Pedro 3:16, 17).

Bibliapica alli runaca bendicioncunatami chasquinga ninmi (Proverbios 14:14). ¿Ima shina? Shujtajcunapaj allita rurajpica paicunapish ñucanchijta alli tratanatachari munangacuna (Proverbios 14:22). Huaquincuna mana chaita rurajpipish allita rurashpami catina canchij. Quizás shuj punllaca paicunapaj yuyaita cambiashpa ñucanchijta alli tratangapishchari (Romanos 12:20).

Achcacunami mana allita ruranata saquishpa allita rurashcacuna. Chaita rurashcamantami alli causaita charishcacuna. Nancyca chaitami rurarca. Paica: “Huiñashpaca como quierami causarcani. Pitapish mana respetarcanichu. Ashtahuanpish pihuanpish siririjllami carcani. Shinapish Dios mandashcacunata yachashpaca ima alli cashcatami intindircani. Chaicunata pajtachishpaca cushillami sintirircani. Cunanca ñucallatajmi cꞌuyarini, respetarini” ninmi.

Shujtajcuna mana ricujpipish Jehová Diosca tucuitami ricucun. Allita rurashcatapish, allita yuyashcatapish yachanmi. Chaita yachashpami cushilla sintirin (Efesios 6:7, 8, NM). Ashtahuancarin ‘alli shungu runamanca, Mandaj Diosllatajmi allicunata cunga’ (Proverbios 12:2). Shinashpaca allita rurashpa causashunchij. Chaimi Yaya Diosca ‘tucui allita rurajcunamanca sumaj canata, alli nishca canata, sumaj causaitapish cunga’ (Romanos 2:10).